Sranan Tongo Bible 2016 (STB16)
11

Den fesiman fu Israel e salfu David leki den kownu

111Dan heri Israel go na David na Hebron èn den taigi en taki: “Yere, wi nanga yu na wan folku. 2Fosi, srefi di Saul ben de wi kownu ete, na yu ben e hari gwe nanga a legre fu Israel èn tyari den kon baka. Boiti dati, MASRA, yu Gado, ben taigi yu taki: ‘Na yu sa sorgu gi Mi pipel Israel, na yu sa de a tiriman fu Mi pipel Israel.’ ” 3Na dat' meki ala den fesiman fu Israel ben kon na kownu na Hebron. Dan drape na Hebron, kownu David meki wan ferbontu nanga den na MASRA fesi. Baka dati den salfu David leki kownu fu Israel, leki fa MASRA ben meki Samuel taki.

4Dan David hari go nanga a heri legre fu Israel na Yerusalem, pe den Yebusitisma ben e libi. A foto dati ben nen Yebus fosi. 5Den Yebusitisma ben taigi David taki: “Dyaso na inisei, yu no e kon!” Ma David teki Sion abra di ben de wan tranga kibripresi, dan a kari en: a foto fu David. 6David ben taigi den man fu en taki: “A fosi sma di kiri wan Yebusitisma e tron edeman fu a legre.” Dan Yoab, a manpikin fu Seruya, tron a edeman fu di na en ben doro leki fosi wan na loktu ini a foto. 7Dan David go libi ini a tranga foto. Dat' meki den e kari drape: a foto fu David. 8Dan David meki a foto moro tranga fu ala sei, bigin na a Milow èn Yoab meki a tra pisi fu a foto moro tranga. 9A makti fu David ben e kon bigi moro nanga moro, fu di MASRA, a Gado fu ala sani, ben de nanga en.

Den dyadya fetiman fu David

10Disi na den edeman fu den dyadya fetiman fu David. Makandra nanga heri Israel den ben yepi en fu a teki en presi leki kownu, leki fa MASRA ben taigi Israel.

11Disi na den nen fu den dyadya fetiman fu David:

Yasobam, a manpikin fu Hakmoni, ben de a edeman fu dritenti man. Wan leisi a kiri dri hondro srudati nanga en lansri na ini wan feti. 12A di fu tu ben de Elasar, a manpikin fu Dodo fu Akoak. A ben de wan fu den dri dyadya fetiman. 13A ben de nanga David na Pas-Damin pe den Filistijnsrudati ben seti densrefi fu feti. Wan pisi pranigron ben drape pe groto ben e gro. Den srudati fu Israel ben lon gi den Filistijnsrudati. 14Ma en nanga David go tnapu mindrisei fu a gron, den fon den Filistijnsrudati èn den Filistijnsrudati no ben man teki a gron abra. Na so MASRA ben gi Israel wan bigi wini.

15Wan leisi dri fu den dritenti edeman kon na David di ben de na a bergi-olo na Adulam. Den Filistijnsrudati ben meki den kampu ini a Refaimdal. 16David ben de ini a tranga kibripresi èn den Filistijnsrudati ben abi wan kampu ini Betlehem. 17Dan David soktu wan leisi èn a taki: “Mi winsi taki wan sma ben kan go teki pikinso watra fu a peti na a bigi doro fu Betlehem tyari kon gi mi.” 18Ne den dri man disi boro psa ini a legrekampu fu den Filistijnsrudati go na a peti na a bigi doro fu Betlehem. Den peti watra dan den tyari en go gi David. Ma David no ben wani dringi a watra. A kanti en na gron leki wan ofrandi gi MASRA, dan a taki: 19“Gado mus kibri mi fu mi no du a sani dati! A o de leki na a brudu fu den man mi o dringi di go teki a watra tyari kon gi mi, bika den ben kan lasi den libi di den go teki en gi mi.” Na dat' meki David no ben wani dringi a watra. Na den sortu sani dati den dri dyadya fetiman disi ben e du. 20Abisai, a brada fu Yoab, ben de a edeman fu den dritenti dyadya fetiman. Wan leisi a kiri dri hondro srudati, dan a wai nanga en lansri leki winiman. Den dri moro dyadya fetiman ben e warderi en. 21A ben de a edeman fu den dritenti dyadya fetiman, a ben abi a moro bigi nen fu a grupu dati, ma a no ben doro den dri moro dyadya fetiman. 22Benaya, a manpikin fu Yoyada, fu a foto Kabseel, ben de wan bun fetiman tu di du bigi sani. Na en ben wini tu fu den moro bun fetiman fu Moab. Wan leisi di sneeuw ben e fadon, a ben meki den saka en go na ini wan olo pe wan lew ben de dan a kiri a lew. 23A ben kiri wan man fu Egipte tu, wan man di ben langa sowan tu nanga afu meter. A man ben abi wan lansri di ben gersi wan pikin postu. Ma Benaya go nanga wan tiki na en tapu. A puru a lansri na en anu, dan a kiri en nanga en eigi lansri. 24Na den dyadya sani dati Benaya, a manpikin fu Yoyada, ben e du. Den dri moro dyadya fetiman ben e warderi en. 25Fu den dritenti dyadya fetiman, en ben de wan fu den moro prenspari wan, ma a no ben doro den dri moro dyadya wan. David ben poti en leki edeman fu den waktiman fu en.

26Den tra dyadya fetiman ben de: Asael, a brada fu Yoab. Elkanan, a manpikin fu Dodo, fu Betlehem. 27Samot fu Haror. Heles fu Pelon. 28Ira, a manpikin fu Ikes fu Tekoa. Abiyeser fu Anatot. 29Sibekai fu Husa. Ilai fu Akoak. 30Maharai fu Netofa. Heled, a manpikin fu Baana, fu Netofa. 31Itai, a manpikin fu Ribai, fu Gibea ini a kontren fu den bakapikin fu Benyamin. Benaya fu Piraton. 32Hurai fu den dal fu Gaas. Abiyel fu Araba. 33Asmawet fu Bakarum. Elyakba fu Saalbon. 34Hasem fu Gison. Yonatan, a manpikin fu Sage fu Harar. 35Akiam, a manpikin fu Sakar fu Harar. Elifal, a manpikin fu Ur. 36Hefer fu Mekera. Akia fu Pelon. 37Hesro fu Karmel. Naarai, a manpikin fu Esbai. 38Yowel, a brada fu Natan. Mibkar, a manpikin fu Hagri. 39Selek fu Amon. Nakrai fu Beerot, di ben e tyari den fetisani fu Yoab, a manpikin fu Seruya. 40Ira nanga Gareb fu Yeter. 41A Hetitiman Uria. Sabad, a manpikin fu Aklai. 42Adina, a manpikin fu Sisa fu a lo fu Ruben. A ben de wan fu den edeman fu a lo, èn a ben tyari dritenti man kon nanga en. 43Hanan, a manpikin fu Maaka. Yosafat fu Meten. 44Usia fu Astarot. Sama nanga Yehiyel, den manpikin fu Hotam fu Arower. 45Yediael, a manpikin fu Simri, makandra nanga en brada Yoka fu Tis. 46Eliyel fu Makanaim. Yeribai nanga Yosawya, den manpikin fu Elnaam. Yitma fu Moab. 47Eliyel, Obed nanga Yaasiyel fu Soba.