Sranan Tongo Bible 2016 (STB16)
13

David seni teki a santa kisi fu Gado

131Baka di David kenki prakseri nanga ala den tiriman fu a legre fu en, den edeman fu wan dusun nanga fu wan hondro srudati, 2a taigi ala den Israelitisma taki: “Efu un feni en bun, èn efu a de a wani fu MASRA, a Gado fu wi, meki wi seni boskopuman go lontu na ala sei fu Israel. Den mus go kari den kondreman fu wi di no de dyaso, fu den kon makandra dyaso. Den mus go kari den priester nanga den Lefitisma tu di e libi ini den eigi kontren. 3Dan meki wi go teki a santa kisi fu Gado tyari kon dyaso. Bika sensi a ten fu Saul no wan fu wi luku en na wan ai.” 4Ala den sma drape ben agri nanga a tori dati, bika a pipel ben si en leki wan bun sani.

5Dan David seni kari ala den Israelitisma fu a liba di e prati a kondre fu den nanga Egipte, te go miti a pasi di e go na Hamat, fu go teki a santa kisi fu Gado na Kiryat-Yearim. 6Dan David hari go nanga heri Israel na Baala, na Kiryat-Yearim ini Yuda fu go teki a santa kisi fu Gado, a MASRA, di sidon tapu den kerub, a santa kisi, di e tyari a spesrutu nen. 7Den go teki a santa kisi ini a oso fu Abinadab dan den poti en tapu wan nyun wagi. Usa nanga Akio ben e tyari a wagi. 8David nanga ala den Israelitisma ben e dansi nanga den heri ati gi Gado. Den ben e singi èn den ben e meki poku nanga citer, harp, tamboerijn, cimbaal nanga trompet. 9Ma di den doro na a presi pe Kidon e masi a buba puru na a graan, den kaw grati dan Usa langa en anu fu hori a santa kisi. 10Ne MASRA lusu a atibron fu En tapu Usa. A strafu en, fu di a ben langa en anu go na a santa kisi. Usa dede leti drape na Gado fesi. 11Dan David mandi taki MASRA ben strafu Usa so hebi. Dat' meki den e kari a presi Peres-Usa te leki tide. 12Ma a srefi ten dati David kisi wan dipi lespeki gi Gado tu, èn a aksi ensrefi taki: “Fa mi o man tyari a frantwortu fu a santa kisi fu Gado?” 13Fu dat'ede David no teki a santa kisi na en ini a foto fu David. A meki den tyari en go poti na a oso fu Obed-Edom, wan man fu Gat. 14A santa kisi fu Gado tan dri mun ini a oso fu Obed-Edom, èn MASRA ben e blesi Obed-Edom, ala sma di ben e libi na ini en oso nanga ala sani di a ben abi.