Sranan Tongo Bible 2016 (STB16)
13

A trutru lobi

131Awinsi mi e taki den tongo fu libisma nanga di fu den engel, ma mi no abi lobi, mi sten de leki wan broko tutu, noso wan kopro preti. 2Awinsi mi e taki san Gado gi mi fu taki, awinsi mi sabi ala kibritori nanga ala sani di de fu sabi, awinsi mi abi nofo bribi fu puru wan bergi na en presi, ma mi no abi lobi, mi no de noti.

13:2
Mat 17:20
21:21
Mrk 11:23
3Awinsi mi gi tra sma ala sani san mi abi fu den nyan, awinsi mi gi sma mi skin fu bron, ma mi no abi lobi, a no o yepi mi noti.

4Lobi abi langa pasensi, lobi abi bunfasi. Lobi no e dyarusu, a no e prodo, èn a no e meki bigi. 5Lobi no e du sani di no fiti nanga trawan. A no e suku en eigi bun nomo, a no e kisi atibron es'esi, èn a no e tan memre a ogri san wan trawan du. 6Lobi no e prisiri te sani no e psa nanga leti, ma a e breiti nanga sani san tru. 7Lobi e tapu ala sani, a e tan bribi, a e tan howpu, èn a e tan hori pasensi.

8Lobi noiti o kba. Ma fu taki san Gado gi yu fu taki, dati o kon na wan kba. Taki ini difrenti tongo no o de moro. Sabi o kon na wan kba. 9Bika wi sabi sani af'afu, èn te wi e taki san Gado gi wi fu taki, wi e taki en af'afu. 10Ma te ala sani kon de leki fa a mus de, dan ala den sani san ben de af'afu, no o de moro. 11Di mi ben pikin, mi ben taki leki wan pikin, mi ben denki leki wan pikin, èn mi ben taki fu sani leki wan pikin. Ma now di mi kon bigi, mi poti a fasi fu wan pikin na wan sei. 12Bika now wi e luku na ini wan spikri, èn sani no de so krin. Ma te a dei doro, wi o si ala sani fesi nanga fesi. Now mi sabi sani af'afu nomo, ma te a dei doro, mi o sabi ala sani dorodoro, soleki fa Gado sabi mi. 13Dri sani de san e tan: bribi, howpu nanga lobi. Ma a moro prenspari wan fu den dri disi na lobi.

14

Taki ini tra tongo èn taki san Gado gi yu fu taki

141Un mus du ala muiti fu kan abi lobi gi makandra. Un mus du muiti tu fu kisi den presenti fu a Yeye, èn spesrutu a presenti fu kan taki san Gado gi yu fu taki. 2Bika efu wan sma e taki ini wan tra tongo, dan a no e taki nanga sma ma nanga Gado, fu di no wan sma e ferstan en. A Yeye e meki a taki kibri sani. 3Ma efu wan sma e taki san Gado gi en fu taki, dan a e taki nanga sma. A e yepi den fu gro ini a bribi, a e kraka den, èn a e trowstu den. 4A sma di e taki ini wan tra tongo, e yepi ensrefi wawan fu gro ini a bribi. Ma a sma di e taki san Gado gi en fu taki, e yepi a gemeente fu gro. 5Mi ben sa wani taki un alamala e taki ini tra tongo. Ma moro ete mi ben sa wani taki un ben e taki san Gado gi un fu taki. A sma di e taki san Gado gi en fu taki prenspari moro a sma di e taki ini tra tongo, boiti efu a sma disi e brokobroko san a taki, fu yepi a gemeente gro ini bribi.

6Brada nanga sisa, efu mi kon now na unu, dan mi taki ini tra tongo, fa mi yepi un dan? Mi kan yepi unu soso te mi taki san Gado sori mi, te mi taki nanga sabi, te mi taki san Gado gi mi fu taki, noso te mi gi un wan leri. 7So a de tu nanga sani leki wan froiti noso wan gitara. Den no e libi, ma yu man arki den te sma e prei den. Ma efu sma no e prei den na difrenti fasi, fa wan sma o man sabi dan sortu singi den e froiti noso prei? 8Efu a sma di e bro a tutu no e bro en bun, dan fa sma o sabi taki den mus meki densrefi klari fu go feti? 9Na so a de nanga unu tu. Efu un no e taki wan tongo san sma e ferstan, fa den o sabi san un e taki? Dan na fu soso yu e taki. 10Someni sortu tongo de na grontapu, èn alamala de fu ferstan. 11Ma efu mi no e ferstan san a sma e taki, dan mi nanga a sma na doroseisma gi makandra. 12Na so a mus de tu nanga unu. Fu di un e du muiti fu kisi den presenti fu a Yeye, a moro prenspari sani na taki un e wroko nanga den presenti di e yepi a gemeente gro.

13Dat' meki te wan sma e taki ini wan tra tongo, a mus begi Gado fu yepi en fu man brokobroko gi tra sma san a taki. 14Bika efu mi e begi na ini tra tongo, mi e begi nanga mi yeye, mi ferstan no e teki prati na ini. 15Fa sani mus de dan? Mi o begi nanga mi yeye, ma mi o begi nanga mi ferstan tu. Mi o singi nanga mi yeye, ma mi o singi nanga mi ferstan tu. 16Efu un e prijse Gado nanga un yeye, a nyun sma na un mindri no sa man taki “Amen” te un taki Gado tangi. Bika a no ferstan srefsrefi san un taki. 17Un e taki Gado tangi tapu wan bun fasi, ma un no e yepi a tra sma fu gro ini a bribi. 18Mi e taki Gado tangi tak' mi e taki ini tra tongo moro un alamala. 19Ma ini a gemeente mi feni en moro bun te mi e taki feifi wortu san sma e ferstan fu gi trawan leri, dan fu taki dusundusun wortu ini wan tra tongo.

20Brada nanga sisa, un no mus denki leki pikin moro, ma un mus denki leki bigisma. Efu na fu du ogri, un mus de leki wan nyunyun pikin. 21Na ini a wèt a skrifi taki: “Nanga sma di e taki wan tra tongo èn nanga a mofo fu doroseisma, Mi o taki nanga a pipel disi. Ma toku den no o arki Mi. So Masra e taki.”

14:21
Yes 28:11-12
22Fu dat'ede a taki ini tra tongo no de wan marki gi sma di e bribi, ma gi sma di no e bribi. Ma fu taki san Gado gi yu fu taki, no de gi sma di no e bribi. A de gi den bribisma. 23Kon un taki a heri gemeente kon makandra èn ala sma e taki ini tra tongo. San o psa dan te nyun sma noso sma di no e bribi kon inisei? Den o taki tak' na law un e law. 24Ma efu un alamala e taki san Gado gi un fu taki, dan wan sma di no e bribi noso wan nyun sma kon inisei, dan un alamala o meki a kon ferstan taki a abi sondu. Un o sori en fa a de. 25Den sani san kibri ini en ati, o kon na doro. Dan a o kindi, anbegi Gado èn a o taki tak' Gado de trutru na un mindri.

Fa sani mus waka na a konmakandra fu bribisma

26Brada nanga sisa, arki fa sani mus waka. Te un kon makandra, dan ala sma abi wan sani. A kan de wan psalm-singi, wan leri, noso wan sani di Gado sori wan sma. Kande wan sma abi wan sani ini tra tongo, noso kande wan sma wani brokobroko wan sani di taki ini tra tongo. Ma ala den sani disi musu psa fu meki den bribisma gro ini bribi. 27Te sma e taki ini tra tongo, a mus de tu noso dri sma nomo. Den mus taki wan fru wan èn wan sma mus brokobroko san den taki. 28Ma efu no wan sma de drape di man brokobroko san den taki, dan den mus hori den mofo na ini a konmakandra. Meki den taki ini densrefi èn nanga Gado. 29Meki tu noso dri profeiti taki san Gado gi den fu taki. Dan den trawan mus arki bun fu si efu san den sma e taki tru. 30Ma efu Gado sori wan tra sma di sidon drape wan sani, dan a sma di ben e taki mus tan tiri. 31Bika na wan fru wan un mus taki san Gado gi un fu un taki, fu ala sma kan leri wan sani èn kisi dek'ati. 32Den profeiti na basi abra san Gado e gi den fu taki. 33Bika Gado no e wroko bruya fasi. A de wan Gado fu freide. Soleki fa a de na ala den tra gemeente fu den sma fu Gado.

34Den umasma mus hori den mofo ini a gemeente. Den no abi primisi fu taki. Den mus saka densrefi soleki fa a wèt e taki. 35Efu den wani sabi wan sani, den mus aksi den masra a sani dati na oso. Bika a no moi taki wan uma e taki na ini gemeente.

36Un denki taki a wortu fu Gado ben bigin na unu drape, noso taki na unu wawan ben yere en? 37A sma di feni taki en na wan profeiti noso wan sma di a Santa Yeye e tiri, mus man agri taki den sani di mi skrifi dya na sani di Masra wani taki wi musu fu du. 38Ma a sma di poti san mi taki na wan sei, sma o poti na wan sei tu. 39Fu dat'ede, mi brada nanga sisa, un mus du ala muiti fu kan taki san Gado gi un fu taki, ma un no mus tapu pasi gi den sma di e taki ini tra tongo. 40Meki ala sani psa wan lespeki fasi, leki fa a fiti.

15

Yesus opo baka na dede

151Brada nanga sisa, mi e memre unu na a bun nyunsu di mi ben ferteri unu. Un bribi en èn un e libi now leki fa a taki. 2A bun nyunsu disi e ferlusu unu, efu un tan hori en soleki fa mi ben ferteri unu. Noso un bribi en fu soso. 3Bika mi ferteri unu a moro prenspari sani san mi srefi ben leri, èn dati na taki Kristus dede fu wi sondu ede soleki fa a Santa Buku ben taki.

15:3
Yes 53:5-12
4Den beri En, ma tapu a di fu dri dei A opo baka na dede, soleki fa a Santa Buku ben taki.
15:4
Psa 16:8-10
Mat 12:40
Bosk 2:24-32
5Dan A sori Ensrefi na Kefas,15:5 Kefas na wan tra nen fu Petrus. baka dati A sori Ensrefi na den twarfu man di ben teki leri fu En.
15:5 a
Luk 24:34
6Baka dati A sori Ensrefi na moro leki feifi hondro brada nanga sisa di den ben de makandra. Sonwan fu den dede kba, ma moro furu fu den e libi ete. 7Dan A sori Ensrefi na Yakobus, baka dati na ala den boskopuman fu En. 8Na a kba, A sori Ensrefi na mi tu. Mi di de leki wan pikin di no gebore tapu en ten.
15:8
Bosk 9:3-6
9Bika ala den boskopuman fu Yesus prenspari moro mi. Mi no warti srefi fu tyari a nen: boskopuman fu Yesus. Bika mi ben de na a gemeente fu Gado baka fu du den ogri.
15:9
Bosk 8:3
10Ma Gado sori mi En bun-ati, dat' meki mi de tide san mi de. A no fu soso A sori mi En bun-ati, bika mi wroko moro tranga leki ala den trawan. Ma a no mi du a wroko. Na a bun-ati fu Gado ben de nanga mi. 11Dat' meki a no abi trobi efu na mi noso den trawan e taki. Disi na san wi e preiki, èn na disi un bribi tu.

Den dedesma o kon na libi baka

12Efu wi e ferteri un taki Kristus kon na libi baka, dan fa a kan dati sonwan fu unu e taki tak' dedesma no e opo baka? 13Bika efu a tru taki dedesma no e opo baka, dan Kristus no opo baka tu. 14Èn efu Kristus no opo baka, dan den sani san wi e ferteri unu no abi warti, èn a bribi fu unu no abi warti tu. 15Dan a sori taki wi leki ketoigi fu Gado lei gi En, bika wi ferteri taki A meki Kristus kon baka na libi. Ma efu dedesma no e opo baka, dan Gado no meki Kristus opo baka. 16Bika efu dedesma no e opo baka, dan Kristus srefi no opo baka tu. 17Èn efu Kristus no opo baka, dan a bribi fu unu na wan soso sani, dan un no kon fri fu un sondu. 18Èn dan den sma di dede nanga a bribi ini Kristus go lasi. 19Efu a howpu san wi abi ini Kristus, de soso fu wi libi dya na grontapu, dan wi de fu sari moro leki ala tra libisma.

20Ma a tru taki Kristus opo baka na dede. Na so A tron a fosiwan fu ala sma di dede kba. 21Bika fu di na wan libisma meki wi alamala abi fu dede, so a de now taki wan tra libisma e meki sma di dede o opo baka. 22Bika neleki fa Adam meki taki ala libisma e dede, na so a de tu dati Kristus e meki ala sma opo baka na dede. 23Ma ibri sma o opo te en yuru kisi. Kristus leki fosiwan, èn te A e drai kon baka, dan den sma fu En o opo baka. 24Dan a kba fu ala sani o doro te Kristus gi a tiri abra na ini anu fu Gado a P'pa, èn te A tyari wan kba kon na ala rigeri, nanga ala makti nanga krakti. 25Bika Kristus o de kownu te leki A poti ala En feyanti na ondro En futu.

15:25
Psa 110:1
26A laste feyanti san Kristus o poti na wan sei, na dede. 27Bika: “A poti ala sani na ondro En futu.” Ma te a skrifi taki A poti ala sani na ondro En futu, dan dati no e teri gi Gado. Bika na Gado poti ala sani na ondro Kristus.
15:27
Psa 8:7
28Te ala sani de na ondro a Manpikin kba, dan a Manpikin o saka Ensrefi tu ondro Gado, di ben poti ala sani na En ondro. Dan Gado o de ala sani gi ala libisma.

29Ma san den sma o du dan di teki dopu gi den wan di dede kba? Efu a tru taki dedesma no o opo baka, fu sanede den e teki dopu gi den? 30Fu sanede wi srefi e misi fu dede ala yuru? 31Brada nanga sisa, ala dei mi kan lasi mi libi. A sani disi tru, neleki fa mi e prodo nanga unu, fu di unu de wan nanga Kristus Yesus wi Masra. 32Libisma fasi mi kan taki tak' mi feti ini Efese nanga krasi meti. Ma sortu bun a tyari gi mi? Efu dedesma no o opo baka, dan meki un nyan èn dringi, bika tamara un o dede.

15:32
Yes 22:13
33Un no kori unsrefi! Bika takru mati e pori bun maniri. 34Un kisi unsrefi, dan un tapu nanga sondu. Na wan syen gi unu, ma mi mus taki en tak' sonwan fu unu no sabi Gado.

A skin fu sma di opo baka na dede

35Ma kande wan sma sa aksi: “Fa dedesma e kon na libi baka? Sortu skin den sa abi dan?” 36Yu don kaw! Te yu sai wan siri, a no man libi efu a no dede. 37Te yu e sai, yu no e sai a sani san mus gro kmopo fu a siri. Ma na a siri nomo fu a karu noso wan tra sani yu e sai. 38Ma Gado e gi en wan skin di En wani. A e gi ibri siri en eigi skin. 39Ala sani di e libi no abi a srefi skin. Di fu libisma de tra fasi leki di fu den meti. A skin fu den fowru di e frei, de tra fasi baka leki di fu den fisi. 40Yu abi sani na heimel nanga den eigi skin èn yu abi sani na grontapu nanga den eigi skin. Den di de na heimel moi na tapu den eigi fasi, èn den wan di de na grontapu moi na tapu wan tra fasi. 41A son e brenki wan tra fasi leki a mun nanga den stari. Srefi a wan stari e brenki wan tra fasi leki a trawan. 42Na so a o de tu nanga a opo baka fu den dedesma. A skin di den beri, na wan skin san e pori, ma te a opo baka, a o de wan skin san no man pori moro. 43A skin san beri no warti noti, ma a o opo baka nanga glori. A skin san beri ben swaki, ma te a opo baka, a o abi krakti. 44A skin san beri, na a grontapu skin, ma a o opo baka leki wan yeye skin. Bika efu wan grontapu skin de, dan wan yeye skin mus de tu. 45Na so a skrifi taki Adam, a fosi sma, ben tron wan libilibi sili. A laste Adam tron wan yeye di e gi libi.

15:45
Gen 2:7
46A yeyeskin a no a fosiwan di e kon. A grontapu skin e kon fosi, baka dati a yeyeskin e kon. 47A fosi sma na fu grontapu, a meki fu doti. A di fu tu Sma kmoto fu heimel. 48Ala libisma abi a srefi skin san a fosi libisma ben abi. Na so ala sma di de wan nanga a Wan di kmopo kon fu heimel, sa abi a srefi skin leki a di fu En tu. 49Leki fa un ben abi a fasi fu a sma di ben meki fu doti, na so un o abi a fasi tu fu a Man di kmoto fu heimel.

50Mi brada nanga sisa, disi na san mi wani taki: Wan libisma nanga en skin fu meti nanga brudu, no o man kon ondro a tiri fu Gado. Wan skin san e pori gwe no man abi prati ini sani san no e pori gwe noiti. 51Un arki! Mi o ferteri un wan kibritori. Wi alamala no o dede, ma wi alamala o kenki.

15:51-52
1Tes 4:15-17
52A o psa ini wan momenti, ini a pingi fu wan ai, te a laste tutu bari. Bika a tutu o bari, èn den dedewan o opo baka nanga wan skin san no man pori moro, èn wi o kenki. 53A de fanowdu fu a skin disi di e pori, mus kenki kon tron wan skin san no man pori moro. A skin disi san o dede, mus kenki kon tron wan skin san no man dede noiti moro. 54Te a psa taki a skin disi di e pori, kenki kon tron wan skin san no man pori, èn a skin di o dede, kenki kon tron wan skin di no man dede moro, dan a sani di skrifi o kon tru taki: “Wini doro! Dede lasi!
15:54
Yes 25:8
55Dede, pe a wini fu yu de? Dede, pe a maka fu yu de?”
15:55
Hos 13:14
56A makti fu dede na a sondu, èn a sondu e feni en krakti na ini a wèt. 57Ma meki wi taki Gado tangi! Bika san wi Masra Yesus Kristus du, meki taki Gado meki wi tron winiman.

58Mi lobi brada nanga sisa, dat' meki un mus hori doro, sondro fu degedege! Ala ten un mus tan du a wroko fu Masra nanga un heri ati, fu di un sabi taki san un e du gi Masra, no de fu soso.