Sranan Tongo Bible 2016 (STB16)
4

41Sma mus si unu leki wrokoman fu Kristus di kisi a frantwortu fu luku den kibri sani fu Gado. 2Ma a sma di kisi a frantwortu fu luku a gudu fu trawan, mus sori taki den de fu fertrow. 3Mi no abi bisi fa unu noso tra sma e si mi. Mi no e krutu misrefi tu. 4Bika fu mi sei mi konsensi no e fon mi. Ma dati no wani taki ete tak' mi bun ini Gado ai. Bika Masra na a Wan di e krutu mi. 5Dat' meki un no mus bigin taki tak' wan sma fowtu fosi a ten. Wakti te Masra o doro. Na En o tyari den sani di de na dungru kon na krin, èn A o meki ala sma sabi fu sanede son sma ben du son sani. Dan Gado sa gi ala sma a grani san a mus kisi.

6Brada nanga sisa, fu un kan ferstan a sani disi meki mi teki mi nanga Apolos leki eksempre. Mi du disi fu un kan leri fu wi taki un mus hori unsrefi na san skrifi. Dan no wan fu unu no o man meki bigi èn si a wan wrokoman hei moro a trawan. 7Suma taigi unu taki un hei moro trawan? Ala sani san un abi, na kisi un kisi en. Èn efu na kisi un kisi en, fu sanede un e meki bigi dan leki efu a no de so?

A eksempre fu Paulus

8Un dati, un no abi noti fanowdu moro! Unu na guduman! Un tron kownu kba, sondro wi! Ma mi ben winsi taki un ben de kownu trutru kba, dan wi ben o de kownu makandra nanga unu. 9Gi mi a gersi taki Gado gi wi leki boskopuman fu Yesus a presi te na bakasei, neleki sma di mus dede. Heri grontapu, engel nanga libisma e luku san o psa nanga wi. 10Wi kon don fu Kristus ede, ma unu koni ini Kristus. Wi swaki, ma unu tranga. Den e gi unu grani, ma wi den e si leki noti. 11Te nanga now angri nanga watra e kiri wi. Wi no abi nofo krosi fu weri. Sma e naki wi nanga kofu, èn wi no abi fasti tanpresi. 12Wi e wroko tranga nanga wi anu. Te sma e kosi wi, wi e blesi den. Te sma de na wi baka fu du wi ogri, wi e teki dati nanga pasensi.

4:12
Bosk 18:3
13Te sma taki takru fu wi, wi e tan abi switi maniri. Te nanga now sma e si wi leki den moro lagi sani di de. Den e teki wi leki den figifutu.

14Mi no e skrifi den sani disi fu meki un firi syen. Ma leki mi pikin di mi lobi, mi wani leri unu wantu sani. 15Bika awinsi un ben abi dusundusun sma di kweki unu ini Kristus, na wan p'pa nomo un abi. Na mi na un p'pa na ini Kristus Yesus, fu di na mi tyari a bun nyunsu gi unu. 16Dat' meki mi e begi unu, un du san un si taki mi e du.

4:16
1Kor 11:1
Fil 3:17
17Fu a sani disi ede meki mi seni Timoteus kon na unu. Mi lobi en leki mi pikin na ini Masra, èn a de fu fertrow. A sa tyari kon ini unu prakseri baka fa mi ben e libi fu di mi de wan nanga Kristus Yesus. A o du en leki fa mi e leri na ala presi ini ala gemeente. 18Ma sonwan fu unu e meki bigi, fu di den prakseri taki mi no ben o kon na unu. 19Ma efu Masra wani, mi o kon her'esi na unu. Dan mi o si san den sma di e meki bigi kan du, noso efu na taki den man taki nomo. 20Bika te yu de ondro a tiri fu Masra, a no tak'taki e teri, ma na krakti. 21Fa un wani taki mi mus waka miti unu? Nanga wan tiki, noso nanga lobi èn ini wan safri fasi?

5

Un mus strafu a sma di du ogri

51Sma e taki fu a fasi fa son sma na un mindri e gi densrefi abra na takru lostu. Den go so fara taki den e du sani san srefi den sma di no sabi Gado no e du. Wan man na un mindri e libi nanga a uma fu en p'pa.

5:1
Deu 22:30
2Dan un e meki bigi gi unsrefi ete, ma na sari un mus sari, dan un yagi a man puru na un mindri di e du a sani dati. 3Bika mi no de libilibi na un mindri, ma ini prakseri mi de nanga unu. Dan neleki mi de na un mindri, mi krutu a man disi kba di du sowan sani. 4Te mi nanga unu de ini wan yeye makandra ini a nen fu Masra Yesus, dan nanga a krakti fu wi Masra Yesus Kristus 5wi o gi a man disi abra na Satan. Dan en skin o kisi strafu, ma en yeye no o go lasi tapu a dei fu Masra.

6A bigi san un e meki no abi no wan warti. Un no sabi dan taki pikinso dyesi sari kba fu meki a heri blon sweri?

5:6
Gal 5:9
7Un puru a owru dyesi trowe fu un kan de leki nyunyun blon. Unu na brede di meki sondro dyesi. Bika den srakti wi paskalam. Dati na Kristus.
5:7
Eks 12:5-6
8Dat' meki un mus meki prisiri, ma no nanga owru dyesi. Un no mus du en tu nanga dyesi fu ogri-ati nanga takru fasi. Ma un mus meki prisiri nanga a brede di meki sondro dyesi, dati wani taki wan krin libi sondro leifasi.
5:8
Eks 13:7
Deu 16:3
9Mi ben skrifi un kba taki un no mus bemui nanga sma di e gi densrefi abra na takru lostu. 10Mi no wani taki nanga dati taki un no mus bemui nanga no wan sma ini grontapu di e gi ensrefi abra na takru lostu. Mi no wani taki tu tak' un no mus bemui nanga den gridi sma, den sma di e bedrigi trawan, nanga den sma di e dini kruktu gado. Noso dan un ben o abi fu kmoto fu a grontapu disi. 11San mi e skrifi unu na taki un no mus bemui nanga wan sma di e kari ensrefi wan bribisma, ma dan a e gi ensrefi abra na takru lostu, noso a gridi, a e dini kruktu gado, a e taki takru fu trawan, a e dringi drungu noso a e bedrigi sma. Un no mus nyan srefi nanga sowan sma. 12Bika a no de na mi fu krutu den sma di de na dorosei. Un srefi e krutu un eigi sma nomo! 13Gado o krutu den sma di de na dorosei. Ma un mus puru a sma di du a ogri na un mindri!
5:13
Deu 13:5
17:7
19:19

6

Fa un mus koti krutu

61Fa wan fu unu kan go suku leti na den sma di no bun ini Gado ai, efu a abi wan sani nanga wan trawan? Fu sanede a no e go na den sma fu Gado? 2Na sabi un no sabi taki na den sma fu Gado o krutu den sma na grontapu? Èn efu na unu o krutu grontapu, dan un mus sabi tu fa fu krutu den pikinpikin sani disi. 3Un no sabi taki wi o krutu den engel? San na den aladei sani disi dan? 4Dan fa un kan meki sma di no abi noti fu taki ini a gemeente krutu den aladei sani fu unu? 5Mi e taki disi fu un firi syen. Na abi un no abi no wan sma na un mindri di abi a koni fu koti wan krutu mindri tu brada? 6Ma, nono! A wan bribisma e tyari wan trawan go fu suku leti na sma di no e bribi ini Gado. 7Efu a wan e tyari a trawan go na krutu, dan un lasi a heri tori kba. A no moro betre efu den e du un kruktu? A no moro betre efu den e bedrigi unu? 8Prefu dati, unu srefi e du kruktu, unu srefi e bedrigi trawan. Un e du en nanga un eigi brada nanga sisa ini bribi. 9Na sabi un no sabi taki sma di e du kruktu no o kon ondro a tiri fu Gado? No kori unsrefi. Sma di e gi densrefi abra na takru lostu, sma di e dini kruktu gado, sma di e huru, den man di e seri den skin gi tra man, den man di e go nanga tra man na bedi, fufuruman, sma di gridi fu moni, 10drunguman, sma di e taki takru fu trawan, nanga bedrigiman no o kon ondro a tiri fu Gado. 11Sonwan fu unu ben du den sani disi. Ma ini a nen fu Masra Yesus Kristus èn nanga a Yeye fu wi Gado, un wasi krin, un tron sma fu Gado, èn un kon bun ini Gado ai.

A bribisma mus dini Gado nanga en skin

12Unu e taki: “Mi kan du san mi wani.” Iya, ma a no ala sani bun fu du. Mi kan du san mi wani, ma mi no o meki no wan sani tron mi basi.

6:12
1Kor 10:23
13Nyanyan na fu a bere, èn a bere na fu a nyanyan. Ma Gado o tyari wan kba na ala tu sani. A skin no meki fu yu gi yusrefi abra na takru lostu: a skin na fu Masra èn Masra na fu a skin. 14Gado no meki Masra wawan kon na libi baka, ma nanga En krakti A sa meki wi kon na libi baka tu. 15Na sabi un no sabi taki un skin na wan pisi fu Kristus? Mi no sa teki wan pisi fu a skin fu Kristus fu meki a kon tron wan pisi fu a skin fu wan motyo. Kwet'kweti! 16Na sabi un no sabi taki a sma di e hori nanga wan motyo e tron wan skin nanga en? Bika Gado taki: “Den tu sma sa kon tron wan enkri skin.”
6:16
Gen 2:24
17Ma efu wan sma e tan hori na Masra, dan yeyefasi a de wan nanga Masra. 18Un mus hori unsrefi fara fu takru lostu. Bika no wan tra sondu san wan sma e du, e pori en skin. Ma efu yu e gi yusrefi abra na takru lostu, yu e pori yu eigi skin nanga a sondu dati. 19Un no sabi taki un skin na wan santa presi fu a Santa Yeye di e libi ini unu? Na Gado gi unu a Santa Yeye. Un no de fu unsrefi moro.
6:19
1Kor 3:16
2Kor 6:16
20Gado ben bai unu èn A pai gi unu. So un mus gi Gado glori nanga un skin.