Sranan Tongo Bible 2016 (STB16)
8

Abra a nyanyan san gi leki ofrandi na kruktu gado

81Now wi o taki abra nyanyan san gi leki ofrandi na kruktu gado. A tru taki wi alamala abi sabi. Ma sabi e meki sma kisi bigimemre. Na a tra sei, lobi e meki yu kon moro tranga. 2Efu wan sma e prakseri taki a sabi wan sani, a no sabi a sani ete leki fa a mus sabi en. 3Ma efu wan sma lobi Gado, Gado sabi a sma dati. 4Now wi o taki efu yu kan nyan a nyanyan san gi leki ofrandi na kruktu gado. Wi sabi taki kruktu gado na noti ini grontapu. Wi sabi tu taki wan enkri Gado nomo de, trawan no de. 5Son sani de ini heimel noso na grontapu di sma e kari gado. Èn a tru taki furu “gado” noso “masra” de. 6Ma gi wi, wan Gado nomo de. Dati na a P'pa di meki ala sani, èn wi na fu En. Wan Masra nomo de tu. Dati na Yesus Kristus. Na En meki taki ala sani de leki fa den de, èn na En meki tu dati wi e libi. 7Ma a no ala sma abi a sabi disi. Sonwan fu den ben gwenti den kruktu gado sote taki te den e nyan sowan nyanyan, den e si en leki nyanyan san den ben gi leki ofrandi na wan kruktu gado. Dan fu di den konsensi swaki, a e fon den. 8Ma san wi e nyan no e tyari wi kon moro krosbei na Gado. Un no e lasi noti efu un no nyan a sani. Un no e wini noti tu, efu un nyan en. 9Ma yu mus luku bun taki yu di man nyan fri, no e meki den swakiwan fadon ini sondu. 10Bika te wan bribisma di swaki ete ini en konsensi e si taki yu di sabi a sani bunbun, e nyan ini wan tempel fu kruktu gado, dan a o firi ensrefi tranga fu go nyan sani san gi leki ofrandi na kruktu gado. 11Dan a sabi fu yu o meki taki a swaki brada disi, gi suma Kristus dede, go lasi. 12Dan fu di yu du wan sani nanga den brada nanga sisa fu yu san na sondu, meki yu du wan sani nanga Kristus san na sondu. Bika yu meki den swaki konsensi fu den fon den. 13Fu dat'ede efu san mi e nyan o meki mi brada nanga mi sisa fadon ini sondu, dan noiti moro mi sa nyan meti. Bika mi no wani fu mi brada nanga mi sisa fadon ini sondu.