Sranan Tongo Bible 2016 (STB16)
2

21Mi pikin, mi e skrifi unu den sani disi fu un no sondu. Ma efu wan sma sondu, dan wi abi wan sma di e taki gi wi na a P'pa. Dati na Yesus Kristus, a wan di bun ini Gado ai. 2Na fu di A dede meki Gado gi wi pardon fu wi sondu. Ma a no di fu wi wawan, ma di fu heri grontapu tu.

Waka ini a leti

3Disi na fa wi kan sabi taki wi sabi En: te wi e hori den gebod fu En. 4Efu wan sma e taki tak' a sabi Gado, ma a no e hori ensrefi na den gebod fu En, dan na lei a e lei èn a tru leri no de ini en. 5Ma a sma di e hori ensrefi na san Gado taki, abi a trutru dipi lobi fu Gado ini en. Na so wi kan sabi taki wi de wan nanga En: 6Ibri sma di e taki tak' a e tan wan nanga Gado, mus libi leki fa Yesus ben e libi. 7Lobiwan, a no fu wan nyun gebod mi e skrifi unu, ma mi e skrifi unu wan owru sani san un ben kisi sensi na a bigin. Dati na a boskopu san un ben yere kba.

2:7
Yoh 13:34
8Ma na a tra sei, a de wan nyun sani san mi e komanderi unu, bika a dungru e psa gwe èn a trutru faya de fu si kba. A kon tru ini a libi fu Yesus nanga a di fu unu. 9A sma di e taki tak' a de ini a leti, ma a no man si en brada na ai, de ini a dungru te nanga now. 10A sma di lobi en brada, e tan ini a leti èn noti no de ini en san o meki a fadon. 11Ma a sma di no man si en brada na ai, de ini a dungru èn a e waka ini a dungru. A no sabi pe a e go, bika a dungru tak' a no man si.

12Mi pikin, mi skrifi unu bika un kisi pardon fu un sondu fu En nen ede. 13Papa, mi e skrifi unu bika un sabi a Wan di ben de sensi na a bigin. Yonguwan, mi e skrifi unu bika un wini a ogriwan. 14Pikin, mi e skrifi unu bika un sabi Gado a P'pa. Papa, mi skrifi unu bika un sabi a Wan di ben de sensi na a bigin. Yonguwan, mi skrifi unu bika un tranga. A wortu fu Gado e tan ini unu èn un wini a ogriwan.

15Un no mus lobi grontapu nanga den sani fu grontapu. Efu wan sma lobi grontapu, a no lobi a P'pa. 16Bika ala den sani fu grontapu, soleki a lostu fu a skin, bigi-ai nanga heimemre, no e kmoto fu a P'pa, ma fu grontapu. 17Wan dei grontapu nanga den sani fu en di e hari sma, no o de moro. Ma a sma di e du san Gado wani, o libi fu têgo.

A bigi-feyanti fu Kristus

18Mi pikin, un de na den kriboi dei. Un ben yere taki a bigi-feyanti fu Kristus o kon. Nownow kba furu feyanti fu Kristus de. Na so wi sabi taki wi de na den kriboi dei. 19Den sma disi ben de na wi mindri, ma den no ben de wan nanga wi. Efu trutru den ben de wan nanga wi, dan den ben o tan na wi. Ma a gwe di den gwe, e sori wi taki no wan fu den ben de wan nanga wi. 20Ma a Santa Wan poti a Santa Yeye na un tapu èn un sabi ala sani.2:20 Wantu manuscript skrifi taki: un alamala sabi dati. 21Mi no skrifi unu fu di un no sabi a tru leri, ma fu di un sabi en, èn fu di un sabi taki lei no de ini a tru leri. 22A sma di e taki tak' Yesus no de a Mesias, na wan leiman. Na en na a bigi-feyanti fu Kristus di no e bribi ini a P'pa nanga a Manpikin. 23A sma di no e bribi ini a Manpikin, no sabi a P'pa. Ma a sma di e taki tak' a e bribi ini a Manpikin, sabi a P'pa tu. 24Ma unu fu un sei, mus hori unsrefi na san un yere na a bigin. Efu un tan du dati, dan un o tan wan nanga a Manpikin nanga a P'pa. 25Èn san A pramisi wi na a libi fu têgo. 26Mi skrifi unu den sani disi abra den sma di e kori unu. 27Ma unu, a Santa Yeye di A ben poti na un tapu, e tan na un tapu. So a no de fanowdu fu sma e gi un leri, bika a Santa Yeye e leri unu ala sani. Na tru sani A e leri unu, A no e lei. Un mus tan ini Kristus, soleki fa A leri unu.

Pikin fu Gado

28Mi pikin, un mus tan wan nanga En. Dan wi no sa abi fu frede te A o sori Ensrefi, èn wi no o firi syen fu miti En te A o drai kon baka. 29Un sabi taki Kristus bun ini Gado ai. Dat' meki un kan sabi tu taki ala sma di e du san bun ini Gado ai, na pikin fu Gado.

3

31Luku o bigi a lobi de di a P'pa abi gi wi, taki A kari wi pikin fu Gado. Èn na so a de. Dat' meki den sma fu grontapu no sabi unu, bika den no sabi En.

3:1
Yoh 1:12
2Lobiwan, nownow kba wi na pikin fu Gado, ma a no de fu si ete san wi o de bakaten. Ma wi sabi taki te Kristus sa sori Ensrefi, wi sa de leki En, bika wi o si En leki fa A de. 3Dat' meki ibri sma di poti en fertrow na En tapu fu di a e ferwakti a sani disi, mus libi sondro fu du sondu, soleki fa Kristus no abi sondu. 4A sma di e sondu, no e hori ensrefi na san a wèt fu Gado e taki, bika sondu na te yu no e hori yusrefi na san a wèt fu Gado e taki. 5Un sabi taki Yesus ben kon na grontapu fu puru ala sondu, èn En no abi no wan sondu.
3:5
Yoh 1:29
6A sma di de wan nanga En, no e tan du sondu, ma a sma di e tan du sondu, no si En noiti èn a no sabi En.

7Mi pikin, un no meki no wan sma kori unu. A sma di e du san bun ini Gado ai, de leki fa Kristus de. 8Ma a sma di e tan du sondu, na fu didibri, bika sensi na a bigin didibri sondu. Ma a Manpikin fu Gado ben kon na grontapu fu wai den wroko fu didibri puru. 9Ibri sma di kon tron wan pikin fu Gado, no e tan du sondu, bika a krakti fu Gado di e gi libi, de ini en. A no man tan du sondu bika a de wan pikin fu Gado. 10Na so yu kan sabi suma na den pikin fu Gado èn suma na den pikin fu didibri. A sma di no e du san bun ini Gado ai, ma owktu a sma di no lobi en brada, no de fu Gado.

A lobi e sori taki wi na bribisma

11Disi na a boskopu san un ben yere sensi na a bigin, taki wi mus lobi makandra.

3:11
Yoh 13:34
12Un no mus de leki Kain, di ben de fu didibri èn di kiri en brada. Fu sanede a kiri en brada dan? Na fu di a ben e du kruktu sani, ma en brada ben e du san bun ini Gado ai.
3:12
Gen 4:8
13Brada nanga sisa, un no mus ferwondru efu sma fu grontapu no man si un na ai. 14Wi sabi taki wi kmoto fu dede kon ini a libi, fu di wi lobi tra bribisma. A sma di no abi lobi, e tan dede.
3:14
Yoh 5:24
15A sma di no man si wan tra bribisma na ai, na wan kiriman. Èn un sabi taki no wan kiriman abi a libi fu têgo ini en. 16A dede di Kristus dede gi wi, meki wi kon sabi san na lobi. Dat' meki wi srefi mus de klar'klari fu dede gi tra bribisma. 17Efu wan sma si taki wan tra bribisma e pina, ma a no abi sari-ati nanga en aladi a abi nofo fu libi, dan fa a lobi fu Gado e tan ini en?

18Mi pikin, wi no mus taki nanga mofo wawan tak' wi lobi trawan, ma wi mus du sani tu di e sori dati trutru. 19Na so wi o sabi taki wi sabi a tru leri, èn wi o man tnapu sondro frede na Gado fesi, 20awinsi wi konsensi e krutu wi. Bika Gado bigi moro wi konsensi, èn A sabi ala sani. 21Lobiwan, efu wi konsensi no e krutu wi, dan wi o abi dek'ati te wi tnapu na Gado fesi. 22Wi o kisi ala sani san wi e aksi fu En, fu di wi e hori wisrefi na den gebod fu En, èn fu di wi e du san A lobi. 23Disi na a gebod fu Gado: Wi mus bribi ini a nen fu En Manpikin Yesus Kristus, èn wi mus lobi makandra leki fa A taigi wi taki wi mus fu du.

3:23
Yoh 13:34
15:12,17
24A sma di e hori ensrefi na den gebod fu Gado, e tan wan nanga Gado èn Gado e tan wan nanga en. Èn wi sabi taki A e tan wan nanga wi, bika A gi wi a Santa Yeye.

4

No bribi ala yeye

41Lobiwan, un no mus bribi ala sma di e taki tak' na a Santa Yeye e tiri den. Ma un mus ondrosuku fu si efu a yeye kmoto fu Gado. Bika furu sma e waka lontu na grontapu di e du leki den na profeiti. 2Na so wi sabi a Yeye fu Gado: Ibri yeye di e taki tak' a tru tak' Yesus Kristus kon na grontapu leki libisma, na fu Gado. 3Ma ibri yeye di no e taki dati fu Yesus, no de fu Gado. A de a yeye fu a bigi-feyanti fu Kristus. Un ben yere taki a ben o kon, ma a de na grontapu kba. 4Mi pikin, unu na fu Gado èn un wini den man dati kba. Bika a Wan di de ini unu, tranga moro a wan di de na grontapu. 5Den na fu grontapu, dat' meki den e taki sani fu grontapu èn den sma fu grontapu e arki den. 6Ma wi na fu Gado. Den sma di sabi Gado e arki wi, ma den sma di no sabi Gado no e arki wi. Na so wi kan sabi suma abi a Yeye di e sori san na tru, nanga suma abi wan yeye di e bedrigi.

Trutru lobi

7Lobiwan, meki wi lobi makandra, bika lobi e kmoto fu Gado. Ibri sma di abi lobi, na wan pikin fu Gado èn a sabi Gado. 8A sma di no abi lobi, no sabi Gado, bika Gado na lobi. 9Disi na a fasi fa Gado sori wi taki A lobi wi: A seni En wan enkri Manpikin kon na grontapu, èn san Yesus du meki wi kisi a trutru libi. 10Lobi no wani taki tak' na wi ben lobi Gado, ma na Gado ben lobi wi, èn A seni En Manpikin kon fu dede gi wi fu wi kan kisi pardon fu wi sondu.

11Lobiwan, efu Gado lobi wi so tranga, dan wi mus fu lobi makandra tu. 12Noiti wan sma no si Gado. Ma efu wi lobi makandra, dan Gado e tan wan nanga wi, èn a lobi fu En kon tron ini wi san a mus de.

4:12
Yoh 1:18
13Gado gi wi En Yeye. Na so wi sabi taki wi e tan wan nanga En èn En e tan wan nanga wi. 14Wi si a Manpikin èn wi e taigi trawan taki a P'pa ben seni En kon leki a Ferlusuman fu grontapu. 15Efu wan sma e taki tak' Yesus na a Manpikin fu Gado, dan Gado e tan wan nanga en, èn a sma dati e tan wan nanga Gado. 16Wi kon sabi taki Gado lobi wi, èn wi e bribi dati tu. Gado na lobi, èn a sma di e tan abi lobi, e tan wan nanga Gado èn Gado e tan wan nanga en.

17A lobi kon tron ini wi san a mus de, fu meki taki wi o man tnapu sondro frede na fesi Gado tapu a krutudei. Bika wi e libi dya na grontapu leki fa En ben libi. 18Pe lobi de, frede no de. Trutru lobi e yagi frede, bika frede e taki fu strafu. A sma di e frede, no abi trutru lobi. 19Wi abi lobi fu di Gado ben lobi wi fosi. 20A sma di e taki tak' a lobi Gado, ma dan a no man si wan tra bribisma na ai, na wan leiman. Bika efu yu no man lobi tra bribisma di yu e si, fa yu o man lobi Gado dan di yu no e si? 21A sma di lobi Gado, mus lobi tra bribisma tu. Dati na san Gado komanderi wi.