Sranan Tongo Bible 2016 (STB16)
10

A kownu fu Seba kon fisiti Salomo

101A uma di ben de kownu fu Seba, ben yere fu a bigi nen di MASRA ben meki Salomo abi. Dat' meki a ben kon fu tesi Salomo nanga aksi di no ben makriki fu piki. 2A kon na Yerusalem nanga bun furu sma nanga kameel di ben e syow spesrei, bun furu gowtu nanga diri ston. Di a doro na Salomo, a aksi en ala sani di ben de tapu en ati. 3Salomo piki en tapu ala den aksi fu en. Ala den dipidipi sani a ben tyari kon na krin gi en. 4Di a kownu fu Seba si fa Salomo koni, di a si a kownu-oso tu di a bow, 5a nyanyan di ben de tapu tafra, a fasi fa den wrokoman fu en ben e sidon na tafra, a fasi fa den sma di ben e sorgu gi a nyanyan ben tnapu èn fa den ben e weri, den dringi nanga den meti di Salomo ben e bron leki ofrandi ini a oso fu MASRA, a fruwondru srefsrefi. 6Dat' meki a taigi kownu taki: “Den sani tru di mi yere ini mi kondre fu yu nanga a fasi fa yu koni. 7Mi no ben e bribi te leki mi kon dyaso èn si nanga mi eigi ai. Ma den no ben ferteri mi afu srefi fu san mi si. A koni nanga a gudu fu yu no de fu marki nanga den tori di mi yere fu yu. 8Den sma di yu e tiri, den knekti fu yu di e dini yu èn di e yere den koni sani di yu e taki, na blesi sma. 9Mi e prijse MASRA, a Gado fu yu, di abi sowan prisiri nanga yu taki a poti yu tapu a kownusturu fu Israel. Na fu di MASRA lobi Israel nanga wan lobi di no abi kba, meki a poti yu leki kownu fu tiri a kondre tapu wan bun èn leti fasi.”

10Dan a gi kownu Salomo sowan fo dusun nanga tu hondro kilo gowtu nanga bun furu spesrei nanga diri ston. Noiti moro spesrei kon ini a kondre, leki san a kownu fu Seba ben gi kownu Salomo. 11Den boto fu Hiram no ben tyari gowtu fu Ofir wawan kon ini a kondre, ma bun furu sandel-udu nanga diriston. 12Nanga a udu dati kownu Salomo meki sturu nanga tafra gi a oso fu MASRA nanga a kownu-oso. A meki citer nanga harp tu gi den singiman. Noiti moro someni sandel-udu kon ini a kondre èn noiti moro sma si someni fu a udu dati tu te tide. 13Kownu Salomo fu ensei, no gi a kownu fu Seba den kado wawan di a ben gwenti gi leki kownu, ma a gi en ala san a ben angri fu abi tu. Baka dati a kownu nanga den knekti fu en drai go baka na a kondre fu den.

Den gudu fu Salomo

14A gowtu di Salomo ben e kisi ala yari, ben de tutenti dusun kilo, 15boiti san den bai nanga seriman, ala den kownu fu Arabia nanga den man di kownu ben poti fu tiri den foto, ben e tyari kon.

16Kownu Salomo meki tu hondro bigi schild fu fini gowtu. Ibri schild ben meki fu siksi kilo gowtu. 17A meki dri hondro pikin schild tu fu fini gowtu. Ibriwan fu den ben meki fu wan nanga afu kilo gowtu. Dan kownu poti den ini a oso: Busi fu Libanon. 18Moro fara kownu meki wan bigi kownusturu fu ivoor. Dan a poti lala gowtu na en tapu. 19A kownusturu ben abi wan pikin trapu nanga siksi tree, a edepisi ben lontu na loktusei èn abi ben abi tu pisi fu poti yu anu. Sei iniwan fu den pisi fu poti yu anu wan lew ben tnapu. 20Twarfu lew ben tnapu tapu den tree fu a trapu, siksi na a wan sei nanga siksi na a tra sei. Noiti ete sowan kownusturu ben meki ini wan kondre. 21Ala den sani fu dringi fu kownu Salomo ben de fu gowtu. Ala den tra kukru sani fu a oso: Busi fu Libanon ben de fu lala gowtu. Noti ben de fu solfru, bika ini a ten fu Salomo solfru no ben abi warti. 22Kownu Salomo ben abi sipi na se di ben e go na Tarsis makandra nanga den di fu Hiram. Ibri dri yari den ben e drai kon nanga gowtu, solfru, ivoor, kes'kesi nanga prodokaka.

23No wan kownu fu grontapu ben gudu noso koni moro kownu Salomo. 24Alasei fu grontapu sma ben e kmoto kon na Salomo fu arki a koni di Gado ben gi en. 25Iniwan fu den ben e kon nanga kado: solfru nanga gowtu sani, krosi, fetisani, spesrei, asi nanga buriki. Na so a ben e go ala yari.

26Salomo ben sorgu taki fetiwagi nanga man di e tyari den fetiwagi ben de. A ben abi wan dusun nanga fo hondro fetiwagi nanga twarfu dusun man di ben e tyari den wagi. Dan a poti afu fu den ini den foto di ben meki spesrutu fu poti den wagi, a tra afu ben de na en ini Yerusalem.

27Kownu ben meki tu taki solfru ben furu leki ston na ini Yerusalem. Sedre-udu ben lai tu leki den figabon di e gro bogobogo ini den kontren na den bergifutu.

28Den asi fu Salomo ben e kmoto fu Egipte nanga Kewe. Den bai nanga seriman fu kownu ben e go bai den ini Kewe. 29Den ben e bai wan fetiwagi ini Egipte gi siksi hondro pisi solfru èn gi wan asi wan hondro nanga feifitenti pisi solfru. Den bai nanga seriman ben e tyari asi go seri tu gi ala den kownu fu den Hetitisma nanga di fu den Arameesma.

11

Salomo drai en baka gi MASRA

111Boiti a umapikin fu farao, kownu Salomo ben lobi furu tra uma tu fu difrenti dorosei kondre. Uma fu Moab, fu Amon, fu Edom nanga uma fu den Hetitisma. 2Den ben de fu den folku fu san MASRA ben taigi den Israelitisma taki: “Un no mus trow nanga den umasma fu den èn den no mus trow nanga den umasma fu unu. Bika den o drai un ede fu un dini den gado fu den.” Ma na den uma dati Salomo ben lobi. 3A ben trow nanga seibi hondro uma èn a ben e libi nanga dri hondro trawan ete èn den uma dati drai en ede. 4Salomo ben de wan owru man kba di den uma fu en meki a bigin dini tra gado. A no teki a eksempre fu en p'pa David, fu dini MASRA, a Gado fu en, wawan. 5A go dini Astarte, a gado fu den Sidonisisma, nanga Milkom, a groskin gado fu den Amonitisma. 6A ben e du sani di no ben bun srefsrefi ini MASRA ai, èn a no ben e dini MASRA moro nanga en heri ati, leki en p'pa David. 7Dan Salomo meki den bow wan altari gi Kemos, a groskin gado fu Moab, tapu a bergi na oostsei fu Yerusalem, nanga wan gi Molok, a groskin gado fu Amon. 8A du a srefi sani tu gi ala den uma fu en fu den doroseikondre, di ben e bron wierook èn den ben e srakti meti leki ofrandi gi den gado fu den.

9A sani disi meki MASRA ati bron tapu Salomo, fu di Salomo ben drai en baka gi MASRA, a Gado fu Israel, di ben sori Ensrefi tu leisi na en. 10A ben taigi Salomo fu no waka baka tra gado, ma Salomo no ben arki san MASRA ben komanderi en. 11Fu dat'ede MASRA taigi en taki: “Fu di a kon so now, taki yu broko a ferbontu nanga Mi èn yu no hori yusrefi na den sani di yu ben mus tan du soleki fa Mi ben komanderi yu, Mi sa puru a kondre na yu anu èn gi en na wan knekti fu yu. 12Ma fu yu p'pa David ede, meki Mi o du dati te yu dede fosi. Mi o puru a kondre na yu manpikin anu. 13Ma Mi no sa puru a heri kondre na en anu. Mi sa libi wan fu den lo gi en fu Mi knekti David ede nanga fu Yerusalem ede, di Mi teki.”

Den feyanti fu Salomo

14Dan MASRA meki Hadad fu Edom tron a feyanti fu Salomo. A man disi ben de famiri fu a kownu fu Edom. 15Baka wan feti fu David nanga Edom, Yoab, a edeman fu a legre, ben go fu beri den srudati di ben dede ini a feti. Dan Yoab kiri ala den mansma ini Edom. 16Yoab ben tan siksi mun nanga a legre fu Israel ini Edom, te leki den ben kiri ala den mansma ini Edom. 17Ma Hadad, di ben yongu ete a ten dati, ben man lowe nanga wantu tra man fu Edom go na Egipte. Den man dati ben de heihei wrokoman fu en p'pa. 18Den psa ini Midyan dan den kon doro na Paran. Drape den teki wantu man moro nanga den, dan den hari go moro fara na Egipte. Drape Farao, a kownu fu Egipte, gi en wan oso fu tan, a pramisi Hadad taki a o sorgu taki a abi nyanyan èn a gi en wan pisi gron. 19Farao ben kon lobi Hadad sote tak' a meki a trow nanga a sisa fu en eigi frow, kownu Takpenes. 20A frow fu Hadad kisi wan boi gi en di den kari Genubat. A frow fu farao teki a boi dati kweki ini Farao oso èn a gro makandra nanga den boi fu farao. 21Ma di Hadad kisi fu yere taki David nanga Yoab, a edeman fu a legre fu David, dede, a aksi farao taki: “Mi e begi yu fu drai go baka na mi kondre.” 22Ne Farao aksi en taki: “Yu e mankeri wan sani na mi taki wantron so yu wani go baka na yu kondre?” Hadad piki farao taki: “Kwet'kweti, ma mi e begi yu fu yu meki mi go.”

23Gado ben meki Salomo kisi ete wan feyanti. Dati ben de Reson, a manpikin fu Elyada. Reson ben lowe fu en basi, kownu Hadadeser fu Soba, 24di David ben kiri Hadadeser nanga a legre fu en ini wan feti. Reson ben feni wantu man di ben e waka na en baka. Den go tan na Damaskus, den teki drape leki den tanpresi èn den ben e libi leki kownu. 25Reson ben de wan feyanti fu Israel solanga di Salomo ben de na libi. Boiti Hadad, Reson srefi ben e gi Israel bigi problema, bika a no ben wani sabi not'noti fu Israel èn A ben tron kownu fu Aram.

26Wan tra sma di ben tron wan feyanti fu Salomo tu, ben de Yerobeam, wan knekti fu en fu Sereda, wan presi ini Efraim. En p'pa, di no ben de na libi moro, ben nen Nebat èn en m'ma ben nen Serua. 27Na so a dyugudyugu fu en nanga Salomo bigin. Salomo ben e meki a Millo fu tapu wan bigi olo na a skotu fu a foto fu David. 28Yerobeam ben de wan bun wrokoman. Di Salomo si taki a ben de wan tranga wrokoman, a poti en leki edeman fu luku den wrokoman fu a lo fu Yosef. 29Wan dei di Yerobeam ben kmoto na Yerusalem, a miti nanga a profeiti Akia fu Silo, dorosei fu a foto. Akia ben weri wan nyun langa dyakti. 30Den tu man disi wawan ben de ini a opo wei. Ne Akia teki a nyun langa dyakti fu en dan a priti en ini twarfu pisi. 31Dan a taigi Yerobeam taki: “Teki tin pisi, bika MASRA, a Gado fu Israel, e taigi yu taki: Luku, Mi o puru a kondre na Salomo anu èn Mi o gi yu tin fu den lo. 32Ma Mi o libi wan lo gi en. Mi o du dati fu Mi knekti David ede èn fu Yerusalem, a foto di Mi teki na mindri fu ala den lo fu Israel. 33Mi e tyari a prati disi fu di a kownu nanga a folku gwe libi mi. Den go boigi gi Astarte, a gado fu den Sidonisisma, gi Kemos, a gado fu Moab, nanga gi Milkom, a gado fu Amon. Den no libi leki fa Mi wani, èn den no du san Mi ben wani. Den no teki a eksempre fu David, a p'pa fu Salomo fu du den sani di den ben mus tan du èn fu hori densrefi na den sani na san den ben mus tan hori densrefi. 34Ma Mi no sa puru a heri kondre na Salomo anu. Mi sa meki a tan kownu solanga leki a de na libi. Mi o du dati fu Mi knekti David ede, di Mi ben teki èn a ben hori ensrefi na den gebod fu Mi nanga den sani na san a ben mus tan hori ensrefi. 35Mi sa puru a kondre na Salomo en manpikin anu. Mi o gi yu tin fu den lo. 36Mi o meki a manpikin fu en hori wan. Bika Mi wani taki wan bakapikin fu Mi knekti David sa tan kownu ini Yerusalem, a foto di Mi teki leki a presi pe sma kan anbegi Mi. 37Mi sa meki yu tron kownu fu Israel èn yu sa de kownu fu a heri kontren di yu wani. 38Du ala san Mi e komanderi yu, libi leki fa Mi wani èn du san bun ini Mi ai. Hori yusrefi na den sani na san yu mus hori yusrefi nanga den gebod fu Mi, soleki fa Mi knekti David ben du. Dan Mi sa yepi yu èn sorgu taki na soso den pikin nanga bakapikin fu yu sa tan kownu, neleki fa Mi du nanga David, èn Mi sa gi yu Israel. 39Mi sa broko den bakapikin fu Israel saka fu den sondu di den du, ma no fu ala ten.”

40Salomo suku fu kiri Yerobeam, ma Yerobeam lowe go na Sisak, a kownu fu Egipte. A tan drape te leki Salomo dede.

41Den tra sani di psa ini a libi fu Salomo, ala den sani di a du, a koni di a ben abi, skrifi poti ini a buku fu a historia fu Salomo. 42Ini Yerusalem, Salomo tiri heri Israel fotenti yari langa. 43A dede èn den beri en ini a foto fu en p'pa David. En manpikin Rekabeam teki en presi leki kownu.

12

Fa a kondre du prati

121Dan Rekabeam go na Sikem, bika drape ala den Israelitisma ben kon makandra fu poti en leki kownu. 2Fa Yerobeam, a manpikin fu Nebat, yere dati, na so a drai kmoto fu Egipte pe a ben lowe go tan gi kownu Salomo.12:2 A Hebrewtekst fu a pisi disi no krin. 3Den seni kari en, dan Yerobeam nanga ala den Israelitisma go na Rekabeam go aksi en taki: 4“Yu p'pa ben meki a libi tumsi hebi gi unu. Ma efu yu meki a hebi wroko fu yu p'pa nanga a libi moro lekti gi wi, dan wi sa dini yu.” 5Rekabeam piki den taki: “Un go dan un kon tra tamara baka na mi.” Di den gwe, 6Rekabeam aksi den owru man di ben wroko nanga en p'pa Salomo, taki: “Sortu rai un kan gi mi fu piki a pipel?” 7Den man taigi en taki: “Efu yu wani dini a pipel na tapu a yoisti fasi, du den wan bun. Du san den aksi èn taki switi nanga den. Dan ala ten den sa dini yu.” 8Ma Rekabeam no arki a rai di den owru man gi en. A go aksi den yonkuman di gro makandra nanga en, èn di ben e wroko now gi en. 9A aksi den taki: “Sortu rai un e gi mi? A pipel aksi mi fu mi meki a hebi wroko di mi p'pa e meki den du, moro lekti. San mi mus piki den?” 10Den yonkuman nanga san a gro kon, piki en taki: “A pipel di aksi yu fu yu meki a hebi wroko fu yu p'pa moro lekti gi den, yu mus piki taki: ‘A pikinfinga fu mi fatu moro mi p'pa bere. 11Mi p'pa ben hebi a wroko gi unu, ma mi o meki a kon moro hebi. Mi p'pa ben fon unu, ma mi dati o priti un skin nanga wipi.’ ” 12Tapu a di fu dri dei Yerobeam nanga a heri pipel drai go baka na kownu Rekabeam soleki fa a ben taigi den. 13Dan Rekabeam piki den tapu wan grofu fasi. A no ben arki a rai di den owru man ben gi en, 14ma a teki di fu den yonkuman. A piki den taki: “Mi p'pa ben hebi a wroko gi unu, mi o meki en moro hebi. Mi p'pa ben fon unu, ma mi dati o priti un skin nanga wipi.” 15Tapu a fasi disi kownu no du san a pipel ben aksi en. Ma na MASRA ben meki sani waka so, bika A ben wani du san A ben meki Akia fu Silo taigi Yerobeam, a manpikin fu Nebat.

16Di ala den Israelitisma si tak' kownu no ben wani arki den, den piki en taki: “Man fu Israel, wi abi noti fu du nanga David, wi abi noti fu wini na a manpikin fu Isai. Meki wi go na wi oso! A kownu-oso fu David sa sorgu gi ensrefi.” Dan den Israelitisma drai go na den oso baka. 17Na so Rekabeam tan kownu soso fu den Israelitisma di ben e libi ini den foto fu Yuda. 18Dan Kownu Rekabeam seni Adoniram, a edeman fu den sma di ben mus wroko fu soso gi kownu, go na den Israelitisma ma den fringi ston kiri en. Kownu srefi ben abi fu dyompo es'esi na ini en wagi go na Yerusalem baka. 19Na so den Israelitisma drai den baka gi a famiri fu David te leki tide.

20Di den Israelitisma ben yere taki Yerobeam ben drai kon baka, den kari en kon na wan bigi konmakandra fu a pipel. Dan den poti en leki kownu fu Israel. Soso a lo fu Yuda ben tan waka baka a famiri fu David.

21Di Rekabeam, a manpikin fu Salomo, doro baka na Yerusalem, a kari den lo fu Yuda nanga Benyamin kon na wan fu go feti nanga Israel, fu tyari den kon ondro a tiri fu en baka. A legre fu Yuda nanga Benyamin ben abi wan hondro aititenti dusun srudati di ben fiti fu go feti nanga Israel. 22Ma dan Gado taigi Semaya, a man fu Gado, taki: 23“Taigi Rekabeam, a manpikin fu Salomo, a kownu fu Yuda, nanga den sma fu den lo fu Yuda nanga Benyamin, nanga ala den tra sma fu a folku taki: 24‘Na disi MASRA e taki: Un no mus go feti nanga den Israelitisma, bika unu nanga den na wan folku. Iniwan fu unu mus drai go na un oso baka, bika na Mi meki sani waka so.’ ” Dan den arki san MASRA taigi den èn den drai go baka leki fa MASRA ben taigi den fu du.

Kownu Yerobeam drai en baka gi MASRA

25Yerobeam meki a foto Sikem, ini a bergikondre fu Efraim, moro tranga dan a go libi drape. Baka wan pisten a kmoto fu drape dan a go meki a foto Penuel moro tranga. 26Dan Yerobeam prakseri taki: “A kan taki a kondre go baka ini anu fu a famiri fu David. 27Bika te den sma fu a kondre o go fu tyari ofrandi ini a tempel fu MASRA na Yerusalem, dan a kan taki den bigin lobi den tiriman, kownu Rekabeam fu Yuda, baka. Dan den o kiri mi, dan den teki a sei fu Rekabeam baka.” 28Fu dat'ede kownu Rekabeam teki a besroiti fu meki tu yongu bulu fu gowtu. Dan a taigi a pipel taki: “Wan kba mus kon now na a go di un e go anbegi na Yerusalem. Israelitisma, un luku den gado fu unu di puru unu na Egipte.” 29Dan Yerobeam meki den poti wan fu den gowtu bulu tnapu ini Betel, a trawan den poti na Dan. 30A heri folku ben waka baka a gowtu bulu di den ben e tyari en go poti na Dan. Na so a sondu bigin. 31Yerobeam bow tempel tu na den presi pe den sma ben e tyari ofrandi. Ala sortu man fu a folku a teki poti leki priester, man di no ben de srefsrefi fu a lo fu Lefi. 32Yerobeam poti tu tak' ini a di fu aiti mun fu ala yari, tapu a di fu tin-na-feifi dei fu a mun, den mus hori wan fesa leki a wan di e hori na Yuda. Dan a ben e tyari wan ofrandi tapu a altari. Na so a ben e du na Betel. A ben e tyari ofrandi gi den yongu bulu di a ben meki èn a ben e meki den priester di a ben poti fu wroko na den presi pe den sma ben e tyari ofrandi, du a wroko na Betel.

A profeiti fu Yuda

33Tapu a di fu tin-na-feifi dei fu a di fu aiti mun, a dei di ensrefi ben poti leki fesadei, Yerobeam kren go tapu a altari di a ben meki na Betel fu tyari wan ofrandi.