Sranan Tongo Bible 2016 (STB16)
14

A strafu di Yerobeam kisi

141A srefi ten dati, Abia, a manpikin fu Yerobeam, kon siki. 2Dan Yerobeam taigi a frow fu en taki: “Meki yusrefi klari fu go na Silo. Drape a profeiti Akia e tan di ben taigi mi taki mi ben o tron kownu fu a folku disi. Ma yu mus weri so wan fasi taki sma no man si taki na a frow fu mi. 3Tyari tin brede, wantu rosenkuku nanga wan kroiki oni gi en. A sa taigi yu san o psa nanga a boi.” 4A wefi fu Yerobeam du san a taigi en. A teki pasi go na Silo èn a go na a oso fu Akia. Akia no ben e si moro. A ben kon owru èn en ai ben kon dungru. 5Ma MASRA ben taigi en taki: “A wefi fu Yerobeam e kon. A wani aksi yu san o psa nanga a boi fu en di siki. A weri en krosi so wan fasi fu yu no man sabi tak' na en. Ma fa a kon inisei yu mus taigi en den sani disi di Mi o taigi yu.” Dan MASRA taigi a profeiti san a mus taigi en te a kon na inisei.

6Di Akia yere taki wan sma psa a doro kon na inisei, a taki: “Yu kan kon doro, wefi fu Yerobeam! San meki yu weri so fu sma no sabi taki na yu? A boskopu di mi abi gi yu, no moi srefsrefi. 7Go taigi Yerobeam taki na so MASRA, a Gado fu Israel, taki: ‘Mi puru yu na mindri fu a pipel èn Mi gi yu wan moro hei presi. Mi poti yu leki tiriman fu Mi pipel Israel. 8Mi puru a kondre ini anu fu a famiri fu David èn Mi gi yu a kondre. Ma yu no tyari yusrefi leki Mi knekti David di hori ensrefi na den gebod fu Mi, di dini Mi nanga en heri ati èn di du sani di bun ini Mi ai. 9Ma yu du moro ogri dan den wan di ben de na yu fesi. Yu drai yu baka gi Mi fu go meki tra gado, yu meki gowtu popki èn so yu wiki a atibron fu Mi. 10Fu dat'ede Mi o meki wan bigi ogri miti a famiri fu en. Iya, Mi o kiri ala den manpikin fu Yerobeam ini Israel, bigiwan nanga pikinwan. Mi o figi a famiri fu Yerobeam gwe, leki fa sma e figi doti gwe te leki noti fu en no de fu si moro. 11Dagu o nyan den famiri fu yu di o dede ini a foto, èn tingifowru o nyan den wan di o dede ini a wei. Na mi, MASRA, taki dati.’ ” 12Dan Akia taigi a uma moro fara taki: “Drai go baka na yu oso. Fa yu o poti yu futu ini a foto, na so a pikin o dede. 13Heri Israel sa low gi en, èn beri a dedeskin fu en. Fu a heri famiri fu Yerobeam, na a boi disi wawan sa beri, bika na ini en wawan MASRA, a Gado fu Israel, feni wan bun sani. 14MASRA o poti wan kownu ini Israel, di o figi a famiri fu Yerobeam puru na pasi. Tide srefi dati o psa.14:14 A Hebrewtekst fu a pisi disi no krin. 15MASRA sa naki Israel, leki fa a winti e wai a tyengrasi di e gro ini a liba. A sa rutu den Israelitisma puru fu a bun kondre disi di A ben gi den afo fu den. A sa panya den go na tra sei fu a Eufratliba, bika den wiki a atibron fu En nanga den postu di den meki gi den kruktu gado. 16Iya, now En sa drai baka gi Israel, fu den sondu di Yerobeam du èn fu di a meki Israel e sondu tu.”

17Dan a wefi fu Yerobeam drai go baka na Tirsa. Fa a poti en futu ini a oso, na so a boi dede. 18Den beri en èn heri Israel ben low gi en leki fa MASRA ben meki En knekti, a profeiti Akia, taki.

19Den tra sani di psa ini a libi fu Yerobeam, den feti di a feti èn a fasi fa a ben tiri a kondre, skrifi poti ini a buku fu a historia fu den kownu fu Israel. 20Yerobeam tan tutenti-na-tu yari na makti. A dede èn en manpikin Nadab teki en presi leki kownu.

Kownu Rekabeam fu Yuda

21Rekabeam, a manpikin fu Salomo, ben tron kownu fu Yuda. A ben abi fotenti-na-wan yari di a tron kownu. Tin-na-seibi yari a ben de na makti ini Yerusalem, a foto di MASRA teki na mindri fu ala den lo fu Israel fu sma kon anbegi En. A m'ma fu Rekabeam ben nen Naama, wan uma fu Amon.

22Den sma fu Yuda ben e du sani di no ben bun ini MASRA ai. Nanga den sondu di den ben e du, den ben e wiki a dyarusu fu En moro leki fa den afo fu den ben du. 23Tapu ala pikin bergi nanga ondro ala bon nanga furu wiwiri, den ben e meki presi fu sma tyari ofrandi noso den ben e poti ston nanga postu tnapu gi kruktu gado. 24Yu ben abi man nanga uma ini a kondre srefi di ben e seri den skin na den presi disi. Den ben e du den srefi groskin sani fu den folku di MASRA ben yagi puru gi den sma fu Israel.

25Di kownu Rekabeam ben de feifi yari na makti, kownu Sisak fu Egipte hari kon feti nanga Yerusalem. 26A teki ala den gudu fu a oso fu MASRA nanga di fu a oso fu kownu. Ala sani a teki. A teki den gowtu schild srefi di Salomo ben meki. 27Kownu Rekabeam meki kopro wan na den presi, dan a poti den ondro a frantwortu fu den edeman fu den spesrutu waktiman di ben e hori wakti na den doro fu a kownu-oso. 28Den waktiman disi ben e tyari den ala leisi kon, te kownu ben e go na a oso fu MASRA. Baka dati den ben e go poti den baka ini a kamra fu den spesrutu waktiman.

29Den tra sani di psa ini a libi fu Rekabeam nanga ala den sani di a du, skrifi poti ini a buku fu a historia fu den kownu fu Yuda. 30Dorodoro feti ben de fu Rekabeam nanga Yerobeam. 31Rekabeam dede èn den beri en na den afo fu en ini a foto fu David. En m'ma ben nen Naama, wan uma fu Amon. En manpikin Abiam teki en presi leki kownu.

15

Kownu Abiam fu Yuda

151Di Yerobeam, a manpikin fu Nebat, ben de tin-na-aiti yari na a makti, Abiam tron kownu fu Yuda. 2Abiam ben de dri yari na makti ini Yerusalem. En m'ma ben nen Maaka, wan umapikin fu Abisalom. 3Abiam ben e du den srefi sondu di en p'pa ben du. A no ben e dini MASRA, en Gado, nanga en heri ati, soleki en afo David. 4Ma fu di MASRA, en Gado, ben wani taki wan bakapikin fu David ben mus tan kownu ini Yerusalem, Gado gi en wan manpikin di ben o teki en presi leki kownu. Bika Gado ben wani taki Yerusalem ben mus tan, 5fu di David ben du san bun ini MASRA ai. En heri libi langa a du san MASRA ben komanderi en, boiti ini a tori fu Uria, a Hetitiman. 6A feti fu Rekabeam nanga Yerobeam, ben go doro di Abiam ben de na makti.

7Den tra sani di psa ini a libi fu Abiam nanga ala den sani di a du, skrifi poti ini a buku fu a historia fu den kownu fu Yuda. Abiam nanga Yerobeam feti go doro nanga densrefi. 8Abiam dede èn den beri en ini a foto fu David. En manpikin Asa teki en presi leki kownu.

Kownu Asa fu Yuda

9Di kownu Yerobeam fu Israel ben de tutenti yari na makti, Asa tron kownu fu Yuda. 10Asa tan fotenti-na-wan yari na makti ini Yerusalem. En granm'ma ben de Maaka, a umapikin fu Abisalom. 11Asa ben e du san bun ini MASRA ai, neleki en afo David. 12A yagi den man nanga uma gwe fu a kondre, di ben e seri den skin na den presi pe sma ben e tyari ofrandi èn a puru ala den popki fu den kruktu gado di den afo fu en ben meki. 13A puru a grani di en granm'ma Maaka ben abi leki m'ma fu kownu, fu di a ben meki wan groskin popki fu Asyera. Asa kapu a popki dati pis'pisi, dan a sutu faya gi en ini a Kidrondal. 14Asa tan dini MASRA wawan nanga en heri ati en heri libi langa, ma den presi pe sma ben e tyari ofrandi ben tan. 15Ala den sani di en p'pa nanga di ensrefi ben poti aparti gi MASRA, a tyari go poti ini a oso fu MASRA, sani leki solfru, gowtu nanga ala sortu wrokosani.

16Solanga di Asa ben de kownu fu Yuda èn Basa ben de kownu fu Israel, feti ben de fu den tu kownu disi. 17Kownu Basa fu Israel, hari go feti nanga Yuda. A meki a foto Rama kon moro tranga fu a ben kan tapu a pasi fu sma no go noso kmoto fu Yuda. 18Dan Asa teki ala a solfru nanga gowtu, di ben de ete ini a oso fu MASRA, ini den kamra pe den gudu ben e tan, nanga di fu a kownu-oso. A langa den gi den knekti fu en dan a seni den go nanga den sani disi na Benhadad, a kownu fu Aram, di ben e libi na Damaskus. Benhadad ben de a manpikin fu Tabrimon nanga a granpikin fu Hesyon. Den knekti ben mus taigi Benhadad taki: 19“Den p'pa fu wi ben meki wan ferbontu, meki wi meki wan tu. Luku, mi e seni wan kado gi yu: solfru nanga gowtu. Broko a ferbontu fu yu nanga Basa, a kownu fu Israel. Dati sa dwengi en fu a puru den srudati fu en ini mi kondre.” 20Benhadad du san kownu Asa aksi en. A komanderi den edeman fu a legre fu en fu hari go na den foto fu Israel. Dan den teki den foto Iyon, Dan, Abel-Bet-Maaka, a heri kontren Kineret nanga a kontren fu Naftali, abra. 21Fa Basa yere a nyunsu, na so a tapu a wroko di a ben e du na Rama fu meki a foto disi kon moro tranga dan a drai go baka na Tirsa. 22Kownu Asa fu ensei, seni kari ala mansma fu Yuda, no wan ben mus tan na baka. A meki den puru ala den ston nanga ala den udu nanga san kownu Basa ben meki a foto Rama kon moro tranga, dan a meki den foto Geba ini Benyamin nanga Mispa kon moro tranga.

23Den tra sani di psa ini a libi fu Asa, ala den feti di a wini, ala den sani di a du nanga den foto di a bow, skrifi poti ini a buku fu a historia fu den kownu fu Yuda. Di a kon owru, a kon siki na en futu. 24Asa dede èn den beri en na den afo fu en ini a foto David. En manpikin Yosafat teki en presi leki kownu.

Kownu Nadab fu Israel

25Di kownu Asa fu Yuda ben de tu yari na a makti, Nadab, a manpikin fu Yerobeam, tron kownu fu Israel. A tan tu yari na makti ini Israel. 26Nadab ben e du san no bun ini MASRA ai. A ben teki a eksempre fu en p'pa èn a ben e du den srefi sondu di en p'pa ben meki Israel du. 27Dan Basa, a manpikin fu Akia, fu a lo fu Isakar, meki mofo fu kiri Nadab. A naki Nadab kiri di Nadab nanga a legre fu Israel ben lontu a foto Gibeton fu den Filistijnsma. 28Basa kiri Nadab, di kownu Asa ben de dri yari na makti, èn a tron kownu na Nadab presi. 29Fa Basa tron kownu, na so a meki den kiri ala den famiri fu Yerobeam. No wan sma fu a famiri a meki tan na libi leki fa MASRA ben meki En knekti Akia fu Silo, taki. 30Dati psa fu den sondu di Yerobeam ben du èn di a ben meki Israel du nanga fu di a ben wiki a atibron fu MASRA, a Gado fu Israel.

31Den tra sani di psa ini a libi fu Nadab nanga ala den sani di a du, skrifi poti ini a buku fu a historia fu den kownu fu Israel. 32Solanga di Asa ben de kownu fu Yuda èn Basa ben de kownu fu Israel, feti ben de fu den tu kownu disi.

Kownu Basa fu Israel

33Di kownu Asa fu Yuda ben de dri yari na makti, Basa, a manpikin fu Akia, tron kownu fu Israel. A ben e libi ini Tirsa èn a ben de tutenti-na-fo yari na makti. 34A ben e du san no bun ini MASRA ai. A ben teki a eksempre fu Yerobeam èn a ben e du den srefi sondu di Yerobeam ben meki Israel e du.

16

161Dan MASRA taki nanga Yehu, a manpikin fu Hanani. A gi en a boskopu disi gi Basa: 2“Mi teki yu, wan sma di ben de noti, èn Mi poti yu leki tiriman fu Mi pipel Israel. Ma yu wiki a atibron fu Mi, fu di yu du den srefi sani di Yerobeam du èn yu meki mi pipel Israel sondu. 3Fu dat'ede Mi o figi Basa nanga en heri famiri puru na pasi, leki fa Mi du nanga a famiri fu Yerobeam, a manpikin fu Nebat. 4Dagu o nyan den famiri fu yu di o dede ini a foto èn tingifowru o nyan den wan di o dede ini a wei.”

5Den tra sani di psa ini a libi fu Basa, den sani di a du nanga den feti di a wini, skrifi poti ini den buku fu a historia fu den kownu fu Israel. 6Basa dede èn den beri en ini Tirsa. En manpikin Ela teki en presi leki kownu. 7A boskopu di MASRA ben gi Yehu, a manpikin fu Hanani, ben de gi Basa nanga en heri famiri bika a ben du sani di no bun ini MASRA ai. A ben wiki a atibron fu MASRA, fu di a ben du den srefi sani leki a famiri fu Yerobeam. Boiti dati a ben kiri a heri famiri fu Yerobeam tu.

Kownu Ela fu Israel

8Kownu Asa fu Yuda ben de tutenti-na-siksi yari na makti, di Ela tron kownu fu Israel. Ela ben e libi na Tirsa èn a tan tu yari na makti. 9Simri, wan knekti fu en ben meki mofo fu kiri en. Simri ben abi a frantwortu abra afu fu den fetiwagi fu kownu. Ela ben sidon e dringi wan leisi na a oso fu Arsa, a edeman fu den knekti fu kownu, te leki a ben drungu. 10Dan Simri kon èn a naki Ela kiri. A sani dati psa di kownu Asa ben de tutenti-na-seibi yari na makti ini Yuda. Dan Simri teki a presi fu Ela leki kownu. 11Fa Simri tron kownu èn a ben abi a makti ini anu, na so a kiri a heri famiri fu Basa. No wan mansma fu a famiri no tan na libi. A kiri ala famiri nanga mati. 12Na so Simri kiri ala den famiri fu Basa, leki fa MASRA ben meki a profeiti Yehu taigi Basa, 13bika Basa nanga en boi Ela ben sondu èn den ben meki den sma fu Israel sondu tu. Tapu a fasi dati den ben wiki a atibron fu MASRA, a Gado fu Israel, nanga den kruktu gado fu den di no abi no wan warti.

14Den tra sani di psa ini a libi fu Ela nanga den sani di a du, skrifi poti ini a buku fu a historia fu den kownu fu Israel.

Kownu Simri fu Israel

15Di kownu Asa fu Yuda ben de tutenti-na-seibi yari na makti, Simri tron kownu fu Israel. A ben e libi na Tirsa èn a tan seibi dei nomo na makti. A ten dati a legre fu Israel ben e suku fu teki a foto Gibeton fu den Filistijnsma abra. 16Di den srudati yere tak' Simri meki mofo fu kiri kownu èn taki a naki a kownu kiri trutru tu, den agri leki wan man ini a kampu fu poti Omri, a edeman fu a legre leki kownu fu Israel. 17Dan Omri nanga a legre fu en kmoto na Gibeton fu go lontu a foto Tirsa. 18Di Simri si tak' den ben o teki a foto abra, a go tapu ensrefi ini a tranga kibripresi fu a kownu-oso, dan a sutu faya gi a heri kownu-oso. Na so ensrefi kon dede. 19A dede fu den sondu di a ben du. A ben e du sani di no bun ini MASRA ai èn a ben du den srefi san di Yerobeam ben du èn di a ben meki Israel du tu.

20Den tra sani di psa ini a libi fu Simri nanga a mofo di a ben meki fu kiri kownu, skrifi poti ini a buku fu a historia fu den kownu fu Israel.

21Baka a dede fu Simri, prati kon mindri a pipel fu Israel. Afu fu den ben wani poti Tibni, a manpikin fu Ginat, leki kownu, a tra afu ben tnapu baka Omri. 22Ma den sma di ben e waka baka Omri kon wini a strei fu den sma di ben e waka baka Tibni. Tibni dede èn Omri tron kownu.

Kownu Omri fu Israel

23Kownu Asa fu Yuda ben de dritenti-na-wan yari na makti, di Omri tron kownu fu Israel. Omri tan twarfu yari na makti. A tan siksi yari ini Tirsa. 24Dan a bai wan pikin bergi gi sowan seibitenti kilo solfru fu Semer. A bow wan foto tapu a bergi dan a kari a foto Samaria, fu memre a nen fu Semer, a man di ben abi a bergi.

25Omri ben e du sani di no bun ini MASRA ai. A ben e du moro ogri leki den wan di waka na en fesi. 26A ben e du ala den sani di Yerobeam, a manpikin fu Nebat, du. A ben e tan du den sondu di Yerobeam ben meki Israel e du. A ben wiki a atibron fu MASRA, a Gado fu Israel, nanga den kruktu gado fu en di no abi no wan warti.

27Den tra sani di psa ini a libi fu Omri, den sani di a du nanga den feti di a wini, skrifi poti ini a buku fu a historia fu den kownu fu Israel. 28Omri dede èn den beri en ini Samaria. En manpikin Akab teki en presi leki kownu.

Kownu Akab fu Israel

29Kownu Asa fu Yuda ben de dritenti-na-aiti yari na makti, di Akab tron kownu fu Israel. Akab ben e libi ini Samaria èn a tan tutenti-na-tu yari na makti. 30Akab, a manpikin fu Omri, ben e du sani di no bun ini MASRA ai. A ben du moro ogri moro ala den trawan di waka na en fesi. 31A ben e du den srefi sondu di Yerobeam, a manpikin fu Nebat, ben du. Ma efu dati no ben sari ete, a teki Isebel, a umapikin fu Etbaal, a kownu fu Sidon, leki en uma. Dan a bigin anbegi Baal tu. 32A meki den bow wan tempel gi Baal na ini Samaria, èn a meki wan altari poti gi en ini a tempel. 33A meki den poti wan postu tu gi wan kruktu gado. Akab ben tan du den sani disi, taki a ben e wiki a atibron fu MASRA, a Gado fu Israel, moro leki ala den tra kownu di waka na en fesi.

34Ini a ten di Akab ben de na makti, Hiyel fu Betel, bow Yeriko baka. Di Hiyel e seti den fundamenti fu a foto, en fosi manpikin Abiram dede. Di a e poti den bigi doro fu a foto, Segub, a moro yongu manpikin fu en, dede. Disi psa leki fa MASRA ben meki Yosua, a manpikin fu Nun, taki na fesi kba.