Sranan Tongo Bible 2016 (STB16)
4

A libi fu wan bribisma

41Fu di Kristus nyan pina leki libisma, dan unu srefi mus de klar'klari tu gi dati. Bika a sma di teki pina leki libisma, tapu nanga sondu. 2Dan so a no o libi moro fa en ati firi, ma ini a ten san a abi fu libi ete, a o libi leki fa Gado wani. 3Bika un libi nofo leki fa den sma di no sabi Gado e libi. Un ben e libi wan yayolibi, èn un ben e du san un ati ben e firi fu du. Un ben e dringi drungu, un ben e gi fesa nomo, èn un ben e du ala sortu takru afkodrei. 4Den sma di no sabi Gado no man ferstan taki un no wani libi a srefi doti libi disi moro nanga den. Dat' meki den e taki takru fu unu. 5Ma den o abi fu gi frantwortu na a Wan di tnapu klar'klari fu krutu den libiwan nanga den dedewan. 6Bika na fu dat'ede den dedewan yere a bun nyunsu tu. Leki libisma den ben mus kisi strafu na libisma fasi, ma gi Gado den e libi na yeyefasi.

7A kba fu ala sani de krosbei. Dat' meki un mus kisi unsrefi. Un mus de na un krin ferstan fu un kan begi. 8A moro prenspari sani na taki un lobi makandra tranga, bika lobi e tapu furu sondu.

4:8
Leri 10:12
9Un mus opo un oso gi makandra, sondro fu knoru. 10Ibri sma mus dini den trawan nanga a presenti di Gado gi en, leki sma di e wroko bun nanga den difrenti sortu presenti di Gado gi wi. 11Efu wan sma e tyari wan wortu, meki a de so taki a wortu e kon fu Gado srefi. Efu wan sma e dini trawan, meki a de so taki a e dini nanga a krakti san Gado gi en. Disi o meki tak' fu Yesus Kristus ede, Gado o kisi grani fu ala sani. Na En mus kisi ala grani nanga ala krakti fu têgo èn ala ten! Amen.

Den hebi tesi

12Lobiwan, un no mus ferwondru fu a bigi tesi di e miti unu, neleki na wan spesrutu sani psa nanga unu. 13Ma o moro un e teki prati ini a pina fu Kristus, o moro un mus breiti. Dan un sa breiti srefsrefi tapu a dei di A o sori En glori. 14Unu na blesi sma efu un e nyan pina fu a nen fu Kristus ede. Bika a Yeye fu Gado, di de a Yeye fu glori, de na un tapu. 15Sorgu taki no wan fu unu abi fu nyan pina leki wan kiriman, leki wan fufuruman, leki wan abani, noso fu di a e bemui na ini tra sma tori. 16Ma efu wan fu unu e nyan pina fu di a de wan Kristensma, dan a no abi fu firi syen. Ma meki a gi Gado grani fu di a e tyari a nen disi.

17Bika a ten fu krutu doro kba, èn a o bigin na ini a oso fu Gado. So efu a e bigin na wi fosi, dan fa a sa waka nanga den sma di no wani bribi a bun nyunsu fu Gado? 18Efu nanga muiti Gado e ferlusu den sma di bun ini En ai, san o psa dan nanga den sma di no e dini Gado èn nanga den wan di e sondu?

4:18
Leri 11:31
19Dat' meki den sma di mus nyan pina fu di Gado wani dati, mus tan du san bun èn den mus poti den libi ini anu fu Gado. Na En meki den èn A de fu fertrow.

5

Wantu sani gi den fesiman

51Fesiman fu gemeente, mi na wan fesiman tu. Mi si fa Kristus teki pina èn mi o teki prati ini a glori di de fu kon. Mi e begi unu: 2Un sorgu bun gi den bribisma drape, den skapu fu Gado. Sma no mus dwengi unu fu du en, ma un mus du en nanga wan fri wani, soleki fa Gado wani. Un no mus du en tu fu meki moni, ma fu di un wani yepi den.

5:2
Yoh 21:15-17
3Un no mus de leki basi na tapu den sma di un mus luku, ma un mus de wan eksempre gi den skapu fu Gado. 4Dan te a Moro Hei Skapuman kon, A sa gi un grani di noiti no e kba.5:4 Ini Grikitongo a skrifi taki: A sa gi unu a kroon fu glori. 5Yonguwan, unu fu un sei mus saka unsrefi gi den owruwan. Un alamala mus abi sakafasi gi makandra. Bika Gado e feti den sma di abi bigimemre, ma den sma di abi sakafasi A e sori En bun-ati.
5:5
Leri 3:34
6Dat' meki un mus saka unsrefi ondro a tranga anu fu Gado, dan En o opo unu te a ten fu En doro.
5:6
Mat 23:12
Luk 14:11
18:14
7Poti ala sani nanga san un e broko un ede, ini Gado anu, bika A e sorgu gi unu.

8Un mus de nanga krin ferstan, èn un mus de na ai. Bika didibri, a feyanti fu unu, e waka lontu leki wan krasi tigri fu si suma a kan feni swari. 9Un mus kaka futu gi en, un mus tnapu tranga na ini a bribi. Bika un sabi taki den brada nanga sisa na ini heri grontapu, e nyan den srefi pina leki unu. 10Ma Gado, di e sori En bun-ati na ala fasi, kari unu fu teki prati ini En glori di e tan fu têgo, fu di un de wan nanga Kristus. Fu wan syatu pisten un o abi fu nyan pina, ma dan A o meki un kon de san un mus de. A o opo un tnapu, un o kon moro tranga, èn A o poti un tnapu tapu wan bun fundamenti. 11Na En mus kisi ala krakti fu têgo èn ala ten! Amen.

Wantu odi

12Silfanus yepi mi skrifi unu a syatu brifi disi. A de wan brada di mi sabi taki un kan fertrow. Nanga a brifi disi mi wani gi un dek'ati, èn mi wani sori unu tak' san mi skrifi e taki fu a tru bun-ati fu Gado. Un mus tan hori tranga na dati.

5:12
Bosk 15:22,40
13Den sma fu Gado na Babilon seni taki un odi. Gado teki den gi Ensrefi neleki unu. Markus, di mi e si leki mi eigi pikin, seni taki un odi tu.
5:13
Bosk 12:12,25
Kol 4:10
Flm 24
14Un mus taki makandra odi nanga wan santa bosi. Meki a freide fu Gado de nanga unu di de wan nanga Kristus.