Sranan Tongo Bible 2016 (STB16)
14

141Wan dei Yonatan, a manpikin fu Saul, taigi a srudati di ben e syow den fetisani fu en taki: “Kon, meki wi abra go na a wakti-oso fu den Filistijnsrudati na a tra sei.” Ma Yonatan no ben taigi en p'pa san a ben o du. 2Saul ben sidon ondro a granaki-apra bon na Migron krosbei fu a foto Gibea. Sowan siksi hondro srudati ben de nanga en. 3A pisten dati Akia ben de priester èn na en ben e tyari a efod, di ben e meki den sabi a wani fu MASRA. Akia ben de a manpikin fu Akitub, Akitub ben de a manpikin fu Pinekas, Pinekas ben de a manpikin fu Eli, di ben de a priester fu MASRA na Silo. Ikabod ben de a brada fu Akitub, a p'pa fu Akia. No wan sma ben sabi tak' Yonatan ben gwe.

4Fu ben kan doro a wakti-oso fu den Filistijnsrudati, Yonatan ben teki wan smara pasi mindri den bergi. Na ala tu sei fu a smara pasi disi tu smara èn hei bergi ben de. A wan den ben e kari Boses nanga a trawan Senne. 5Wan fu den ben tnapu na noordsei, abrasei fu Mikmas, èn a trawan ben tnapu na zuidsei, abrasei fu Geba. 6Dan Yonatan taigi a srudati di ben e syow den fetisani fu en taki: “Kon, meki wi abra go na a wakti-oso fu den man dati di no besnei. Kande MASRA sa yepi wi. Bika MASRA kan gi wini nanga pikinso sma, leki fa A kan gi nanga furu sma.” 7A srudati piki en taki: “Du ala san yu firi fu du. Mi de nanga yu, awinsi san yu wani du!” 8Dan Yonatan taigi en taki: “Yere san wi o du. Wi o abra go na den man, dan wi o meki den si unu. 9Efu den taigi wi tak' wi mus tan tnapu èn tak' den o kon na wi, wi o tan tnapu pe wi de èn wi no o kren go na den. 10Ma efu den taigi wi tak' wi mus kren kon na den, wi o kren go. Bika dati o de a marki gi wi tak' MASRA gi den abra ini wi makti.” 11Di den meki den Filistijnsrudati fu a wakti-oso si den, den Filistijnsrudati taki: “Luku, den Hebrewsma e kmoto ini den olo pe den ben go kibri.” 12Dan den srudati fu a wakti-oso bari taigi Yonatan nanga a srudati di ben syow den fetisani fu en taki: “Un kren kon na loktu, dan wi o sori unu!” Ne Yonatan taigi a srudati taki: “Kren kon na mi baka, bika MASRA gi den abra ini a makti fu Israel.” 13Tapu en anu nanga futu Yonatan kren go na loktu, èn a srudati di ben syow den fetisani fu en, ben de na en baka. Di Yonatan doro, a naki den Filistijnsrudati trowe na gron, èn a srudati di ben de na en baka, ben e kiri den. 14Ini a fosi feti disi, Yonatan nanga en srudati kiri tutenti srudati. A feti disi ben feti tapu wan pikin pisi gron nomo, afu fu a gron di tu kaw man drai ini wan dei. 15Ala den Filistijnsrudati kon frede: den wan di ben de ini a legrekampu, den wan di ben de ini a wei, den wan na a wakti-oso nanga den wan di ben go fufuru èn broko den sani fu den Israelitisma. Dan a gron seki èn ala den Filistijnsma ben e frede srefsrefi.

16Den srudati fu Saul di ben e hori wakti na Gibea ini a kontren fu a lo fu Benyamin, si san psa. Den si fa bruya ben kon ini a kampu fu den Filistijnsma. 17Dan Saul komanderi den srudati di ben de na en taki: “Un kari ala den srudati kon na wan, dan un luku suma no de dyaso.” Di den du dati, den si tak' na Yonatan nanga a srudati di ben e syow den fetisani fu en, no ben de drape. 18Ne Saul taigi priester Akia taki: “Tyari a santa kisi fu Gado kon dyaso.” A pisten dati a santa kisi fu Gado ben de ini a legrekampu fu den Israelitisma. 19Ma di Saul e tak' nanga a priester, a dyugudyugu ini a legrekampu fu den Filistijnsrudati ben e kon moro tranga. Dat' meki Saul taigi a priester taki: “Yu no abi fu go doro!” 20Dan Saul kari ala den srudati di ben de nanga en kon na wan. Ma di den doro na a presi fu a feti den si taki wan bigi bruya ben de mindri den Filistijnsrudati taki den ben e feti nanga densrefi. 21Boiti dati, den Hebrewsma srefi, di ben de langa ten kba na den Filistijnsma èn di ben de ini a legre fu den, teki a sei fu den srudati fu Israel, di ben de nanga Saul nanga Yonatan. 22Ala den srudati fu Israel di ben go kibri ini a bergikontren fu Efraim, yere taki den Filistijnsrudati ben e lowe èn densrefi bigin lon baka den Filistijnsrudati. 23Na so MASRA ferlusu Israel a dei dati.

A feti feti go te psa Bet-Awen. 24A dei dati ben de wan hebi dei gi den srudati fu Israel, bika Saul ben meki den srudati meki wan sweri taki: “Wan fluku sa de tapu a man di nyan fosi neti tapu èn fosi mi puru mi atibron tapu den feyanti fu mi.” Dat' meki no wan fu den srudati ben nyan wan sani. 25Dan ala den srudati kon doro ini wan busi nanga furu godo di ben e dropu oni. 26Di den doro ini a busi, den si fa a oni ben e dropu. Ma no wan fu den no langa en anu fu nyan fu a oni, fu di den ben frede a sweri. 27Ma Yonatan no ben yere taki en p'pa ben meki den srudati meki wan sweri. So a langa a tiki di a ben hori na en anu, a dyuku en go ini wan fu den godo, dan a nyan fu a oni. A srefi momenti a kisi krakti baka. 28Ma wan fu den srudati taigi en taki: “Yu p'pa ben meki wi meki wan sweri taki wan fluku sa de tapu a man di nyan tide. Dat' meki wi swaki so fu angri.” 29Ne Yonatan taki: “Na soso problema mi p'pa e tyari gi wi pipel. Luku fa mi kisi krakti baka di mi nyan pikinso fu a oni. 30Efu den srudati ben nyan tide fu den sani di den feyanti libi na baka, a wini bo moro bigi.”

31A dei dati den srudati fu Israel fon den Filistijnsrudati fu Mikmas go te na Ayalon, aladi den ben weri srefsrefi. 32Dan den lon go grabu den sani di den Filistijnsrudati ben libi na baka. Den grabu skapu, krabita, kaw, bigiwan nanga pikinwan, den srakti den leti drape na gron èn den nyan a meti nanga ala a brudu. 33Dan wan sma go taigi Saul taki: “Luku, den srudati e sondu. Den e du san MASRA no wani. Den e nyan meti nanga ala a brudu.” Ne Saul taigi den taki: “Un e sondu. Un lolo wan bigi ston wantron kon gi mi.” 34Saul taigi den moro fara taki: “Panya a boskopu disi gi den srudati taki iniwan fu den mus tyari en kaw noso en skapu kon na mi fu srakti en dyaso tapu a ston. Baka dati den kan nyan en sondro taki den sondu. Ma den no mus sondu fu du san MASRA no wani, fu nyan en nanga ala a brudu.” A neti dati iniwan fu den srudati tyari a meti di a ben teki go srakti tapu a ston. 35Saul bow wan altari gi MASRA. A ben de a fosi altari di a ben bow gi MASRA.

36Saul ben taigi den srudati tu taki: “Meki wi go tide neti na baka den Filistijnsrudati. Dan wi o feti nanga den te mamanten. No wan fu den mus tan na libi.” Den srudati piki en taki: “Du san yu si tak' bun.” Ma dan a priester taigi den taki: “Meki wi taki nanga Gado fosi.” 37Dan Saul aksi Gado taki: “Mi kan go na baka den Filistijnsrudati? Yu o gi den abra ini a makti fu Israel?” Ma Gado no piki Saul a dei dati. 38Ne Saul taki: “Meki ala den edeman fu a pipel kon dyaso. Wi o ondrosuku sortu sondu psa dyaso tide. 39Bika mi e sweri na a libilibi MASRA, di e ferlusu Israel, tak' awinsi na mi eigi boi Yonatan, a o dede.” Ma no wan sma no piki en. 40Dan Saul taigi ala den srudati taki: “Un go tnapu na wan sei èn mi nanga Yonatan o go tnapu na a tra sei.” Den piki en taki: “Du san yu si tak' bun.” 41Dan Saul aksi MASRA taki: “Gado fu Israel, tyari kon na krin suma sondu.” A lot sori go na a sei fu Saul nanga Yonatan. Den srudati no ben sondu. 42Ne Saul taki: “Un fringi a lot fu a sori efu na mi noso Yonatan.” Dan a lot sori taki na Yonatan. 43Dan Saul taigi Yonatan taki: “Taigi mi san yu du.” Yonatan taigi en taki: “A tru taki mi sutu a tiki fu mi ini wan fu den godo èn nyan pikinso fu a oni di ben de na a tiki. Ma dyaso mi de, mi de klari fu dede.” 44Ne Saul piki taki: “We, Gado kan strafu mi hebi, Yonatan, efu mi no kiri yu.” 45Ma den srudati piki Saul taki: “Yu no kan kiri Yonatan bika na en meki Israel teki sowan bigi wini tide. Dati no o psa srefsrefi. Wi e sweri na a libilibi MASRA taki fasi srefi yu no o fasi en. Bika na Gado ben yepi en fu a ben kan wini tide.” Na so den srudati yepi Yonatan fu a no dede. 46Saul no hari go baka den Filistijnsrudati moro èn den Filistijnsrudati go na den eigi kontren baka.

47Baka di Saul ben teki a frantwortu na en tapu fu tiri Israel, a feti nanga ala den feyanti fu den di ben e libi lontu den. A feti nanga den Moabitisma, den Amonitisma, den Edomitisma, den kownu fu Soba nanga den Filistijnsma. Alasei pe Saul ben e go, a ben e wini. 48A ben e feti leki wan dyadya fetiman. A wini den Amalekitisma, èn a ferlusu den Israelitisma puru ini a makti fu den feyanti fu den di ben e kon fufuru den sani. 49Den manpikin fu Saul ben de Yonatan, Yiswi nanga Malkisua. A ben abi tu umapikin tu. A moro owru wan ben nen Merab, èn a yongu wan Mikal. 50A wefi fu Saul ben nen Akinoam. A ben de a umapikin fu wan man di ben nen Akimaas. A edeman fu a legre fu Saul ben nen Abner, a manpikin fu Ner. Ner ben de wan omu fu Saul. 51A p'pa fu Saul ben nen Kis. Kis nanga Ner, a p'pa fu Abner, ben de manpikin fu Abiyel. 52A heri ten di Saul ben de na makti, a feti fayafaya nanga den Filistijnsma. Dat' meki ala dyadya man nanga man di ben abi dek'ati, di Saul ben e si, a ben e poti ini a legre fu en.

15

Gado no wani Saul moro leki kownu

151Wan leisi Samuel taigi Saul taki: “Na mi MASRA ben seni fu salfu yu leki kownu fu En pipel, leki kownu fu Israel. We dan, arki san MASRA abi fu taki! 2Na disi MASRA fu ala sani e taki: Mi o strafu den Amalekitisma fu di den ben tapu pasi gi den Israelitisma, di den ben e kmoto fu Egipte. 3Dat' meki yu mus hari go feti nanga Amalek. Yu mus kiri èn pori ala sani di den abi. No abi sari-ati gi den. Yu mus kiri man nanga uma, yongu pikin nanga nyunyun pikin, kaw, skapu, kameel nanga buriki.” 4Ne Saul seni kari ala den srudati fu Israel fu kon na Telaim. Makandra den ben de tu hondro dusun srudati di ben de nanga futu, nanga ete tin dusun srudati fu Yuda. 5Di Saul nanga a legre doro na a foto fu den Amalekitisma, den go didon luru ini wan pikin drei liba. 6Dan Saul seni warskow den Kenitisma taki: “Un kmoto drape. Un kmoto mindri den Amalekitisma, fu mi no kiri un makandra nanga den. Un ben bun gi den Israelitisma di den ben kmoto na Egipte.” Wantron den Kenitisma kmoto na mindri den Amalekitisma. 7Baka dati Saul nanga a legre kiri den Amalekitisma fu Hawila te go miti Sur, na oostsei fu Egipte. 8Agag, a kownu fu den Amalekitisma, den grabu libilibi. Ala den tra Amalekitisma den kiri nanga deigri. 9Ma Saul nanga den srudati fu en no kiri Agag. Den no kiri den moro bun skapu, krabita nanga kaw tu. Fu san ben libi ete den teki den bun yongu skapu nanga ala sani di ben abi warti. Den sani dati den no ben wani kiri noso pori. Soso den meti di no ben abi warti nanga den wan di no ben bun, den kiri.

10Ne MASRA taigi Samuel taki: 11“A e hati Mi tak' Mi meki Saul tron kownu. Bika a drai en baka gi Mi èn a no du san Mi ben komanderi en.” Samuel atibron, èn a begi MASRA a heri neti dati. 12Fruku mamanten Samuel gwe fu go miti Saul. Ma den taigi en taki Saul ben go na Karmel fu go poti wan marki drape fu sma memre a feti di a ben wini, dan baka dati a ben saka go na Gilgal. 13Di Samuel kon miti nanga Saul, Saul taigi en taki: “Meki MASRA blesi yu. Mi du san MASRA ben komanderi mi.” 14Ma Samuel piki en taki: “Dan san wani taki a babari fu skapu nanga kaw di mi e yere drape?” 15Saul piki taki: “Dati na den moro bun skapu, krabita nanga kaw, di den srudati tyari kmoto fu den Amalekitisma. Den no kiri den meti disi fu di den wani gi den leki ofrandi na MASRA, a Gado fu yu. Ma ala den trawan wi kiri.” 16Ne Samuel taigi Saul taki: “Tan tiri, dan mi o taigi yu san MASRA taigi mi esde neti.” Saul piki taki: “Yu kan taki.” 17Dan Samuel taigi en taki: “Aladi yu ben e si yusrefi leki noti, yu tron a edeman fu den lo fu Israel. Na yu MASRA salfu leki kownu fu Israel. 18MASRA ben komanderi yu fu yu go feti nanga den ogri-atisma, den Amalekitisma. Yu ben mus feti nanga den èn kiri den te leki no wan ben de na libi moro. 19Prefu yu du san MASRA taigi yu fu du, yu go teki den sani fu den èn yu du san no bun ini MASRA ai srefsrefi.” 20Ne Saul piki Samuel taki: “Mi du san MASRA taigi mi, mi go pe A ben seni mi go. Mi kiri ala den Amalekitisma èn mi grabu Agag, a kownu fu den, tyari kon dyaso. 21Ma den srudati teki den moro bun skapu, krabita nanga kaw, di den ben mus kiri, fu gi den leki ofrandi ini Gilgal, na MASRA, a Gado fu yu.” 22Ma Samuel piki en taki: “MASRA no abi a srefi prisiri te sma e bron meti leki ofrandi gi En nanga te sma e du san A e taki. Arki, fu du san MASRA taki, betre moro dan fu srakti meti leki ofrandi. Fu arki san A e taki, betre moro a fatu fu man skapu. 23Fu tru, efu yu no wani du san MASRA e taki, a de a srefi leki te yu e du tofruwroko. Efu yu no wani arki san MASRA e taki, a de a srefi leki te yu e dini kruktu gado. Fu di yu no du san MASRA ben komanderi yu, MASRA poti yu na wan sei, yu no sa de kownu moro langa.” 24Dan Saul piki Samuel taki: “Mi sondu, bika mi no du san MASRA ben komanderi mi èn san yu ben taigi mi. Ma fu di mi ben e frede den srudati, mi du san den ben wani. 25Ma now mi e begi yu fu yu kan gi mi pardon fu mi sondu. Drai go baka nanga mi, dan mi sa anbegi MASRA.” 26Ma Samuel piki en taki: “Mi no sa drai go baka nanga yu. Bika yu ben poti san MASRA komanderi yu na wan sei, dat' meki A poti yu na wan sei tu. Yu no sa de kownu fu Israel moro langa.” 27Di Samuel drai fu gwe, Saul grabu a ondrosei pisi fu a langa dyakti fu Samuel ori. Ma a pisi dati priti kmoto. 28Ne Samuel taigi en taki: “Leki fa a krosi priti kmoto, na so MASRA e puru yu tide leki kownu fu Israel. A o poti wan tra sma di betre moro yu. 29A Gado fu Israel di e tan a srefi fu têgo, no e lei. A no e kenki wan besroiti tu di A teki. Bika En a no libisma, taki a sa kenki a besroiti di A teki.” 30Ma Saul taigi Samuel taki: “Mi sondu, ma no meki mi fesi fadon fesi den edeman fu a legre èn fesi den tra Israelitisma. Drai go baka nanga mi, dan mi sa anbegi MASRA, yu Gado.” 31Ne Samuel drai go baka nanga Saul. Dan Saul anbegi MASRA.

32Baka dati Samuel taki: “Un tyari kownu Agag fu Amalek kon gi mi.” Nanga prisiri Agag waka go miti Samuel, dan a taki: “Fu tru, mi no abi fu frede moro tak' mi o dede.”15:32 A Hebrewtekst fu a pisi disi no krin. 33Ma Samuel piki en taki: “Soleki fa a deigri fu yu meki uma lasi den pikin, na so yu m'ma o tron wan uma tu di lasi en pikin.” Dan Samuel kapu Agag pis'pisi fesi a santa presi fu MASRA na Gilgal.

34Baka dati Samuel drai go baka na Rama, èn Saul drai go na en oso na Gibea, a foto pe a ben gebore. 35Noiti moro Samuel ben wani si Saul, ma a ben e sari fu Saul ede. A ben hati MASRA taki A ben poti Saul leki kownu fu Israel.

16

Samuel e salfu David leki kownu

161Dan MASRA taigi Samuel taki: “No sari moro langa fu Saul ede, bika na Mi poti en na wan sei leki kownu fu Israel. Furu a tutu fu yu nanga oleif-oli, dan yu e go gi Mi na Betlehem, na wan man di nen Isai. Bika na wan fu den boi fu en Mi teki fu poti leki kownu.” 2Ma Samuel aksi taki: “Fa mi o man go du a sani dati drape? Efu Saul yere, a o kiri mi.” Ma MASRA piki en taki: “Tyari wan yongu kaw te yu e go, èn taigi den sma tak' na srakti yu kon srakti en leki wan ofrandi gi MASRA. 3Yu mus kari Isai te yu o tyari a ofrandi. Dan Mi o meki yu sabi san yu mus du. Na a sma di Mi o sori yu, yu mus salfu gi Mi.” 4Samuel du san MASRA taigi èn a go na Betlehem. Di a doro drape, den edeman fu a foto waka kon miti en nanga beifi ati. Den aksi en taki: “Na bun nyunsu yu tyari kon?” 5Samuel piki den taki: “Iya, mi kon fu srakti wan meti leki ofrandi gi MASRA. Un krin unsrefi dan un kan nyan fu a ofrandi nanga mi.” Samuel kari Isai nanga den boi fu en tu èn ensrefi krin den fu den ben kan teki prati. 6Di den e kon na inisei, en ai fadon tapu Eliab. Dan Samuel prakseri taki: “Na en mus de a wan di MASRA wani tak' mi mus salfu.” 7Ma MASRA taigi en taki: “No luku fa a moi noso fa a bigi, bika a no en Mi wani. A no prenspari fa libisma e si sani, bika libisma e luku san den ai e si, ma MASRA e luku a ati.” 8Dan Isai kari Abinadab, èn a meki a go na Samuel. Ma Samuel taki: “MASRA no wani a disi tu.” 9Baka dati Isai meki Sama go na Samuel. Ma Samuel taki: “A disi srefi MASRA no wani.” 10Na so Isai ben meki den seibi boi fu en go na Samuel. Ma Samuel taigi Isai taki: “MASRA no teki no wan fu den disi.” 11Dan Samuel aksi Isai taki: “Na disi na ala den boi fu yu.” Isai piki en taki: “A moro yongu wan mankeri. A de ini a wei e luku den skapu.” Dan Samuel taigi Isai taki: “Un seni kari en, bika un no o nyan solanga a no kon.” 12So Isai seni kari en. A boi ben luku gesontu, a ben abi moi ai, èn a ben moi fu si. Ne MASRA taigi Samuel taki: “Na en na a wan, salfu en.” 13So Samuel teki a tutu nanga oleif-oli, dan a salfu David leti pe den brada fu en tnapu. Bigin fu a dei dati a yeye fu MASRA kon tapu David, èn a no gwe libi en moro. Baka dati Samuel drai go baka na Rama.

David go wroko gi Saul

14Ma a yeye fu MASRA ben gwe libi Saul, èn MASRA ben seni wan takruyeye di ben e pina en. 15Ne den knekti fu Saul taigi en taki: “Na wan takruyeye di Gado seni, e pina yu. 16Taigi wi leki knekti di e wroko gi yu, fu un go suku wan sma di man prei bun tapu wan citer. Dan te a takruyeye, di Gado seni, kon na yu tapu, a sma mus prei, dan yu o firi betre.” 17Ne Saul taigi den knekti fu en taki: “A bun, un luku fu wan sma di kan prei bun, dan un tyari en kon gi mi.” 18Dan wan fu den knekti taki: “Mi sabi wan sma di kan prei bun. Na wan manpikin fu Isai, wan man fu Betlehem. Na wan moi boi di abi dek'ati, a de wan bun fetiman èn a sabi taki bun. MASRA de nanga en.” 19Dan Saul seni boskopuman go na Isai nanga a boskopu disi: “Seni yu manpikin David gi mi, di e luku den skapu fu yu.” 20Dan Isai gi David wan buriki, brede, wan saka nanga win nanga wan yongu bokoboko fu tyari go gi Saul. 21Na so David doro Saul èn bigin wroko gi en. Saul ben lobi David trutru, èn a poti David fu syow den fetisani fu en. 22Dan Saul seni aksi Isai tu taki: “Meki David tan wroko gi mi, bika mi lobi fa a de.” 23Ala leisi te a takruyeye di Gado ben seni, ben kon tapu Saul, David ben e teki a citer èn a ben e prei. Dati ben e du Saul bun, a ben e firi betre baka èn a takruyeye ben e gwe libi en.