Sranan Tongo Bible 2016 (STB16)
4

Un mus libi santa

41Brada nanga sisa, now mi wani taki wan tra sani. Wi ben leri unu fa un mus libi fu gi Gado prisiri, èn un e libi so tu. Ma wi wani aksi unu tangitangi ini a nen fu Masra Yesus, fu un du dati moro ete. 2Un sabi den sani di wi ben leri unu nanga a makti di Masra Yesus gi wi. 3Bika Gado wani fu un libi wan santa libi. Un no mus gi unsrefi abra na takru lostu. 4Ala sma mus basi en skin. So un mus tyari unsrefi tapu wan santa èn lespeki fasi.4:4 Un kan puru a pisi disi so tu: Ala man mus teki en eigi uma. A mus libi wan santa fasi nanga en, èn a mus lespeki en. 5Un no mus libi nanga morsu prakseri, soleki fa den sma e du di no sabi Gado. 6Un no mus puru san wan tra bribisma abi na en anu, noso bedrigi a tra bribisma ini den sani disi. Bika wi ben taigi unu krinkrin kba, èn wi ben warskow unu taki Masra e strafu den sortu sma disi. 7Gado no kari unu fu un libi wan doti libi, ma fu un libi wan santa libi. 8Fu dat'ede a sma di e poti den sani san wi leri unu na wan sei, no e poti wan libisma na wan sei. Ma na Gado a e poti na wan sei di gi unu En Santa Yeye.

9A no de fanowdu fu mi skrifi unu taki, leki brada nanga sisa, un mus lobi unsrefi. Bika un srefi leri fu Gado tak' un mus lobi makandra. 10Èn a de so tu taki un e sori a lobi fu unu na ala den bribisma ini heri Masedonia. Ma brada nanga sisa, wi wani aksi unu tangitangi fu sori a lobi disi moro ete. 11Soleki fa wi ben taigi un kba, un mus si en leki wan grani fu libi wan tiri libi, fu bemui nanga un eigi tori, èn fu wroko fu sorgu unsrefi. 12Na sowan fasi den sma di no e bribi, o lespeki unu te den e si fa un e libi, èn un no o abi fu go suku yepi na sma.

Te Masra o kon baka

13Brada nanga sisa, wi wani fu un sabi san o psa nanga den bribisma di dede kba, fu un no sari leki den tra sma di no abi howpu. 14Wi e bribi taki Yesus dede èn tak' A kon baka na libi. Dat' meki wi e bribi tu taki te Yesus e kon baka, Gado o meki den bribisma di dede kba, kon baka nanga En. 15Wi e taigi un taki: Te Masra o drai kon baka, dan unu di de na libi ete no o gwe go miti En fosi den bribisma di dede kba. Na Masra srefi taki so.

4:15-17
1Kor 15:51-52
16Bika Masra o komanderi, dan wan fu den moro prenspari engel o opo en sten, èn a tutu fu Gado o bro. Dan Masra srefi o saka kmoto fu heimel èn den bribisma di dede kba o kon baka na libi fosi. 17Baka dati wi di de na libi ete, o opo gwe makandra nanga den na loktu fu go miti Masra na tapu den wolku. Na so wi sa de ala ten nanga Masra. 18Fu dat'ede un mus trowstu makandra nanga den wortu disi.

5

Un mus de na ai

51Brada nanga sisa, a no de fanowdu fu wi skrifi unu oten nanga sortu yuru a sani disi o psa. 2Bika un srefi sabi heri bun taki a dei fu Masra o kon leki fa wan fufuruman e kon na neti.

5:2
Mat 24:43
Luk 12:39
2Pe 3:10
3A ten di den sma e taki: “Ala sani e go bun, ala sani e waka switi,” dan wantron so bigi ogri o miti den èn yepi no o de gi den. Den no o sabi na fesi, neleki fa wan bere-uma no sabi na fesi oten en bere o hati en fu meki a pikin. 4Brada nanga sisa, un dati no de na dungru. Dat' meki a dei fu Masra no o kisi unu leki wan fufuruman. 5Bika un alamala na sma fu a leti, sma fu deiten. Wi no de fu a dungru, wi no de fu neti. 6Fu dat'ede wi no mus sribi leki den tra sma, ma wi mus de na ai, èn wi ai mus krin. 7Bika te neti yu abi sma di e sribi èn tra sma di e dringi drungu. 8Ma meki wi di de fu deiten, de nanga krin ai. Un mus weri a bribi nanga a lobi di wi abi leki wan isri bosroko5:8 Na ini Bakratongo den e kari en wan harnas. fu kibri wi. Sosrefi un mus teki a howpu san wi abi tak' Gado o ferlusu wi, weri na wi ede leki wan fet'musu.
5:8
Yes 59:17
Efe 6:13-17
9Bika Gado no meki wi fu strafu wi, ma fu wi kisi a libi fu têgo tangi fu wi Masra Yesus Kristus. 10A dede fu wi ede fu wi sa libi fu têgo makandra nanga En, awinsi wi dede, noso efu wi de na libi ete te A e drai kon baka. 11Dat'ede un mus tan gi makandra dek'ati, èn tan yepi makandra, soleki fa un e du kba.

Den kriboi boskopu nanga odi

12Brada nanga sisa, wi e begi unu fu lespeki den sma na un mindri di e meki tranga muiti nanga unu, di e tiri unu na ini a nen fu Masra, èn di e taki nanga unu te un meki wan fowtu. 13Un mus abi furu lobi gi den fu a wroko san den e du. Un mus libi ini freide nanga makandra tu. 14Brada nanga sisa, wi e aksi unu tangitangi fu un taigi den sma di no wani wroko taki den mus fu wroko. Den sma di fredefrede, un mus gi dek'ati. Un mus yepi den sma di swaki, èn un mus abi pasensi nanga ala sma. 15Un mus sorgu taki no wan sma no pai ogri nanga ogri. Ma ala ten un mus suku fu du bun gi makandra, nanga gi ala tra sma. 16Ala ten un mus e prisiri. 17Un mus tan begi sondro fu kon weri. 18Awinsi san e psa, un mus gi Gado tangi. Bika na dati Gado wani fu unu di de wan nanga Kristus Yesus. 19Un no mus tapu a Santa Yeye fu du En wroko. 20Efu Gado gi wan sma wan wortu fu taki, un no mus poti a wortu na wan sei. 21Ma un mus ondrosuku a sani san a sma taki, èn un mus teki san bun. 22Un mus tan fara fu ala sortu ogri. 23Wi e begi taki Gado di e gi freide, sa meki un kon santa ini ala fasi. Dan un heri yeye, sili nanga skin sa de sondro fowtu te wi Masra Yesus Kristus drai kon baka. 24Un kan fertrow a Gado di kari unu. A e du san A pramisi.

25Brada nanga sisa, un begi tu gi wi. 26Gi ala den brada nanga sisa odi gi wi nanga wan santa bosi. 27Mi e begi un tangitangi ini a nen fu Masra, fu un leisi a brifi disi gi ala den bribisma. 28Meki a bun-ati fu wi Masra Yesus Kristus de nanga unu.