Sranan Tongo Bible 2016 (STB16)
2

Fa den bribisma mus begi

21A fosi sani san mi wani aksi yu fu du, na fu begi gi ala sma. Tyari den nowtu kon na fesi Gado, taki nanga Gado gi den, èn gi Gado tangi. 2Begi gi den kownu nanga ala den sma di abi wan hei presi ini a kondre. Na so wi o man libi safri na tapu wan tiri fasi. Wi o man libi leki fa Gado wani èn du sani san abi warti. 3A bun fu du a sani disi, èn Gado wi Ferlusuman lobi te wi e begi so. 4Bika A wani ferlusu ala sma, èn A wani taki den kon ferstan a tru leri. 5Bika na wan Gado nomo de, èn na wan Mindriman nomo de di e tyari Gado nanga libisma kon na wan. A man dati na Kristus Yesus. 6Na Yesus ben gi En libi fu ala sma kan kon fri. Dati na a boskopu di Gado seni kon di a yoisti ten doro. 7Èn Gado poti mi leki boskopuman fu panya a boskopu disi. A poti mi fu leri den sma di no de Dyu abra a bribi nanga a tru leri. A sani disi tru, mi no e lei.

2:7
2Tim 1:11

8Mi wani taki na ala presi, den mansma mus opo santa anu go na loktu te den e begi. Den no mus de nanga atibron, noso e libi ini trobi. 9Moro fara mi wani taki den umasma no mus weri krosi san e poti den skin na doro. Den mus weri bun soleki fa a fiti. Den no mus wani fu sma si den fu di den e brei moi wiwiri, noso fu di den e weri gowtu sani, parelkrara noso dir'diri krosi. 10Ma sma mus e si den fu di den e du bun wroko, bika na so a fiti wan umasma di e taki tak' a e libi leki fa Gado wani.

2:9-10
1Pe 3:3-4
11Te wan umasma e teki leri, a mus tan tiri èn a mus arki nanga sakafasi. 12Mi no e gi umasma pasi fu gi leri noso fu abi makti tapu mansma. Den mus de tiri. 13Bika Gado meki Adam fosi èn baka dati A meki Eva.
2:13
Gen 2:7,21-23
14A de so tu tak' a no Adam meki didibri kisi en, na a uma meki didibri kisi en fu du sondu.
2:14
Gen 3:1-6
15Ma Gado o ferlusu en fu di a e tyari pikin kon na grontapu, efu a e tan hori a bribi, lobi tra sma, èn libi santa soleki fa a fiti.2:15 Kande san Paulus e taki dya na fu den sma di ben taki tak' fu kisi pikin na wan sondu, fu di wan libisma skin takru.

3

Den tiriman fu a gemeente

31San mi e taki now de fu fertrow. Efu wan sma wani tron tiriman fu a gemeente, dan na wan tumsi bun sani a wani. 2Wan tiriman fu a gemeente mus abi wan bun nen èn a mus abi wan uma nomo.3:2 Un kan puru a pisi disi so tu: a mus de wan man di trow wan leisi nomo. A mus de nanga krin ai, a mus abi wan krin ferstan, èn a mus abi bun maniri. A doro fu en mus opo gi ala sma, èn a mus man gi leri.

3:2-7
Tit 1:6-9
3A no mus de wan sma di lobi dringi, èn a no mus de wan sma di e kisi atibron es'esi, ma a mus abi switi maniri. A no mus de wan trobiman, èn a no mus gridi fu moni. 4A mus de wan bun tiriman na ini en eigi oso, di e leri den pikin fu en tapu wan lespeki fasi fu du san a wani. 5Bika efu wan sma no man tiri en eigi oso, fa a sa man sorgu gi a gemeente fu Gado dan? 6Wan tiriman fu a gemeente mus de wan sma di drai en libi langa ten kba. Bika a kan kisi bigifasi, dan a o kisi a srefi strafu leki didibri. 7A mus abi wan bun nen na den sma di no e bribi, fu a no kisi pori nen èn fu didibri no man kisi en.

Den dinari fu a gemeente

8Den dinari fu a gemeente mus de sma tu di trawan kan lespeki. Den no mus de leki wan tumofo gon, den no mus lobi dringi furu win, èn den no mus suku fu abi wini tapu wan fasi di no fiti. 9Ma nanga wan krin konsensi den mus hori densrefi na den kibrisani san Gado sori wi fu a bribi. 10Fosi den sma disi tron dinari fu a gemeente, sma mus luku efu den fiti fu du a wroko. Baka te a sori taki den o man, dan yu kan poti den leki dinari. 11A mus de a srefi nanga den uma.3:11 A kan dati Paulus e taki fu den uma fu den dinari fu a gemeente, noso fu uma di e du a wroko leki dinari fu a gemeente. Den mus de sma di trawan kan lespeki. Den no mus waka e pori trawan nen, ma den mus de nanga krin ai, èn den mus de fu fertrow na ini ala sani. 12Den dinari fu a gemeente mus abi wan uma nomo.3:12 Un kan puru a pisi disi so tu: mus de wan man di trow wan leisi nomo. Den mus kweki den pikin fu den bun èn sorgu bun gi den eigi oso. 13Bika den dinari di e du den wroko bun, e meki sma kisi lespeki gi den. Den sa man taki fri fu a bribi ini Kristus Yesus.

A tru leri fu Gado

14Mi e skrifi yu den sani disi aladi mi e howpu fu kon her'esi na yu. 15Efu mi tan tumsi langa fu kon, yu sabi fa den sma mus tyari densrefi ini a oso fu Gado, sobun a gemeente fu a libilibi Gado. Na a gemeente e tyari a tru leri èn na en na a stonfutu fu en. 16Fu tru, den kibrisani san Gado sori wi fu a bribi, bigi psa marki:

Yesus kon leki libisma.

A Santa Yeye sori taki A bun ini Gado ai.

Den engel si En.

Den preiki fu En na ala den folku.

Sma bribi ini En na ala sei fu grontapu.

Èn Gado teki En go na ini a glori fu heimel.

4

Den kruktu leriman

41Ma a Yeye e taki krin tak' na den kriboi dei son sma o gwe libi a bribi. Den o bribi den yeye di e kori sma, èn den o bribi sani san takruyeye e leri den. 2Den leri disi e kmopo fu sma di e du leki den santa, ma na soso lei den e lei èn na so den tapu a sten fu den konsensi. 3Den e leri taki sma no mus trow èn taki den no mus nyan ala sani. Ma na Gado meki den sani disi, èn ala bribisma di kon ferstan a tru leri kan nyan den nanga tangi. 4Bika ala sani san Gado meki, bun. Wi kan nyan ala sani, solanga wi e taki Gado tangi te wi e nyan en. 5Bika a wortu fu Gado nanga a begi di wi e begi, e meki taki a kon bun fu nyan.

Wan bun wrokoman fu Kristus

6Yu mus leri den brada nanga sisa den sani disi, dan yu o de wan bun wrokoman fu Kristus Yesus di kweki ini den tru sani fu a bribi nanga a bun leri san yu e hori. 7Ma yu no mus lasi yu ten nanga lawlaw taki di no abi noti fu du nanga Gado. Teki ala ten èn du ala muiti fu libi leki fa Gado wani. 8Fu tan wroko na a skin no e tyari furu yepi. Ma fu libi leki fa Gado wani abi warti na ala fasi, fu di a sani dati e pramisi yepi gi yu libi dya nanga gi a libi san mus kon. 9San mi e taki now de fu fertrow èn un kan bribi en nanga un heri ati. 10Iya, dat'ede wi e meki someni muiti èn wi e wroko tranga, bika wi poti wi fertrow na tapu a libilibi Gado di de a Ferlusuman fu ala sma, ma funamku fu den bribisma.

11Leri den sma a sani disi èn komanderi den taki den mus du so. 12No meki no wan sma si yu leki noti fu di yu yongu. Ma yu mus de wan eksempre gi den bribisma ini a fasi fa yu e taki, a fasi fa yu e libi, sosrefi na ini lobi, nanga bribi, nanga wan krin libi. 13Poti yusrefi fu leisi a wortu fu Gado gi den bribisma. Kraka den èn gi den leri te leki mi kon. 14Di den fesiman fu a gemeente ben poti anu na yu tapu, èn di sma taki san Gado gi den fu taki abra yu, yu kisi wan presenti fu a Santa Yeye. Wroko nanga en. 15Du den sani disi, tan du den nanga yu heri ati. Dan so ala sma sa si taki yu e go na fesi. 16Luku bun fa yu e libi èn san yu e leri. Tan hori doro ini den sani disi. Sofasi yu e yepi yusrefi nanga den sma di e arki yu.