Sranan Tongo Bible 2016 (STB16)
13

Kownu Abia fu Yuda

131Di Yerobeam ben de tin-na-aiti yari na makti, Abia tron kownu fu Yuda. 2A ben de dri yari na makti ini Yerusalem. En m'ma ben nen Mikaya èn a ben de wan umapikin fu Uriyel fu Gibea.

Abia nanga Yerobeam ben e feti nanga makandra. 3Abia hari go na a feti nanga wan legre fu fo hondro dusun dyadya fetiman. Yerobeam go miti en nanga wan legre fu aiti hondro dusun dyadya fetiman. 4Abia go tnapu tapu a Semaraimbergi, ini a bergikontren fu Efraim, dan a taki: “Yerobeam, yu nanga heri Israel, un arki mi! 5Na sabi un no sabi tak' nanga wan ferbontu di stampu nanga sowtu, MASRA, a Gado fu Israel, taki tak' David nanga den bakapikin fu en sa de kownu fu Israel fu têgo. 6Ma Yerobeam, a manpikin fu Nebat, no ben wani saka ensrefi moro ondro en basi Salomo, a manpikin fu David. 7Makandra nanga wantu takru-ati man di no warti srefsrefi, a kaka futu gi Rekabeam, a manpikin fu Salomo. Rekabeam ben yongu èn a no ben abi dek'ati ete, dat' meki a no ben sabi san fu du. 8Un prakseri taki un o man feti MASRA fu puru den bakapikin fu David leki kownu, fu di yu kon nanga wan bigi legre nanga den gowtu bulu di Yerobeam meki gi unu leki gado? 9Srefi den priester fu MASRA, den bakapikin fu Aaron, nanga den Lefitiman, un yagi èn un poti un eigi priester neleki den tra folku. Ibrisma di ben kon nanga wan yongu bulu nanga seibi man skapu, ben kan tron priester gi den sani di no de gado. 10Ma gi wi, MASRA, na wi Gado. Wi no drai wi baka gi En. Den bakapikin fu Aaron e du a wroko leki priester fu MASRA èn den Lefitiman e yepi den du a wroko. 11Ala mamanten nanga ala neti den e bron meti leki ofrandi gi MASRA, nanga wierook di e smeri switi. Na den e poti den brede di mus poti spesrutu gi Gado, tapu a tafra fu lala gowtu èn na den e leti den lampu ini den gowtu kandelaar ala neti tu. Wi e hori wisrefi na den sani di MASRA, a Gado fu wi, komanderi wi, ma unu gwe libi En. 12Luku, na Gado srefi na wi edeman ini a feti èn den priester fu En tnapu klar'klari fu bro tapu den trompet fu gi a marki fu wi broko kon na un tapu. Israelitisma, un no feti nanga MASRA, a Gado fu den afo fu unu, bika un no o man wini a feti!”

13Ma a pisten dati Yerobeam ben meki wan pisi fu a legre fu en waka lontu fu kon baka a legre fu Yuda. A moro bigi pisi fu a legre fu en ben tnapu abra a legre fu Yuda èn a tra pisi ben de na den baka. 14Di den srudati fu Yuda drai luku den si tak' a feyanti ben de na den fesi nanga na den baka. Ne den kari MASRA fu yepi den. Den priester bro tapu den trompet 15èn den srudati fu Yuda meki wan fetibabari. Di den fetiman fu Yuda meki a fetibabari, Gado meki Yerobeam nanga a legre fu Israel lasi a feti fu Abia nanga a legre fu Yuda. 16A legre fu Israel lon gi a di fu Yuda èn Gado gi den abra ini a makti fu Yuda. 17Abia nanga den srudati fu en kiri bun furu fu den srudati fu Israel. Feifi hondro dusun fu den srudati fu Israel lasi den libi. 18Tapu a fasi dati Gado broko den sma fu Israel. Den sma fu Yuda wini fu di den ben poti den fertrow tapu MASRA, a Gado fu den afo fu den. 19Abia go na baka Yerobeam èn a teki sonwan fu den foto nanga den dorpu fu Yerobeam abra soleki: Betel nanga den dorpu fu en, Yesana nanga den dorpu fu en nanga Efron nanga den dorpu fu en. 20Noiti moro Yerobeam kisi nofo krakti baka fu go feti nanga Abia, solanga leki di Abia ben de na makti. Te fu kba MASRA meki a dede.

21Ma Abia ben e kisi makti moro nanga moro. A teki tin-na-fo uma fu libi èn a meki tutenti-na-tu manpikin nanga tin-na-siksi umapikin. 22Den tra sani di psa ini a libi fu Abia, a fasi fa a tyari ensrefi nanga den sani di a taki, skrifi poti ini a buku fu a profeiti Ido.

14

141Abia dede èn den beri en ini a foto fu David. En manpikin Asa teki en presi leki kownu. Di Asa ben de na makti, feti no feti ini a kondre tin yari langa.

Kownu Asa fu Yuda

2Asa ben e du san bun èn leti ini a ai fu MASRA, a Gado fu en. 3A puru den altari fu den tra gado nanga den presi pe den sma ben e tyari ofrandi, èn a naki den ston nanga den postu broko di den sma ben meki gi kruktu gado. 4A taigi den sma fu Yuda tak' den mus suku den yepi na MASRA, a Gado fu den afo fu den, èn tak' den mus du san a wèt nanga den gebod e taki. 5A puru den presi pe den sma ben e tyari ofrandi nanga den altari pe den sma ben e bron wierook ini ala den foto fu Yuda. Di Asa ben de na makti, freide ben de ini a kondre. 6Fu di freide ben de ini a kondre èn feti no ben e feti, Asa ben abi a okasi fu bow tranga foto na ini Yuda, bika MASRA ben meki taki freide ben de ini a kondre. 7A taigi den sma fu Yuda taki: “Meki wi meki den foto disi tron foto di tranga fu teki abra. Meki wi meki skotu lontu den nanga hei toren, doro nanga greni. A kondre na fu wi ete, fu di wi aksi MASRA, wi Gado, fu yepi wi èn A meki taki wi abi freide na alasei.” So den ben man bow sondro problema. 8Asa ben abi wan legre fu dri hondro dusun man fu a lo fu Yuda, di ben e waka nanga lansri nanga schild. A ben abi wan legre tu fu tu hondro nanga aititenti dusun man fu a lo fu Benyamin. Den man disi ben e waka nanga wan pikin schild èn di ben e sutu nanga peiri nanga bo. Ala den man disi ben de dyadya fetiman.

9Wan leisi Serak fu Nubia hari kon feti ini a kondre nanga wan legre fu wan milyun srudati nanga dri hondro fetiwagi. A ben doro te na Maresa. 10Dan Asa hari go miti en. Den tu legre seti densrefi fu feti ini a Sefatadal na Maresa. 11Dan Asa begi MASRA, a Gado fu en, fu yepi en. A taki: “MASRA, boiti Yu no wan sma de fu yepi den swakiwan te den mus feti nanga den wan di abi makti. Yepi wi MASRA, Gado fu unu, bika tapu Yu wi e fertrow èn ini Yu nen wi hari kon feti nanga a bigi legre disi. MASRA, Yu na wi Gado, no meki libisma opo fu feti Yu.” 12Dan MASRA meki a legre fu Nubia lasi a feti fu Asa nanga den sma fu Yuda. A legre fu Nubia ben abi fu lowe gi den. 13Asa nanga a legre fu en teki na den baka te kon miti Gerar. Den teki sowan bigi wini èn den kiri someni man fu a legre fu Nubia taki not'noti fu a legre ben tan abra fesi MASRA nanga a legre fu en. Den teki furu sani fu a legre fu Nubia tu. 14Baka dati den teki ala den foto ini a birti fu Gerar abra, fu di den sma dati ben frede srefsrefi gi MASRA. Den teki ala den sani gwe fu den foto dati di ben abi furu gudu. 15Den teki den tenti abra tu fu den man di ben e kweki èn den tyari furu skapu, krabita nanga kameel gwe. Baka dati den drai go na Yerusalem baka.

15

Asa e du a wani fu MASRA

151A Yeye fu Gado kon tapu Asarya, a manpikin fu Oded. 2Dan Asarya waka miti Asa èn a taigi en taki: “Asa, yu nanga ala den sma fu Yuda nanga Benyamin, un arki mi! MASRA de nanga unu solanga un de nanga En. Efu un suku En, A o meki un feni En, ma efu un gwe libi En, A o gwe libi un tu. 3Wan heri pisten Israel libi sondro a tru Gado, sondro priester di ben e gi leri èn sondro wèt. 4Ma te den ben de ini benawtu, den ben drai kon baka na MASRA, a Gado fu Israel èn te den ben e suku En, dan A ben e meki den feni En. 5Ini den ten dati no wan sma ben man go fu a wan presi na a trawan sondro problema, bika ala presi bruya ben de. 6A wan kondre ben e feti nanga a trawan èn a wan foto ben e feti nanga a trawan, bika Gado ben e tyari ala sortu bruya na den pasi. 7Ma unu, un mus teki dek'ati, un no mus lasi ati, bika un o kisi a pai fu a wroko di un e du.”

8Fa Asa yere a boskopu, den sani di Gado ben gi Asarya, a manpikin fu Obed, fu taki, na so a teki dek'ati. A puru ala den groskin popki fu tra gado ini a heri kontren fu Yuda nanga Benyamin nanga ini den foto di a ben teki abra ini a bergikontren fu Efraim. A meki a altari fu MASRA, di ben tnapu fesi a fes'sei gadri fu a tempel, bun baka. 9Dan a seni kari ala den sma fu den lo fu Yuda nanga Benyamin fu kon na wan, makandra nanga den sma fu Efraim, Manase nanga Simeon di ben e libi leki doroseisma na den mindri. Bika furu sma fu Israel ben abra go na Asa di den si tak' MASRA, a Gado fu en, ben de nanga en. 10Dan den kon makandra na Yerusalem ini a di fu dri mun di Asa ben de na tin-na-feifi yari na makti. 11A dei dati den tyari seibi hondro kaw nanga seibi dusun skapu nanga krabita gi MASRA, fu den meti di den wini ini den feti. 12Dan den meki wan ferbontu tak' den o suku MASRA, a Gado fu den afo fu den, nanga den heri ati, nanga den heri sili, 13èn tak' den ben o kiri ini wan sma di no du dati. A no ben abi trobi efu a ben de wan pikin noso wan bigisma, wan man noso wan uma. 14Nanga tranga sten den sweri dati gi MASRA. Den ben e meki babari fu prisiri èn den ben e bro trompet nanga tutu. 15Heri Yuda ben breiti nanga a ferbontu di den meki. Bika den ben sweri nanga den heri ati èn den ben suku MASRA trutru, èn MASRA meki den feni En. A ben meki taki den ben e libi ini freide nanga ala den folku lontu den.

16Kownu Asa puru a grani di en granm'ma Maaka ben abi leki m'ma fu kownu, fu di a ben meki wan groskin popki fu Asyera. Asa kapu a popki dati pis'pisi, dan a sutu faya gi en ini a Kidrondal. 17Asa tan dini MASRA wawan nanga en heri ati en heri libi langa, ma den presi pe sma ben e tyari ofrandi ben tan. 18Den sani di en p'pa nanga di ensrefi ben poti aparti gi MASRA, soleki solfru, gowtu nanga ala sortu tra sani, a tyari go poti ini a oso fu Gado.

19Te leki di Asa ben de dritenti-na-feifi yari na makti feti no ben broko ini a kondre.