Sranan Tongo Bible 2016 (STB16)
28

Kownu Akas fu Yuda

281Akas ben abi tutenti yari di a tron kownu èn a tan tin-na-siksi yari na makti ini Yerusalem. A no ben e du san bun ini MASRA ai, a Gado fu en, soleki en afo David, 2ma a ben teki a eksempre fu den kownu fu Israel. A ben meki popki srefi fu den Baal. 3A bron ofrandi tu ini a Ben-Hinomdal èn a bron den manpikin fu en leki ofrandi, wan groskin sani di den folku ben e du di MASRA ben yagi gwe gi den Israelitisma. 4A ben e srakti meti leki ofrandi èn bron wierook na den presi pe den sma ben e tyari ofrandi, tapu den pikin bergi nanga ondro ibri bon nanga furu wiwiri.

5Na dat' meki MASRA, a Gado fu en, gi en abra ini a makti fu a kownu fu Aram. Den Arameesma wini en, èn den tyari wan bigi grupu fu den sma fu en gwe leki strafuman na Damaskus. MASRA gi en abra tu ini a makti fu a kownu fu Israel, di teki wan bigi wini na en tapu. 6Ini wan dei Pekak, a manpikin fu Remalyahu, kiri wan hondro nanga tutenti dusun srudati, bun fetiman, ini Yuda fu di den ben gwe libi MASRA, a Gado fu den afo fu den. 7Sikri, wan dyadya fetiman fu a lo fu Efraim, kiri Maaseya srefi, a manpikin fu kownu, Asrikam, a edeman fu den sma di e wroko ini a kownu-oso, nanga Elkana, a moro prenspari man baka kownu. 8Den Israelitisma teki tu hondro dusun umasma, manpikin nanga umapikin fu den famiri fu den, tyari gwe leki strafuman. Den teki bun furu sani fu den tyari gwe tu na Samaria.

9Ma wan profeiti fu MASRA di ben nen Oded ben de na Samaria. A waka miti a legre di den e drai kon baka na Samaria, dan a taki: “Fu di MASRA, a Gado fu den afo fu unu, En ati e bron nanga Yuda, meki A gi en abra na unu. Ma un meki someni brudu lon nanga so wan atibron di doro te na heimel 10èn un prakseri srefi taki un kan teki sma fu Yuda nanga Yerusalem leki srafu. Ma unsrefi fiti fu kisi strafu fu MASRA, a Gado fu unu. 11Dat' meki un mus arki mi bun: un meki den famiri fu unu di un teki leki strafuman tyari gwe, drai go baka. Bika a hebi atibron fu MASRA de na un tapu.” 12Dan wantu edeman fu den famiri fu a lo fu Efraim opo. Den man dati ben de: Asarya, a manpikin fu Yokanan, Berekya, a manpikin fu Mesilemot, Yekiskia, a manpikin fu Salum nanga Amasa, a manpikin fu Hadlai. Den sori den man di ben kmoto fu a feti kon taki den no du bun. 13Den taigi den taki: “Un no mus tyari den strafuman kon dyaso. A sani san un prakseri fu du o meki wi fiti fu kisi strafu fu MASRA. A o meki den sondu nanga a strafu fu wi kon moro furu. A strafu di wi mus kisi bigi kba èn a atibron fu MASRA de tapu Israel.” 14Dan den srudati libi den strafuman nanga den sani di den ben teki na den edeman nanga ala sma di ben kon makandra. 15Dan den man di nen ben kari kba, bigin yepi den strafuman. Den teki krosi weri gi ala den strafuman di ben de sondro krosi. Den krosi disi den ben teki na mindri den sani di a legre ben teki tyari kon. Den weri krosi gi den èn den gi den susu fu weri tu. Den gi den nyanyan nanga dringi èn den lobi oli gi den soro fu den. Den poti den wan di no ben man waka bun moro na tapu buriki, dan den tyari den go na a palmfoto, Yeriko, na den famiri fu den. Baka dati den drai go baka na Samaria.

16Ini a srefi ten dati, kownu Akas seni aksi a kownu fu Asur fu yepi en. 17Bika den Edomitisma ben hari go na Yuda tu, den wini èn den ben teki sma tyari gwe leki strafuman. 18Den Filistijnsma ben broko go na den foto ini a kontren na den bergifutu nanga na zuidsei fu Yuda. Den ben teki Bet-Semes, Ayalon, Gederot, Soko nanga den dorpu fu en, Timna nanga den dorpu fu en nanga Gimso nanga den dorpu fu en abra, dan den go libi drape. 19Na so MASRA ben broko Yuda saka fu kownu Akas fu Israel ede, bika a ben meki den sma fu Yuda sondu èn a ben drai en baka trutru gi MASRA. 20Kownu Tiglatpileser fu Asur ben hari kon, ma prefu a yepi Akas a feti nanga en èn a poti en na ini bigi benawtu. 21Akas ben teki ala den gudu fu a oso fu MASRA, fu a kownu-oso nanga fu den oso fu den edeman, gi a kownu fu Asur, ma dati no yepi en srefsrefi. 22Ala di a ben de na ini benawtu, a srefi kownu Akas dati ben go doro fu drai en baka gi MASRA. 23A tyari ofrandi gi den gado fu Damaskus, di ben wini en, bika a ben prakseri taki: “Na den gado fu den kownu fu Aram yepi den. Mi sa tyari ofrandi gi den, fu den yepi mi tu.” Ma prefu den yepi en, den meki sani moro takru gi en nanga heri Israel. 24Akas meki den puru ala den wrokosani fu a oso fu Gado, dan a naki den broko. A meki den sroto a oso fu MASRA, èn a poti altari tapu ala uku fu den strati fu Yerusalem. 25A meki presi pe sma ben kan tyari ofrandi gi tra gado, na ini ala foto fu Yuda. Na so a ben e wiki a atibron fu MASRA, a Gado fu den afo fu en.

26Den tra sani di psa ini a libi fu Akas, fu a bigin go te na a kba, skrifi poti ini den buku fu a historia fu den kownu fu Yuda nanga Israel. 27Akas dede èn den beri en ini Yerusalem, ma den no beri en pe den tra kownu fu Israel ben beri. En manpikin Yekiskia teki en presi leki kownu.