Sranan Tongo Bible 2016 (STB16)
7

71Di Salomo kba begi, faya kmopo fu heimel èn bron den meti di den ben o bron leki ofrandi nanga den tra meti di den srakti leki ofrandi. Dan a glori fu MASRA furu a tempel. 2Den priester no ben man go ini a oso fu MASRA, bika a glori fu MASRA ben furu a oso fu MASRA. 3Di ala den Israelitisma si fa a faya nanga a glori fu MASRA saka kon tapu a oso, den kindi tapu a ston fu a dyari nanga den fesi go na gron. Dan den prijse MASRA taki: “MASRA bun, a bigi lobi fu En na fu têgo.”

4Dan kownu nanga a heri pipel bron meti leki ofrandi gi MASRA. 5Kownu Salomo srakti tutenti-na-tu dusun kaw nanga wan hondro nanga tutenti dusun skapu nanga krabita. Na so kownu nanga a heri pipel opo a oso fu Gado. 6Dan den priester go tnapu na den presi. Den Lefitiman teki den presi tu nanga den instrumenti di kownu David ben meki spesrutu gi MASRA. Den ben e prijse MASRA nanga a singi: “A bigi lobi fu En na fu têgo”, leki fa den ben e du en di kownu David ben de na libi. Den priester di ben e bro den trompet, ben tnapu abrasei fu den, èn a heri pipel fu Israel ben opo tnapu. 7Salomo santa a mindri pisi fu a pren di ben de fesi a oso fu MASRA. Drape den bron meti leki ofrandi nanga den fatu pisi fu den freide-ofrandi, bika a kopro altari ben pikin tumsi gi ala den ofrandi.

8Na a fasi dati Salomo hori a fesa seibi dei langa makandra nanga ala den Israelitisma, wan bigi grupu di ben kmoto fu a pasi di e go na Hamat te go miti a kriki di e stotu na Egipte. 9Den ben hori wan fesa seibi dei langa di den ben e krin a altari èn meki en klari fu tyari ofrandi na en tapu. Tapu a di fu aiti dei, den ben abi wan konmakandra di den hori leki wan fesa. Baka dati den hori wan fesi baka fu seibi dei, pe den ben e memre taki den ben libi wan pisten na ini kampu. 10Dan tapu a tutenti-na-dri dei fu a di fu seibi mun, kownu seni den sma go na den oso baka. Den drai gwe nanga prisiri na ini den ati fu a bun di MASRA du gi David, gi Salomo nanga gi En pipel Israel.

Gado e sori Ensrefi fu a di fu tu leisi na Salomo

11Di Salomo ben kba bow a oso fu MASRA, a kownu-oso nanga ala den tra sani di a ben wani meki ini a oso fu MASRA nanga en eigi oso, 12MASRA sori Ensrefi na Salomo wan neti. A taigi Salomo taki: “Mi yere a begi fu Yu èn Mi teki a oso disi leki a presi pe sma kan tyari ofrandi gi Mi. 13Te Mi hori a alen fu a no fadon, te Mi komanderi sprenka fu pori ala san prani ini a kondre, noso meki takrusiki panya mindri a pipel, 14èn a pipel fu Mi di e tyari a nen fu Mi, saka ensrefi èn den begi èn suku Mi èn tapu nanga den ogridu, Mi sa yere ini heimel. Mi sa gi den pardon fu den sondu èn meki sani go bun baka ini den kondre. 15Now Mi o luku èn Mi o arki na den begi di sa begi dyaso. 16Now Mi teki a oso disi èn Mi poti en leki wan spesrutu presi pe sma kan anbegi Mi fu têgo. Noiti Mi sa puru Mi ai na en tapu èn Mi ati sa opo gi ala san o psa drape. 17Efu yu dini Mi tapu wan tru fasi leki yu p'pa David èn du ala sani san Mi komanderi yu fu du, efu yu du den sani di yu mus tan du èn yu hori yusrefi na den sani na san yu mus tan hori yusrefi, 18dan Mi sa meki tak' na soso den pikin nanga den bakapikin fu yu sa de kownu fu Israel. Mi ben pramisi yu p'pa David taki na den pikin nanga bakapikin fu en ben o sidon tapu a kownusturu fu Israel. 19Ma efu yu sa drai yu baka gi Mi, efu yu no hori yusrefi na den sani di yu mus tan du èn na den sani na san yu mus tan hori yusrefi èn yu go dini tra gado èn boigi gi den, 20dan Mi sa puru a pipel fu Israel nanga tranga fu a kondre fu Mi di Mi gi den. Mi sa puru a oso na Mi tapu di Mi ben poti fu sma kan anbegi Mi. Ala den tra folku sa koti odo gi en èn meki spotu fu en. 21Ala sma di sa waka psa na a tempel disi, di ben abi so wan bigi nen, sa tnapu nanga opo mofo èn aksi ferwondru taki: Fu sanede MASRA du so nanga a kondre èn nanga a oso disi? 22Dan sma sa piki den taki: ‘Na fu di den gwe libi MASRA, a Gado fu den afo fu den, di ben puru den na Egipte. Den go poti den fertrow na tapu tra gado èn den go anbegi èn dini den. Na dat' meki MASRA meki a bigi ogri disi miti den.’ ”

8

Tra sani di Salomo du

81Tutenti yari Salomo ben abi fanowdu fu meki a oso fu MASRA nanga a eigi oso fu en. 2Baka dati a go bow den foto di kownu Huram ben gi en moro tranga dan a poti Israelitisma fu libi drape. 3Salomo hari go na Hamat-Soba èn a teki en abra. 4Baka dati a go bow Tadmor di ben de ini a bigi dreisabana, moro tranga, nanga ala den foto di a ben bow ini Hamat fu kibri nyanyan. 5A bow den foto Hei-Bet-Horon nanga Lagi-Bet-Horon kon moro tranga tu. Den ben kon tron bun tranga foto di ben abi skotu, bigi doro nanga greni. 6Salomo bow Baalat nanga ala den tra foto pe nyanyan ben e kibri, pe den fetiwagi nanga en asi ben e tan, kon moro tranga tu. Salomo bow ala san a ben wani, ini Yerusalem, tapu a Libanon nanga ini a heri kondre di a ben e tiri.

7Fu den folku di no ben de Israelitisma: den Amoritisma, den Hetitisma, den Perisitisma, den Hiwitisma nanga den Yebusitisma, 8ala den bakapikin fu den, di den Israelitisma no ben kiri, Salomo poti fu wroko fu soso leki srafu gi en te leki a dei fu tide. 9Ma Salomo no meki no wan Israelitisma wroko leki srafu gi en. Den Israelitisma ben de srudati, edeman fu den waktiman fu kownu, edeman fu den fetiwagi nanga edeman fu den man di ben e tyari den asi fu kownu. 10Kownu Salomo poti tu hondro feifitenti edeman fu luku den wrokoman fu en.

11Dan Salomo meki a umapikin fu Farao froisi kmopo fu a foto fu David go na a kownu-oso di a meki gi en. Bika a taki: “No wan uma fu mi no kan libi ini a oso fu David, a kownu fu Israel, bika den presi pe a santa kisi fu MASRA kon, na santa presi.”

12Dan Salomo bron meti leki ofrandi gi MASRA tapu a altari di a ben bow fesi a fes'sei gadri fu a tempel. 13Drape a ben e tyari den ofrandi di ben mus bron ala dei, den ofrandi fu a sabat, fu den nyunmunfesa nanga gi den fesa di ben e hori dri leisi wan yari: a fesa pe den e nyan brede di meki sondro dyesi, a fesa fu den wiki nanga a fesa fu memre taki den ben e tan wan pisten ini kampu. Moses ben poti fa den ofrandi disi ben mus tyari. 14Salomo seti a wroko fu den grupu fu den priester tu nanga di den Lefitiman di ben mus singi èn yepi den priester, soleki fa en p'pa David ben taki tak' a mus du ala dei. A seti a wroko tu fu den grupu fu den man di ben e hori wakti na den doro, sortu grupu ben o hori wakti na sortu doro, bika na so David, a man fu Gado ben komanderi taki a mus du. 15Den hori den fin'fini na san kownu ben komanderi, gi den priester, gi den Lefitiman, nanga gi den sma di ben abi a frantwortu fu den gudu fu a tempel. 16Kownu Salomo tyari a bow kon na wan bun kba, fu a dei di den diki a fundamenti fu a oso fu MASRA, te kon miti a dei di a kba.

17Baka dati Salomo go na Esyon-Geber nanga Elot, na a syoro fu Edom. 18Dan kownu Huram seni knekti fu en go na Salomo nanga sipi nanga man di ben sabi a se bun. Makandra nanga den knekti fu Salomo den hari go na Ofir, pe den go teki tin-na-feifi dusun kilo gowtu tyari kon gi Salomo.

9

A kownu fu Seba kon fisiti Salomo

91A uma di ben de kownu fu Seba, ben yere fu a bigi nen di Salomo ben abi. Dat' meki a go na Yerusalem fu tesi Salomo nanga aksi di no ben makriki fu piki. A go drape nanga bun furu sma nanga kameel di ben e syow spesrei, bun furu gowtu nanga diriston. Di a doro na Salomo, a aksi en ala sani di ben de tapu en ati. 2Salomo piki en tapu ala den aksi fu en. Ala den dipidipi sani a ben tyari kon na krin gi en. 3Di a kownu fu Seba si fa Salomo koni, di a si a kownu-oso tu di a bow, 4a nyanyan di ben de tapu tafra, a fasi fa den wrokoman fu en ben e sidon na tafra, a fasi fa den sma di ben e sorgu gi a nyanyan ben tnapu èn fa den ben e weri, den man di ben e kanti win gi kownu nanga a fasi fa den ben weri nanga den meti di Salomo ben e bron leki ofrandi ini a oso fu MASRA, a fruwondru srefsrefi. 5Dat' meki a taigi kownu taki: “Den sani tru di mi yere ini mi kondre fu yu nanga a fasi fa yu koni. 6Mi no ben e bribi te leki mi kon dyaso èn si nanga mi eigi ai. Ma den no ben ferteri mi afu srefi fu san mi si. A koni nanga a gudu fu yu no de fu marki nanga den tori di mi yere fu yu. 7Den sma di yu e tiri, den knekti fu yu di e dini yu èn di e yere den koni sani di yu e taki, na blesi sma. 8Mi e prijse MASRA, a Gado fu yu, di abi sowan prisiri nanga yu tak' A poti yu tapu a kownusturu, leki kownu fu MASRA, yu Gado. Na fu di Gado lobi Israel èn A wani fu a tan fu têgo, meki a poti yu leki kownu fu tiri a kondre tapu wan bun èn leti fasi.”

9Dan a gi Salomo dritenti-na-siksi hondro kilo gowtu nanga bun furu switismeri sani nanga diriston. Noiti moro so bun spesrei, leki san a kownu fu Seba ben gi kownu Salomo ben de fu feni ini Israel. 10Boiti dati, den knekti fu Huram nanga Salomo di ben e go teki gowtu na Ofir, ben tyari sandel-udu nanga diriston kon tu. 11Nanga a sandel-udu kownu meki trapu gi a oso fu MASRA nanga gi a kownu-oso fu en. A meki citer nanga harp tu gi den singiman. Noiti bifo so wan sani ben de fu si ini Yuda. 12Kownu Salomo gi a kownu fu Seba ala san ben e angri fu abi nanga san a ben aksi. Salomo gi en moro dan san a ben tyari kon gi en. Baka dati a kownu nanga den knekti fu en drai go baka na a kondre fu den.

Den gudu fu Salomo

13A gowtu di Salomo ben e kisi ala yari, ben de tutenti dusun kilo, 14boiti san den bai nanga seriman ben e tyari kon. Ala den kownu fu Arabia nanga den man di kownu ben poti fu tiri den foto, ben e tyari gowtu nanga solfru kon gi Salomo tu.

15Kownu Salomo meki tu hondro bigi schild fu fini gowtu. Ibri schild ben meki fu siksi kilo gowtu. 16A meki dri hondro pikin schild tu fu fini gowtu. Ibriwan fu den ben meki fu wan nanga afu kilo gowtu. Dan kownu poti den ini a oso: Busi fu Libanon. 17Moro fara kownu meki wan bigi kownusturu fu ivoor. Dan a poti lala gowtu na en tapu. 18A kownusturu ben abi siksi tree nanga wan futubangi fu gowtu di ben fasi na a kownusturu. A sturu ben abi tu pisi fu poti yu anu èn sei iniwan fu den pisi fu poti yu anu wan lew ben tnapu. 19Twarfu lew ben tnapu tapu den tree fu a trapu, siksi na a wan sei nanga siksi na a tra sei. Noiti ete sowan kownusturu ben meki ini wan kondre. 20Ala den sani fu dringi fu kownu Salomo ben de fu gowtu. Ala den tra kukru sani fu a oso: Busi fu Libanon ben de fu lala gowtu. Solfru no ben abi warti ini a ten fu Salomo. 21Kownu ben abi sipi di ben e go nanga den knekti fu Huram na Tarsis. Wan leisi na ini dri yari den sipi dati ben e drai kon fu Tarsis nanga gowtu, solfru, ivoor, yapyapi nanga prodokaka.

22No wan kownu fu grontapu ben gudu noso koni moro kownu Salomo. 23Ala den kownu fu grontapu ben e kon na Salomo fu arki a koni di Gado ben gi en. 24Iniwan fu den ben e kon nanga kado: solfru nanga gowtu sani, krosi, fetisani, spesrei, asi nanga buriki. Na so a ben e go ala yari.

25Salomo ben abi fo dusun presi fu poti den asi nanga den fetiwagi fu en. A ben abi twarfu dusun man di ben e tyari den wagi. Dan a poti afu fu den ini den foto di ben meki spesrutu fu poti den wagi, a tra afu ben de na en ini Yerusalem.

26Ala den kownu fu a Eufratliba te go miti a kondre fu den Filistijnsma nanga Egipte ben saka densrefi gi Salomo. 27Kownu ben meki tu taki solfru ben furu leki ston na ini Yerusalem. Sedre-udu ben lai tu leki den figabon di e gro bogobogo ini den kontren na den bergifutu. 28Den asi fu Salomo ben e kmoto fu Egipte nanga ala tra kondre.

A dede fu Salomo

29Den tra sani di psa ini a libi fu Salomo, fu a bigin go te na a kba, skrifi poti ini a buku fu a historia fu a profeiti Natan. Akia fu Silo taki tu fu den ini den sani di Gado ben gi en fu taki èn Yedo, a man di Gado ben e sori sani, taki fu den di Gado ben e sori en sani fu Yerobeam, a manpikin fu Nebat. 30Ini Yerusalem, Salomo tiri heri Israel fotenti yari langa. 31Baka dati a dede èn den beri en ini a foto fu en p'pa David. En manpikin Rekabeam teki en presi leki kownu.