Sranan Tongo Bible 2016 (STB16)
2

21So mi teki a besroiti tak' mi no o kon moro na unu fu un firi sari. 2Bika efu na mi e meki un firi sari, dan suma kan meki mi prisiri dan? Na den srefi sma di mi meki firi sari. 3Na fu a sani disi ede mi ben skrifi unu, fu di mi no ben wani taki den sma di mus meki mi prisiri, ben o meki mi firi sari te mi doro. Bika mi abi a bribi taki te mi e prisiri, dan un alamala e firi prisiri tu. 4A ben hebi gi mi fu skrifi unu. Mi du en nanga sari ini mi ati èn nanga furu watra-ai. Mi no du en fu un firi sari, ma fu un kon ferstan a tranga lobi di mi abi gi unu.

Den mus gi a sma pardon di ben du a sondu

5Efu wan sma ben tyari sari kon, dan a no mi a ben meki firi sari. Ma a sani san a du meki taki moro furu fu unu firi sari tu. Ma mi no wani taki tumsi tranga na en tapu. 6Bika a fasi fa moro furu fu unu strafu en, sari gi en. 7Dat' meki un mus gi en pardon now èn un mus trowstu en, dan a no o firi sari te leki a lasi ati. 8Dat'ede mi e begi unu fu sori en taki un lobi en ete. 9Na fu a sani disi ede mi ben skrifi unu tu. Mi ben wani si efu mi kan bow na un tapu, taki un e du ala sani san mi e taigi unu. 10Efu unu gi wan sma pardon, dan mi e gi en pardon tu. Kon meki wi taki tak' mi mus gi wan sma pardon. Dan efu mi gi en pardon, dan Kristus na mi kotoigi tak' mi du en fu un ede. 11Dan Satan no o abi wini na wi tapu. Bika wi sabi en prakseri tumsi bun.

Wrokoman fu a nyun ferbontu

12Di mi doro na Troas fu preiki a bun nyunsu fu Kristus, Masra opo wan doro gi mi.

2:12-13
Bosk 20:1-2
13Ma mi no ben firi switi fu inisei, bika mi no ben miti nanga mi brada Titus drape. Dat' meki mi taki den sma drape odi, dan mi go na Masedonia.

14Ma grantangi fu Gado! A e meki a de fu si ala ten taki wi di de wan nanga Kristus, na winiman. So wi e panya a sabi fu En leki wan switi smeri na ala sei. 15Bika wi de leki wan switi smeri fu Kristus gi Gado, na mindri den sma di Gado e ferlusu, èn na mindri den sma di e go lasi. 16Gi den sma di e go lasi, wi na wan tingi smeri di e tyari dede kon. Gi den sma di Gado e ferlusu, wi na wan switi smeri di e tyari libi kon. Suma man du a wroko disi dan? 17Bika wi no de leki someni tra sma di e meki moni nanga a wortu fu Gado. Ma fu di Gado seni wi, meki wi e taki nanga wan krin konsensi ini a nen fu Kristus na Gado.