Sranan Tongo Bible 2016 (STB16)
1

Odi

11Gi a uma di Gado ben teki leki wan sma fu En.

Leki fesiman fu kerki mi e skrifi yu nanga den pikin fu yu1:1 Den pikin fu yu. A skrifiman e bedoi den sma fu a kerki di a uma e tiri. di mi lobi trutru. Ma a no mi wawan lobi unu. Ala den sma di kon sabi a tru leri lobi unu tu. 2Bika a tru leri de ini wi, èn a sa tan nanga wi fu têgo. 3Mi e winsi taki Gado a P'pa, nanga Yesus Kristus a Manpikin fu a P'pa, sa sori bun-ati, sari-ati nanga freide na wi di sabi a tru leri èn di lobi makandra.

Un mus lobi makandra

4Mi ben breiti srefsrefi di mi miti wantu pikin fu yu di e hori densrefi na a tru leri leki fa wi ben kisi a gebod fu a P'pa. 5Mi lobi sisa, dat' meki mi e aksi yu fu wi lobi makandra. A no fu wan nyun gebod mi e skrifi yu. Na wan sani san yu ben yere kba sensi na a bigin.

5
Yoh 13:34
15:12,17
6Bika lobi na te wi e du san den gebod fu Gado e taki. Yu mus libi soleki fa a gebod e taki di yu ben yere kba sensi na a bigin.

Den kruktu leriman

7Furu sma de di e waka lontu na grontapu e kori trawan. Den e taki tak' a no tru taki Yesus Kristus kon na grontapu leki libisma. A sma di e taki so na a bedrigiman èn a bigi-feyanti fu Kristus. 8Luku bun taki un no pori a wroko san wi du, fu un kan kisi a heri paiman. 9A sma di no e tan ini a leri fu Kristus, ma di e go moro fara, no de fu Gado. Ma a sma di tan ini a leri fu Kristus, de fu a P'pa nanga a Manpikin. 10Efu wan sma kon na unu di no e kon nanga a leri fu Kristus, dan un no mus meki a kon ini un oso, èn un no mus taki en odi. 11Bika a sma di e taki en odi, abi prati ini den ogri sani san a e du.

Wan laste wortu

12Mi abi furu sani fu skrifi, ma mi no wani poti den tapu papira. Ma mi e howpu taki mi kan kon na unu, fu wi kan taki ai na ai fu den sani disi. Dan wi kan breiti trutru. 13Den pikin fu yu s'sa, di Gado teki leki wan sma fu En, seni taki yu odi.