Sranan Tongo Bible 2016 (STB16)
17

Kownu Hosea fu Israel

171Di kownu Akas fu Yuda ben de twarfu yari na makti, Hosea, a manpikin fu Ela, tron kownu fu Israel. A ben e libi na Samaria èn a tan neigi yari na makti. 2A ben e du san no bun ini MASRA ai, ma a no ben takru so leki den kownu fu Israel di waka na en fesi.

3Kownu Salmanasar fu Asur ben hari kon feti nanga Hosea. Hosea ben saka ensrefi gi en, èn a ben ferplekti fu pai Salmanasar wan moni ala yari. 4Ma a kownu fu Asur ben meki den grabu Hosea èn tyari en go sroto na straf'oso fu di a ben kon sabi taki Hosea ben meki mofo fu du wan sani, bika Hosea ben seni boskopuman go na kownu So fu Egipte fu yepi en, èn a no ben pai a moni moro leki fa a ben gwenti du ala yari. 5Ne a kownu fu Asur broko kon ini a kondre, a hari go na Samaria dan a lontu a kondre dri yari langa fu ala sei. 6Di Hosea ben de neigi yari na makti, a kownu fu Asur teki Samaria abra. A tyari den Israelitisma gwe nanga tranga na Asur. Drape a poti sowan fu den fu libi ini a foto Halak, trawan na a syoro fu a Haborliba ini Gosan, nanga trawan ini den foto fu den Meden.

A strafu fu den sondu fu Israel

7Den sani disi psa nanga den Israelitisma, fu di den no du a wani fu MASRA, den Gado, di puru den na ini Egipte ini a makti fu Farao, a kownu fu Egipte. Den ben dini tra gado, 8den tan du den sani fu den folku di MASRA ben yagi puru fu a kondre gi Israel èn den tan du den sani di den kownu fu Israel meki den du. 9Den Israelitisma ben e du sani di MASRA, den Gado, no ben lobi srefsrefi. Ini ala den foto den ben abi presi pe den sma ben e tyari ofrandi, fu a moro pikin wakti-oso te nanga den tranga foto. 10Den ben poti ston nanga postu tnapu gi kruktu gado tapu ala pikin bergi nanga ondro ibri bon nanga furu wiwiri. 11Na ala den presi pe den sma ben e tyari ofrandi, den bron meti leki ofrandi, leki fa den folku ben e du di MASRA ben yagi puru fu a kondre gi den. Den du MASRA wan hati sani nanga den ogri di den du. 12Den ben e dini kruktu gado, wan sani gi san MASRA ben warskow den trangatranga taki den no mus du en. 13MASRA ben meki ala den profeiti fu En nanga den man di A ben e sori sani, warskow Israel nanga Yuda dorodoro taki: “Un libi den sani di un e du di no bun. Un hori un na den gebod nanga den sani di un mus tan du, na a wèt di Mi gi den afo fu unu fu hori èn di Mi meki den knekti fu Mi, den profeiti, gi unu.” 14Ma den no ben wani arki. Den sori tak' den ben trangayesi leki den afo fu den di no ben poti den fertrow na tapu MASRA, a Gado fu den. 15Den ben poti den warskow, den sani di den ben mus tan du nanga a ferbontu di A ben meki nanga den afo fu den na wan sei. Den waka baka kruktu gado te leki densrefi kon kruktu. Den du densrefi sani tu di den folku ben e du di ben e libi lontu den, aladi MASRA ben komanderi den fu den no du den srefi sani fu den folku. 16Den ben poti ala den gebod fu MASRA, den Gado, na wan sei. Den ben meki tu yongu kaw fu gowtu, den poti postu tnapu gi kruktu gado, den ben e anbegi a son, a mun nanga den stari, èn den ben dini Baal. 17Moro fara den bron den manpikin nanga den umapikin fu den leki ofrandi, den ben e meki sma taigi den noso luku gi den san ben de fu kon ini a ten na den fesi èn den ben poti densrefi fu du san no bun ini MASRA ai. Tapu a fasi disi den ben e wiki a atibron fu Gado. 18Na dat' meki MASRA atibron srefsrefi tapu Israel, tak' A poti den na wan sei. Soso a lo fu Yuda ben tan na baka. 19Ma den sma fu Yuda srefi no ben e hori den gebod tu fu MASRA, den Gado, ma den ben e tan du den sani di Israel ben e du. 20Na dat' meki MASRA poti ala den bakapikin fu Israel na wan sei. A broko den saka èn A gi den abra ini a makti fu folku di ben e kon fufuru ala den sani fu den tyari gwe. Te fu kba A no ben wani si den moro. 21Di MASRA ben prati den Israelitisma fu a famiri fu David, den Israelitisma ben poti Yerobeam, a manpikin fu Nebat, leki den kownu. Ma Yerobeam ben meki den tapu fu dini MASRA èn a meki den du hebi sondu. 22Den Israelitisma du den srefi sondu di Yerobeam du. Den tan du den sondu dati. 23Te fu kba, MASRA puru den na En fesi, leki fa A ben meki ala den knekti fu En, den profeiti, taki. Leki straf'man den Israelitisma gwe libi den kondre. Feyanti tyari den sma fu Israel nanga tranga go na Asur, pe den de te leki tide.

24A kownu fu Asur puru sma fu Babel, Kuta, Awa, Hamat nanga Sefarwaim, tyari go libi na Samaria na a presi fu den Israelitisma. Den sma disi teki Samaria abra èn den go libi ini den foto fu en. 25Ini a bigin, di den sma go libi drape, den no ben e anbegi MASRA. Dat' meki MASRA ben seni lew go na den mindri di kiri wantu fu den. 26Dan sma taigi a kownu fu Asur taki: “Den folku di yu tyari go libi ini den foto fu Samaria, no sabi fa den mus dini a Gado fu a kondre dati na a yoisti fasi. Dat' meki A seni lew go na den mindri, èn den lew e kiri den fu di den no sabi a yoisti fasi fu dini a Gado fu a kondre dati.” 27Ne a kownu fu Asur komanderi taki: “Un tyari wan fu den priester di un ben teki fu drape tyari gwe, go libi drape baka. A mus leri den sma a yoisti fasi fu dini a Gado fu a kondre dati.” 28Na so wan fu den priester, di den ben teki fu Samaria tyari gwe, go drape baka. A go libi na Betel, èn a leri den sma fa den ben mus anbegi MASRA. 29Ma iniwan fu den folku ben meki den eigi popki fu den gado fu den. Den ben e poti den ini den tempel di den sma fu Samaria ben bow na den presi pe den ben e tyari ofrandi. Ala den sma fu den folku ben e du disi ini den foto pe den ben e tan. 30Den sma fu Babel ben meki wan popki fu Sukot-Benot, den sma fu Kuta ben meki wan fu Nergal, den sma fu Hamat ben meki wan fu Asima, 31èn den Awitisma ben meki fu Nibkas nanga Tartak. Den Sefarwitisma ben e bron den pikin fu den leki ofrandi gi Adramelek nanga Anamelek, den gado fu Sefarwaim. 32Boiti den gado fu den, den ben e anbegi MASRA tu èn den ben teki sma na den mindri poti leki priester na den presi pe sma ben e tyari ofrandi. Den priester disi ben e du a wroko gi den ini den tempel na den presi pe den ben e tyari ofrandi. 33Den ben e anbegi MASRA, ma den ben tan dini den gado fu den leki fa den ben gwenti du ini den eigi kondre.

34Te nanga a dei fu tide den e tan du den owru gwenti fu den. Den no e anbegi MASRA, den no e du den sani di den ben mus tan du, den no e hori densrefi na den sani na san den ben mus tan hori densrefi, den no e hori densrefi na a wèt nanga den gebod, di MASRA ben gi den bakapikin fu Yakob, di A ben kari Israel. 35Ma nanga den MASRA ben meki wan ferbontu, èn A ben komanderi den taki: “Un no mus anbegi tra gado, un no mus boigi gi den èn un no mus dini den noso tyari ofrandi gi den. 36Ma un mus anbegi MASRA, di puru un ini Egipte nanga bigi krakti nanga makti. Na En un mus anbegi, gi En un mus boigi, èn gi En un mus tyari ofrandi. 37Ala ten un mus hori unsrefi finifini na den sani di un mus tan du, na den sani na san un mus hori unsrefi, na a wèt nanga den gebod di A ben gi unu. Un no mus anbegi tra gado. 38Un no fergiti a ferbontu di Mi meki nanga unu tak' un no mus anbegi tra gado. 39Na MASRA, a Gado fu unu, un mus anbegi, dan A sa ferlusu unu fu a makti fu ala un feyanti.” 40Ma den no arki, den tan du den owru gwenti fu den.

41Na so den folku disi ben e anbegi MASRA, ma den ben e dini den popki fu den gado fu den tu. Te tide den pikin nanga den bakapikin fu den e du leki fa den afo fu den ben e du.

18

Kownu Hiskia fu Yuda

181Di kownu Hosea fu Israel, a manpikin fu Ela, ben de dri yari na makti, Hiskia, a manpikin fu Akas tron kownu fu Yuda. 2A ben abi tutenti-na-feifi yari di a tron kownu, èn a tan tutenti-na-neigi yari na makti ini Yerusalem. En m'ma ben nen Abi, èn a ben de wan umapikin fu Sekarya. 3Neleki en afo David, a ben e du san bun ini MASRA ai. 4A puru ala den presi pe sma ben e tyari ofrandi, a naki den ston broko di den sma ben poti tnapu gi kruktu gado èn a kapu den postu trowe di den ben poti tnapu gi kruktu gado. A naki a kopro sneki broko tu di Moses ben meki, bika te leki a ten dati den sma fu Israel ben e bron wierook leki ofrandi gi en. Den ben gi a sneki a nen fu Nekustan. 5Hiskia ben poti en fertrow tapu MASRA, a Gado fu Israel. No wan fu den kownu fu Yuda di kon na en baka, nanga di waka na en fesi, ben de fu marki nanga en. 6A ben e dini MASRA nanga en heri ati, a tan du En wani èn a hori ensrefi na den gebod di MASRA ben gi Moses. 7MASRA ben de nanga Hiskia èn ala san a ben du ben e waka bun. A puru ensrefi ondro a tiri fu a kownu fu Asur èn a no ben e dini en moro. 8A feti nanga den Filistijnsma èn a wini den. A teki a heri kontren abra go te na Gasa, fu a moro pikin wakti-oso te nanga den tranga foto.

9Kownu Hiskia ben de fo yari na makti, èn kownu Hosea fu Israel, a manpikin fu Ela, ben de seibi yari na makti, di kownu Salmanasar fu Asur hari kon na Samaria dan a lontu a foto fu ala sei. 10Baka dri yari a ben kan teki a foto abra. Di Hiskia ben de siksi yari na makti èn di kownu Hosea fu Israel, ben de neigi yari na makti, Salmanasar teki Samaria abra. 11A kownu fu Asur tyari den Israelitisma gwe nanga tranga na Asur. Drape a poti sowan fu den fu libi ini a foto Halak, trawan na a syoro fu a Haborliba ini Gosan, nanga trawan ini den foto fu den Meden. 12A sani disi psa fu di den no arki MASRA, den Gado. Den broko a ferbontu fu Gado nanga ala san A ben meki En knekti Moses komanderi den. Den no arki den sani dati èn den no du den tu.

Sanherib e hari kon feti nanga Yerusalem

13Di kownu Hiskia ben de tin-na-fo yari na makti, kownu Sanherib fu Asur hari kon feti nanga ala den tranga foto fu Yuda èn a teki den abra. 14Dan kownu Hiskia fu Yuda seni a boskopu disi gi a kownu fu Asur di ben de na Lakis: “Mi no du bun. Drai gwe nanga yu legre dan mi sa pai yu san yu wani.” Ne a kownu fu Asur ferplekti en fu pai en neigi dusun kilo solfru nanga neigi hondro kilo gowtu. 15So Hiskia gi en ala a solfru di ben de ini a oso fu MASRA nanga ini den kamra fu a kownu-oso pe den gudu ben e tan. 16Na a pisten dati Hiskia meki den puru a gowtu nanga a solfru di ensrefi ben meki den poti na den doro nanga doropostu ini a tempel fu MASRA, dan a gi a gowtu na a kownu fu Asur.

17Ma baka dati, a kownu fu Asur seni a edeman fu en legre, a edeman fu den knekti fu en nanga wan ofisiri fu en nanga wan bigi legre fu Lakis go na kownu Hiskia na Yerusalem. Den hari go na Yerusalem èn di den doro drape den tan tnapu na a kba pisi fu den kokro di e tyari a watra kon fu a tapusei watrabaki. Dati ben de na a pasi di e go na a wei pe sma ben e wasi krosi. 18Di den seni aksi fu taki nanga kownu, kownu seni Elyakim, a manpikin fu Hilkia, a edeman fu den knekti fu en, go na den. A seni en go makandra nanga Sebna, a sekretarsi fu kownu, nanga Yoak, a manpikin fu Asaf, di ben de a takiman fu a kownu. 19Dan a ofisiri taigi den taki: “Un taigi Hiskia tak' a bigi kownu, a kownu fu Asur, seni aksi en disi: ‘Tapu san yu e poti yu fertrow? 20Yu denki taki yu kan wini wan feti nanga moi wortu wawan? Tapu suma yu e poti yu fertrow so taki yu no wani saka yusrefi gi mi? 21Efu na tapu Egipte yu e fertrow, di gersi wan broko tiki, a o boro yu anu te yu o anga na en tapu. Na dati e psa nanga ala sma di e fertrow tapu Farao, a kownu fu Egipte. 22Efu yu taigi mi taki na tapu MASRA, a Gado fu unu, un e fertrow, dan mi o aksi unu efu a no den presi fu En pe sma e tyari ofrandi nanga den altari fu En Hiskia broko èn taigi den sma fu Yuda nanga Yerusalem taki na soso fesi a altari dyaso ini Yerusalem den mus boigi. 23We dan, hori wan strei nanga a basi fu mi, a kownu fu Asur: Mi e gi un tu dusun asi efu un abi sma fu tyari den. 24Yere, awinsi yu poti yu fertrow tapu den fetiwagi nanga den srudati tapu asi fu Egipte, yu no o man tapu wan enkri kapten srefi, wan fu den moro pikin knekti fu mi basi, te a hari kon fu feti nanga yu. 25Na MASRA seni mi kon fu broko a presi disi. Na MASRA srefi ben komanderi mi taki: Hari go na a kondre dati, dan yu e broko en.’ ” 26Ne Elyakim, a manpikin fu Hilkia, Sebna nanga Yoak, taigi a ofisiri taki: “Wi e begi yu fu yu taki Arameestongo nanga den knekti fu yu, bika wi e ferstan a tongo dati. Ma no taki ini a tongo fu den sma fu Yuda, bika den sma di de tapu a skotu e yere ala san un e taki.” 27Ma a ofisiri piki taki: “Un no mus prakseri taki mi basi seni mi kon fu taki nanga unu èn nanga un basi wawan. Den sani di mi e taki de tu gi den man tapu a skotu. No langa moro dan den o nyan den eigi morsu èn den o dringi den eigi pisi, leki unu.” 28Dan a ofisiri waka go na fesi, dan a bari trangatranga ini a tongo fu den sma fu Yuda taki: “Un arki san a bigi kownu, a kownu fu Asur, abi fu taki! 29Na disi a kownu e taki: ‘No meki Hiskia kori unu, bika a no o man ferlusu unu. 30Un no meki Hiskia taigi unu tu taki un mus poti un fertrow tapu MASRA, taki a no abi misi taki MASRA o ferlusu unu, fu a foto disi no o kon ini anu fu a kownu fu Asur.’ 31Un no arki Hiskia, bika na disi a kownu fu Asur e taki: ‘Un saka unsrefi gi mi èn un gi unsrefi abra na mi, dan iniwan fu unu o man nyan fu un eigi droifibon nanga en eigi figabon èn dringi a watra fu en eigi peti, 32te leki mi kon teki un tyari go na wan kondre leki di fu unu. Wan kondre fu graan nanga nyun win, wan kondre fu brede nanga droifidyari, fu oleifbon, oli nanga oni. Drape un o libi, un no o dede. Dat' meki un no mus arki Hiskia, bika na kori a e kori unu te a e taki: MASRA sa ferlusu unu. 33No wan fu den gado fu den tra folku ben man ferlusu den fu a makti fu a kownu fu Asur. 34Pe den gado fu Hamat, Arpad nanga den di fu Sefarwaim, Hena nanga Iwa de? Den no ben man ferlusu Samaria fu a makti fu mi. 35No wan fu den gado fu den kondre dati ben man ferlusu a kondre fu den fu a makti fu mi. MASRA no o man ferlusu Yerusalem tu.’ ” 36Ma a pipel tan tiri, den no piki a ofisiri noti, bika kownu ben komanderi den taki den no mus piki.

37Dan Elyakim, a manpikin fu Hilkia, a edeman fu den knekti fu kownu, Sebna, a sekretarsi fu kownu, nanga Yoak, a manpikin fu Asaf, a takiman fu kownu, priti den krosi fu sori taki den e sari, dan den go na Hiskia go taigi en ala den sani di a ofisiri taki.

19

191Fa kownu Hiskia yere den sani dati, na so a priti en krosi, a weri lowkrosi dan a go ini a oso fu MASRA. 2Dan a seni Elyakim, a edeman fu den knekti fu en, Sebna, a sekretarsi fu en, nanga den moro owru priester go nanga lowkrosi na a profeiti Yesaya, a manpikin fu Amos. 3Den taigi en taki: “Disi Hiskia e taki: ‘A dei disi na wan dei fu benawtu, fu strafu nanga fu syen. Bika wan pikin mus gebore, ma krakti no de fu pusu en kon na doro. 4Kande MASRA, yu Gado, yere den wortu fu a ofisiri nanga san a basi fu en, a kownu fu Asur, seni en kon fu afrontu a libi Gado. Kande MASRA, yu Gado, sa strafu en fu den wortu di A yere. Dat' meki mi e aksi yu fu yu begi gi den wan di tan abra ete.’ ” 5Di den knekti fu kownu Hiskia doro na Yesaya, 6Yesaya taigi den taki: “Un taigi un basi taki na so MASRA taki: ‘No frede gi den sani di yu yere, den sani di den knekti fu a kownu fu Asur taki fu afrontu Mi. 7Yere, Mi o seni wan yeye fu bruya en. A o yere taki sma taki sani, di o meki a drai go baka na en kondre. Dan drape, ini en eigi kondre, Mi o meki den kiri ini wan feti.’ ”

8Dan a ofisiri drai go na a kownu fu Asur, bika a ben kisi fu yere taki a kownu ben broko en kampu na Lakis dan a hari go feti na a foto Libna. 9Ma di kownu Sanherib kisi a boskopu taki kownu Tirhaka fu Etiopia e hari kon feti nanga en, a seni boskopuman fu en go na Hiskia nanga a boskopu disi: 10“Na disi un mus taigi Hiskia, a kownu fu Yuda: ‘No meki a Gado fu yu, tapu san yu e fertrow, bedrigi yu fu taigi yu taki Yerusalem no o kon ini anu fu a kownu fu Asur. 11Arki, yusrefi yere san den kownu fu Asur du nanga den kondre di den teki abra. Den broko den pis'pisi te na gron. No wan sma o man ferlusu yu. 12Di den afo fu mi broko den foto Gosan, Haran, nanga Resef, èn di den figi den Edomitisma ini Telasar puru na pasi, den gado fu den no ben man yepi den. 13Pe a kownu fu Hamat de, a di fu Arpad, a di fu Sefarwain, nanga den di fu Hena nanga Iwa?’ ”

14Hiskia teki a brifi na den boskopuman dan a leisi en. Baka dati a go na a oso fu MASRA dan a bradi a brifi opo fesi MASRA. 15Dan a begi taki: “MASRA, Gado fu Israel, Yu di e sidon tapu den kerub, Yu, Yu wawan na Gado fu ala den kondre na grontapu. Na Yu ben meki heimel nanga grontapu. 16Kaka Yu yesi MASRA èn arki, opo Yu ai MASRA èn luku. Arki a boskopu di Sanherib seni kon fu afrontu Yu, a libi Gado. 17A tru MASRA, den kownu fu Asur wai ala den folku dati puru na pasi èn broko den kondre fu den. 18Den bron den gado fu den ini faya, bika den no ben de gado, ma sani fu udu nanga ston di libisma ben meki nanga den anu. Na dat' meki den kownu ben kan bron den. 19Ma MASRA, Gado fu unu, ferlusu wi fu a makti fu en. Dan ala kondre na grontapu o sabi taki Yu, MASRA, Yu wawan de Gado.”

20Dan Yesaya, a manpikin fu Amos, seni a boskopu disi gi Hiskia: “Na disi MASRA, a Gado fu Israel, e taki: Mi yere a begi fu yu fu Mi yepi yu nanga Sanherib, a kownu fu Asur. 21Disi na san MASRA abi fu taigi Sanherib:

A yongu umapikin, Sion, e si yu fu noti,

a e teki yu meki spotu.

Yerusalem e seki en ede na yu baka.

22Suma yu afrontu,

suma yu kosi?

Gi suma yu opo yu sten,

èn suma yu opo yu ai luku nanga heimemre?

Na a Santa Wan fu Israel?

23Yu meki den boskopuman fu yu afrontu MASRA di den taki:

‘Nanga den furu fetiwagi fu mi,

mi go na den moro hei bergi,

te na den moro hei pisi fu a Libanon.

Mi koti den moro bigi sedrebon fu en,

den moro bun sipresbon.

Mi e doro srefi te na den moro fara kibripresi fu en,

te ini a moro dipi busi.

24Mi diki peti èn mi dringi watra ini doroseikondre,

nanga mi futu mi trapu ala den liba fu Egipte drei.’

25Fa yu no yere?

Na Mi ben seti en so bun langa kba.

Langa na fesi Mi ben teki a besroiti

fu du den sani di Mi e meki psa now,

taki yu ben o broko tranga foto

tron bigi ipi broko ston.

26Den sma no ben man du not'noti,

den ben lasi ati,

èn den ben kon na syen.

Den ben kon de leki a grasi di e gro ini a wei,

leki yongu wiwiri di e opo ede,

leki grasi di e gro tapu den daki

di a son e bron fosi a opo wan bun fasi.19:26 A Hebrewtekst fu a pisi disi no krin.

27Ma Mi sabi te yu e opo nanga te yu e sidon,

te yu e go nanga te yu e kon,

Mi sabi tu fa yu e rigeri nanga Mi.

28Fu di yu e rigeri so nanga Mi,

èn fu di Mi yere den bigitaki fu yu,

Mi o naki Mi aka poti ini yu noso

èn poti a isri sani nanga san den e tiri meti ini yu mofo,

dan Mi o tyari yu gwe baka tapu a pasi di yu ben kon.

29Disi o de a marki gi yu, kownu Hiskia: a yari disi yu o nyan sani di gro kon densrefi ini den pranigron. A yari baka dati yu o nyan a srefi fasi. Ma a di fu dri yari yu mus sai èn koti, yu mus man prani droifidyari èn nyan den froktu fu en. 30Bika den sma fu Yuda di tan abra, den wan di tan na libi, o beri den rutu baka go na gron, èn na loktu den o gi nyanyan. 31Iya, den sma di tan abra ini Yerusalem, o panya densrefi fu Sion go moro fara. MASRA fu ala sani o du den sani disi nanga wan tranga angri fu du en. 32Dat' meki MASRA e taki disi fu a kownu fu Asur: Ini a foto disi a no o kon. No wan peiri a no o sutu dyaso, no wan schild a o opo na en fesi, èn no wan sani a o kon poti na a skotuskin fu kren kon na inisei. 33A o drai gwe baka tapu a srefi pasi di a kon, ma kon dati a no o kon ini a foto disi. Na so MASRA taki. 34Mi o kibri èn ferlusu a foto disi, fu Mi ede èn fu Mi knekti David ede.”

35A srefi neti dati wan engel fu MASRA hari gwe, èn a kiri wan hondro dusun aititenti-na-feifi srudati fu a legre fu Asur. Di den opo mamanten soso dedeskin ben didon drape. 36Dan so kownu Sanherib fu Asur broko en kampu èn drai gwe baka na en tanpresi na Nineve. 37Wan leisi di a go boigi ini a tempel gi en gado Nisrok, tu fu den manpikin fu en, Adramelek nanga Sareser, kiri en drape nanga den deigri. Dan den lowe go na a kondre Ararat. En manpikin Esarhadon teki en presi leki kownu.