Sranan Tongo Bible 2016 (STB16)
1

Odi

11Gi den sma di kisi a srefi diri bribi leki wi, fu di wi Gado èn Ferlusuman, Yesus Kristus, e du sani nanga leti.

Disi na wan brifi fu Simon Petrus, wan knekti èn boskopuman fu Yesus Kristus. 2Mi e winsi taki fu di un kon sabi Gado nanga wi Masra Yesus, den sa sori un bun-ati èn gi un freide bogobogo.

Na Gado kari den bribisma

3Wi kon sabi a Wan di kari wi fu teki prati ini a glori nanga a makti fu En. Nanga a krakti di En leki Gado abi, A gi wi ala sani san wi abi fanowdu fu libi leki fa A wani. 4A sani disi meki wi kisi pramisi di warti furu èn di bigi srefsrefi. Den e meki wi kan teki prati ini a fasi fa Gado de, èn taki wi man kmopo ini a pori di den takru lostu tyari kon na grontapu. 5Fu dat'ede, fu di un e bribi, un mus du ala muiti fu abi bunfasi. Makandra nanga a bunfasi, un mus abi sabi tu. 6Makandra nanga a sabi, un mus man hori unsrefi. Te un man hori unsrefi, dan dati mus go makandra nanga tan hori doro. A hori di un man tan hori doro, mus go makandra nanga du Gado wani. 7Te un e du san Gado wani, un mus libi bun nanga makandra leki bribisma. Te un e libi bun nanga makandra leki bribisma, dan un mus lobi makandra. 8Bika te den sani disi de ini unu èn te den e gro kon furu, den o meki un du wan sani nanga a sabi di un abi fu wi Masra Yesus Kristus, èn a o tyari froktu. 9Ma a sma di no abi den san disi, no e si fara. A breni. Bika a fergiti taki Gado krin en fu den sondu san a ben du fosi. 10Brada nanga sisa, un mus du moro muiti fu meki a de fu si taki Gado kari unu èn taki A teki unu gi Ensrefi. Efu un e du dati, dan noiti un no o fadon. 11Bika disi o meki taki a doro opo bradi gi unu fu kon ondro a tiri fu Masra Yesus Kristus, wi Ferlusuman. A tiri disi e tan fu têgo.

A boskopu san wi gi unu tru

12Fu dat'ede mi o tan memre unu na den sani disi, awinsi mi sabi taki un sabi den kba èn taki un e bribi nanga un heri ati tak' na wan tru boskopu. 13Mi e si en leki mi plekti fu tan memre unu na den sani disi solanga mi e libi ini a skin disi ete. 14Bika mi sabi taki her'esi mi o dede libi a skin disi. Disi na san wi Masra Yesus Kristus ben sori mi. 15Ma mi o du muiti taki awinsi mi no de moro, un o man tan memre den sani disi ala leisi.

16Bika a no anansitori wi ben ferteri unu di wi ben e taki fu a krakti fu wi Masra Yesus Kristus, èn tak' A o kon baka. Bika nanga un eigi ai wi si a glori fu En. 17Gado a P'pa ben gi En grani nanga glori di a sten fu a Heiwan di abi Ala Glori taki: “Disi na Mi Manpikin di Mi lobi. Mi abi prisiri nanga En.”

1:17-18
Mat 17:1-5
Mrk 9:2-7
Luk 9:28-35
18Wi srefi yere a sten disi di kmoto fu heimel, di wi ben de nanga En na tapu a santa bergi. 19Fu dat'ede wi e bribi a boskopu fu den profeiti moro tranga. Èn a sa bun efu un tan prakseri en. A de leki wan lampu di e tyari faya kon ini dungru presi te leki a dei broko èn a mamanten-stari opo ini un ati. 20Disi na wan sani san un musu fu sabi: Noti san den profeiti skrifi ini a Santa Buku, un mus brokobroko tapu un eigi fasi.1:20 Un kan puru a pisi disi so tu: No wan sani san den profeiti taki, den ben brokobroko tapu den eigi fasi. 21Bika noiti a boskopu fu wan profeiti ben kmopo fu ensrefi leki libisma. Ma na a Santa Yeye ben meki sma taki san Gado wani.

2

Den kruktu leriman

21Ma kruktu profeiti ben de na mindri a pipel tu, leki fa kruktu leriman o kon na un mindri. Safrisafri den o panya falsi leri na un mindri di kan meki un go lasi. Den o taki srefi tak' den no sabi a Basi di pai fu den kon fri. Tapu sowan fasi her'esi den o go lasi. 2Someni sma o go libi a yayolibi san den e libi. Den o meki sma taki ogri fu a tru leri. 3Gridi o meki den e ferteri un soso lei, fu den kan puru moni na un skin. Ma someni langa a strafu fu den de klar'klari kba. A no langa moro fosi den go lasi.

4Bika Gado no ben meki den engel di ben sondu, tan sondro strafu. Ma A trowe den ini wan dipi olo,2:4 Ini Grikitongo a nen fu a presi disi na Tartaros. pe A keti den poti ini dipi dungru, te leki a ten doro fu A strafu den. 5Gado no meki den sma fu fosi tan sondro strafu tu. A meki a bigi frudu sungu ala den sma di no ben e dini En. Ma A kibri Noa, di ben e preiki gi den sma taki den mus libi bun ini Gado ai. Gado kibri en nanga seibi tra sma moro.

2:5
Gen 6:1—7:24
6A strafu den foto Sodom nanga Gomora tu. Noti fu den no tan abra, A bron den te na gron. Na so A meki den tron wan eksempre gi den sma di no wani dini En.
2:6
Gen 19:24
7Ma Gado kibri Lot, di ben e libi bun ini En ai. A man disi ben e sari fu a yayolibi fu den sma di no ben wani hori no wan enkri wèt.
2:7
Gen 19:1-16
8Lot ben e libi na den mindri leki wan sma di bun ini Gado ai, èn ala dei a ben e hati en fu yere èn fu si a takru fasi fa den ben e libi. 9Ma Masra sabi fa fu puru sma di e du En wani, na ini tesi. Èn A sabi fa fu hori den sma di no bun ini En ai te leki A strafu den tapu a krutudei.2:9 Un kan puru a pisi disi so tu: Èn A sabi fa fu strafu den sma di no bun ini En ai, èn fu hori den te go miti a krutudei. 10A e strafu spesrutu den sma di e du den takru lostu fu a skin nomo, èn di no wani saka densrefi gi En.

Den kruktu leriman disi abi sowan don dek'ati èn den e si densrefi so hei, tak' den no e frede fu kosi den moro heiwan. 11Den engel srefi, di tranga moro den èn di abi makti moro den, no e taki takru fu den heiwan fesi Masra. 12Ma den sma disi de leki meti sondro ferstan, di meki soso fu sma fanga èn kiri den. Den e taki takru fu sani di den no sabi. Dat' meki den srefi o dede ini a ogri san den e du. 13A srefi ogri san den ben du nanga trawan, o miti den baka. Den e si en leki wan prisiri sani fu e nyan èn dringi psa marki bigibigi dei. Fu di den lobi den bedrigi sani fu den, den de leki wan doti flaka nanga wan syen na un mindri te den e nyan makandra nanga unu. 14Den e luku lontu nomo fu feni wan uma di wani huru nanga den. Den no e weri fu du sondu. Den e kori den swakiwan. Den sabi ala sani kba fu gridifasi. Wan fluku de na den tapu. 15Den lasi pasi fu di den libi a bun pasi. Den e waka a srefi pasi now fu Bileam, a manpikin fu Beor,2:15 Ini Grikitongo a nen disi na Bosor. di ben lobi meki moni tapu wan kruktu fasi.

2:15-16
Nom 22:4-35
16Ma Gado ben warskow en fu a kruktu libi fu en. A meki wan babaw buriki taki nanga en nanga wan libisma sten, fu tapu a profeiti fu a no du wan don sani.

17Den sma disi na peti di no e gi watra moro. Den na wolku di a winti e wai gwe. A moro dipi dungru presi san de, de klar'klari e wakti den. 18Den e taki bigitaki di no abi no wan warti. Nanga a takru lostu nanga yayolibi fu den, den e kori sma di no so langa ete ben hari densrefi puru na mindri fu den sma di e libi wan kruktu libi. 19Den e pramisi den sma taki den o meki den kon fri, ma den srefi na srafu fu a pori libi di o meki den go lasi. Bika a de so taki yu na a srafu fu a sani di e basi yu. 20Efu den sma kmoto ini a morsu libi fu grontapu fu di den kon sabi wi Masra èn Ferlusuman Yesus Kristus, ma dan den go libi a srefi libi baka tak' den no man tapu moro nanga en, dan a kon moro takru gi den leki na a bigin. 21A ben o moro betre gi den efu den no ben kon sabi san den ben mus du fu kon bun ini Gado ai, dan fu sabi disi, ma dan den drai den baka gi a santa wèt san den kisi. 22San miti den na leki fa a odo e taki: “Dagu drai go nyan san a ben puru kon na doro,” noso, “Agu wasi krin, dan a drai go lolo baka ini tokotoko.”

2:22
Leri 26:11

3

Den sma di o meki spotu

31Lobiwan, disi na a di fu tu brifi di mi skrifi unu. Na ini ala tu mi tyari sani kon ini un prakseri fu yepi unu fu tan prakseri wan krin fasi. 2Mi wani fu un memre den sani di den santa profeiti ben taki na fesi kba, nanga den komanderi fu wi Masra èn Ferlusuman, di den boskopuman fu En ben gi unu. 3San un no mus fergiti na taki ini den laste dei sma o kon di o teki unu leki spot'popki. Den o du nomo san den takru lostu fu den e taigi den fu du.

3:3
Yud 18
4Den o taki: “A ben pramisi taki A o kon. Pe a e tan dan? Sensi den afo fu wi dede, ala sani tan a srefi fasi leki fa den ben de sensi a bigin fu grontapu.” 5Espresi den e du leki den no sabi taki langa ten kba Gado ben meki heimel nanga grontapu nanga a wortu san A taki. A ben meki grontapu nanga watra èn A puru en fu a watra.
3:5
Gen 1:6-9
6Nanga watra Gado ben sungu a heri fosten grontapu, meki noti fu en no tan abra.
3:6
Gen 7:11
7Ma nanga a srefi wortu Gado e kibri a heimel nanga a grontapu san de now, fu bron den nanga faya tapu a krutudei. Na a dei dati den sma di no wani dini Gado o go lasi.

A dei fu Masra

8Lobiwan, a sani disi un no mus fergiti, tak' wan dei de leki dusun yari gi Masra, èn tak' dusun yari de leki wan dei.

3:8
Psa 90:4
9Masra no e draidrai fu du san A pramisi, ma son sma de di e prakseri dati. Ma A abi langa pasensi nanga unu, fu di A no wani taki no wan sma go lasi. A wani taki ala sma drai den libi.

10Ma a dei fu Masra o kon leki fa wan fufuruman e kon. Tapu a dei dati ala sani di de na loktu o wai gwe nanga bigi babari. Den difrenti sani di de na loktu o bron gwe. Grontapu nanga ala den sani di e psa na en tapu, o kon na krin na fesi Gado.3:10 Un kan puru a pisi disi so tu: Grontapu nanga ala den sani di de na en tapu o teki faya, den o bron.

3:10
Mat 24:43
Luk 12:39
1Tes 5:2
Kon na krin 16:15
11Efu ala den sani disi o bron gwe tapu sowan fasi, dan un mus fu libi wan santa fasi leki fa Gado wani. 12Un mus ferwakti a dei fu Gado èn meki muiti fu a dei dati kon esi. Tapu a dei dati den sani di de na loktu o bron èn a faya o meki den smèlter gwe. 13Ma wi e ferwakti a sani san Gado ben pramisi: wan nyun heimel nanga wan nyun grontapu, pe ala sma o du san bun ini Gado ai.
3:13
Yes 65:17
66:22
Kon na krin 21:1

14Lobiwan, fu di wi e ferwakti dati, un mus du ala muiti fu libi wan krin libi sondro fowtu ini Gado ai. Un mus libi ini freide nanga En tu. 15Sabi taki a ferlusu di wi ferlusu, na fu di Masra abi langa pasensi nanga wi. Wi lobi brada Paulus ben skrifi fu a sani disi tu nanga a koni di Gado gi en. 16A skrifi fu en ini ala den brifi te a e taki fu a sani disi. Wantu sani de ini den brifi disi di tranga fu ferstan. Den sma di no kisi leri ini den sani disi, nanga den wan di swaki ete, e drai den sani disi neleki den e du nanga tra pisi fu a Santa Buku. Ma disi o meki den go lasi.

17Lobiwan, now di un sabi disi na fesi, un mus luku bun taki un no drai un baka gi san un ben e bribi so tranga, dan un meki den sma di no e hori no wan wèt hari unu kon ini den sani san no tru. 18Ma meki wi Masra Yesus Kristus, wi Ferlusuman, sori unu En bun-ati moro nanga moro, èn un mus kon leri sabi En moro bun. Na En mus kisi ala grani now èn fu têgo.