Sranan Tongo Bible 2016 (STB16)
1

Odi

11Gi a gemeente na Tesalonika, di de fu Gado wi P'pa, nanga fu Masra Yesus Kristus,

1:1
Bosk 17:1

Disi na wan brifi fu Paulus, Silfanus nanga fu Timoteus. 2Wi e winsi taki Gado a P'pa, nanga Masra Yesus Kristus, sa sori un bun-ati èn gi un freide.

Yesus o kisi grani te A drai kon baka

3Brada nanga sisa, wi mus fu taki Gado ala ten tangi gi unu. A fiti fu du so fu di a bribi fu unu e gro moro nanga moro, èn a lobi di ibriwan fu unu abi gi makandra e kon moro tranga. 4Wi e meki bigi gi unu ini den tra gemeente fu Gado, taki un e hori doro èn taki un e tan bribi, aladi sma de na un baka nomo fu du un ogri èn aladi den e pina unu. 5A sani disi e sori taki Gado e koti krutu nanga leti èn taki A feni un warti fu kon ondro En tiri. Èn fu di Gado e tiri unu, meki un e nyan pina now. 6Gado o pina den sma baka di e pina unu now, èn A abi leti fu du dati. 7Ma te Masra Yesus drai kon baka fu heimel nanga den tranga engel fu En, na ini wan bigi faya, A o gi unu di de ini nowtu now, rostu makandra nanga wi. 8Dan ala den sma di no sabi Gado èn di no wani du san a bun nyunsu fu wi Masra Yesus e taki, o kisi den strafu. 9A strafu fu den o de taki den o pori gwe fu têgo, èn den o prati nanga Masra èn nanga a bigi makti fu En.

1:9
Yes 2:10
10Disi o psa tapu a bigi dei te Masra o drai kon baka fu teki glori na mindri den sma fu En. Ala den bribisma o luku En nanga opo mofo. Unu o de nanga den sma dati tu, bika un bribi a boskopu san wi ben ferteri unu. 11Fu dat'ede wi e tan begi Gado fu A meki taki un sa man libi na a fasi fa A kari un fu libi. Wi e begi tu taki Gado sa gi un En krakti, fu un kan du ala den bun sani san un e prakseri fu du, èn fu ala sani san un e du na ini bribi sa waka bun. 12Dan wi Masra Yesus o kisi glori na un mindri, èn un sa kisi glori fu di un de wan nanga En. Na a bun-ati fu wi Gado èn fu Masra Yesus Kristus o meki dati psa.

2

A konbaka fu Masra

21Brada nanga sisa, wi wani taigi unu wan sani fu a konbaka fu wi Masra Yesus Kristus, èn fa wi alamala o kon makandra na En.

2:1
1Tes 4:15-17
2Wi e aksi unu tangitangi fu un no meki sma drai un ferstan es'esi. Un no mus bruya efu sma sa taigi un taki a dei fu Masra doro kba, awinsi den e taigi un taki den si a sani ini den yeye, noso taki Gado gi den wan wortu. Kande den e taigi un taki na wi skrifi a sani ini wan brifi. 3Un no mus meki sma kori unu na no wan fasi! Bika fosi a dei fu Masra doro, na ala sei sma o poti Gado na wan sei, èn dan a Ogriwan di no e span nanga no wan wèt, o sori ensrefi. A man disi poti fu go lasi. 4Na en na a feyanti fu ala sani di den e kari gado, noso di den e anbegi leki gado. A e si ensrefi moro hei leki ala den sani disi. A o sidon te ini a santa presi fu Gado srefi fu sori taki na en na Gado.
2:4
Dan 11:36
Ese 28:2
5Un no e memre dan, tak' mi ben ferteri unu fu den sani disi di mi ben de na un mindri ete? 6Èn un sabi tu san e tapu a Ogriwan fu a no kan sori ensrefi. Bika solanga a yuru no doro, a no man sori ensrefi. 7A krakti di e meki sma no span nanga no wan wèt e wroko kba tapu wan kibri fasi. Èn a o tan wroko wan kibri fasi te leki a wan di e tapu en kmopo na pasi. 8Baka dati a Ogriwan o sori ensrefi. Ma te Masra Yesus drai kon baka fu ala sma si En, dan a konbaka fu En o broko a makti fu a Ogriwan, èn Masra o kiri en nanga a bro fu En mofo.
2:8
Yes 11:4
9A Ogriwan o kon nanga a makti fu Satan. A o du ala sortu bigi sani, èn a o meki sma si wan lo ferwondru marki nanga bedrigi wondru.
2:9
Mat 24:24
10Nanga ala sortu ogri san a o du, a o kisi den sma di e go lasi fu di den no lobi den tru sani fu Gado di kan ferlusu den. 11Dat' meki Gado breni den fu den bribi a lei. 12Na sowan fasi ala sma di no ben wani bribi san tru sa kisi den strafu, bika den ben feni en moro switi fu du ogri.

13Brada nanga sisa, un di Masra lobi, wi mus fu gi Gado tangi fu un ede ala ten. Bika Gado teki unu leki den fosi sma drape di A ferlusu. A ferlusu unu fu di un bribi a tru boskopu èn fu di a Yeye meki un kon santa. 14Fu den sani disi A kari unu di wi ben tyari a bun nyunsu gi unu. Na so un sa man teki prati na ini a glori fu wi Masra Yesus Kristus. 15Brada nanga sisa, fu dat'ede un no mus degedege. Un mus hori unsrefi na san wi ben leri unu di wi ben de na unu, èn na san wi ben skrifi gi unu. 16-17Gado wi P'pa lobi wi. A gi wi wan têgo trowstu nanga wan bun howpu fu sori wi En bun-ati. Meki wi Masra Yesus Kristus gi un dek'ati nanga krakti ini ala bun sani san un wani du noso taki.

3

Paulus aksi begi

31Brada nanga sisa, moro fara wi wani aksi unu fu begi gi wi. Un begi taki a wortu fu Masra sa panya es'esi go moro fara, èn taki sma sa lespeki a boskopu leki fa unu e du. 2Un begi tu taki Gado sa kibri wi fu den takru-ati nanga ogri sma, bika a no ala sma de fu fertrow.3:2 Un kan puru a pisi disi so tu: bika a no ala sma e bribi. 3Ma Masra de fu fertrow. A sa gi un krakti èn A sa kibri un fu didibri. 4Masra e meki taki wi abi a fertrow taki un e du den sani san wi ben leri unu, èn tak' un sa tan du den. 5Wi e winsi taki Masra sa meki un ferstan a lobi di Gado abi gi unu, èn tak' un sa tan hori doro soleki fa Kristus ben du.

Den mus fu wroko

6Brada nanga sisa, ini a nen fu Masra Yesus Kristus, wi e taigi unu fu un no bemui nanga wan bribisma di no wani wroko. San sowan sma e du no e akruderi nanga den sani di wi ben leri unu. 7Un srefi sabi taki un mus teki a eksempre san wi ben gi unu. Bika di wi ben de na un mindri, wi no ben libi leki lesiman. 8Sosrefi wi no ben sidon fu meki sma sorgu wi. Ma dei nanga neti wi ben meki muiti, èn wi ben wroko tranga fu no poti wi sorgu tapu no wan fu unu. 9A no taki wi no ben abi a leti fu du dati, ma wi ben poti wan eksempre gi unu. 10Bika di wi ben de na unu, wi ben taigi un krin taki: “Suma no wani wroko, no o nyan.” 11Wi kisi fu yere taki sonwan fu unu no wani wroko. Den no e du noti moro leki sutu den noso ini tra sma tori. 12Na ini a nen fu Masra Yesus Kristus, wi e warskow den sortu sma dati èn wi e komanderi den fu den go safri go wroko fu sorgu densrefi. 13Ma brada nanga sisa, un fu un sei, un no mus weri fu du bun. 14Efu wan sma no wani du san wi skrifi ini wi brifi, un mus piri ai gi en èn un no mus bemui nanga en, fu a firi syen. 15Un no mus hori en na feyanti, ma un mus warskow en leki brada.

Wan blesi fu Paulus

16Meki Masra di de a Masra fu freide, gi unu En freide ala ten èn 17Mi Paulus seni taki un odi. Nanga mi eigi anu mi skrifi disi. Mi e du en leki wan marki na ondro ala mi brifi, fu sori taki na mi seni a brifi. 18Meki a bun-ati fu wi Masra Yesus Kristus de nanga un alamala.