Sranan Tongo Bible 2016 (STB16)
2

Wan bun wrokoman fu Kristus Yesus

21We, mi pikin, meki a bun-ati di Kristus Yesus sori yu, gi yu krakti. 2Èn san yu ben yere fu mi na fesi someni tra sma, na dati yu mus leri tra sma tu, sma di de fu fertrow èn di sa man leri trawan baka. 3Leki wan bun srudati fu Kristus Yesus, yu srefi mus teki pina tu. 4No wan srudati di de ini wan feti, e broko en ede nanga a aladei libi, bika a wani meki a edeman fu a legre abi prisiri nanga en. 5Èn efu wan sma de ini wan wega, dan a kan kisi grani leki winiman soso efu a strei a strei leki fa a musu. 6A gronman di du a tranga wroko, mus de a fosi sma di e nyan san a prani. 7Poti prakseri tapu san mi e taki, bika Masra o meki yu ferstan ala den sani disi.

8Memre tak' Gado ben meki Yesus Kristus, wan bakapikin fu David, opo baka na dede. Disi na a bun nyunsu di mi e preiki. 9Na fu a bun nyunsu disi ede meki mi e nyan pina, èn den bui mi srefi neleki mi na wan ogriman. Ma den no man bui a wortu fu Gado. 10Dat' meki awinsi san e miti mi, mi e teki en, efu dati sa tyari ferlusu nanga têgo glori ini Kristus Yesus gi den sma di Gado ben teki. 11San mi e taki now de fu fertrow:

Efu wi dede nanga En,

dan wi o libi nanga En.

12Efu wi tan hori doro,

dan wi o rigeri nanga En.

Efu wi sa taki tak' wi no sabi En,

dan En srefi sa taki

tak' A no sabi wi.

2:12
Mat 10:33
Luk 12:9

13Awinsi wi no e du san wi taki,

A sa tan du san A taki,

bika A no kan lei gi Ensrefi.

Fa yu mus de nanga kruktu leriman

14Yu mus tan memre den bribisma den sani disi. Taigi den na fesi Gado tak' den no mus meki trobi abra san wan wortu wani taki. Bika a sani dati no e tyari no wan wini kon, ma a e pori den sma di e arki. 15Du ala muiti fu Gado kan feni taki yu na wan bun wrokoman fu En, di no abi fu syen èn di e leri a tru wortu soleki fa a musu. 16No bemui nanga sma di e hari taki abra lawlaw sani di no abi noti fu du nanga Gado. Bika o moro sma e bemui ini den sani disi, o moro den e kmopo na a pasi fu Gado. 17A leri fu den e panya leki wan takru siki. Himeneus nanga Filetus na tu fu den sma di e du a sani disi. 18Den libi a tru pasi, e leri a lei tak' den dedesma kon baka na libi kba. Tapu a fasi disi den e broko a bribi fu son sma. 19Ma a fundamenti di Gado poti, steifi. A no man seki. A sani disi skrifi na en tapu: “Masra sabi suma na fu En.” Nanga: “Ala sma di e taki tak' den na fu Masra, mus tan fara fu ogridu.” 20A de so tak' na ini wan bigi oso yu no abi soso gowtu nanga solfru sani. Ma yu abi sani tu di meki fu udu, nanga sani di meki fu kleidoti. Sonwan fu den na fu spesrutu momenti, trawan na fu aladei sani. 21Efu wan sma hori ensrefi krin fu ala sortu ogri, dan Masra sa man teki en fu du spesrutu sani. A o de santa, èn a o de klar'klari fu du ibri bun wroko san Masra gi en fu du.

22Yu no mus gi yusrefi abra na den lostu fu yongu sma. Ma makandra nanga den sma di e kari na Masra nanga wan krin ati, yu mus poti yusrefi fu du san bun ini Gado ai, fu bribi, fu lobi, èn fu libi ini freide. 23Mi e taigi yu ete wan leisi fu no bemui nanga lawlaw nanga don aksi, bika yu sabi taki den e tyari trobi. 24Wan wrokoman fu Masra no mus e meki trobi, ma a mus abi switi maniri nanga ala sma. A mus man fu gi leri, èn a mus abi pasensi. 25Nanga wan safri fasi a mus man poti den sma di e feti en na den presi. A kan tak' Gado sa meki den drai den libi kon bribi san na tru. 26Na so den o kisi densrefi èn den o man kmopo ini a krafana fu didibri pe a ben hori den, fu den du san didibri wani.

3

Tranga ten o kon

31Yu mus e hori a sani disi na yu ede, tak' tranga ten o kon na ini den laste dei. 2Ini den dei dati den sma o prakseri densrefi nomo, èn den o gridi fu moni. Den o abi bigimemre, èn den o prakseri hei fu densrefi. Den o taki takru fu trawan, den no o arki m'ma nanga p'pa moro, den no o sabi san na tangi, èn den no o si noti leki wan santa sani. 3Den sma no o lobi trawan, den no o sabi san wani taki tak' yu mus gi pardon, èn den o gi trawan pori nen. Den sma no o man basi densrefi, den o ogri, èn den no o lobi sani san bun. 4Den o konkru densrefi, den o du sani sondro fu prakseri, èn den o abi bigifasi. Den o lobi grontapu prisiri moro leki Gado. 5Den o du leki den e dini Gado, ma den no o meki a krakti fu Gado wroko ini den libi. Yu mus tan fara fu den sortu sma disi. 6Sonwan fu den sma disi sabi fa fu boro go ini sma oso èn kisi den uma di no e denki fara. Den uma disi lai nanga sondu, èn ala sortu tranga lostu e hari den. 7Ala yuru den e teki leri, ma noiti den no man kon ferstan san na tru. 8Den man di e gi den kruktu leri, e feti a tru leri soleki fa Yanes nanga Yambres ben feti Moses. A ferstan fu den man disi pori kba, èn a bribi fu den no man hori stan.

3:8
Eks 7:11
9Ma den no o skopu en fara, bika a srefi sani san ben psa nanga Yanes nanga Yambres, o psa nanga den tu. Ala sma o kon si taki na lawlaw sani den e leri.

A wroko san Timoteus mus du

10Ma yu dati sabi ala den sani san mi e leri. Yu sabi fa mi e libi nanga san mi wani du ini mi libi. Yu sabi a bribi fu mi, yu sabi fa mi abi pasensi nanga lobi èn fa mi e hori doro. 11Yu sabi fa sma ben de na mi baka fu du mi ogri, èn fa mi ben nyan pina na ini Antiokia, Ikonium nanga Listra. Ala den sani disi ben miti mi, ma Masra puru mi na ini alamala.

3:11
Bosk 13:14—14:20
12Ma a no kan tra fasi, bika ala sma di e bribi na ini Kristus Yesus èn di wani libi leki fa Gado wani, o ondrofeni tak' sma de na den baka fu du den ogri. 13Ma den takru-ati sma nanga den bedrigiman sa kon moro ogri ete. Den e kori sma èn sma e kori den baka. 14Ma yu dati mus tan hori na den sani san yu leri èn san yu sabi taki na tru sani. Bika yu sabi suma na den sma di ben gi yu leri. 15Sensi yu ben de wan pikin boi, yu ben sabi san a Santa Buku e taki. A buku disi kan gi yu koni fu kon sabi taki efu yu bribi na ini Kristus Yesus, Gado o ferlusu yu. 16Na Gado srefi ben meki sma skrifi ala sani san de ini a Santa Buku. Den sani disi bun fu gi leri, fu sori pe un fowtu, fu meki un kon bun, èn fu leri un fu libi wan bun fasi. 17Tapu a fasi disi a sma di e dini Gado sa de klar'klari fu kan du ibri bun wroko.

4

41Na fesi Gado èn na fesi Kristus Yesus di o krutu den dedewan nanga den libiwan te A kon baka fu rigeri leki Kownu, mi e taigi yu trangatranga taki: 2Preiki a boskopu. Yu mus de klar'klari ala ten fu du dati, awinsi na wan bun ten, efu no. Sori den sma pe den fowtu, warskow den, gi den dek'ati. Du dati nanga ala pasensi, èn tan leri den sma. 3Bika wan ten o kon pe den sma no o wani arki a bun leri moro. Den o du san den wani, èn den o teki wan lo leriman di e leri den san den wani fu yere. 4Den o tapu den yesi gi a tru leri èn den o arki leitori. 5Ma yu dati mus de nanga krin ai, awinsi san e psa. Teki a pina, panya a bun nyunsu, du ala a wroko san Gado gi yu fu du.

6Dyonsro mi brudu o lon leki wan ofrandi. A yuru fu mi dede de krosbei kba. 7Mi strei a bun strei. Mi lon a streilon te na a kba, èn mi no lasi a bribi. 8Now wan grani e wakti mi, a grani san yu e kisi te yu libi bun ini Gado ai. Masra, a krutubakra di e koti krutu nanga leti, sa gi mi a grani dati tapu a bigi dei. Ma a no mi wawan o kisi a grani disi, ma na ala sma di e angri fu A kon baka.

Den kriboi boskopu nanga odi

9Du muiti fu kon her'esi na mi, 10bika Demas gwe libi mi fu di a lobi den sani fu a grontapu disi. A go na Tesalonika. Kresens go na Galasia, èn Titus go na Dalmasia.

4:10 a
Kol 4:14
Flm 24
11Lukas wawan de ete nanga mi. Te yu e kon, go teki Markus fu a kon nanga yu, bika a de wan bigi yepi gi mi na ini a wroko.
4:11 a
Kol 4:14
Flm 24
12Mi seni Tikikus go na Efese.
4:12
Bosk 20:4
Efe 6:21-22
Kol 4:7-8
13Te yu e kon, yu mus tyari a mantel fu mi kon di mi ben libi ini Troas na Karpus oso. Sosrefi yu mus tyari den buku gi mi, ma funamku den wan di skrifi tapu meti buba.4:13 Fosten den ben meki wan sortu papira fu meti buba.
4:13
Bosk 20:6
14Aleksander, a koprosmeti, du mi furu ogri. Masra o pai en fu san a du.
4:14
1Tim 1:20
15Yu mus luku bun nanga en tu, bika fayafaya a e feti san wi e leri.

16A fosi leisi di mi go na krutu, no wan sma kon yepi mi. Ala sma libi mi, mi wawan. Meki Masra no hori den frantwortu fu dati. 17Ma Masra ben de nanga mi èn A gi mi krakti fu mi kan preiki a heri boskopu. Na so ala den sma di no sabi Gado ben kan yere en. Èn Masra puru mi na grebimofo. 18Iya, Masra o kibri mi fu ala sortu ogri èn A o meki mi doro bun na heimel pe A e rigeri leki Kownu. Na En mus kisi glori fu têgo èn ala ten! Amen.

19Taki Priska, Akwila, Onesiforus nanga den ososma fu en, odi gi mi.

4:19 a
Bosk 18:2
20Erastus tan ini Korinte, èn mi ben abi fu libi Trofimus sikisiki na baka di mi gwe fu Mileta.
4:20 a
Bosk 19:22
Rom 16:23
21Meki muiti fu kon na mi fosi a kowruten. Ebulus, Pudens, Linus, Klaudia nanga ala den brada nanga sisa e seni odi gi yu.

22Meki Masra de nanga yu èn meki A sori unu bun-ati.