Sranan Tongo Bible 2016 (STB16)
18

Paulus ini a foto Korinte

181Dan Paulus kmopo fu Atena go na Korinte. 2Drape a miti nanga wan Dyusma di ben nen Akwila. Akwila ben gebore ini Pontus, èn a no langa di en nanga en wefi Prisila ben kmopo fu Italiakondre kon, fu di a grankownu Klaudius ben yagi ala Dyusma puru fu Roma. Dan Paulus go luku den. 3Den sma disi ben e meki tenti, èn fu di Paulus ben e du a srefi wroko, meki a tan na den dan a wroko nanga den.

4Ibri sabatdei Paulus ben e go ini a Dyukerki pe a ben pruberi fu meki den Dyusma nanga den Grikisma kon ferstan taki a abi leti. 5Di Silas nanga Timoteus kmopo kon fu Masedonia, Paulus teki ala en ten fu preiki, èn a sori den Dyusma krin taki Yesus na a Kristus. 6Ma di den no ben wani arki en moro èn den bigin taki takru fu en, Paulus seki a santi puru fu en krosi leki wan marki taki a kba nanga den. Dan a taigi den taki: “Na un eigi fowtu efu un go lasi, a no mi frantwortu moro. Bigin fu now mi o go na den sma di no de Dyu.” 7Dan Paulus kmopo fu drape go na a oso fu Titius Yustus, di ben de let' na sei a Dyukerki. A man dati no ben de wan Dyu, ma a ben e anbegi Gado. 8Krispus, di ben de a edeman fu a Dyukerki, nanga ala den sma fu en oso, teki bribi ini Masra Yesus. Furu tra sma fu Korinte kon na bribi tu di den yere a boskopu fu Paulus, dan den teki dopu. 9Dan wan neti Gado sori Paulus wan sani. A si fa Masra e taigi en taki: “Yu no abi fu frede! Tan taki nanga den sma, yu no mus tan tiri. 10Mi de nanga yu èn no wan sma o man du yu ogri, bika Mi abi furu sma ini a foto disi.” 11So Paulus tan libi wan yari nanga siksi mun drape èn a leri den sma a wortu fu Gado.

12Ma di Galio ben de granman fu Akaya, den Dyusma opo leki wan man dan den grabu Paulus tyari en go na krutu. 13Den taigi Galio taki: “A man disi e pruberi fu meki den sma dini Gado tapu wan tra fasi leki fa a wèt e taki.” 14Dan leki fa Paulus ben wani opo en mofo fu taki, Galio taigi den Dyusma taki: “Un Dyusma, yere. Efu a man disi ben du wan hebi ogri noso wan tra sani di no bun, dan mi ben o teki ten fu arki san un abi fu taki. 15Ma fu di un no e agri abra wortu, nen, nanga san a wèt fu unu e taki, dan un srefi mus luku san un e du. Mi no wani koti krutu fu den sani disi.” 16Dan a yagi den puru na fesi en krutusturu. 17Ne den alamala grabu Sostenes, a edeman fu a Dyukerki, èn den fon en let' fesi a krutusturu. Ma Galio no hati en ede nanga den srefsrefi.

Paulus go baka na Antiokia ini Siria

18Paulus tan wan heri pisten ini Korinte ete, dan a gwe libi den bribisma. Makandra nanga Prisila nanga Akwila, a go na a foto Kenkrea. Drape a meki den krebi en ede leki wan marki taki a ben pramisi Gado wan sani. Dan den teki wan sipi fu go na Siria.

18:18
Nom 6:13,18
19A sipi go fosi na a foto Efese. Drape Paulus prati pasi nanga Prisila nanga Akwila, dan a go na a Dyukerki fu taki nanga den Dyusma. 20Den sma aksi en fu tan moro langa, ma a no ben wani. 21Ma di a e gwe, a taigi den taki: “Efu Gado wani, mi sa drai kon baka na unu.” Dan a kmopo na Efese nanga sipi. 22Di Paulus doro na Sesarea, a go na syoro èn a taki a gemeente odi.18:22 Un kan puru a pisi disi so tu: Di a doro na Sesarea, a go na Yerusalem go taki a gemeente odi. Dan a go na Antiokia ini Siria. 23A tan wan pisten drape, dan a gwe baka. A waka lontu ini Galasia nanga Frigia èn a meki den bribisma kon tranga ini a bribi.

Apolos ini a foto Efese

24Dan wan Dyusma fu a foto Aleksandria, di ben nen Apolos, kon doro ini Efese. A ben de wan koni man èn a ben sabi a Santa Buku tapu en tin finga. 25A ben kisi leri abra a Nyun Pasi, èn tapu wan krakti fasi a ben e leri sma fin'fini abra Yesus. Ma a ben sabi soso fu a dopu fu Yohanes. 26Sondro frede Apolos bigin taki na ini den Dyukerki. Ma di Prisila nanga Akwila kon yere san a e taki, den teki en tyari go na den oso, dan den leri en den sani fu Gado moro fini. 27Di Apolos ben wani go na Akaya, den bribisma fu Efese gi en dek'ati fu go. Den skrifi wan brifi gi den bribisma drape taki den mus teki en nanga opo anu. Di a doro drape, a ben de wan bigi yepi gi den sma di ben tron bribisma fu di Gado ben sori den En bun-ati. 28Na tapu wan krakti fasi a ben sori den Dyusma na ala sma fesi taki den no abi leti. A ben sori den kmopo fu a Santa Buku taki Yesus na a Mesias.

19

Paulus ini a foto Efese

191A srefi ten di Apolos ben de ini a foto Korinte, Paulus psa ini den distrekti te a kon doro na a foto Efese. Drape a miti wantu bribisma. 2A aksi den taki: “Unu kisi a Santa Yeye di un teki bribi?” Den piki en taki: “No, un no ben sabi srefi taki wan Santa Yeye de.” 3Dan Paulus aksi den taki: “Sortu dopu un kisi dan?” Den piki en taki: “Wi kisi a dopu fu Yohanes.” 4Ne Paulus taigi den taki: “Yohanes ben dopu sma te den ben drai den libi, èn a ben taigi den taki den mus teki bribi ini a Man di ben o kon na en baka. A Man dati na Yesus.”

19:4
Mat 3:11
Mrk 1:4,7-8
Luk 3:3,16
Yoh 1:26-27
5Di den yere a sani dati, den teki dopu ini a nen fu Masra Yesus. 6Baka dati Paulus poti en anu na den tapu dan a Santa Yeye kon na den tapu. Den bigin taki ini tra tongo èn den taki san Gado gi den fu taki. 7Den sma dati ben de nanga den twarfu so.

8Dri mun langa Paulus tan go na a Dyukerki drape. Sondro frede a ben e taki nanga den sma fu a fasi fa Gado wani tiri libisma, èn a ben e pruberi fu meki den ferstan taki a abi leti. 9Ma wantu fu den sma no ben wani bribi san Paulus taki. Den no ben wani arki srefsrefi. Na ala sma fesi den ben e taki takru fu a Nyun Pasi. Dat' meki Paulus libi den sma dati, dan a teki den bribisma tyari go ini wan skoro fu wan man di ben nen Tiranus. Drape a ben taki ala dei nanga den. 10Tu yari langa Paulus du a sani dati. Na so ala sma ini Asia, Dyusma nanga sma di no de Dyu, kon yere a wortu fu Masra.

Den manpikin fu Skefas

11Gado ben meki Paulus du bun bigi sani. 12Dat' meki sma ben tyari anyisa nanga tra krosi fu en skin go gi den sikisma. Den sikisma ben e kon betre èn takruyeye ben e gwe libi den.

13Wantu fu den Dyusma di ben waka fu a wan presi go na a trawan e yagi takruyeye puru tapu sma, ben pruberi tu fu yagi takruyeye puru ini a nen fu Masra Yesus. Den ben e taki: “Mi e komanderi yu fu gwe ini a nen fu Yesus, di Paulus e preiki.” 14Den man di ben du dati ben de den seibi manpikin fu Skefas, wan fu den prenspari priester fu den Dyusma. 15Ma a takruyeye piki den taki: “Yesus mi sabi, èn mi sabi suma na Paulus, ma suma na unu?” 16Dan a man di ben abi a takruyeye na en tapu, dyompo go na den tapu dan a fon den alamala. A man ben tranga moro den, tak' nanga mankeri èn nanga sososkin den ben abi fu lon kmopo fu a oso. 17Ala sma fu Efese, den Dyusma nanga den sma di no de Dyu, kon yere a tori disi. Den alamala kon frede èn den gi a nen fu Masra Yesus bigi grani. 18Furu fu den sma di ben teki bribi, ben kon taki na ala sma fesi sortu sondu den ben du. 19Furu fu den sma di ben du bonuwroko tyari den buku fu den kon na wan, dan den bron den let' fesi ala sma. Den sma teri gi omeni moni den ben o man seri den buku disi èn den teri feifitenti dusun solfrumoni. 20So a wortu fu Masra ben panya moro nanga moro èn a ben sori taki a abi krakti.

A bigi dyugudyugu ini Efese

21Baka den sani disi, Paulus teki a besroiti fu psa ini Masedonia nanga Akaya te a ben o go na Yerusalem. A taki: “Baka te mi go drape, mi mus go na Roma tu.” 22Dan a seni Timoteus nanga Erastus, tu fu den man di ben wroko nanga en, fu bigin go na Masedonia. Ma ensrefi tan wan pisten ete ini Asia.

23A srefi ten dati wan bigi dyugudyugu broko ini Efese abra a Nyun Pasi. 24A bigin nanga wan solfrusmeti di ben nen Demetrius. A man disi ben e meki pikin solfru tempel fu a gado Artemis. Na so a ben e meki den smeti wroko furu moni nanga a sani disi. 25Dan Demetrius kari ala den smeti nanga den sma di ben abi fu du nanga a wroko disi, kon na wan. A taigi den taki: “Brada, un alamala sabi taki wi e meki moi moni nanga a wroko di wi e du. 26Ma un srefi e si èn un yere fa a man Paulus drai bun furu sma prakseri. A no dya ini Efese wawan, ma pikinso moro ini heri Asia tu. Bika a e meki den bribi taki gado di meki nanga anu, a no trutru gado. 27A sani disi o meki taki a wroko san wi e du kisi pori nen, èn den sma no o teri Artemis moro, di ala sma fu Asia nanga heri grontapu e anbegi. A tempel fu a bigi gado Artemis no o abi no wan warti moro.” 28Di den man yere san Demetrius taki, den ati teki faya dan den bigin bari taki: “Artemis fu Efese bigi!” 29A heri foto kon bruya èn den lon leki wan man go na a stadion. Den ben grabu Gayus nanga Aristarkus srepi go nanga den. Den tu man dati ben waka nanga Paulus èn den ben de fu Masedonia. 30Paulus ben wani go fu taki nanga den sma, ma den bribisma tapu en fu a no go. 31Wantu heihei lantiman fu Asia di ben de mati fu Paulus, seni warskow en tu tak' a no mus prefuru fu go drape. 32A heri konmakandra ben bruya srefsrefi, bika a wan ben e bari disi èn a trawan ben e bari dati. Moro furu fu den sma no ben sabi fu sanede den ben kon makandra. 33Dan den Dyusma pusu wan man go na fesi fu taki gi den. Wantu fu den sma brokobroko gi en san na a problema. Dan Aleksander sori den sma nanga en anu taki den mus tan tiri, fu a taki san psa. 34Ma di den si taki en na wan Dyusma, den bari tu yuru langa taki: “Artemis fu Efese bigi!”

35Te fu kba a fesiman fu a foto meki den sma tan tiri. A taigi den taki: “Sma fu Efese, ala sma na grontapu sabi taki na den sma fu Efese abi a frantwortu fu sorgu gi a tempel fu a bigi gado Artemis nanga a santa ston fu en di fadon kmopo na heimel. 36No wan sma kan strei taki a no tru. Dat' meki un mus hori unsrefi èn un no mus du noti sondro fu prakseri bun san un o du. 37Bika un tyari den man kon dya sondro taki den fufuru sani puru fu a tempel èn sondro taki den taki takru fu a gado fu unu. 38We, efu Demetrius nanga den tra smeti no man feni en nanga wan sma, meki den tyari en go na krutu. Bika krutu e hori èn granman de di e koti krutu. 39Efu un wani wan sani ete, dan un sa taki fu a sani dati te wi kon makandra soleki fa a wèt e taki. 40Den kan kragi wi fu a dyugudyugu di psa tide. Wi no o man gi frantwortu fu sanede un ben meki opruru, bika noti no de san un kan tyari kon na fesi fu sanede un du en.” Nanga den wortu dati a man seni den sma go na oso.

20

Paulus ini Masedonia nanga Grikikondre

201Di a dyugudyugu ben kba, Paulus seni kari den bribisma. Dan a taki nanga den fu gi den dek'ati. Baka dati a taki den odi, dan a hari go na Masedonia. 2A psa ini a heri kontren drape èn a taki furu nanga den bribisma fu gi den dek'ati. Baka dati a doro na Grikikondre. 3Drape a tan dri mun. Di a meki ensrefi klari fu go nanga sipi na Siria, a kisi fu yere taki den Dyusma ben e suku wan fasi fu kiri en. So a teki a besroiti fu psa ini Masedonia te a e drai go baka. 4Wantu bribisma go nanga Paulus. Den man dati ben de Sopater a manpikin fu Pirus, di kmopo fu a foto Berea, Aristarkus nanga Sekundus fu a foto Tesalonika, nanga Gayus fu a foto Derba. Moro fara yu ben abi Timoteus, nanga tu man fu Asia di ben nen Tikikus nanga Trofimus. 5Den man disi go na un fesi dan den wakti unu na Troas. 6Ma wi srefi wakti te leki a Paskafesa kba, dan fosi wi teki wan sipi kmopo fu Filipi go na Troas. Baka feifi dei wi doro na den tra brada, dan wi tan seibi dei drape.

Paulus fisiti a foto Troas fu a laste leisi

7Tapu a fosi dei fu a wiki, wi ben kon makandra fu broko brede. Dan Paulus bigin taki nanga den bribisma, èn fu di a ben o gwe a tra dei, a taki nanga den te mindrineti. 8Wi ben de makandra ini wan bigi kamra na tap'sei fu wan oso. Furu oli lampu ben leti ini a kamra. 9Wan yonkuman di ben nen Etikus ben sidon tapu wan fensre-bangi. Dan fu di Paulus ben taki langa, a go ini wan dipi sribi dan a fadon go te na gron. Di den opo en puru na gron, a ben dede. A boi no tan na libi fu di yu ben mus kren dri trapu fu kon pe wi ben de. 10Ma Paulus go na gron, a didon tapu a dedeskin èn a brasa en. Dan a taki: “Un no abi fu frede, bika a e libi.” 11Di a go baka na tap'sei, a broko brede dan a nyan nanga den. A taki nanga den te leki dei broko, dan a gwe. 12Den sma tyari a boi gwe libilibi èn a sani dati gi den furu dek'ati.

Paulus kmopo fu Troas go na Mileta

13Fu di Paulus ben wani en so, meki wi go moro fara nanga sipi na a foto Asus pe en ben o kon ini a sipi. A ben wani waka nanga futu kon drape. 14Di a doro na Asus, a kon ini a sipi èn so un go na a foto Mitilena. 15Fu drape wi hari go moro fara, èn a tamara fu en wi doro fesi Kios. A tra dei wi hari go na Samos, èn a dei na en baka wi doro na Mileta. 16Wi ben psa Efese fu di Paulus no ben wani lasi ten ini Asia, bika a ben e feti fu doro na Yerusalem. A ben e suku fu doro drape tapu a Pinksterfesa efu a ben man.

Paulus nanga den fesiman fu a gemeente na Efese

17Di Paulus ben de na Mileta, a seni kari den fesiman fu a gemeente fu Efese kon. 18Di den man kon, Paulus taigi den taki: “Un sabi fa mi ben libi na un mindri sensi a dei di mi poti futu ini Asia. 19Mi wroko gi Masra nanga ala sakafasi. Mi krei furu èn mi nyan furu pina fu di den Dyusma ben wani kiri mi. 20Ala san ben de fanowdu fu un sabi, mi leri èn ferteri unu. Mi du dati na ini un oso èn na ala sma fesi. Mi no hori noti na baka gi unu. 21Mi leri Dyusma nanga sma di no de Dyu taki den mus fu drai den libi kon na Gado èn teki bribi ini wi Masra Yesus. 22Luku, now a Santa Yeye e meki mi go na Yerusalem èn mi no sabi san o miti mi drape. 23San mi sabi nomo na taki a Santa Yeye e taigi mi wan krin fasi na ibri foto taki sma o poti mi na ini straf'oso, èn den o pina mi. 24Ma mi eigi libi no prenspari, a no e teri gi mi. San prenspari gi mi, na dati mi kan kba a wroko di Masra Yesus gi mi fu du. A wroko dati na fu ferteri libisma a bun nyunsu fu a bun-ati fu Gado.

20:24
2Tim 4:7

25Now mi sabi taki no wan fu unu di mi kon ferteri fu a fasi fa Gado wani tiri libisma, o si mi moro. 26Fu dat'ede mi e taigi un tide taki a no mi frantwortu moro efu un go lasi. 27Bika mi no hori noti na baka, ma mi ferteri unu ala sani san Gado ben wani fu un sabi. 28Sorgu taki un e luku bun fa un e tyari unsrefi nanga ala den bribisma. A Santa Yeye poti unu leki sma di e tiri a gemeente, èn A gi unu a frantwortu fu sorgu gi a gemeente fu Gado di A bai nanga a brudu fu En Manpikin.20:28 Wantu manuscript skrifi taki: di A bai nanga En eigi brudu. 29Bika mi sabi taki te mi gwe, sma o kon na unu di gersi krasi tigri èn den o pruberi fu pori a gemeente. 30Sma o opo na un mindri di o taki sani di no tru, fu hari den bribisma kon na den baka. 31Un mus tan na ai, èn un no mus fergiti taki na dri yari langa mi sori ibriwan fu unu fa fu tyari ensrefi. Mi du dati dei nanga neti èn nanga furu watra ai.

32Now mi e libi unu ini a anu fu Gado nanga a wortu di e sori unu a bun-ati fu En. Bika A kan meki un gro ini a bribi èn kisi den blesi di A pramisi den sma fu En. 33Mi no ben abi bigi-ai tapu tra sma solfru, gowtu noso krosi. 34Un srefi sabi fa mi wroko fu sorgu misrefi nanga den sma di ben de nanga mi. 35Tapu a fasi disi mi sori unu taki un mus wroko tranga, soleki fa mi ben du, fu man yepi pôtisma. Un memre tu den wortu di Masra Yesus ben taki: Wan moro bigi blesi de tapu a sma di e gi, dan tapu a sma di e kisi.”

36Di Paulus kba taki, a kindi dan a begi nanga ala den sma. 37Dan den alamala bari krei. Den brasa en èn den bosi en. 38Noti no ben meki den sari so, leki di Paulus taigi den taki noiti moro den no o si en. Dan den tyari en go na a sipi.