Sranan Tongo Bible 2016 (STB16)
5

51Israel, arki san mi abi fu taki, arki a dede-oso singi di mi o singi gi yu.

2A yongu uma, Israel, fadon.

A fadon èn a no sa opo moro.

Den fringi en trowe tapu en eigi gron.

No wan sma no e gi en wan anu fu opo.

3Bika na so MASRA fu Masra taki fu Israel: Fu a foto di e hari go feti nanga dusun man, wan hondro nomo o tan èn fu a wan di e hari go feti nanga wan hondro man, tin nomo o tan. 4Na disi MASRA e taigi Israel: Suku Mi, dan yu sa libi. 5Ma no go suku en na Betel, no kon na Gilgal èn no hari go na Berseba. Bika a no abi misi taki den o tyari den sma fu Gilgal gwe leki srafu èn taki not'noti o tan abra fu Betel. 6Ma suku MASRA, dan yu sa tan na libi. Efu yu no du dati, A o psa leki wan faya ini a kondre fu Yosef. A o bron ala sani èn no wan sma o de fu kiri a faya ini Betel. 7Yu, yu di e meki taki te sma e taki fu a reti fasi, den e abi wan bita tesi ini den mofo. Yu di e trapu den bun sani nanga yu futu.

8A Wan, di meki den stari di den e kari Pleiaden nanga Orion,

A Wan di e meki a moro dipi dungru kon krin leki dei,

A Wan di e meki dei tron neti,

di e kari a watra fu a se kon na wan

dan A e kanti abra grontapu,

na MASRA na En nen.

9Nanga a faya fu En di e koti na loktu

A e kiri den tranga wan,

A e figi den foto fu den puru na pasi.

10Den no wan si den sma srefsrefi na ai di e tnapu na den bigi doro fu a foto fu taki tak' sani mus psa tapu wan leti fasi. Den no lobi den sma srefsrefi di e taki sani soleki fa den de. 11Dat' meki, na fu di un e trapu den swakiwan, na fu di yu e puru a karu fu en na en anu, yu no sa tan libi ini den ston oso fu unu di un bow èn un no sa dringi fu den droifibon di un prani so moi ini den droifidyari fu unu. 12Bika Mi sabi o furu sani un du di no bun èn Mi sabi o furu den sondu fu un de. Unu di e pina den sma di e du sani nanga leti, unu di e meki sma pai un ondro tafra, èn di e puru a leti na den pôtisma anu te krutu e hori. 13Dat' meki den koniwan e hori den mofo a ten disi, bika na wan tumsi ogri ten.

14Un suku den bun sani, no suku a ogri, fu un kan libi. Dan MASRA, a Gado fu ala sani, sa de nanga unu, leki fa un e taki. 15Un no mus lobi den ogri sani, ma un mus lobi den bun sani. Dan kande MASRA, a Gado fu ala sani, sa sori sari-ati na den bakapikin fu Yosef di tan abra. 16Fu dat'ede MASRA, a Gado fu ala sani, Masra e taki: Den sa row tapu ala pren. Den sa krei na ini ala strati èn den sa taki: kari den man di e prani gron fu kon krei, kari den sma di sabi dede-oso singi fu den kon singi. 17Na ini den droifidyari srefi krei sa de fu yere te Mi o psa na un mindri. So MASRA taki.

18Den sma di e angri fu a dei fu MASRA kon, mus luku bun. Bika a dei fu MASRA no o tyari leti gi unu, ma dungru. 19A o gersi wan sma di e lon gi wan lew, dan wan beer grabu en. Te a doro oso, dan a tnapu nanga en anu na a skotu, wan sneki e beti en. 20Bika a dei fu MASRA o de wan dungru dei, sondro faya. A o dungru srefsrefi, no wan pikin faya o de fu si.

21Mi no lobi den fesa fu unu srefsrefi. Mi e fisti fu den èn Mi no wani si den konmakandra fu unu. 22Iya, Mi no abi prisiri ini den meti di un e bron leki ofrandi gi Mi nanga den graan-ofrandi. Mi no e luku den pikin skapu na wan ai, di un kweki spesrutu fu tyari leki freide-ofrandi. 23Un kmoto nanga a babari fu den singi fu unu na Mi tapu. Mi no wani yere fa un e prei den harp. 24A ben o moro bun efu un ben e meki taki sani e tan psa tapu wan leti fasi èn un mus tan du sani fa den mus du, leki wan liba di no e tapu fu lon.

25Israel, fotenti yari langa un ben kiri meti leki ofrandi gi Mi èn un ben tyari graan-ofrandi gi Mi ini a sabana. 26Ma un ben tyari den popki tu di unsrefi ben meki fu un kownu Sikut nanga fu Kewan, a gado fu unu fu den stari. 27Fu dat'ede Mi o meki den tyari un gwe leki srafu psa Damaskus. Na disi MASRA taki. A Gado fu ala sani, na En nen.