Sranan Tongo Bible 2016 (STB16)
9

91Mi si fa Masra ben tnapu na a altari dan A taki: “Naki a ede fu a postu, meki a fundamenti seki. Naki den ston broko tapu den ede. Den wan di de na libi ete, Mi sa meki dede na ini feti. No wan fu den sa man lowe. No wan fu den di lowe o tan na libi. 2Awinsi den diki wan olo go te na dedekondre, te drape Mi o langa Mi anu hari den kon baka. Awinsi den kren go te na heimel, Mi o hari den kon na gron baka. 3Awinsi den ben go te na a moro hei pisi fu a Karmelbergi, Mi ben o go feni den puru drape. Awinsi den ben wani go kibri gi Mi te na ondrosei fu a se, Mi ben o taigi wan sneki fu beti den drape. 4Awinsi den feyanti fu den ben e tyari den gwe leki srafu, Mi ben o meki den dede drape na ini feti. Mi e tan hori Mi ai na den tapu, no fu du den bun, ma fu du den ogri.”

5Iya, Masra, a MASRA fu ala sani, e fasi grontapu meki a seki,

dan ala sma di e libi na en tapu e row.

Grontapu sa opo kon na loktu,

leki fa a watra fu a Nijl-liba e sweri kon na loktu,

dan a sa saka go baka leki a liba fu Egipte.

6Na En na A Wan di bow En oso na ini heimel,

èn di span a heimel abra grontapu.

A Wan di e kari a watra fu a se kon na wan,

dan A e kanti abra grontapu,

na MASRA na En nen.

7Na so MASRA taki: “Pikin fu Israel, un de a srefi gi Mi leki den pikin fu Etiopia. Na Mi puru Israel na ini Egiptekondre. Ma na Mi puru den Filistijnsma na ini Kaftor tu, nanga den Arameesma na ini Kir. 8Luku, den ai fu MASRA fu Masra, de na tapu a sondu kondre disi. Mi sa figi en puru na grontapu. Ma Mi no sa figi ala den bakapikin fu Yakob puru.” Na so MASRA taki.

9Luku, na Mi o gi a komanderi, Mi o seki den sma fu Israel na mindri fu den tra folku, leki fa den e seki sani ini wan manari fu puru den sani na ini di no mus de na ini, èn no wan ston sa boro psa. 10Deigri sa kiri ala den sma fu Mi folku, di e sondu dan den e taki: “Yu o sorgu taki a ogri no miti wi, Yu o meki a tan fara fu wi.”

11A pisten dati Mi sa bow a oso fu David baka, di ben broko fadon. Mi sa tapu den priti, èn Mi sa poti tnapu baka san ben broko fadon. Mi sa bow en baka leki fa a ben de bifo. 12Mi sa du disi fu den kan teki abra san ben tan ete fu Edom, nanga fu ala den folku di ben de fu Mi. Na so MASRA taki, A Wan di o du ala den sani disi.

13Luku, a ten e kon, MASRA taki, taki a wan di e drai a gron, o miti a wan di e mai, èn a wan di e masi den droifi, o miti nanga a wan di e sai. A win sa droipi kmoto fu den bergi, a sa lon na den bergifutu. 14Mi sa tyari wan kenki kon na a fasi fa sani e waka gi Mi folku Israel. Den sa bow den foto baka di ben broko, dan den sa go tan na ini. Den sa prani droifidyari èn den sa dringi a win fu den. Den sa prani froktubon èn den sa nyan den froktu fu den. 15Dan Mi sa prani den ini a gron fu den èn no wan sma no o man hari den puru moro fu a gron di Mi gi den. Na so MASRA, un Gado, taki.