Sranan Tongo Bible 2016 (STB16)
1

Odi

11-2Gi den sma fu Gado na Kolose di e bribi na ini Kristus,

Disi na wan brifi fu Paulus nanga wi brada Timoteus. Mi na wan boskopuman fu Kristus Yesus fu di Gado wani dati. Wi e winsi taki Gado wi P'pa sa sori un bun-ati èn gi un freide.

A begi fu Paulus

3Ala leisi wi e taki Gado, a P'pa fu wi Masra Yesus Kristus, tangi te wi e prakseri unu ini begi. 4Bika wi yere fa unu e bribi na ini Kristus Yesus nanga fa un lobi ala den sma fu Gado. 5Un e du disi fu di un abi wan howpu na ini heimel. Un ben yere a fosi leisi fu a sani disi di un yere a tru boskopu. Dati na a bun nyunsu 6di un kisi fu yere. A e panya na ini heri grontapu èn den froktu fu en de fu si. Den de fu si na unu tu, bigin fu a dei di un yere a boskopu èn di un kon ferstan a bun-ati fu Gado trutru. 7Na wi lobi brada Epafras ben leri unu a sani disi. Wi nanga en na wrokoman makandra. A e yepi unu leki wan wrokoman fu Kristus, di un kan fertrow.

1:7
Kol 4:12
Flm 23
8A ben ferteri wi tu fu a lobi san a Santa Yeye gi unu.

9Dat' meki sensi a dei di wi yere a sani disi, wi no tapu fu begi gi unu. Wi e begi taki un sa kisi ala koni nanga sabi na ini den yeye sani, fu un kon sabi trutru san na a wani fu Gado. 10Dan un o libi neleki fa Masra wani, èn un o gi En prisiri nanga ala sani san un e du. Na so ala den bun wroko san un e du o gi froktu, èn moro nanga moro un o leri sabi Gado. 11Wi e begi tu tak' a bigi krakti fu Gado sa gi unu a krakti fu kan hori doro èn abi pasensi.

12Nanga prisiri un mus gi a P'pa tangi. Bika na En meki taki un kon warti fu teki prati na ini a gudu di A poti klari gi den sma fu En ini a leti. 13A puru unu ini a makti fu a dungru, tyari kon poti ondro a tiri fu En Manpikin di A lobi. 14Ini a Manpikin wi kon fri èn wi kisi pardon fu sondu.

1:14
Efe 1:7

A Manpikin fu Gado

15A Manpikin na a prentyi fu a Gado,

di wi no kan si nanga ai.

Na En na a moro prenspari wan

di ben de fosi iniwan sani meki.

16Bika nanga yepi fu En

ala sani di de na heimel nanga grontapu

ben meki.

Dati na den sani di wi kan si

nanga den sani di wi no kan si,

den moro hei yeye,

den di e rigeri,

den di de edeman,

nanga den di abi makti.

Nanga yepi fu En den ben meki,

èn gi En den ben meki.

17A ben de fosi iniwan sani meki,

èn na En e hori ala sani na makandra.

18A Manpikin na a ede fu a skin,

dati na a gemeente.

Na En na a bigin.

Na En na a fosiwan tu,

di kon baka na libi fu no dede moro.

Na so A abi a fosi presi

na ini ala sani.

1:18
Efe 1:22-23

19Bika Gado nanga En heri fasi fa A de,

ben prisiri fu libi na ini En.

20A ben meki ala sani

di de na heimel nanga grontapu,

kon bun baka nanga Ensrefi,

fu san a Manpikin du.

Bika A tyari freide kon,

fu di A gi En brudu di A dede na tapu a kroisi.

1:20
Efe 2:16

21Ma fos'fosi un srefi no ben sabi Gado èn un ben de feyanti fu En. A takru libi san un ben e libi ben sori dati. 22Ma now fu di Kristus dede leki libisma, Gado meki un kon bun baka nanga En. Gado du dati fu un kan kon na En fesi leki sma di santa, di de sondro flaka èn sondro fowtu. 23Ma a sani disi kan psa nomo efu un tan tnapu tranga na ini a bribi, èn efu un no meki noti puru un ai tapu a howpu fu a bun nyunsu di un yere. Mi Paulus tron wan dinari fu a bun nyunsu disi di panya gi ala sma na heri grontapu.

Paulus nyan pina fu a gemeente ede

24Nownow mi breiti taki mi e nyan pina fu unu ede. Mi breiti tu tak' mi kan go doro fu nyan den pina san Kristus ben mus nyan ete gi En skin, dati na a gemeente. 25Mi tron wan dinari fu a gemeente, fu di Gado fertrow mi fu du wan wroko fu yepi unu. Mi mus preiki a heri boskopu fu Gado gi unu. 26A boskopu disi na a kibritori di no ben kon na krin gi no wan sma na ini ala den ten di psa. Ma now Gado meki a kon na krin gi den sma fu En. 27Gado ben wani meki den kon sabi o bigi a switi fu a kibritori disi de, di e panya na mindri fu den sma di no de Dyu. A kibritori na taki Kristus e libi na ini wi, èn dati na wi howpu taki wi o teki prati ini a glori fu Gado. 28Na fu Kristus wi e preiki. Nanga ala koni di wi abi wi e sori ibri sma tapu en fowtu, èn wi e gi den leri fu den sa de san den mus de na ini Kristus. 29Na fu a sani disi mi e haswa ini hebi strei nanga a yepi fu Kristus di e wroko nanga En krakti na ini mi.

2

21Bika mi feni en fanowdu fu un sabi o bigi a strei de san mi mus strei gi unu, gi den wan di de na Laodisea, nanga gi ala den trawan di noiti no si mi fesi. 2Mi du dati fu gi den dek'ati èn fu tyari den kon na wan ini lobi, fu den sa kisi ala sabi nanga koni. Dan so den sa kon sabi Kristus, di de a kibritori fu Gado. 3Na ini En ala den gudu fu koni nanga sabi kibri.

4Mi e taigi unu a sani disi fu no wan sma no kon kori unu nanga moi wortu. 5Bika awinsi mi srefi no drape, na ini mi prakseri mi de nanga unu. Èn mi breiti fu si taki ala sani e waka na unu soleki fa a musu, èn taki a bribi fu unu na ini Kristus tranga.

Leri fu libisma no mus puru unu na Gado pasi

6Now di un teki Kristus Yesus leki Masra, un mus tan libi leki wan nanga En. 7Un mus beri rutu ini En èn dan un mus gro na ini En. Un mus kon tranga moro nanga moro na ini bribi, soleki fa un ben leri, èn un ati mus furu nanga tangi tak' a e lon abra. 8Un mus luku bun taki no wan sma no meki un tron srafu fu den soso leri nanga prakseri fu den. Den prakseri disi na gwenti fu libisma. Den gronprakseri fu den na fu grontapu. Den no e kmopo fu Kristus. 9Bika a heri fasi fa Gado de, e libi na ini a skin fu Kristus. 10Èn fu di un de wan nanga En, meki un de leki fa un mus de. Kristus na a basi fu ala den yeye di de edeman èn di abi makti. 11Fu di un de wan nanga En meki A besnei unu. A no wan libisma du a sani disi, ma na Kristus. A koti a heri sondufasi fu unu puru. 12Di un teki dopu, un beri makandra nanga En. Un kon baka na libi nanga En tu, fu di un bribi ini a krakti fu Gado di meki A kon baka na libi.

2:12
Rom 6:4
13Fos'fosi un ben dede fu di un ben sondu, èn a sondufasi fu unu no ben koti puru ete. Ma toku Gado meki un kon na libi makandra nanga Kristus. A gi wi pardon fu wi sondu.
2:13
Efe 2:1-5
14A figi a wèt nanga den komanderi fu en puru, di ben e sori wi tak' wi fowtu èn di ben e krutu wi. A wai en puru na pasi, spikri en na a kroisi.
2:14
Efe 2:15
15A puru a makti na a anu fu den yeye di de edeman èn di abi makti. Nanga a dede fu En na a kroisi, A gi den syen meki ala sma si, èn na so a wini a feti.

Tan hori na Kristus

16Un no mus meki no wan sma krutu un tu fu san un e nyan noso dringi. Un no meki den krutu un taki un no e hori wan santa fesadei, nyunmunfesa noso sabatdei.

2:16
Rom 14:1-6
17Bika ala den sani disi ben e waka na fesi fu a tru sani san ben mus kon, èn dati na Kristus srefi. 18Un no meki no wan sma meki un lasi un paiman san un o kisi, fu di a e leri un wan sortu sakafasi san no de sakafasi srefsrefi, èn fu di a e leri un fu anbegi engel. A e du leki na si a si den sani disi. Na fu soso sowan sma e denki bigi fu ensrefi, bika den prakseri fu en na libisma prakseri. 19A no e hori ensrefi na Kristus, di de a Ede fu a skin. Na En e sorgu taki a skin, di titei nanga skrufu e hori na wan, e gro leki fa Gado wani.
2:19
Efe 4:16
20Efu un dede makandra nanga Kristus, èn efu tapu sowan fasi un kon fri fu den gronprakseri fu grontapu, dan fu sanede un e meki sma poti wèt gi unu neleki un na fu grontapu ete? 21Den e taki: “No meri disi, no nyan dati, no fasi so.” 22Ala den sani disi na sani di e lasi gwe te yu kebroiki den. Den na wèt nanga leri di e kmopo fu libisma. 23A gersi leki den sani disi na koni sani, ma na libisma meki sowan bribi, di e meki den sma broko densrefi saka èn pina den skin. Ma a no abi no wan warti èn na soso densrefi den e gi prisiri.

3

31Efu a de so taki un kon baka na libi makandra nanga Kristus, dan un mus angri fu den sani di de na heimel pe Kristus sidon na a let'anu sei fu Gado.

3:1
Psa 110:1
2Un mus poti un prakseri tapu den sani di de na heimel. No poti un prakseri tapu den sani fu grontapu. 3Bika un dede èn a libi fu unu kibri nanga Kristus na ini Gado. 4Kristus na un libi. Te A kon baka fu sma si En, dan unu srefi o de fu si makandra nanga En, èn un sa teki prati na ini a glori fu En.

A nyun fasi fu libi

5Un mus tapu krinkrin nanga den sani fu grontapu, soleki hurulibi, dot'libi, morsu prakseri, takru lostu nanga gridi fasi, di de a srefi leki afkodrei. 6Na den sani disi e meki Gado ati bron tapu den sma di no wani du san A e taki. 7Fos'fosi unu srefi ben e libi so, èn un ben e tyari unsrefi tapu a srefi fasi dati. 8Ma now un mus poti ala den sani disi na wan sei: un no mus kisi atibron, un ati no mus teki faya es'esi, un no mus abi ogri-ati, un no mus taki ogri fu trawan èn dot'taki no mus de ini un mofo. 9No lei moro gi makandra. Bika un poti a owru fasi fa un ben de nanga a fasi fa un ben du sani, na wan sei.

3:9
Efe 4:22
10Now un tron wan nyun sma, di moro nanga moro e kenki kon kisi moro koni. Na so a e kon gersi a Wan di meki en.
3:9-10
Efe 4:22-24
Gen 1:26
11Dan a no abi trobi efu yu na wan Dyusma noso wan Grikisma, efu yu besnei noso efu yu no besnei, efu yu na wan doroseisma noso wan Sititisma,3:11 Sma ben e si den Sititisma fosi leki sma di no abi maniri noso di no kisi leri. efu yu na wan srafu noso wan fri sma. Nono. Ma na Kristus wawan e teri, èn na En de ini un alamala.

12We dan, fu di Gado ben teki unu fu de sma fu En, èn fu di A lobi unu, un mus abi sari-ati, bunfasi, sakafasi, safrifasi nanga pasensi.

3:12-13
Efe 4:2
13Un mus abi langa pasensi nanga makandra, èn un mus gi makandra pardon. Efu un feni taki wan sma no du bun nanga unu, dan neleki fa Masra gi un pardon, na so un mus du tu.
3:13
Efe 4:32
14Boiti den sani disi, un mus lobi makandra. A lobi e tai un hori na wan soleki fa a mus de. 15Meki a freide fu Kristus tiri un ati. Bika Gado kari un kon ini wan enkri skin fu un sa libi ini freide. Èn un mus de sma nanga tangi ini un ati. 16Meki a wortu fu Kristus de bogobogo ini un libi. Dan so nanga ala koni un o man leri makandra èn sori makandra tapu un fowtu. Nanga wan ati di furu nanga tangi gi Gado, un mus singi psalm-singi, singi di e gi Gado grani, nanga yeye singi.
3:16-17
Efe 5:19-20
17Ala sani san un e taki noso du, musu psa ini a nen fu Masra Yesus, èn ini En nen un mus taki Gado a P'pa tangi.

A oso libi

18Uma, un mus saka unsrefi gi un masra, soleki fa a fiti sma di de fu Masra.

3:18
Efe 5:22
1Pe 3:1
19Mansma, un mus lobi un uma èn un no mus grofu nanga den.
3:19
Efe 5:25
1Pe 3:7
20Pikin, un mus gi yesi na ala sani san un m'ma nanga p'pa e taigi unu, bika Masra abi prisiri nanga dati.
3:20
Efe 6:1
21P'pa, un no mus tanteri den pikin fu unu, noso den o lasi ati.
3:21
Efe 6:4
22Srafu, un mus du ala sani san den masra fu unu dyaso na grontapu, e taki. Un no mus du dati soso te den e luku unu, fu un kan kisi bun nen. Ma un mus du dati, nanga wan krin ati, fu di un abi dipi lespeki gi Gado.
3:22-24
Efe 6:5-8
23Awinsi sortu wroko un e du, du en nanga un heri ati, leki na gi Gado un e du en, èn no gi libisma. 24Bika un sabi taki a paiman san Masra o gi unu, na fu un teki prati ini a gudu san A poti klari gi den sma fu En. Bika a Masra san un e dini na Kristus. 25Dat' meki a sma di e du kruktu, o kisi a paiman fu san a ben du. Gado no e luku suma yu de.
3:25
Deu 10:17
Efe 6:9