Sranan Tongo Bible 2016 (STB16)
11

111Misrefi ben yepi en ini a fosi yari di Darius, fu a folku fu den Meden ben de na makti. 2Now mi o ferteri yu a tru.

Ete dri kownu o de na makti ini Persia. A di fu fo o gudu moro den fosiwan. A gudu fu en o meki taki a abi makti fu du ala sani fu feti Grikikondre 3Dan wan tranga kownu o kon. A o abi furu makti èn a o man du ala sani san a wani. 4Ma a no langa baka te a kon na makti, a kondre fu en o broko pis'pisi èn a o prati na fo. A no o kon ini anu fu en eigi pikin. A kondre no o abi someni makti tu leki di en ben e tiri en. A kondre fu en o broko pis'pisi èn a o kon ini anu fu trawan. Den pikin fu en no o kisi en.

5A kownu fu zuidsei o kisi furu makti. Ma wan fu den legre edeman fu en o abi makti moro en, èn a o rigeri leki kownu. A o rigeri abra wan moro bigi kondre leki di fu a kownu fu zuidsei. 6Baka wantu yari a kownu fu zuidsei nanga di fu Noordsei o meki wan ferbontu. Fu stampu a ferbontu di den meki, a kownu fu Zuidsei o meki en umapikin trow nanga a kownu fu Noordsei. Ma a umapikin no o abi a makti langa fu meki a kownu hori ensrefi na a ferbontu. A makti fu en p'pa no o tan langa tu. Den o kiri a umapikin nanga ala sma di ben kon nanga en. Den o kiri en manpikin nanga en masra srefi. 7A ten dati wan sma fu en famiri o teki a presi fu en p'pa. A sa hari kon nanga en legre na a tranga foto fu a kownu fu Noordsei èn A sa wini den. 8A o teki ala den gado fu den nanga den diri sani di meki fu gowtu nanga solfru, tyari go na Egipte. Wantu yari langa a no sa feti nanga a kownu fu Noordsei. 9Dan a kownu fu Noordsei sa kon nanga en legre ini a kondre fu a kownu fu Zuidsei, ma a o drai go baka na en kondre. 10Dan den manpikin fu a kownu fu Noordsei o meki densrefi klari fu feti. Den o seti wan bigi legre. Den o hari go feti nanga a kownu fu Zuidsei. Den o teki a kondre abra, leki te a watra fu wan liba e furu wan kondre. Den o psa na ini a kondre fu a wan sei go na a tra sei. Te den o hari go fu a di fu tu leisi, den o doro te na a tranga oso fu a kownu. 11A kownu fu Zuidsei no o man teki disi moro èn a o opo fu feti baka nanga a kownu fu Noordsei. A kownu fu Noordsei o seti wan bigi legre, ma a legre fu en o lasi a feti. 12Dan a kownu fu Zuidsei o kisi heimemre te a wini a legre fu Noordsei. Ma aladi a wini dusundusun man, dati no meki taki a abi makti. 13A kownu fu Noordsei o seti wan tra bigi legre baka. A disi o bigi moro a fosiwan. Dan baka wantu yari a o hari go feti nanga a kownu fu Zuidsei, nanga wan bigi legre di ben abi ala sani di ben de fanowdu fu hari go na feti. 14A pisten dati furu sma no o wani a kownu fu Zuidsei moro. Danyel, ogrisma fu yu eigi folku srefi no o wan en moro. Den o wani si taki wan sani di Gado ben sori den kon psa. Ma den no o man meki a sani psa. 15A kownu fu Noordsei o kon seti bergi santi nanga ston na a skotu fu wan tranga foto èn den o teki a foto abra. A legre fu a kownu fu Zuidsei no o man tan feti doro. Srefi den moro bun fetiman fu en no o abi a krakti fu tan feti. 16Dan a wan di kon feti o du san a wani. No wan sma o man hori en. A o doro srefi ini a moro moi kondre fu grontapu èn a o teki a heri kondre abra. 17A o pruberi fu teki a heri kondre fu a trawan ini en makti. Fu dat'ede a o meki wan ferbontu nanga en. A o gi a kownu wan umapikin fu a kan broko a kondre tapu so wan fasi. Ma a sani san a ben abi ini en prakseri no o psa. A no o abi no wan wini na en. 18Baka dati a drai go feti nanga den kondre di didon na a se. A o teki wan lo fu den kondre disi abra. Ma dan wan legre-edeman o tyari wan kba kon na a hei memre fu en. A o lasi a feti tapu wan syen fasi èn a no o man du noti baka. 19Baka dati a o wan feti nanga den tranga foto ini en eigi kondre. Ma dan a o lasi a feti. Den o kiri en puru fu têgo na pasi. 20A kownu di o kon na en baka o seni wan man di e piki lantimoni go lontu ini Yuda, a moro moi pisi fu a kondre. Ma baka wan pisten a kownu disi o dede. A no o dede ini wan feti ma den o luru en dan den kiri en bakabaka.

21Dan wan kownu di sma no e si fu noti o teki en presi. Den no o wan poti en leki kownu srefi. Ma sondro fu wan sma ferwakti, a o tron kownu tapu wan bedrigi fasi. 22Ala feyanti fu en a o wini. A o puru den na pasi fu têgo. A o kiri wan prenspari tiriman fu a ferbontu tu. 23A e bedrigi ala sma nanga san a e meki wan ferbontu. Nanga a yepi fu wan pikin grupu sma a o kisi moro nanga moro makti. 24Sondro fu wan sma ferwakti, a o doro ini den pisi fu a kondre pe a gron e gi a moro bun nyanyan. A o du san no wan fu den tra kownu di waka na en fesi ben du. Den sani san a fufuru èn puru nanga tranga na sma anu, a o prati gi den sma di e hori baka gi en. A o sidon prakseri tu fa a o man teki den moro tranga foto abra. Ma ala den sani disi o de fu wan pisten nomo. 25Nanga ala en krakti èn nanga ala sani san de na ini en a o opo baka fu feti a kownu fu Zuidsei. Nanga wan bigi èn tranga legre a o hari go na en tapu. Dan a kownu fu Zuidsei o seti wan moro bigi èn tranga legre fu en sei, ma a no o man kaka futu. Den o meki mofo fu kiri en, èn den o kiri en tu. 26Den man di ben e gi en rai, den wan di a ben e fertrow, o kiri en. Den o figi a legre fu en puru na pasi èn furu dede o fadon. 27Den tu kownu o go sidon makandra fu kruderi, ma ala tu o prakseri fa den man du a trawan ogri. Den o pruberi fu bedrigi makandra. Ma ala den sani san den ben abi ini prakseri no o go doro, fu di a no ben de a ten ete di Gado ben poti. 28A kownu fu noordsei o drai gwe na en kondre nanga furu sani di a wini ini a feti. Te a e drai go na oso a o seti ensrefi fu du sani nanga a santa ferbontu èn a du tu san a ben wani.

29Baka wan pisten a o hari go baka nanga en legre ini a kondre na Zuidsei. Ma a leisi disi sani o waka tra fasi. 30Den sipi fu den Romeinisma o kon feti nanga en dan a o lasi ati èn a o drai gwe baka. Dan a o puru en atibron wantron moro tapu a santa ferbontu èn a o du sani drape. A go na en kondre dan a o arki den wan di libi a santa ferbontu. 31A o poti bakaman fu en ini Yerusalem. Den o pori a tempel, den o tyari wan kba kon na den ofrandi di ben e tyari aladei ini a tempel èn den o poti a popki, a groskin wan di e tyari pori, na ini. 32A o kori den sma di no e hori densrefi na a ferbontu, fu den no dini Gado moro langa. Ma den wan di tan dini Gado, o tranga nofo fu kaka futu gi en. 33Den koniwan mindri a folku o meki furu sma kon ferstan san e psa. Ma sma o de na den koniman disi baka. Sma o kiri den, poti den na dungru-oso èn sma o puru den sani san den abi na den anu. 34Te den sma o de so na den baka fu kiri den, dan wan pikin grupu sma o yepi den. Furu sma o kon ini a grupu fu den, ma no nanga bun prakseri. 35Den o kiri sonwan fu den koniman, ma so den sma o psa tesi èn den e kon de san den mus de. Solanga a ten no doro di Gado poti, wan kba no o kon na a sani disi.

36A kownu fu Noordsei o man du san a wani du. A o kisi so wan heimemre, taki a o taki tak' a hei moro ala gado. Den sani di a o taki fu a moro hei Gado, no fiti fu taki srefsrefi. A o go bun nanga en, te leki a ten doro pe a atibron fu Gado doro en marki. Bika san Gado besroiti o psa. 37A no o abi lespeki tu gi den gado fu den afo fu en, noso gi a gado di den frow lobi moro ala trawan. A no o teri no wan gado. A o firi ensrefi moro hei leki den. 38A no wani dini den gado dati, ma a o dini a gado di e kibri den tranga foto. A o gi grani na wan gado di den afo fu en no ben sabi. A o gi a gado dati gowtu, solfru, diri ston nanga tra diri sani. 39A o poti wan folku di e dini wan tra gado, fu luku taki noti no psa nanga den tranga foto. Den sma di e lespeki a gado dati a e gi grani. A e poti den leki basi abra furu sma èn a e gi den gron leki paiman.

40Na a kba fu a ten, a kownu fu Zuidsei o hari go na en tapu. Ma a kownu fu Noordsei o hari es'esi go miti en nanga wagi, man tapu asi èn nanga bun furu boto. A o teki kondre abra èn a o psa leki wan liba abra den nanga a legre fu en. 41A o kon tu ini a moro moi kondre fu grontapu. Furu sma o dede. Ma a o misi den kondre fu Edom, Moab nanga den moro bun fetiman fu den Amonitisma. 42Furu kondre a o teki abra, srefi Egipte tu. 43A o fufuru den gudu fu en, den gowtu, den solfru nanga den tra sani di abi furu warti. Den sma fu Libia nanga Nubia o abi fu du tu san a wani. 44Ma dan a o yere fu sani di e psa na a sei pe son e opo nanga a noordsei. Den sani disi o meki a bruya. A o feti nanga ala en krakti, èn ala presi pe a doro a o kiri èn a o pori sani. 45A o poti den kownutenti fu en mindri a se nanga a santa bergi, a moro moi bergi na grontapu. Ma dan a o dede sondro fu wan sma du en wan sani.

12

121Ma a pisten dati Mikael sa kon, a prenspari engelkapten, di e kibri yu folku. Wan tranga ten o kon. Sensi di libisma de na grontapu noiti ete sowan ten ben de. Ma a ten dati den sma fu yu folku, den wan di nen skrifi ini a buku fu Gado sa feni yepi. 2Furu fu den wan di ben e rostu na ini dedekondre sa kon na libi baka. Sonwan o kon fu tan libi fu têgo, trawan o kon ma fu kisi syen èn fu têgo sma o si den fu noti. 3Dan den koniwan o brenki leki a faya fu heimel. Den wan di leri a folku fu libi leki fa Gado wani, o brenki fu têgo leki stari. 4Ma yu Danyel, no mus taigi no wan sma den sani disi. A buku mus tan tapu te na a kba fu grontapu. Furu sma o ondrosuku en, èn sabi o kon moro furu.”

5Dan wantron so, mi Danyel, si tu tra man. A wan ben tnapu na disi sei fu a liba, a trawan na a tra sei. 6Dan wan fu den aksi a man nanga a linnen krosi di ben tnapu pikinso moro fara taki: “Oten wan kba sa kon na den bigi sani disi di musu psa?” 7Ne a man di ben weri a linnen krosi èn di ben tnapu pikinso moro fara, opo en tu anu go na heimel dan mi yere a taki: “Mi e sweri na a Gado di e libi fu têgo, taki baka dri nanga afu yari wan kba sa kon na ala den sani disi. Dan den no sa pina a santa folku moro langa.” 8Mi ben yere en, ma mi no ben sabi san dati ben wan taki. Ne mi aksi taki: “Masra, fa ala den sani disi o kba?” 9A taigi mi taki: “Danyel, go now. Bika solanga a kba fu ala sani no doro, a buku o tan tapu èn sma no o sabi san skrifi ini en. 10Furu sma o kon na tesi èn den o kon de san den mus de. Ma den wan di e du ogri o tan du ogri. Den no o ferstan den sani, soso den koniwan o ferstan den. 11Twarfu hondro nanga neigitenti dei o psa, kmoto fu a momenti di den o tapu den sma fu tyari ofrandi ala dei èn te den o poti a popki, a groskin wan di e tyari pori, ini a tempel. 12Ma a blesi fu Gado de na tapu den sma di o hori doro, te leki wan dusun dri hondro dritenti-na-feifi dei psa. 13Danyel, libi fu yu te leki yu dede. Yu o rostu ini yu grebi, te leki yu opo baka na a kba fu a ten fu kisi san Gado ben poti aparti gi yu.”