Sranan Tongo Bible 2016 (STB16)
11

111Un mus lobi MASRA, un Gado, un mus hori unsrefi ala ten na den sani di A komanderi, na den sani di un mus tan du, na den sani na san un mus tan hori unsrefi nanga na den gebod fu En. 2Bika a no den pikin fu unu ben kisi a leri fu MASRA, un Gado, èn den no sabi En. Ma na unu si den bigi sani di A du, a makti nanga a krakti fu En, 3nanga den wondru nanga den marki fu En, di A du ini Egipte fu Farao, a kownu fu Egipte, nanga a heri kondre si. 4Na unu sabi tu san a du nanga a legre fu Egipte, nanga den asi nanga den wagi fu en. Fa A meki a watra fu a Riet Se wasi den gwe, di den ben de na un baka èn den dede gwe te leki a dei fu tide. 5Un sabi tu san A du nanga unu ini a sabana, te leki un doro na a presi disi. 6Un sabi tu san A du nanga Datan nanga Abiram, den manpikin fu Eliab di ben de wan manpikin fu Ruben. Leti na un mindri A meki a gron priti opo dan a swari den nanga den ososma fu den, den tenti fu den nanga ala sani di den ben abi nanga san den ben e tyari. 7Na unu si den bigi sani di MASRA du. 8Dat' meki un mus hori den gebod di mi e leri un tide. Dan un sa kisi krakti fu go fu teki a kondre abra. A kondre pe un e hari go fu teki en gi unsrefi. 9Un sa libi langa tu ini a kondre di MASRA pramisi èn sweri gi den afo fu unu, taki A bo gi en na den nanga den bakapikin fu den. Wan kondre pe merki nanga oni de bogobogo.

10Bika a kondre di un e go teki abra, no de leki Egipte, a kondre fu pe un kmoto. Drape un ben mus nati a gron srefi baka te un ben sai leki na un dyari un e nati. 11Ma a kondre di un e go teki abra, na wan kondre fu bergi nanga dal, di e kisi en watra fu a alen fu heimel. 12Na wan kondre gi san MASRA, un Gado, e sorgu. MASRA, un Gado, no e puru un ai na en tapu, bigin fu a yari go te na a kba fu a yari. 13So efu un arki den gebod bun di mi e leri un tide, fu un lobi MASRA, un Gado, èn fu un dini En nanga un heri ati èn nanga un heri sili, 14dan A sa meki a alen fadon tapu a yoisti ten gi un kondre. Na a bigin fu a yari nanga na a kba fu a yari, fu un kan feni nyanyan fu a gron: karu, win nanga oli. 15A sa meki grasi gro ini den wei gi den kaw fu unu. Un sa abi en bun. Noti sa man mankeri unu. 16Ma un mus luku bun taki un ati no kori unu fu un kmoto tapu a pasi fu go dini tra gado èn fu go boigi gi den. 17Efu un du dati, MASRA En ati o bron na un tapu. A o tapu a heimel gi unu meki alen no fadon. A gron no o gi nyanyan moro tu èn es'esi un o dede ini a bun kondre di MASRA o gi unu.

18Un kibri den wortu disi fu mi ini un ati èn un mus libi nanga den. Tai den leki wan marki na un anu èn leki wan banti na un fes'ede. 19Un mus leri den na den pikin fu unu èn un mus taki nanga den fu en te un sidon ini un oso, te un de na pasi, te un e didon nanga te un e opo. 20Un mus skrifi den na den postu fu den doro fu un oso nanga den bigi doro fu den foto fu unu. 21Dan un nanga den pikin fu unu sa libi solanga leki heimel sa de na loktu fu grontapu, ini a kondre di MASRA pramisi èn sweri gi den afo fu unu, taki A bo gi den.

22Bika efu un hori unsrefi trutru na ala den gebod di mi e leri un tide, efu un lobi MASRA, un Gado, efu un libi leki fa A wani, èn efu un tan na En sei, 23dan MASRA sa yagi ala den folku disi gi unu. Un sa man teki a kondre abra fu folku di bigi èn di tranga moro unu. 24Ala presi pe un poti un futu, sa de fu unu. Bigin na a sabana te go miti Libanon èn kmoto fu a Eufratliba go te na a Se na westsei, sa de a kondre fu unu. 25No wan sma sa man kaka futu gi unu. MASRA, un Gado sa meki taki a heri kondre ini san un e go, frede èn beifi gi unu, leki fa A taki tak' A o du.

26Luku, tide mi hori fluku nanga blesi na un fesi: 27Un sa si a blesi, efu un du san den gebod fu MASRA, un Gado, e taki di mi e leri un tide. 28Ma un sa si a fluku, efu un no wan du san den gebod fu MASRA, un Gado, e taki èn efu un kmoto fu a pasi di mi e sori un tide, fu go waka baka tra gado, di un no ben sabi. 29Te MASRA, un Gado, tyari un kon ini a kondre, di un e go fu go teki abra, dan un sa tnapu tapu a Gerisimbergi èn taki fa Gado o blesi unu èn tapu a Ebalbergi un sa taki fa Gado o fluku unu. 30Den bergi disi de na a tra sei fu a Yordanliba abra Gilgal, krosbei fu den bigi bon fu More. Yu kan teki a pasi di e waka fu a Yordandal go na a westsei ini a kontren fu den Kananitisma. 31Un tnapu klar'klari fu koti a Yordanliba abra, fu go teki a kondre abra di MASRA, un Gado, sa gi unu. Un sa teki en abra èn un sa libi na ini. 32Baka dati un mus hori unsrefi finifini na ala den sani di un mus tan du nanga den sani na san un mus tan hori unsrefi, den sani di mi e leri un tide.