Sranan Tongo Bible 2016 (STB16)
23

231Wan man di kisi mankeri na en manpresi noso wan man fu san den koti en manpresi puru, no sa teki prati ini den konmakandra fu MASRA. 2Wan sma di gebore sondro taki en p'pa nanga en m'ma ben trow no sa kon ini a konmakandra fu MASRA. Fu têgo a no sa kon ini a konmakandra fu MASRA. 3Wan Amonitisma noso wan Moabitisma no sa kon ini a konmakandra fu MASRA. Fu têgo den no sa kon ini a konmakandra fu MASRA, 4fu di den no gi un nyanyan nanga dringi di un ben kmoto na ini Egipte. Den ben yuru Bileam tu, a manpikin fu Beor, fu a foto Petor ini Mesopotamia, fu fluku unu. 5Ma MASRA, un Gado, no arki Bileam, èn A drai a fluku ini blesi gi unu, fu di MASRA, un Gado, lobi unu. 6Solanga un e libi, un no sa suku fu libi ini freide nanga den noso yepi den fu sani go bun nanga den. 7Un no mus si den Edomitisma leki noti, bika den na famiri fu unu. Un no sa si den sma fu Egipte leki noti tu, bika un ben de doroseisma ini den kondre. 8Den bakapikin fu den kan kon ini den konmakandra fu MASRA.

9Te a legre fu unu e hari go feti nanga den feyanti fu unu, un no sa du no wan sani di sa meki taki un no krin. 10Efu wan man de na un mindri di no krin, fu di wan sani psa nanga en neti, a sa go dorosei fu a kampu. A no sa kon ini a kampu. 11Te a son e saka a sa wasi en skin èn te neti e fadon a so kon ini a kampu baka. 12Un mus sorgu taki wan presi de na dorosei fu a kampu, fu un go du un fanowdu. 13Un mus abi wan pikin skopu na unu. Dati na fu un diki wan olo te un e du un fanowdu èn fu un tapu a olo baka. 14Bika MASRA, un Gado, e koiri ini a kampu, fu yepi unu èn fu gi den feyanti fu unu abra ini un makti. Fu dat'ede a kampu fu unu mus santa. A no mus si noti san no fiti fu A drai en baka gi unu.

15Un no sa tyari wan srafu di lowe kmoto fu en basi go baka na en basi. 16A kan tan na unu ini wan fu den foto fu unu di a wani. Un no sa meki a libi tranga gi en.

17No wan uma noso man ini Israel sa seri en skin na a santa presi. 18A moni di wan uma kisi di a seri en skin nanga a moni di wan man kisi di a seri en skin un no sa tyari kon ini a oso fu MASRA, un Gado, leki wan ofrandi di un ben pramisi fu gi. Bika den tu sani disi na groskin sani gi MASRA, un Gado.

19Te un leni wan sma fu Israel leki unsrefi wan sani, un no mus aksi fu pikinso moro na en tapu. Un no mus du dati nanga moni, nanga nyansani noso iniwan tra sani. 20Fu wan doroseisma un kan aksi pikinso moro na en tapu te un leni en wan sani. Ma fu wan sma fu Israel leki unsrefi un no sa aksi pikinso moro na tapu. Dan MASRA, un Gado, sa blesi unu ini ala sani san un o du ini a kondre di un e go fu teki abra.

21Te un pramisi MASRA, un Gado, wan sani, un no sa draidrai fu du san un pramisi. Bika efu un no du san un ben pramisi, dan MASRA, un Gado, sa aksi unu a sani di un ben pramisi En, èn a o de wan sondu di yu du, fu di yu no du san yu ben pramisi. 22Efu un no ben meki wan pramisi, dan un no bo sondu tu. 23San un taki, un mus du tu. Bika sondro fu sma dwengi unu, unsrefi pramisi MASRA, un Gado, wan sani nanga un eigi mofo. 24Te go ini wan sma droifidyari un kan nyan someni droifi leki un wani, ma un no sa tyari gwe ini wan sani.

25Te un de ini wan tra sma gron mindri a karu di a prani, un kan broko nanga un anu someni leki un man, ma un no mus koti nanga babun-nefi.

24

241Efu wan man trow nanga wan uma ma a no lobi en moro fu di a uma du wan sani di no fiti, a sa gi a uma wan brifi taki a trow broko èn seni en gwe. 2Te a uma gwe fu a man oso, a kan tron a frow fu wan trawan. 3Ma efu a di fu tu man nanga san a e libi no lobi en moro tu, èn a seni en gwe fu en oso nanga wan brifi taki a trow broko, noso efu a di fu tu man nanga san a e libi kon dede, 4dan a fosi man di ben seni a uma gwe no sa teki a uma baka leki en frow, bika a uma no krin moro gi en. Efu a teki a uma baka, dati o de wan groskin sani ini MASRA ai. Un no sa meki den sondu disi psa ini a kondre di MASRA, un Gado, o gi unu taki na fu unu.

5Efu wan no trow tumsi langa, un no sa seni en go na feti noso meki a du wroko ini a legre. Wan yari langa a sa de fri fu meki prisiri nanga en uma.

6Un no sa teki a miri fu wan sma leki panti noso a tapusei wan fu den tu ston nanga san a sma e mara sani. Efu yu du dati a de a srefi leki na a sma libi yu teki leki panti.

7Te un kisi wan sma di tyari wan sma Israel leki ensrefi gwe nanga tranga, dan a seri en leki srafu, un sa kiri a sma di du a sani dati. Tapu a fasi disi un sa tyari wan kba kon na a ogri na un mindri.

8Sorgu taki un du ala sani fin'fini di den lefiti priester taigi un fu du te wan sma abi gwasi. Un mus hori unsrefi fin'fini na den sani di Mi taigi den fu du. 9Memre san MASRA, un Gado, du nanga Miryam di un ben de na pasi di un ben kmoto na ini Egipte.

10Awinsi wan sma mus pai un wan sani, un no sa go ini en oso go teki wan sani leki panti. 11Un sa tan tnapu na dorosei. A man di mus pai unu sa tyari a panti kon srefi na dorosei gi unu. 12Efu na wan pôtiman, yu no sa teki a dyakti di a gi yu leki panti fu tapu yu skin te neti. 13Te son e saka un sa gi en a langa dyakti baka di a ben gi leki panti te son. Dan a sa tapu en skin nanga en eigi dyakti te a e go sribi èn a sa blesi yu. Disi sa de wan bun sani di un du ini a ai fu MASRA, un Gado.

14Un no sa meki a libi tranga gi wan pôtiman di e wroko gi en deibrede. Awinsi na wan sma fu Israel leki unsrefi noso wan doroseisma di e tan ini wan fu den foto ini a kondre fu unu. 15Tapu a dei di a wroko un sa pai en san a mus kisi. Son no mus saka sondro fu un pai en. Bika na wan pôtiman di abi a moni fanowdu. No meki a go kragi fu yu na MASRA, noso sa sondu yu sondu.

16Un no sa kiri p'pa nanga m'ma fu wan sani di den pikin fu den du. Un no sa kiri pikin tu fu wan sani di den bigisma fu den du. Ala sma sa dede fu un eigi sondu.

17Un sa gi wan doroseisma nanga wan pikin di no abi p'pa nanga m'ma moro, den leti di den mus kisi. Un no sa teki a tapusei krosi fu wan uma di masra dede kba, leki panti. 18Un no sa fergiti taki un ben de srafu na ini Egipte èn taki na MASRA, un Gado, puru un drape. Fu dat'ede mi e taigi unu fu du so.

19Te un e tyari a nyan fu un gron go poti ini un maksin, dan un si taki un fergiti wan bosu karu ini a gron, un no sa drai go baka go teki en. Dati sa de gi a doroseisma, a pikin di no abi p'pa nanga m'ma moro nanga gi a uma di masra dede kba. Efu un du so, MASRA, un Gado sa blesi unu ini ala wroko di un e du. 20Te un e naki den oleif fu unu puru na den bon, un no sa luku ete wan leisi efu moro no tan na baka na den taki. San tan na baka na gi a doroseisma, a pikin di no abi p'pa nanga m'ma moro nanga gi a uma di masra dede kba. 21Te un e piki den droifi fu un droifidyari, un no sa waka a di fu tu leisi psa fu luku efu noti no tan na baka. San tan na baka na gi a doroseisma, a pikin di no abi p'pa nanga m'ma moro nanga gi a uma di masra dede kba. 22Un no sa fergiti taki un ben de srafu na ini Egipte. Fu dat'ede mi e taigi unu fu du so.

25

251Te tu man kisi wan trobi èn den go na fesi krutubakra nanga en, a krutubakra sa taki suma abi leti nanga suma no abi leti. 2Efu a wan di no abi leti fiti fu kisi fonfon nanga wan tiki, a krutubakra sa meki a didon leti pe a de, dan a sa meki den gi en someni wipi nanga wan tiki, di fiti fu a kisi. 3Den kan gi en te nanga fotenti wipi. No moro. Bika efu un gi en moro leki dati un o meki taki sma no lespeki en moro.

4Un no mus tai a mofo fu wan kaw san e masi a buba fu puru a graan.

A plekti gi yu brada

5Te tu brada e tan makandra, dan wan fu den dede sondro fu libi wan manpikin na baka, a frow fu a wan di dede no sa tron a frow fu wan man fu wan tra famiri. A brada fu en masra sa sribi nanga en, èn a sa trow nanga en, fu du en plekti leki swagri. 6A fosi manpikin di a sa kisi, sa tyari a nen fu a omu di dede. Tapu a fasi disi en nen no e dede gwe ini Israel. 7Ma efu a man no firi fu trow nanga a frow fu en brada, a frow sa go na a bigi doro fu a foto pe de fesiman e de. Dan a sa taigi den taki: “A brada fu mi masra no wani fu a nen fu en brada tan na ini Israel. A no wani du en plekti leki swagri.” 8Dan den fesiman fu a foto sa seni kari en fu taki nanga en. Efu a man tan hori taki a no wani trow nanga a uma, 9a uma sa puru den susu fu a man na en futu fesi den fesiman, a sa spiti ini a man fesi, dan a sa taki: “Disi den mus du nanga a man di no wani meki pikin gi en brada.” 10Dan den sa kari en famiri ini Israel: A famiri di no weri susu.

11Efu tu man e feti, dan a frow fu wan fu den kon ini a feti fu yepi en masra, dan a grabu a tra man na en manpresi, 12den sa kapu a anu puru fu a uma dati. Un no sa sari en.

13Un no sa abi tu sortu wegi, wan lekti wan nanga wan hebi wan, ini un saka. 14Un no sa abi tu sortu kan tu, wan bigi wan nanga wan pikin wan, nanga san un e marki sani ini un oso. 15Un sa abi wan soifri wegi nanga wan soifri kan nanga san un e marki sani. Dan un sa libi langa ini a kondre di MASRA, un Gado, o gi unu. 16Bika MASRA, un Gado, no lobi den sma srefsrefi di abi tu sortu wegi nanga sortu kan èn di e bedrigi trawan.

A folku fu Amalek mus figi puru na grontapu

17Un no mus fergiti san Amalek du nanga unu na pasi di un kmoto na ini Egipte. 18Di un ben weri èn kon swaki, a sori taki a no ben e span nanga Gado. A koti a bakapisi fu a grupu fu unu puru, pe den moro swakiwan de dan a feti nanga den. 19Te MASRA, un Gado, meki un wini ala den feyanti fu unu ini a kondre di MASRA, un Gado, o gi unu taki na fu unu, un mus sorgu taki figi a folku fu Amalek puru na grontapu. Un no mus fergiti fu du dati.