Sranan Tongo Bible 2016 (STB16)
28

Blesi nanga fluku

281“Efu un arki bun san MASRA, un Gado, e taigi unu èn efu un hori unsrefi trutru na ala den gebod di mi e leri unu tide, dan MASRA, un Gado, o gi un moro makti moro ala tra folku na grontapu. 2Efu un arki san MASRA, un Gado, e taigi unu, un o si den blesi disi na ini un libi:

3A blesi fu Gado sa de na un tapu ini a foto nanga te un de ini un gron.

4A blesi fu Gado sa de tapu den pikin fu unu, tapu den sani di un prani nanga den pikin fu den meti fu unu: de pikin fu den kaw, nanga den pikin fu den skapu nanga den krabita fu unu.

5A blesi fu Gado sa de tapu a nyanyan ini un baskita nanga a brede fu unu.

6A blesi fu Gado sa de na un tapu te un e go nanga te un e kon.

7MASRA sa fon den feyanti fu unu di ben wan feti nanga unu, dan A o gi den abra ini un makti. Leki wán man den o kon na un tapu, ma den o panya ala sei te den e lon gwe gi unu.

8A blesi fu Gado sa de na tapu den maksin fu unu, nanga ala sani di unu e du. A sa blesi unu ini a kondre di MASRA, un Gado, o gi unu.

9MASRA sa teki un leki En santa folku, leki fa A ben pramisi un taki A bo du, efu un hori unsrefi na den gebod fu MASRA, un Gado, èn efu un libi leki fa En wani. 10Dan ala folku sa si taki MASRA teki un leki en folku èn den sa lespeki unu.

11MASRA sa gi un ala sani bogobogo. A sa gi un furu pikin. A sa gi den meti fu unu furu pikin èn a gron fu unu o gi furu nyanyan, ini a kondre di MASRA sweri na den afo fu unu, taki o gi en na unu.

12MASRA sa opo heimel, a bigi kamra fu En pe den gudu fu En de, èn seni a alen tapu a yoisti ten kon gi a gron fu unu. A sa blesi ala sani di un e du taki un o man leni furu folku sondro taki unsrefi abi fu leni.

13Efu un hori unsrefi trutru na den gebod fu MASRA, un Gado, di mi e leri un tide, dan MASRA sa meki un de na fesi, no na baka. Un sa go nomo nanga fesi, no nanga baka. 14Ma un mus hori unsrefi na ala den gebod di mi gi un tide. No wan fasi un mus du wan tra sani leki san den e taki. No waka baka tra gado èn no dini den.

15Efu un no arki san MASRA, un Gado, e taigi unu, èn efu un no hori unsrefi na ala den gebod nanga den sani di un mus tan du, dan den fluku disi sa de na un tapu.

16A fluku fu Gado sa de na un tapu ini a foto nanga te un de ini un gron.

17A fluku fu Gado sa de tapu a nyanyan ini un baskita nanga a brede fu unu.

18A fluku fu Gado sa de tapu den pikin fu unu, tapu den sani di un prani, tapu den pikin fu den kaw, nanga den pikin fu den skapu nanga den krabita fu unu.

19A fluku fu Gado sa de na un tapu te un e go nanga te un e kon.

20MASRA sa fluku ala sani san un e du. A sa meki bruya de na un mindri èn A sa meki a wan nowtu baka a trawan miti unu. Fu di un ati ben takru so fu un drai un baka gi Gado, A sa meki den feyanti fu unu kiri un es'esi.

21MASRA sa meki wan takru siki de nanga unu te leki a kiri un alamala ini a kondre, di un e go fu teki abra.

22MASRA sa naki un nanga wan takru kosokoso, tranga korsu, nanga tra takru siki. A sa meki wan tranga dreiten de, nanga siki di e pori ala sani san un prani. Den sani disi sa psa nanga unu te leki un dede. 23A heimel na loktu sa gersi kopro èn a gron ondro un futu sa gersi isri.

24MASRA sa meki fini santi fadon tapu a kondre. A sa fadon leki alen fu loktu kon na un tapu, te leki un dede.

25MASRA sa gi un abra na un feyanti. Leki wán man un o go na den tapu, ma un o panya ala sei te un e lon gwe gi den. Un sa de wan eksempre gi ala kondre na grontapu. Den sa frede te den si san miti unu. 26Tingi fowru nanga krasi meti sa nyan den dedeskin fu unu, sondro taki wan sma yagi den gwe.

27MASRA sa naki un nanga butsweri, leki fa A ben du nanga den sma fu Egipte. A sa meki unu kisi soro, flaka nanga krasikrasi, di no man dresi.

28MASRA sa meki un kon law, un o breni èn un o lasi un ferstan. 29Bigibigi dei un o waka lontu e firifiri pasi leki wan breniman. Noti fu unu sa waka bun. Dorodoro den sa pina unu, fufuru unu èn sma no sa de fu yepi unu.

30Un o de fu trow nanga wan uma, ma wan tra man o sribi nanga en. Un o bow wan oso, ma un no o tan na ini. Un o prani wan droifidyari, ma un no o nyan den froktu fu en.

31Den o srakti den kaw fu unu leti na un fesi, ma unsrefi no o nyan den. Den o fufuru un buriki tyari gwe leti pe un de èn un no o si en moro. Den o gi den kaw nanga krabita fu unu na den feyanti fu unu sondro taki wan sma kon yepi unu.

32Den o gi den manpikin nanga den umapikin fu unu abra na ini anu fu tra folku leti na un fesi. Un angri fu si den, ma un no man du noti.

33Wan folku di un no sabi sa nyan san un prani nanga un sweti. Dorodoro den sa libi takru nanga unu èn pina unu. 34Un o lasi un ferstan fu den sani di un o si.

35MASRA sa meki bigi butsweri broko na un kindi nanga un bowtu, di no man dresi. Den o broko fu un ede go te na un futu.

36MASRA sa meki den tyari unu nanga a kownu di un teki fu tiri unu, go na wan kondre di un nanga den afo fu unu no sabi. Drape un sa dini gado di meki fu udu nanga ston. 37Un sa de wan eksempre gi ala den folku fu den kondre pe MASRA e tyari un go. Den o koti odo gi unu èn den o teki un leki spot'popki.

38Un o sai furu ini un gron, ma un o koti pikinso nomo, bika sprenka o nyan ala. 39Un o prani furu droifibon ini un droifidyari èn un o wroko den, ma un no piki den droifi èn un no o dringi a win fu en tu, bika woron o nyan ala. 40Oleifbon o de ini a heri kontren fu unu, ma un no abi oli fu lobi gi un skin bika den bon o trowe ala den froktu fu den.

41Un o meki manpikin nanga umapikin ma den no de fu unu, bika sma o tyari den gwe leki srafu.

42Sprenka sa nyan ala den sani san un prani nanga den froktubon fu unu.

43Den doroseisma di e libi na un mindri o kon gudu moro nanga moro èn den o kisi moro makti, ma unu o pina èn un o go nanga baka moro nanga moro. 44Na den sa leni un sani. A no unu o leni den. Den sa de na fesi, no na baka.

45Ala den fluku disi sa kon na un tapu. Den sa tan kon na un tapu te leki un dede. Dati sa psa fu di un no arki san MASRA, un Gado, taki èn fu di un no hori unsrefi na den gebod nanga den sani di un ben mus tan du. 46Den fluku disi sa tan na un tapu fu têgo leki wan wondru nanga wan marki gi unu nanga den bakapikin fu unu. 47Un no dini MASRA, un Gado, nanga prisiri di un ben abi ala sani bogobogo. 48Dat' meki Masra o meki feyanti hari kon feti nanga unu, èn A o meki un dini den. Un o dini den nanga angri bere, watra o kiri unu, un no o abi krosi fu weri. Not' noti un no o abi. A sa poti wan hebi lai na un tapu, te leki un dede. 49MASRA sa meki wan folku hari kon na un tapu. A san kmoto fu fara, fu te na a kba fu grontapu a sa frei kon leki wan aka. Wan folku di e taki wan tongo di un no e ferstan. 50Wan folku di no sabi san na pardon. Den no e lespeki den owruwan èn den no abi sari-ati gi den yonguwan. 51Den sa nyan de yongu kaw fu unu nanga ala sani san un prani, te leki un dede. Den no sa libi karu, win noso oli gi unu. Den no sa libi den pikin fu den kaw gi unu nanga den pikin skapu nanga krabita, te leki un dede gwe. 52Den sa lontu ala foto fu feti nanga unu, te leki ala den tranga hei skotu ini a heri kondre fadon, tapu san un ben e bow. Den sa lontu ala den foto ini a heri kondre fu feti nanga unu, ini a kondre di MASRA, un Gado, o gi unu. 53Den feyanti fu unu sa poti unu ini so wan pina èn un no o si no wan tra fasi fu tan na libi, dan fu nyan un eigi pikin. Un o nyan a meti fu den manpikin nanga umapikin fu unu, di MASRA, un Gado, o gi unu. 54A moro safri man na un mindri, nanga den moro switi maniri, no o wani gi en eigi brada, en eigi frow noso den eigi pikin fu en di a abi ete, wan sani. 55A no o wani gi no wan fu den wan pisi fu a meti fu den pikin fu en di a e nyan, fu di den feyanti no libi no wan tra sani gi en na baka. Na ini sowan pina nanga benawtu den feyanti fu unu o poti unu. 56A moro safri uma na un mindri nanga den moro switi maniri, di den pori sowan fasi taki noiti a ben abi fu du wan sani, no san wani gi en eigi masra, en eigi manpikin nanga en eigi umapikin wan sani. 57A no o wani gi den wan pisi srefi fu a pikin di a meki noso fu a den sani di e kon makandra nanga a pikin na doro, di a e meki a pikin. Bakabaka a sa nyan den sani disi safrisafri, fu di a no abi no wan tra sani fu nyan. Na ini sowan pina nanga benawtu den feyanti fu unu o poti unu.

58Efu un no hori unsrefi trutru na ala den sani fu a wèt di skrifi ini a buku disi, èn efu un no lespeki a bigi nen fu MASRA, un Gado, di fiti fu kisi grani, 59dan MASRA sa strafu unu nanga den bakapikin fu unu hebi. A sa meki ala sortu takru siki broko na un mindri di no abi dresi. 60A sa meki ala den strafu di A ben meki kon abra Egipte, kon tu na un tapu. Den strafu gi san un e frede so èn di no abi dresi. 61MASRA sa meki ala sortu tra siki nanga strafu di no skrifi ini a buku disi nanga a wèt kon na un tapu, te leki un dede. 62Un ben furu leki den stari na heimel, ma wantu fu un nomo o tan abra, fu di un no arki san MASRA, un Gado, taigi unu. 63Leki fa nanga prisiri MASRA ben e du un bun èn A ben e meki un kon furu, na so MASRA broko unu èn kiri unu nanga prisiri. A sa rutu un puru fu a kondre di un e go fu teki abra. 64MASRA sa panya unu na mindri ala den folku fu a wan uku go miti a tra uku fu grontapu. Drape un sa dini tra gado fu udu nanga ston, di unu nanga den afo fu unu no ben sabi. 65Un no sa feni rostu mindri den folku. Un no sa feni wan presi fu unsrefi fu tan. MASRA o meki un de nanga dyompo ati, un no sa abi no wan howpu èn un sa angri tranga fu drai go baka. 66Dorodoro sma sa de na un baka fu kiri unu. Dei nanga neti un ati o de na dyompo èn un no sabi efu un o tan na libi. 67Deiten un sa taki: mi winsi fu a ben kan de neti. Neti un sa taki: mi winsi fu a ben kan de deiten. Un sa taki so fu di un e frede tranga èn fu den sani di un e si nanga un ai. 68MASRA ben taki tak' noiti moro un sa si a pasi baka di e go na Egipte. Ma A sa meki den tyari un go nanga sipi baka go na Egipte. Drape den sa seri un leki srafu gi den feyanti fu unu. Ma sma no o wani bai unu.”

29

291Disi na den sani fu a ferbontu na san den sma fu Israel ben mus hori densrefi. MASRA ben meki Moses taigi den den sani disi ini a kondre Moab. Boiti den sani fu a ferbontu na Horeb, den ben mus hori den na den sani disi tu.

2So Moses kari heri Israel fu kon na en dan a taigi den taki: “Un si ala den sani di MASRA du ini a kondre Egipte nanga Farao, den knekti fu en nanga a heri kondre. Den psa leti fesi un ai. 3Un si den hebi strafu, den wondru nanga den marki nanga un eigi ai. 4Ma te leki tide MASRA no ben meki un ferstan trutru ete fu sanede den sani disi psa. A no ben opo un ati nanga un ai ete gi den. 5Fotenti yari Mi tyari un ini a dreisabana. Den krosi di un ben weri no priti èn un susu no broko na un futu. 6Un no ben e nyan brede èn un no ben e dringi win noso wan tra sani di ben kan meki un drungu fu un ben kan sabi taki Mi na MASRA, un Gado. 7Di un doro dyaso, Sikon a kownu fu Hesbon, nanga Og, a kownu fu Basan, hari kon fu feti nanga unu, ma un fon den. 8Un teki a kondre fu den abra dan un gi en na a lo fu Ruben, Gad nanga afu fu a lo fu Manase, taki na fu den. 9Fu dat'ede un mus hori unsrefi trutru na den sani fu a ferbontu disi, fu ala sani san un e du kan waka bun gi unu.

10Tide un alamala tnapu dyaso fesi MASRA, un Gado. Den edeman fu den lo fu unu, den fesiman nanga den skrifiman. Ala den mansma fu Israel. 11Den pikin fu unu, den frow fu unu nanga den sma di e libi leki doroseisma na un mindri. Srefi den man di e kapu udu nanga den wan di e peti watra. 12Un tnapu dyaso fu meki wan ferbontu tide nanga MASRA, un Gado. Wan ferbontu di o stampu nanga wan sweri. 13Un o du disi fu un kan tron En folku èn fu En tron un Gado, leki fa A taigi unu taki A o du, èn leki fa A sweri gi Abraham, Isak nanga Yakob, den afo fu unu. 14A no nanga unu wawan Mi e sroto a ferbontu disi di o stampu nanga wan sweri. 15Mi e sroto en nanga unu di de dyaso tide, unu di tnapu dyaso na fesi MASRA, un Gado, ma nanga den wan tu di no tnapu dyaso na unu tide.

16Bika un sabi fa un ben libi na ini Egipte, nanga fa un hari psa na ini a kondre fu tra folku. 17Un si den groskin kruktu gado fu den fu udu, ston, solfru nanga gowtu. 18Dat' meki no wan man noso uma, no wan famiri noso lo mus de na un mindri, di no wani dini MASRA, un Gado, moro fu go dini den gado fu den folku disi. Noso dati bo de leki wan rutu mus de na un mindri di e kiri ala tra sani nanga a bita di a e gi. 19Efu wan sma denki taki aladi a yere den sweri nanga san a ferbontu stampu, sani sa tan go bun nanga en, èn taki a o man taki: noti no sa psa nanga mi efu mi tan du san mi ati firi, dan sowan sma o meki un alamala dede. 20MASRA no sa gi so wan sma pardon. Ma MASRA sa lusu En atibron na a sma tapu fu di A e dyarusu. A sa meki ala den fluku di skrifi ini a buku disi kon na a sma tapu. MASRA sa figi en nen puru na grontapu. 21MASRA sa puru mindri den tra lo fu Israel. A sa poti en aparti fu ala den fluku kon na en tapu, leki fa a skrifi ini a ferbontu di skrifi ini a buku nanga den wèt disi.

22Den wan di e kon na un baka, den pikin fu unu di e kon na un baka, nanga den doroseisma di kmoto fu fara, sa si den strafu nanga den siki, di MASRA meki broko ini a kondre disi. 23Den sa si taki kroiti nanga sowtu pori a heri gron èn taki a bron. Den sa si taki noti no man sai, noti no man sproiti èn taki noti no e gro. A sa de leki di MASRA ben drai den foto Sodom, Gomora. Adma nanga Seboim tapu, di En ati ben e bron tranga na den tapu. 24Dan ala folku sa taki: ‘Fu sanede MASRA du so nanga a kondre disi? San a bigi atibron disi wan taki?’ 25Dan sma sa taigi den taki: ‘Na fu di den broko a ferbontu fu MASRA, a Gado fu den afo fu den. Den broko a ferbontu di A ben sroto nanga den di A ben e puru den na ini Egipte. 26Na fu di den go dini tra gado èn den boigi gi den gado disi, di den no ben sabi èn di Gado no ben poti gi den. 27Na fu dat'ede MASRA lusu En atibron tapu a kondre disi, fu ala den fluku di tnapu ini a buku disi kon na den tapu.’ 28Bika na ini en bigi atibron, MASRA rutu den puru fu a kondre fu den, dan a fringi den go na wan tra kondre.

29Den sani di no kon na krin ete na fu MASRA. Ma den sani di kon na krin kba na fu têgo gi unu nanga den pikin fu unu, fu un hori un na ala pisi fu a wèt.”

30

301“Ala den sani disi di mi poti na un fesi, o miti unu. A blesi nanga a fluku. Ma te un de na mindri fu den folku pe MASRA, un Gado, o panya un go èn un memre den sani disi 2dan un nanga den pikin fu unu drai kon baka na MASRA, un Gado, èn arki nanga un heri ati èn nanga un heri sili san A e taigi unu tide, 3dan MASRA, un Gado, sa tyari wan kenki kon ini un libi. A sa tyari un kon na wan baka fu mindri den folku pe MASRA, un Gado, pe panya un go. 4Awinsi sonwan fu unu ben panya go te na a kba fu grontapu, MASRA, un Gado, sa tyari un kon baka èn tyari kon na wan baka. 5MASRA, un Gado, sa tyari un go na a kondre di ben de fu den afo fu unu. A sa de baka fu unu. A sa meki sani go bun nanga èn un sa kon moro furu dan den afo fu unu. 6MASRA, un Gado, sa koti a fesibuba fu un ati nanga di fu den bakapikin fu unu, fu un kan du san A e taki. Dan un o man lobi MASRA, un Gado, nanga un heri ati èn nanga un heri sili, fu un kan tan na libi. 7MASRA, un Gado, sa meki ala den fluku kon na tapu den wan di ben de na un baka. Den feyanti fu unu nanga den wan di no lobi un srefsrefi. 8Un sa arki baka san MASRA e taki èn un sa hori un na ala den gebod di mi e leri un tide. 9MASRA, un Gado, sa meki taki ala sani san un e du sa go bun nomonomo. A sa meki un kisi furu pikin. A sa meki den meti fu unu furu pikin èn A sa meki a gron fu unu gi furu nyanyan. Bika MASRA sa abi prisiri baka nanga unu èn blesi unu, leki fa A ben abi prisiri nanga den afo fu unu. 10A sa du dati efu un arki san MASRA, un Gado, e taigi unu èn efu un hori unsrefi na den gebod fu En nanga ala den sani di un mus tan du, den sani di skrifi ini a buku disi fu a wèt. A sa du en efu drai kon baka nanga un heri ati èn nanga un heri sili na MASRA, un Gado.”

11“Den gebod di mi e taigi tide fu hori, no tranga gi unu fu hori èn den no tranga fu ferstan. 12A no de na heimel. So un no abi fu taki: ‘Suma sa kren go fu go teki en gi unu fu un kan arki èn du den sani?’ 13A no de tu na a tra sei fu a se. So un no abi fu taki: ‘Suma sa koti a se fu go teki en gi unu fu un kan arki èn du den sani?’ 14Kwet'kweti! A no fara srefsrefi. A de leti ini un mofo nanga ini un ati. Ala san yu abi fu du na fu du nomo san den e taki.

15Luku, tide mi e hori a libi nanga koloku na un fesi, ma dede nanga ongoluku tu. 16Bika mi e taigi un tide fu lobi MASRA, un Gado. Un mus tan libi leki fa En wani. Un mus hori unsrefi na den gebod fu En, un mus tan du den sani di un mus du èn un mus tan hori unsrefi na den sani na san un mus hori unsrefi. Dan un sa libi, un sa kon furu, èn MASRA, un Gado, sa blesi unu ini a kondre san un e go fu go teki abra. 17Ma efu un drai un baka gi En, èn efu un no wani arki, ma un meki den kori unu fu un boigi gi tra gado èn fu un dini den, 18dan mi e taigi un tide taki na dede un o dede. Un no o libi langa ini a kondre di un o teki abra, te un abra a Yordanliba. 19Mi e teki heimel nanga grontapu leki kotoigi tide. Mi e hori libi nanga dede na un fesi, koloku nanga ongoloku. Teki a libi dan. Dan un sa tan na libi, un nanga den bakapikin fu unu, 20efu un lobi MASRA, un Gado, efu un arki san A e taigi unu èn efu un tan na En sei wawan. Bika disi na a fasi fa un kan libi langa ini a kondre di MASRA ben sweri gi Abraham, Isak nanga Yakob, den afo fu unu, taki A bo gi en na den.”