Sranan Tongo Bible 2016 (STB16)
12

121Dat' meki, prakseri a Wan di meki yu te yu yongu ete. Prakseri En fosi den ogri dei kon èn den yari pe yu o taki: Mi no abi prisiri nanga a libi.

2Prakseri En fosi a son o kon dungru,

te a munkenki nanga den stari no o gi faya moro,

èn te dungru wolku o tan kon baka alen.

3Prakseri En fosi den waktiman fu a oso bigin beifi

èn den baka fu den tranga man bigin beni,

fosi den uma di e mara o tapu a wroko,

fu di furu fu den no de moro

èn den di e luku na a fensre no o man si moro.

4Prakseri En te den doro na stratisei o sroto,

te a babari fu a miri o tapu,

te pikinfowru no de fu yere so krin moro,

èn te noti o de fu yere moro.

5Iya, prakseri a Wan di meki yu,

fosi a ten doro pe yu o frede fu kren bergibergi presi,

te ogri kan miti yu na strati,

te a amandrabon o gi en weti bromki,

te a sprenka o srepi ensrefi,12:5 Un kan puru a pisi disi so tu: te den sprenka di yu nyan o hebi yu bere.

èn te wan sma no e angri fu noti moro.

So wan sma, na en grebi a e go,

èn den wan di e singi lowsingi e waka lontu tapu strati kba.

6Iya, prakseri En fosi a solfru titei koti

èn a gowtu skarki fadon fow,

prakseri En fosi a prapi broko pis'pisi na a watrabron

èn a sani san un e drai na a bron fu kisi watra, fadon broko.

7Prakseri En fosi a skin go baka ini a doti fu san a ben meki,

èn a yeye go baka na Gado di ben gi en na yu.

A kba pisi

8Preikiman e taki disi: “A libi tranga fu ferstan! A gersi leki un no man ferstan not'noti fu ala den sani di e psa!”

9Boiti dati Preikiman ben de wan koniman, a ben e tan leri a pipel sabi. A ben wegi sani go, a ben wegi den kon èn a ben lobi ondrosuku sani. A meki furu odo tu. 10Te Preikiman ben e taki, a ben e meki ala muiti fu taki switi, èn te a ben e skrifi, a ben e skrifi sani di tru nanga wortu di de fu fertrow. 11Ala den leri fu koni sma de leki wan prin, leki spikri di naki fasi ini udu. Na wán skapuman nomo gi den leri dati.

12Mi boi, meki mi warskow yu fu ete wan sani: fu tyari odo kon na wan na wan wroko di no e kba, èn fu stuka fu kon koni o go na yu skin. 13Efu un kan taki ala den sani di yu yere wan syatu fasi, un kan taki en so: Abi bigi lespeki gi Gado èn hori yu na den gebod fu En. A sani disi na gi ala sma. 14Bika Gado o krutu ala sani san libisma du, owktu den sani di den du kibrikibri, den bun sani nanga den kruktu sani.