Sranan Tongo Bible 2016 (STB16)
1

11Disi na den wortu fu Preikiman, a manpikin fu David, kownu fu Yerusalem.

A libi furu nanga aksi

2Preikiman e taki: A libi tranga fu ferstan,

a tranga fu ferstan fu tru!

A gersi leki un no man ferstan notinoti fu ala den sani di e psa!

3Sortu wini libisma abi na ala a tranga wroko di a e du na grontapu,

na a naki di a e naki en skin?

4Libisma e go, libisma e kon,

ma grontapu e tan fu têgo.

5A son e opo, a son e saka,

dan a e feti go baka na a presi pe a o opo.

6A winti e wai go na zuidsei,

dan a e drai go na noordsei,

a e drai, a e wai, a e drai,

èn ini a drai di a e drai a e wai kon baka.

7Ala liba na se den e go,

ma se no e furu.

Den liba e drai,

den e go baka na a presi pe den kmopo,

dan den e bigin lon baka.

8Ala sani e go nanga langa,

wan kba no e kon na san libisma kan taki,

wan kba no e kon na san ai kan si,

wan kba no e kon na san yesi kan yere.

9San ben de o kon baka,

san ben du o du baka,

nyun sani no de na grontapu.

10Efu wan sma sa taki:

“Luku, disi na wan nyun sani,”

dan na wan sani di ben de bun langa kba,

langa fosi un ben de.

11No wan sma no e prakseri den sma moro di ben libi fosi unu

èn bakaten sma no o prakseri den sma moro tu di kon na un baka.

Preikiman ondrosuku koni nanga don

12Mi, Preikiman, ben de kownu fu Israel ini Yerusalem. 13Nanga mi heri ati mi ondrosuku ala sani dyaso na grontapu tapu a srefi fasi leki fa ala koniman bo du, bika mi ben wani ferstan ala sani di e psa. Dati na wan sari sani fu du. Na wan sani di Gado gi libisma fu du, fu pina en. 14Mi ondrosuku ala sani di e psa na grontapu, èn yu sabi san: a tranga fu ferstan, leki fa a tranga fu ferstan fa a winti e wai. 15Yu no kan meki wan sani di kron kon let'opu, èn yu no man teri wan sani di e mankeri. 16Mi taigi misrefi taki: Mi kisi bigi koni, moro furu leki ala den trawan di ben e tiri Yerusalem fosi mi. Mi kon kisi furu koni nanga sabi. 17Nanga mi heri ati mi meki muiti fu kon sabi san na koni nanga sabi, san na don èn san a wan taki fu no abi ferstan. Ma mi kon si tak' dati srefi na wan sani di tranga fu ferstan, leki fa a tranga fu ferstan fa a winti e wai. 18Bika a sma di abi furu koni abi furu sari èn a sma di e sabi sani moro nanga moro, e firi pen moro nanga moro tu.

2

Prisiri e du noti gi yu

21Mi taigi misrefi taki: So, mi o pruberi den sani di e gi prisiri. Mi o luku sortu bun den abi. Ma mi kon si taki dati srefi tranga fu ferstan. 2Mi kon si dati na wan don sani fu e lafulafu nomo èn dati prisiri no e du noti gi yu. 3Dat' meki mi go ondrosuku na misrefi luku: Mi dringi win te leki mi bigin firi prisiri, ma a srefi ten mi meki muiti fu tan koni. Mi ben wani sabi efu dati ben de a moro bun sani gi libisma fu du, a syatu ten di den de dyaso na grontapu.

4Mi du bigi sani tu: Mi meki sma bow oso gi mi, mi meki den prani droifidyari gi mi, 5mi meki den seti moi bigi dyari kon, fu den prani ala sortu froktu bon. 6Mi meki den diki bradi peti fu a watra dati ben kan nati den rutu fu yongu bon. 7Mi bai mansrafu nanga umasrafu. Den pikin fu den srefi gebore leki srafu ini mi oso. Mi ben abi bun furu kaw, skapu nanga krabita, moro leki ala den wan di ben libi fosi mi ini Yerusalem. 8Mi tyari bun furu solfru nanga gowtu gi misrefi kon na wan tu. Srefi gudu fu kownu nanga fu kondre di ben saka densrefi gi mi. Mi ben abi singiman nanga singi-uma, sosrefi uma, moi uma, di e gi iniwan man prisiri. 9Tapu a fasi disi mi tyari moro gudu kon na wan, moro ala den wan di ben libi fosi mi ini Yerusalem. Èn nanga ala san mi tyari kon na wan gi misrefi, mi tan hori a koni fu mi. 10Mi meki den ai fu mi si ala san den ben wani si, mi gi mi ati ala a prisiri di a ben wani. Iya, nanga mi heri ati mi prisiri nanga ala den sani di mi ben tyari kon na wan. Dati ben de a paiman fu ala a tranga wroko di mi ben du. 11Ma dan mi prakseri ala den sani ete wan leisi di mi du, ala a tranga wroko di mi du, nanga a naki di mi naki mi skin fu ben kan abi den. We yere, dati tranga fu ferstan tu, leki fa a tranga fu ferstan fa a winti e wai. Bika no wan wini a no tyari gi mi dyaso na grontapu.

12Dan mi poti mi prakseri baka tapu san na koni, san na don èn san a wani taki fu no abi ferstan. Bika san a kownu di o kon na mi baka o du nanga ala den sani di a wan di waka na en fesi du? 13Ma mi ben kon ferstan dati koni bun moro don, neleki fa leti bun moro dungru. 14Wan sma di koni e si san a e du, ma wan don sma e firifiri ini a dungru. Ma disi mi sabi tu: na a srefi sani e miti den ala tu. 15Mi taigi misrefi taki: A srefi sani di e miti a don sma, e miti mi tu. Dan sortu bun a bigi koni fu mi e du gi mi? Dati srefi tranga fu ferstan. 16Bika sma no e tan prakseri wan trawan, èn a no e meki noti efu a ben de wan koni sma noso wan don sma. Te fu kba sma e fergiti ala tu. Èn na wan sari sani tu dati dede no abi bisi efu yu koni noso efu yu don.

17Na dat' meki mi no ben lobi a libi srefsrefi moro. Bika a gersi leki notinoti no bun san sma e du dyaso na grontapu. A tranga fu ferstan, leki fa a tranga fu ferstan fa a winti e wai. 18A moro tranga sani na dati mi o abi fu libi ala den sani na baka gi san mi wroko so tranga, den sani gi san mi naki mi skin dyaso na grontapu, gi a sma di o kon na mi baka. 19No wan sma man taigi mi efu a o de wan koni sma noso wan don sma. Ma na en o abi a makti abra ala den sani gi san mi wroko so tranga nanga a koni fu mi dyaso na grontapu. Dati srefi tranga fu ferstan. 20So mi no ben sabi moro san mi ben mus prakseri fu ala a tranga wroko di mi ben wroko, nanga a naki di mi naki mi skin dyaso na grontapu. 21Bika wan sma di naki en skin fu kan abi san a abi, èn di du en nanga koni èn nanga sabi, o abi fu libi en na baka gi wan sma di no du noti gi en. Dati srefi tranga fu ferstan èn a de wan bigi ogri. 22Sortu wini wan sma abi na ala den sani di a tyari nanga tranga wroko kon na wan? A meki ala muiti fu kon na den, a naki en skin gi den dyaso na grontapu, 23ma na soso sari a sabi ini en libi. Ala san a e du e tyari soso broko ati, èn srefi sribi a no man sribi te neti. Dati srefi tranga fu ferstan. 24A moro bun sani di wan libisma kan du, na fu nyan, dringi èn fu prisiri nanga den sani gi san a wroko so tranga. Bika mi kon ferstan tak' dati srefi de ini Gado anu. 25Bika nanga a yepi fu Gado wawan wan sma kan nyan èn feni prisiri ini a libi. 26Bika A e gi koni, sabi nanga prisiri na wan libisma di e gi En prisiri, ma wan sma di no e gi En prisiri A e gi a wroko fu tyari sani kon na wan, fu gi den na a sma di e gi En prisiri. Dati srefi tranga fu ferstan, leki fa a tranga fu ferstan fa a winti e wai.

3

Ala sani abi en ten

31Ala sani abi en yuru,

ala sani dyaso na grontapu abi en ten.

2Wan ten fu gebore,

wan ten fu dede,

wan ten fu prani,

wan ten fu rutu puru.

3Wan ten fu kiri,

wan ten fu dresi,

wan ten fu broko puru,

wan ten fu bow.

4Wan ten fu krei,

wan ten fu lafu,

wan ten fu low,

wan ten fu dansi.

5Wan ten fu meki lobi,

wan ten fu no meki lobi,

wan ten fu brasa,

wan ten fu no brasa.

6Wan ten fu suku,

wan ten fu meki sani go,

wan ten fu kibri sani,

wan ten fu trowe sani.

7Wan ten fu priti,

wan ten fu nai san priti,

wan ten fu tan tiri,

wan ten fu taki.

8Wan ten fu lobi,

wan ten fu no lobi,

wan ten fu feti,

wan ten fu freide.

9Sortu wini wan sma abi na ala a naki di a e naki en skin? 10Mi kon luku den sani finifini di Gado gi libisma fu du. 11Gado e meki ala sani psa na tapu a yoisti ten, èn A meki libisma abi ferstan fu a ten tu. Ma san wi no man ferstan krin, na a wroko di Gado du. Un no man ferstan a bigin noso a kba fu en. 12So mi kon si taki a moro bun sani di libisma kan du, na fu prisiri, nanga fu abi prisiri nanga a libi. 13Den mus nyan, den mus dringi èn den mus prisiri nanga ala den sani fu san den wroko tranga. Bika dati na wan kado fu Gado. 14Mi kon si tu dati ala san Gado e du na fu têgo. Yu no kan poti noti moro na en, èn yu no kan puru noti fu en. Gado du en so fu libisma kan abi bigi lespeki gi En. 15Ala san de, ben de langa ten kba, èn ala san o kon ben de kba tu. Gado e meki densrefi sani psa agen èn agen.3:15 A Hebrewtekst fu a pisi disi no krin.

Ogri lai na grontapu

16Ete wan sani mi si dyaso na grontapu: dati kruktu de na a presi pe krutu mus koti tapu wan leti fasi èn dati kruktu de na a presi pe sma mus feni den leti. 17Ma mi taigi misrefi taki: Gado o krutu den sma di bun ini En ai nanga den sma di e du ogri. Bika A poti wan ten gi ala sani di psa, nanga gi ala sani di sma e du. 18Mi taigi misrefi taki: Gado gi libisma wan spesrutu presi, ma A e meki den si dati den na a srefi leki meti. 19Bika a sani di e miti libisma e miti meti tu. Na a wan sani e miti ala tu: leki fa a wan e dede, na so a trawan e dede tu, èn na a wan bro ala tu abi. So un e si dati libisma no hei moro meti. Fu tru, disi tranga fu ferstan. 20Na wan presi ala sani e go. Ala sani meki fu doti, èn ala sani e tron doti baka. 21Suma sabi efu a bro fu libisma e opo go na loktu èn efu a di fu meti e saka go na gron ini a doti? 22So mi kon si dati a moro bun sani di wan libisma kan du na fu prisiri nanga ala den sani di a e du. Na dati na en pai. Bika no wan sma man sori en san o psa baka te a dede.