Sranan Tongo Bible 2016 (STB16)
5

51Te yu e taki nanga Gado, prakseri fosi yu taki èn no pramisi En sani di yu no o man du. Bika Gado de na heimel èn un de na grontapu. Dat' meki yu mus sabi san yu e taki. 2Bika soleki fa sma e kisi dren te den e du wan lo sani, na so sma e taki dondon sani te den e taki tumsi furu. 3Efu yu pramisi Gado wan sani, yu no mus draidrai fu du san yu pramisi. Bika Gado no lobi te sma e du dondon sani. Yu mus du san yu pramisi. 4Moro betre yu no meki pramisi, dan dati yu pramisi èn yu no du san yu pramisi. 5No meki yu mofo meki yu sondu, èn no taigi a priester bakaten dati na wan fowtu yu meki. Mi no denki dati yu wani fu Gado ati teki faya fu den pramisi di yu meki èn dati A pori ala den wroko fu yu. 6Bika sma e dren wan lo, èn sma e taki wan lo lawlaw sani tu. Ma a moro betre efu yu abi bigi lespeki gi Gado.

Moro kruktudu

7Yu no mus ferwondru te yu si taki sma e pina den pôtiwan ini son pisi fu a kondre, taki sma no e kisi den leti èn taki sani no e du tapu wan leti fasi. Bika wan hei lantiman sabi dati wan moro heiwan e kibri en, èn den ala tu sabi dati wan di hei moro den e kibri den tu. 8Ma ini ala den sani disi, a bun sani de dati a kownu srefi e luku taki sani e waka bun te nyanyan e koti ini den pranigron.5:8 A Hebrewtekst fu a pisi disi no krin.

Moni a no ala sani

9Moni no e sari a sma di lobi moni, èn a sma di e angri fu kon gudu noiti e abi nofo. Dati srefi tranga fu ferstan. 10O moro wan sma abi, o moro trawan o kon nyan fu en. Dan sortu wini a gudu tyari gi sma? Luku wawan a kan luku en. 11Wan wrokoman e sribi switi te neti, èn a no abi trobi efu a ben nyan furu noso pikinso. Ma a sma di e swen ini en gudu no man sribi srefsrefi te neti.

12Mi si ete wan bun ogri sani na grontapu: wan sma di e ori ai na tapu den gudu fu en, ma dan sani no e waka bun. 13Wan ongoluku e miti en, èn a e lasi ala a gudu fu en. A manpikin di a meki, e tan na baka nanga leigi anu. 14Leki fa a guduman ben gebore nanga sososkin, na so a e dede gwe nanga sososkin baka. Noti fu san a ben wroko so tranga a kan tyari gwe nanga en. 15Iya, na wan bun ogri sani: leki fa a kon, na so a e gwe baka. A no abi no wan wini na en taki a naki en skin so. 16En heri libi a ben de mindri sma di ben e dede, sma di ben e sari, sma di ben e kisi atibron, sma di ben e siki, nanga sma di ben e nyan den niri. 17Yere, a sani di mi kon si, na dati a moro bun sani di wan libisma kan du, na fu nyan, na fu dringi èn fu prisiri nanga den sani gi san a wroko so tranga. Disi na san Gado gi en. Na fu dati a e naki en skin a syatu ten di Gado gi en dyaso na grontapu. 18Te Gado meki wan sma abi furu moni nanga gudu, èn A gi a sma dati a okasi fu prisiri nanga den, fu prisiri nanga fa sani waka ini en libi, èn fu prisiri nanga en tranga wroko, dan na wan kado fu Gado. 19Sowan sma no e sidon e broko en ede nanga a syatu pisten di a o de na grontapu, bika nanga en heri ati a e prisiri nanga san Gado gi en.

6

61Mi si wan ogri na grontapu di libisma e tyari leki wan hebi lai: 2dati na tak' Gado e meki wan libisma abi furu moni, gudu nanga grani. A sma dati abi ala san en ati e angri, a no e mankeri noti. Ma toku Gado no e gi en pasi fu a prisiri nanga den sani dati. Wan tra sma e kba ala. Dati tranga fu ferstan èn bita fu swari. 3Bika awinsi so wan sma ben abi wan hondro pikin, awinsi a libi langa èn a doro wan hei libimarki, efu a no ben prisiri nanga den bun sani fu a libi, èn sma no beri en di a dede, mi e taigi unu taki wan pikin di gebore dededede srefi betre moro en. 4Bika a tranga fu ferstan fa a pikin kon so na grontapu, èn fa a du dede gwe so. No wan sma sabi san so wan pikin ben o tron. 5Noiti a si a krin fu dei, èn a no sabi not'noti fu a libi. Ma a e rostu fu en, moro leki a man, 6di no e prisiri nanga den bun sani fu a libi, awinsi a ben libi tu dusun yari. A grebi e wakti ala sma.

7Ala a tranga wroko di libisma e du na fu furu den bere, ma a gersi leki nyanyan noiti e sari den. 8San wan koni sma abi tapu wan don sma? Sortu wini wan pôtisma abi awinsi a sabi fa a mus tyari ensrefi ini a libi? 9A moro betre fu abi prisiri nanga wan sani di yu abi, dan nanga wan sani fu san yu e dren. Dati srefi tranga fu ferstan, leki fa a tranga fu ferstan fa a winti e wai. 10Langa na fesi a ben poti kba fa libisma ben o de. A bo nen libisma èn libisma no abi makti moro Gado. 11Bika o moro wan sma e taki, o moro den sani san a e taki e tranga fu ferstan. A no abi no wan wini na en. 12No wan sma sabi san na a moro bun sani di wan libisma kan du ini a syatu ten fu a soso libi fu en, a libi di e psa so esi leki smoko. Suma kan taigi wan libisma san o psa baka te a libi fu en na grontapu kon na wan kba?

7

San bun gi libisma

71A moro betre fu abi wan bun nen dan fu abi bun switismeri, èn a dei di wan sma e dede betre moro a dei di a gebore. 2A moro betre fu go na wan dede-oso dan fu go na wan friyari-oso. Bika un alamala o dede wan dei. Un di de na libi mus prakseri a sani dati bun. 3A moro betre fu sari dan fu lafu. Awinsi dati e meki a fesi luku sari, a e meki a sma leri ondrofeni. 4Wan koni sma lobi prakseri fa sani o de te a dede, ma wan don sma e prakseri soso prisiri.

5A moro betre fu teki en te wan koni sma e piri ai gi yu, dan fu firi bun te wan don sma e gi yu grani. 6Bika a lafu fu wan don sma de leki a babari fu makamaka taki di e bron ondro wan ketre. Na wan soso lafu di no wani taki noti.

7Wan koni sma e tron wan don sma, efu a e pina wan trawan fu puru wan sani na en anu. Wan sma di e teki tyuku e pori en ati.

8A kba fu wan sani betre moro a bigin fu en. Wan sma di abi langa pasensi, betre moro wan sma di abi bigifasi. 9No nyan yu niri tumsi esi. Na don sma abi a gwenti fu e nyan den niri. 10No aksi yusrefi taki: “Fa a du kon taki fosi sani ben e go moro betre leki now?” Bika wan koni sma no e aksi den sortu sani dati.

11Koni na wan bun sani. A de leki gudu di bigisma e libi na baka. Na wan bun sani gi ala libisma. 12Bika a srefi fasi fa moni kan kibri yu gi problema, na so koni kan du tu. Ma a wini di sma di koni abi, de taki a e gi langa libi na a sma di abi en.

13Meki un luku den sani di Gado meki: suma kan meki wan sani let'opu di Gado meki kron? 14Prisiri te sani e go bun ini yu libi. Te sani no e go bun, yu mus memre dati na Gado meki a ten dati tu. So wan libisma sabi fa a libi fu en o de tamara.

Sani di no makriki fu ferstan

15Ini a libi fu mi di e psa gwe mi si ala sortu sani. Wan fu den sani dati na taki sma di bun ini Gado ai e dede frukufruku, aladi den e du san bun ini Gado ai. Na a tra sei yu abi ogri-ati sma di e libi langa, aladi den e du ogri. 16No denki fu yusrefi taki na bun nomo yu bun so ini Gado ai, èn no tyari yusrefi leki wan sma di koni psa marki. Na kiri yu wani kiri yusrefi? 17No gi yusrefi tumsi abra na kruktudu èn no du don! Fu sanede yu wani dede fosi yu yuru kisi? 18A o bun fu hori ala den tu warskow disi ini prakseri, bika no wan fu den sani disi e miti a sma di e lespeki Gado. 19A makti di koni e gi a koni sma, bigi moro leki a makti di tin tiriman fu wan foto abi. 20No wan sma de na grontapu di no e du ogri, di e du soso bun èn di no e sondu. 21Un no mus teki ala sani di sma e taki, bika sma kan kon taigi yu dati yu knekti e fluku yu. 22bika yusrefi sabi omeni leisi yu fluku trawan tu.

23Nanga a koni fu mi, mi ondrosuku ala den sani dati. Mi prakseri na misrefi taki: a koni fu mi o gi mi piki tapu den sani dati. Ma koni no ben man du dati gi mi. 24Den sani di de, bigi moro un ferstan, den dipi psa marki. Suma o man sabi den dorodoro? 25Mi suku koni nanga mi heri ati, èn mi meki muiti fu ferstan ala sani di de. Mi suku koni èn mi ben wani ferstan den fu ben kan kon na wan besroiti. Mi ben wani sori taki fu du ogri na wan don sani èn fu don na wan trutru law sani. 26Mi kon si wan sani tu di bita moro dede: dati na wan umasma di sabi kori mansma fu fanga den, wan umasma di ati de leki wan net èn di anu de leki bui. A no man fanga a sma di e gi Gado prisiri, ma a sma di no e gi Gado prisiri a e fanga. 27Yere, Preikiman e taki, efu mi poti ala sani kon na wan fu ferstan den gi misrefi, mi e kon si disi: 28Mi suku nanga ala sani di de ini mi, ma te nanga now mi no feni a piki ete. Mi feni wan sma nomo di e libi tapu wan leti fasi na mindri dusun, ma a no ben de wan umasma. 29Ma yere, na disi wawan mi kon si: dati Gado meki libisma bun, ma dati na libisma e fromu densrefi na ini den denki.