Sranan Tongo Bible 2016 (STB16)
3

A wroko di Gado gi Paulus fu du

31Dat' meki fu di Kristus Yesus wani dati, meki mi Paulus de na straf'oso gi unu di no de Dyu. 2Soleki fa un ben yere kba, dan Gado ini En bun-ati gi mi a wroko disi fu un ede. 3A ben tyari a kibritori fu En kon na krin gi mi. Tapu wan syatu fasi mi ben skrifi fu a sani disi na fesi kba. 4Te un e leisi en, dan un o ferstan san mi sabi fu a kibritori fu Kristus.

3:4-6
Kol 1:25-27
5Na ini den ten di de na wi baka, Gado no ben meki libisma kon sabi a kibritori disi. Ma now a Yeye tyari en kon na krin gi den santa boskopuman nanga profeiti fu En. 6A kibritori na tak' den sma di no de Dyu e teki prati na ini den gudu fu Gado, den tron wan pisi fu a skin, èn den abi prati ini a pramisi fu di den de wan nanga Kristus Yesus. Na a bun nyunsu meki a sani disi psa. 7Mi na wan boskopuman fu a bun nyunsu disi. Gado sori mi a bun-ati disi fu di a krakti fu En e wroko ini mi. 8Fu ala den sma fu Gado, mi na a moro pikin wan. Ma Gado soro mi En bun-ati. A meki mi ferteri den sma di no de Dyu fu den gudu fu Kristus di bigi moro leki san wi man ferstan, 9èn A meki mi sori den fa a kibritori fu Gado o wroko. Ini ala den ten di de na un baka, Gado di meki ala sani, ben hori a sani disi gi Ensrefi. 10Dan now a gemeente mus meki taki den yeye na loktu di de edeman, nanga den di abi makti, kon sabi fa Gado koni na ini ala fasi. 11Èn a sani disi e akruderi nanga a prakseri san A ben abi ten na ten, èn now A du en ini Kristus Yesus, wi Masra. 12Fu di wi de wan nanga En èn fu di wi e bribi na ini En, wi kan go tapu wan fri fasi na Gado fesi sondro frede. 13Dat' meki mi e aksi unu fu no lasi ati fu di mi e nyan pina fu unu ede. Bika te mi e pina, dan unu e kisi grani.

A lobi fu Kristus

14Dat' meki mi e fadon tapu mi kindi gi a P'pa. 15Leki P'pa A gi ala den famiri di de na heimel nanga den wan di de na grontapu den nen. 16Mi e begi a P'pa tak' kmopo fu En glori di bigi psa marki, A sa meki En Yeye krakti un yeye. 17Dan so Kristus o libi na ini un ati, fu di un e bribi. Mi e begi tu tak' un sa beri rutu èn ankra fasi ini a lobi, 18dan makandra nanga ala den tra sma fu Gado un sa man ferstan o bradi, o langa, o hei èn o dipi a lobi fu Kristus de. 19Èn un o kon sabi a lobi disi di bigi moro leki san un man ferstan. Dan so a heri fasi fa Gado de, sa furu unu.

20Na En di nanga a krakti di e wroko ini wi, kan du moro furu gi wi leki san wi kan begi noso prakseri, 21na En mus kisi glori na ini a gemeente nanga na ini Kristus Yesus, ini den ten san e kon, fu têgo èn ala ten. Amen!

4

A skin fu Kristus

41Mi di de na straf'oso fu Masra ede, e begi un tangitangi fu un libi wan libi di e akruderi nanga a libi ini san Gado kari un kon. 2Un mus abi sakafasi, safrifasi, nanga pasensi. Èn nanga lobi un mus e teki den trawan leki fa den de.

4:2
Kol 3:12-13
3A Yeye meki un de wan. So un mus du ala muiti fu meki a sani disi tan so. A o tan so efu un e libi ini freide nanga makandra. 4Wan skin nomo de, wan Yeye nomo de, èn di Masra kari un, A gi un wan enkri howpu nomo. 5Wan Masra nomo de, wan enkri bribi nanga wan enkri dopu. 6Wan Gado nomo de, di de a Papa fu wi alamala. Na En na a basi fu wi alamala, A e wroko ini wi alamala, èn A de na ini wi alamala.

7Ma Kristus sori ibriwan fu wi En bun-ati leki fa A ben wani fu du dati. 8Dat' meki a skrifi taki: “Di A opo go na heimel A tyari den wan di A wini gwe nanga En, èn A gi presenti na libisma.”

4:8
Psa 68:19
9Efu a skrifi taki: “A opo go na heimel,” dan dati wani taki tak' A ben saka go na den moro lagi presi fu grontapu fosi. 10A Wan di saka go, na a srefi Wan di opo gwe psa ala heimel di de. Na so A furu ala sani nanga Ensrefi. 11Na En poti son sma leki boskopuman fu En, èn trawan leki profeiti. Moro fara A poti sma di e panya a bun nyunsu, sosrefi sma di mus sorgu gi den bribisma èn gi den leri.4:11 Un kan puru a pisi disi so tu: Sosrefi A poti sma di mus sorgu gi den bribisma èn sma di mus gi den leri. 12A poti den fu gi den sma fu Gado ala sani san den abi fanowdu fu du den wroko san den mus du fu bow a skin fu Kristus. 13Den mus du den wroko te leki wi alamala tron wan ini a bribi èn wi kon sabi a Manpikin fu Gado soleki fa wi mus sabi En. Na so wi o gro tron bigisma ini a bribi, wi o doro na a presi pe wi no abi no wan fowtu moro, wi o de leki fa Kristus de. 14Dan wi no o de leki pikin moro. Bedrigiman no o man meki moro tak' tide wi e bribi disi tamara wi e bribi dati. Den no o man kori wi moro nanga ala sortu leri fu tyari wi tapu wan kruktu pasi. 15Ma nanga lobi un mus tan taki san tru. Dan ini ala fasi wi o gro kon gersi Kristus di de a ede. 16Na En e meki ala den pisi fu a skin e fiti na makandra èn tan na makandra te den e du a wroko san den mus du. Dan so a heri skin e gro èn a lobi e meki taki a skin e bow ensrefi.
4:16
Kol 2:19

A owru nanga a nyun fasi fu libi

17Ini a nen fu Masra, mi e warskow un taki: No libi moro leki den sma di no sabi Gado, bika den abi soso lawlaw prakseri. 18Den ferstan dungru. Den no abi prati ini a libi san Gado e gi, fu di den no sabi En èn den tranga den ati gi En. 19Fu di den no abi no wan dropu firi moro, meki den gi densrefi abra na ala sortu yayolibi, fu kan feni bigi wini na ini ala sortu doti libi. 20Ma unu de heri tra fasi, bika un leri sabi Kristus. 21Un yere fu En, èn un kisi a leri abra En. Na so un leri taki na Yesus abi a tru leri. 22Un no mus libi moro leki fosi. Un mus poti a owru fasi fa un ben de, na wan sei. Bika a fasi dati nanga den bedrigi lostu fu en, e meki sma go lasi. 23A heri fasi fa un e denki mus kon nyun. 24Un mus go libi leki nyun sma di meki na a fasi fu Gado, fu un libi bun ini Gado ai tapu wan santa fasi leki fa a tru leri e taki.

4:22-24
Kol 3:9-10
25Dat' meki un no mus lei moro gi makandra, ma taigi makandra den sani leki fa den de. Bika wi alamala na fu a srefi skin.
4:25
Sak 8:16
26Efu yu kisi atibron, sorgu taki yu no sondu. Son no mus saka dan yu de nanga atibron ete.
4:26
Psa 4:5
27No gi didibri no wan okasi. 28A sma di ben de wan fufuruman, no mus fufuru moro. Ma a moro betre efu a bigin wroko nanga en eigi anu fu kon na en brede. Dan a kan yepi wan trawan tu di no abi. 29Dot'taki no mus kmopo ini un mofo. Ma pe a de fanowdu, un mus taki wan sani di kan kraka wan trawan. Dan den sma di yere san un taki, kan feni wan yepi. 30No meki a Santa Yeye fu Gado firi sari. Bika A de a marki tak' unu na fu Gado te leki a dei doro pe Gado o ferlusu unu. 31Un no mus abi bita fasi, un ati no mus teki faya es'esi, èn un no mus kisi atibron. No meki babari, no taki takru fu trawan, èn no abi ogri-atifasi.

32Ma un mus sori switi maniri na makandra, abi sari-ati gi makandra, èn un gi makandra pardon soleki fa Gado gi unu pardon na ini Kristus.

4:32
Kol 3:13

5

Fa wan bribisma mus libi

51Dat' meki un mus teki a eksempre fu Gado, leki pikin fu En di A lobi. 2Sori trawan taki un lobi den soleki fa Kristus sori un lobi. A gi En libi leki wan ofrandi di ben de leki wan switi smeri gi Gado èn di Gado ben feni bun.

5:2
Eks 29:18

3Leki sma fu Gado un no mus gi unsrefi abra na takru lostu, un no mus libi ala sortu doti libi èn un no mus abi bigi-ai. Den sani disi no mus de na un mindri leki sma fu Gado. 4A no fiti tu fu un taki dot'taki nanga lawlaw sani, noso fu meki morsu spotu. Ma a moro betre fu gi Gado tangi. 5Bika un mus sabi bun taki wan sma di e gi ensrefi abra na takru lostu, di e libi ala sortu doti libi, noso di gridi fu moni, no o kon ondro a tiri fu Kristus nanga Gado. Gridi fu moni na a srefi leki te yu e du afkodrei. 6No meki sma kon kori unu nanga wortu di no e taki noti, bika na den sani disi e meki Gado ati e bron tapu den sma di no wani du san A taki. 7No teki prati ini den sani san den e du. 8Fosi un ben de ini a dungru, ma now un de ini a leti fu di un de wan nanga Masra. So un mus tyari unsrefi leki sma di de fu a leti. 9Bika a leti e tyari soso bun kon na doro, sani di bun ini Gado ai, nanga sani di taki leki fa den de. 10Suku fu kon sabi san e gi Gado prisiri. 11Un no mus teki prati na ini den soso sani san den sma e du di de ini a dungru. Ma un mus sori taki den sani dati no bun. 12Bika den sani san den e du kibrikibri, na soso syen sani. A no fiti srefi fu taki abra den. 13Ma te a faya o tyari ala den sani disi kon na krin, dan a de fu si fa den de trutru. 14Bika na a faya e meki ala sani kon na krin. Dat' meki a skrifi taki:

Wiki, yu di e sribi!

Opo kmopo mindri den dedewan.

Dan a faya fu Kristus sa de na yu tapu.

15Fu dat'ede, un mus luku bun fa un e tyari unsrefi. No tyari unsrefi leki sma di no abi ferstan, ma un tyari unsrefi leki sma di koni. 16Un no mus lasi un ten fu soso, bika a ten pe un e libi takru.
5:16
Kol 4:5
17Dat' meki un no mus du leki donman, ma un mus suku fu kon sabi san Masra wani. 18Un no mus dringi win te leki un drungu, bika dati o meki un du sani di no fiti. Ma un mus kon furu nanga a Yeye. 19Un mus taki nanga makandra nanga psalm-singi, singi di e gi Gado grani, èn nanga singi di e opo Gado nen. Un mus singi, iya un singi gi Masra na ini un ati.5:19 Un kan puru a pisi disi so tu: un singi gi Masra nanga un heri ati.
5:19-20
Kol 3:16-17
20Un mus taki Gado a P'pa tangi ala ten èn fu ala sani ini a nen fu wi Masra Yesus Kristus.

A oso libi

21Un saka unsrefi gi makandra fu di un e lespeki Kristus. 22Uma, un mus saka unsrefi gi un masra, leki fa un e du dati gi Masra.

5:22
Kol 3:18
1Pe 3:1
23Bika a man na a ede fu en uma, leki fa Kristus na a ede fu En gemeente. Na En na a Ferlusuman fu En skin. 24We dan, leki fa a gemeente e saka ensrefi gi Kristus, na so den uma mus saka densrefi gi den masra na ini ala sani. 25Mansma, un mus lobi un uma leki fa Kristus lobi a gemeente. A ben gi En libi gi en,
5:25
Kol 3:19
1Pe 3:7
26fu meki a kon santa. A wasi en kon krin nanga a wortu. 27Na so A o poti en na En fesi leki wan gemeente di e brenki na ala sei, di no abi flaka, ploiploi noso iniwan fu den sortu sani dati. Dan so a gemeente o de santa èn sondro fowtu. 28Na so den man mus lobi den uma tu. Den mus lobi den leki fa den lobi den eigi skin. Suma lobi en uma lobi ensrefi. 29Bika noiti ete wan sma hori en eigi skin na feyanti. Ma a e gi en nyanyan èn a e sorgu bun gi en, soleki fa Kristus e sorgu gi a gemeente. 30Bika wi alamala de wan pisi fu En skin. 31Dat' meki wan man sa libi en m'ma nanga en p'pa fu go libi nanga en uma, èn den tu sma sa kon tron wan enkri skin.
5:31
Gen 2:24
32A kibritori disi dipi. Ma mi e teki en fu sori fa Kristus de nanga a gemeente. 33Ma a e teri fu ibriwan fu unu tu. Wan man mus lobi en uma leki fa a lobi ensrefi, èn wan uma mus abi lespeki gi en masra.