Sranan Tongo Bible 2016 (STB16)
5

Ester go na kownu

51Tapu a di fu dri dei, Ester weri wan fu den kownukrosi fu en, dan a go tnapu tapu a inisei pren fu a kownu-oso, na abrasei fu a bigi kamra pe kownu ben e sidon. Kownu ben sidon tapu a kownusturu fu en na abrasei fu a doro. 2Di kownu si Ester tnapu tapu a pren en ati firi prisiri, dan a langa a gowtu kownutiki di a ben hori na ini en anu, go na en. Ester waka go dan a fasi a edesei fu a tiki. 3Dan kownu aksi en taki: “San psa, Ester? San yu wani aksi mi? Awinsi na afu fu a kondre fu mi yu wani, mi o gi yu en.” 4Ester piki taki: “Efu kownu feni en bun, mi wani kari kownu fu kon tide, makandra nanga Haman, gi a nyanyan di mi meki spesrutu klari.” 5Dan kownu komanderi den knekti fu en taki: “Un go teki Haman wantron tyari kon, bika wi o du san Ester aksi.”

So kownu nanga Haman go na Ester gi a nyanyan di a ben meki spesrutu klari. 6Di den ben e dringi win, kownu aksi Ester taki: “San yu wani? San yu wani aksi mi? Mi sa gi yu en. Awinsi na afu fu a kondre fu mi srefi. Mi o du san yu aksi.” 7Ne Ester piki en taki: “San mi wani aksi, san mi e angri, 8na taki efu kownu abi prisiri nanga mi èn taki kownu sa gi mi san mi wani èn du san mi o aksi, meki kownu kon tamara baka nanga Haman fu kon nyan fu a spesrutu nyanyan di mi o meki klari gi unu. Dan tamara mi o piki kownu tapu a aksi fu en.”

9A dei dati Haman kmoto fu a kownu-oso nanga prisiri, a ben firi bun. Ma di a si Mordekai na mofodoro fu a kownu-oso, en atibron srefsrefi na en tapu. Bika Mordekai no opo gi en, Mordekai no skreki srefsrefi di a si en. 10Ma Haman hori ensrefi. A go na en oso, dan a meki den mati fu en nanga en uma Seres kon na en. 11Dan Haman ferteri den fa a gudu, den furu manpikin di a abi, a grani di kownu gi en nanga a hei presi di kownu gi en moro ala den prenspari man fu a kondre nanga ala den dinari fu kownu. 12Haman taigi den tu taki: “Boiti dati, Ester, a frow fu kownu, seti wan nyanyantafra èn a kari kownu nanga mi wawan. A kari kownu nanga mi fu go na en tamara tu. 13Ma mi no abi noti na den sani dati solanga mi e si Mordekai e sidon na mofodoro fu a kownu-oso.” 14Dan en uma Seres nanga ala den mati fu en taigi en taki: “Seti wan postu fu tutenti-na-feifi meter poti. Dan tamara yu e aksi kownu fu anga Mordekai na en. Baka dati yu kan go nanga prisiri nanga kownu fu go nyan a nyanyan di meki spesrutu klari gi unu.” Haman ben feni en wan bun rai, èn a meki sma seti wan postu poti.