Sranan Tongo Bible 2016 (STB16)
9

Den Dyusma wini den feyanti fu den

91A tin-na-dri dei fu a di fu twarfu mun, a mun Adar, ben doro. Tapu a dei dati den sani di kownu ben komanderi fu a fosi leisi, den sani di ben tron wan wèt, ben musu psa. A ben de a dei tapu san den feyanti fu den Dyusma ben wakti fu kiri den. Ma sani ben kon kenki, bika a dei dati na den Dyusma kiri den sma di no ben man si den na ai. 2A dei dati den Dyusma bondru densrefi ini ala den foto èn ini ala den pisi fu a kondre fu kownu Ahasveros, fu ben kan kiri den sma di ben wani puru den na pasi. No wan fu den folku ben man hori feti nanga den, bika na fesi kba den alamala ben e frede gi den Dyusma. 3Ala den edeman fu den pisi fu a kondre, den heihei lantiman di kownu ben poti fu tiri den difrenti pisi fu a kondre fu en, den komsarsi nanga de heihei lantiman fu kownu, ben yepi den Dyusma, fu di den ben e frede Mordekai. 4Bika Mordekai ben kon abi wan hei presi ini a kownu-oso, èn ini ala den pisi fu a kondre sma ben e yere fu en. Mordekai ben e kisi moro nanga moro makti. 5Den Dyusma kiri bun furu fu den feyanti fu den ini a feti. Den du san den ben wani nanga den sma di no ben man si den na ai. 6Ini fort Susan, den Dyusma kiri feifi hondro fu den. 7Den kiri Parsandata, Dalfon, Aspata, 8Porata, Adalya, Aridata, 9Parmasta, Arisai, Aridai nanga Waisata, 10den tin manpikin fu Haman, a feyanti fu den Dyusma, di ben de a manpikin fu Hamedata. Ma den no teki noti fu den sani di den sma ben abi.

11Di kownu yere omeni dede fadon ini fort Susan a dei dati, 12a taigi Ester taki: “Den Dyusma kiri feifi hondro sma ini fort Susan, srefi den tin manpikin fu Haman. Omeni den sa kiri ini den tra pisi fu a kondre fu mi? San yu wani fu mi du gi yu now? Mi sa du gi yu san yu wani. San yu angri ete? Yu sa kisi en.” 13Dan Ester piki taki: “Efu kownu feni en bun, dan yu gi den Dyusma fu Susan primisi fu du tamara ete san a wèt di de fu tide wawan e taki èn fu anga den dedeskin fu den tin manpikin fu Haman na wan postu.” 14Dan kownu komanderi fu sani waka so. Wan wèt meki gi Susan èn a meki sma anga den dedeskin fu den tin manpikin fu Haman na wan postu. 15Dan den Dyusma na ini Susan bondru densrefi a tra dei baka, a di fu tin-na-fo dei fu a mun Adar, èn den kiri ete dri hondro sma ini Susan. Ma den no teki noti fu den sani di den sma dati ben abi.

16Den Dyusma ini den tra pisi fu a kondre ben bondru densrefi tu, den feti gi den libi èn den feyanti fu den no ben ferferi den moro. Den kiri seibitenti-na-feifi dusun fu den sma di no ben man si den na ai, ma den no teki noti fu den sani di den sma ben abi, 17tapu a di fu tin-na-dri dei fu a mun Adar. Tapu a di fu tin-na-fo dei, den rostu. Den teki a dei dati leki wan fesadei fu nyan, fu dringi nanga fu meki prisiri. 18Ma den Dyusma ini Susan ben bondru densrefi fu feti gi den libi tapu a di fu tin-na-dri dei nanga tapu a di fu tin-na-fo dei fu a mun dati. Den rostu tapu a di fu tin-na-feifi dei, èn den teki a dei dati leki wan fesadei fu nyan, fu dringi èn fu meki prisiri. 19Dat' meki den Dyusma fu den dorpu, den di no ben e libi ini foto nanga skotu, teki a di fu tin-na-fo dei fu a mun Adar, leki wan dei fu prisiri, fu nyan èn fu dringi. A ben de wan dei tu pe den ben e seni kado gi makandra.

20Dan Mordekai poti ala den sani di psa tapu papira èn a seni brifi go gi ala den Dyusma di ben e libi ini a kondre fu kownu Ahasveros, gi den di ben e libi krosbei èn gi den di ben e libi farawe. 21Ini den brifi Mordekai ferplekti den Dyusma tak' ala yari den ben mus hori fesa tapu a di fu tin-na-fo nanga tapu a di fu tin-na-feifi dei fu a mun Adar. 22Bika dati ben de den dei di den Dyusma ben kon fri fu den feyanti fu den, èn dati ben de a mun di sari ben kenki tron prisiri èn pe low ben kenki tron fesa gi den. Den ben mus meki den dei dati tron dei fu nyan, fu dringi nanga prisiri. Tapu den dei dati den ben mus seni kado gi makandra tu èn den ben mus gi na pôtisma. 23Den Dyusma du san Mordekai skrifi den. Den tan du disi fu têgo.

24Na so a sani ben waka: Haman, a feyanti fu ala Dyusma, a manpikin fu Hamedata èn bakapikin fu Agag, ben abi na ini en prakseri fu puru ala den Dyusma na pasi. A ben meki sma fringi a lot, di den e kari pur, fu luku fu a yoisti ten fu kiri den Dyusma puru na pasi. 25Ma baka di Ester go na kownu, kownu no gi primisi wawan fu skrifi wan brifi, ma a ben teki a besroiti tu fu meki a ogri di Haman ben prakseri fu du nanga den Dyu, drai kon tapu en eigi ede. A meki den anga Haman nanga den manpikin fu en na wan postu. 26Na dat' meki den kari den dei dati Purim, fu a wortu pur.

Na fu ala den sani di Mordekai ben skrifi ini a brifi, fu san densrefi ben si nanga fu san ben miti den, 27meki den Dyusma teki en leki wan sani di den, den bakapikin fu den nanga ala sma di ben wani teki a Dyubribi, ben o tan du. Den no ben o meki den tu dei disi psa fu soso, ma ala yari den ben o hori wan fesa tapu den dei disi leki fa a ben skrifi taki den mus du tapu a ten di ben poti. 28Ibri Dyu famiri, na ini ibri pisi nanga ini ibri foto fu a kondre ben mus memre èn hori den dei dati. Den purimdei no ben mus kmopo moro ini a libi fu den Dyusma èn den bakapikin fu den no ben mus tapu fu memre den tu.

29Dan Ester, a umapikin fu Abikail, skrifi wan brifi tu makandra nanga a Dyu Mordekai, fu poti moro krakti ini a di fu tu brifi disi taki a Purimfesa ben mus hori fu têgo. 30Dan Mordekai seni brifi go na ala Dyusma ini ala den wan hondro tutenti nanga seibi pisi fu a kondre fu kownu Ahasveros, pe a ben e winsi den taki ala sani ben sa go bun nanga den èn taki a ben e fertrow na den tapu 31tak' den ben o hori a purimfesa tapu a yoisti ten. A no a Dyu Mordekai wawan nanga Ester, a frow fu kownu, ben ferplekti den fu du dati, ma densrefi ben pramisi tak' den nanga den bakapikin fu den ben o hori den na a ten fu faste nanga fu sari. 32A komanderi di Ester ben gi fu a Purimfesa no ben o man kenki moro èn den skrifi en poti na ini buku.