Sranan Tongo Bible 2016 (STB16)
1

Den sma fu Egipte e pina den Israelitisma

11Disi na den nen fu den manpikin fu Israel di ben kon nanga Yakob na Egipte. Ibriwan fu den ben tyari den ososma fu en. 2Yu ben abi Ruben, Simeon, Lefi nanga Yuda. 3Isakar, Sebulon nanga Benyamin. 4Dan, Naftali, Gad nanga Aser. 5Ala nanga ala den pikin nanga granpikin fu Yakob ben de seibitenti sma.1:5 Te den ben e teri pikin nanga bakapikin den ben e teri soso den mansma. Yosef srefi ben de na Egipte kba. 6Dan Yosef, den brada fu en nanga ala den sma fu a ten dati kon dede. 7Ma den bakapikin fu den Israelitisma ben e meki pikin es'esi èn so den ben kon furu srefsrefi. Den ben kon furu sote taki yu ben e feni den ini a heri kondre.

8Dan wan nyun kownu kon na a makti ini Egipte di no ben sabi Yosef. 9A taigi den sma fu en folku taki: “Luku, den Israelitisma furu moro wi èn den tranga moro wi. 10Dat' meki un mus feni wan koni fasi fu den no kon moro furu. Bika efu feti broko nanga wan tra kondre, den kan span anu makandra nanga den feyanti fu wi fu feti nanga wi, dan den gwe fu a kondre.” 11So den kon poti basya di ben mus sorgu taki den Israelitisma du hebi wroko. Tapu a fasi disi den ben wani broko den Israelitisma. Den Israelitisma ben mus bow den foto Pitom nanga Ramses gi Farao. Den foto disi ben de spesrutu foto di ben o de leki maksin fu kibri nyanyan. 12Ma o moro den ben e pruberi fu broko den Israelitisma, o moro den ben e kon furu èn o moro den ben e panya ini a kondre. Te fu kba den ben e bigin frede den Israelitisma.1:12 Un kan puru a pisi disi so tu: Te fu kba den no ben man si den Israelitisma na ai srefsrefi. 13Dan den sma fu Egipte bigin pina den Israelitisma èn dwengi den fu wroko leki srafu gi den. 14Den ben e hebi a wroko srefsrefi gi den leki srafu. Den Israelitisma ben mus wroko nanga ston nanga smenti èn den ben mus du ala sortu wroko ini den gron tu.

15A kownu fu Egipte ben komanderi Sifra nanga Pua, den frow di ben e yepi den Hebrew-uma te den ben e kisi pikin, taki: 16“Te un e yepi den Hebrew-uma fu kisi pikin, un mus luku bun san den e kisi. Efu na wan boi, un mus kiri en. Efu na wan umapikin, a kan tan na libi.” 17Ma den frow disi ben abi lespeki gi Gado. So den no du san a kownu fu Egipte taigi den. Den no ben e kiri den boi. 18Ne a kownu fu Egipte seni kari den frow disi, dan a aksi den taki: “Fu sanede un no e kiri den boi ma un e meki den tan na libi?” 19Den frow piki en taki: “Den Hebrew-uma no de leki di fu Egipte. Den tranga. Den meki a pikin kba fosi a frow doro di mus yepi den.” 20Gado ben meki taki sani ben e go bun gi den tu frow disi di ben e yepi den Hebrew-uma fu kisi den pikin. Den Israelitisma ben e meki furu pikin èn so a folku ben e kon furu srefsrefi. 21Fu di den tu frow disi ben e lespeki Gado, Gado ben meki taki densrefi kon kisi pikin. 22Ne Farao komanderi a heri folku taki: “Un mus fringi ala den boi di e gebore ini a Nijl-liba. Ma den umapikin kan tan na libi.”