Sranan Tongo Bible 2016 (STB16)
12

A Paskafesa

121MASRA taigi Moses nanga Aaron ini Egipte taki: 2“Bigin fu now a mun disi sa de a fosi mun fu a yari gi unu. 3Taigi ala sma fu Israel taki: ‘Tapu a di fu tin dei fu a mun disi, ala mansma fu ibri famiri mus teki wan skapu noso wan krabita gi en oso. 4Efu a meti furu tumsi gi den sma fu wan oso, den kan nyan en makandra nanga sma fu wan tra oso. Ma den mus sorgu taki ala sma kisi nofo. 5A skapu noso a krabita di den o teki mus de wan manwan fu wan yari. Noti no mus mankeri en. 6Den mus poti en aparti te leki a di fu tin-na-fo dei fu a mun disi. Dan a heri folku fu Israel mus srakti den meti te son e saka. 7Ini ala oso pe a meti o nyan den sma mus teki fu a brudu fu a meti dan den lobi en gi den tu postu fu a doro nanga gi a postu tapusei fu a doro. 8A srefi neti dati den mus nyan a meti. Den mus losi en tapu wan faya dan den nyan en nanga brede di meki sondro dyesi èn nanga bita spesrei. 9A meti no mus lala èn den no mus bori ini watra tu. A meti mus losi tapu wan faya nanga a heri ede, den bowtu nanga a inibere. 10Noti fu en mus tan te tamara. San tan te tamara den mus bron. 11So den mus nyan en: Den mus nyan en es'esi nanga den susu na den futu, den wakatiki na den anu èn den mus weri krosi fu teki waka. Na wan Paska12:11 A Hebrewtongo taki: Pesach. gi MASRA. 12Bika tide neti Mi o psa ini a kondre Egipte, dan Mi o kiri ala den fosi pikin fu libisma nanga meti. Mi MASRA, o krutu ala den gado fu Egipte. 13A brudu na den ososkin na wan marki pe unu e libi. Te Mi si a brudu, Mi o psa. Dan so un no o fadon ini a hebi strafu nanga san Mi o strafu Egipte.

14A dei disi mus de wan dei di un mus tan memre. Un mus teki en leki wan fesadei fu MASRA. Gi den pikin fu unu di e kon na baka a mus de wan sani di den mus tan du. 15Seibi dei langa un sa nyan brede di meki sondro dyesi. Tapu a fosi dei kba un mus puru a dyesi ini un oso. Bika a sma di nyan wan sani di meki nanga dyesi tapu a fosi dei go miti a di fu seibi dei, den no mus si moro leki wan sma fu Israel. 16Tapu a fosi dei nanga tapu a di fu seibi dei un mus hori wan santa konmakandra. No wan wroko mus du a dei dati. Soso den sani san un o nyan un kan meki klari. 17Un mus tan memre den dei disi, pe un e nyan brede di meki sondro dyesi, leki wan fesadei. Bika tapu a dei disi Mi o puru unu, den lo fu Israel, na ini Egipte. Dat' meki gi ala den pikin fu unu di e kon na baka a mus de wan sani di den e tan du. 18Ini a fosi mun, bigin na a mofoneti fu a tin-na-fo dei, un sa nyan brede di meki sondro dyesi. Un sa nyan en te go miti a mofoneti fu a di fu tutenti-na-wan dei. 19Seibi dei langa dyesi no mus de fu feni ini un oso. Bika a sma di nyan wan sani di meki nanga dyesi, den no mus si moro leki wan sma fu Israel. A no abi trobi efu na wan doroseisma noso wan sma di gebore leki wan sma fu Israel. 20Un no sa nyan noti di meki nanga dyesi. Ini ala oso pe un e tan un sa nyan brede di meki sondro dyesi.’ ”

Moses e gi a boskopu doro na den fesiman fu Israel

21Dan Moses seni kari ala den fesiman fu Israel. A taigi den taki: “Un gwe go teki skapu nanga krabita kon gi un famiri fu un srakti gi a Paska. 22Baka dati un mus teki wan bosu hisopwiwiri. Un mus dopu en ini a skarki nanga a brudu, dan un e lobi en gi a postu tapusei fu a doro nanga den tu postu fu a doro. Dan no wan fu unu mus go na dorosei moro te a tamara mamanten. 23Bika MASRA sa psa na ini Egipte fu strafu a kondre. Ma te MASRA si a brudu na a postu tapusei fu a doro nanga den tu postu fu a doro, A sa psa a doro dati. A no sa meki a wan di o strafu kon ini un oso fu kiri unu tu. 24Un mus tan du den sani disi. Unu nanga den pikin fu unu. 25Un mus tan du a sani disi te un doro ini a kondre di MASRA o gi unu, leki fa A ben pramisi. 26Te den pikin fu unu aksi un taki: ‘Fu sanede wi e du a sani disi?’ 27Dan un mus piki den taki: ‘Na wan Paska-ofrandi gi MASRA. Bika di wi ben de na Egipte, MASRA ben strafu den sma fu Egipte, ma A ben waka psa den oso fu den Israelitisma.’ ” Dan a folku kindi èn den gi Gado grani. 28Baka dati den sma fu Israel go du den sani leki fa MASRA ben taigi Moses nanga Aaron taki den mus du en.

A di fu tin strafu: Ala fosi pikin e dede

29Mindrineti MASRA kiri ala fosi pikin na ini a kondre Egipte. Bigin na a fosi manpikin fu Farao di ben o teki a presi fu en p'pa leki kownu, te go miti a fosi manpikin fu a strafuman di ben de na dungru-oso. A kiri ala den fosi pikin fu den meti tu. 30Farao, den knekti fu en nanga ala sma fu Egipte ben opo a neti dati. Krei ben e bari ini Egipte. Bika no wan oso no ben de pe wan sma no ben dede.

31A neti dati srefi Farao seni kari Moses nanga Aaron kon. A taigi den taki: “Un meki unsrefi klari. Un nanga den Israelitisma kan kmoto gwe na mindri fu mi folku. Un gwe go dini MASRA leki fa un taki. 32Un kan teki un skapu, un krabita nanga un kaw tu, leki fa un aksi dan un gwe. Ma un blesi mi tu.” 33Den sma fu Egipte ben begi a pipel tangitangi tu fu gwe libi a kondre so esi leki den man. Den ben taki: “Noso un alamala o dede.” 34Den Israelitisma teki a blon di den ben masi kba, ma gi san den no ben poti dyesi ete. Den poti en ini den koba pe den e masi blon, dan den tai den ini krosi anga abra den skowru. 35Den Israelitisma du tu san Moses nanga Aaron ben taigi den. Den aksi den sma fu Egipte solfru sani, gowtu sani nanga krosi. 36MASRA ben meki taki den sma fu Egipte ben feni en bun san a pipel ben aksi den. So den gi den san den ben aksi. Tapu a fasi disi den ben puru gudu na den sma fu Egipte anu.

37Baka dati den Israelitisma kmoto fu Raamses go na Sukot. Den ben de sowan siksi hondro dusun man di ben e waka nanga futu. Den pikin no ben teri. 38Wan lo tra sma di no ben de Israelitisma gwe nanga den tu. Den ben e tyari wan bigi grupu skapu, krabita nanga kaw gwe tu. 39Den baka kuku di ben meki sondro dyesi, fu a blon di den ben tyari kmoto fu Egipte. A blon disi ben masi kba ma den no ben poti dyesi ete gi en fu di den no ben abi ten moro. Bika den sma ben yagi den puru ini Egipte èn den no ben abi ten fu teki nyanyan gi ondropasi.

40Den Israelitisma tan fo hondro nanga dritenti yari ini Egipte. 41Tapu dati, di den ben de fo hondro nanga dritenti yari ini a kondre, ala den lo fu a pipel MASRA kmoto ini a kondre Egipte. 42A ben de wan neti pe MASRA ben e hori wakti gi den fu tyari den kmoto ini Egipte. Dat' meki den Israelitisma nanga ala den bakapikin fu den e hori wakti a neti disi fu gi MASRA grani.

Den sani di mus du na a Paskafesa

43MASRA taigi Moses nanga Aaron taki: “Disi na den sani di un mus tan du na a Paskanyanyan: No wan sma di no de wan Israelitisma mus nyan fu en. 44Ala srafu di wan sma bai nanga moni kan nyan fu en, baka te a besnei. 45Wan doroseisma di e tan nanga yu no mus nyan fu en. Sosrefi wan knekti di yu yuru fu wroko gi yu. 46A paskanyanyan mus nyan ini a oso pe den meki en klari. Noti fu a meti mus go na dorosei. No wan bonyo fu en un mus broko. 47Ala den Israelitisma mus hori a fesa disi. 48Efu wan doroseisma di e tan na yu wani nyan a Paska fu MASRA, dan en nanga ala mansma fu en oso mus besnei. Baka dati a kan nyan a Paska. Dan den sa si en leki wan sma fu Israel. Ma no wan sma di no besnei mus nyan fu a Paska. 49A srefi wèt sa de gi den sma di gebore leki sma fu Israel nanga gi doroseisma di e tan na un mindri.” 50Dan den Israelitisma du san MASRA taigi Moses nanga Aaron taki den mus du.

51A srefi dei dati MASRA tyari ala den lo fu den Israelitisma kmoto na ini Egipte.

13

Ala fosi pikin na fu MASRA

131MASRA taigi Moses taki: 2“Ala fosi pikin fu den Israelitisma un mus poti aparti gi Mi. Ala pikin, fu libisma nanga meti, di kmoto leki fosiwan na ini en m'mabere, na fu Mi.”

3Ne Moses taigi a folku taki: “Un mus memre a dei disi di un kmoto na ini Egipte pe un ben de srafu. Bika nanga en makti MASRA puru un drape. Fu dat'ede un mus nyan no wan sani di meki nanga dyesi. 4Tapu a dei disi ini a mun Abib wi e gwe. 5Te MASRA tyari un go na a kondre fu den Kananitisma, den Hetitisma, den Amoritisma, den Hiwitisma nanga de Yebusitisma, un mus tan hori a fesa disi na ini a mun disi. A ben pramisi den afo fu wi taki A bo gi wi a kondre disi. Wan kondre pe merki nanga oni de bogobogo. 6Seibi dei langa un sa nyan brede di meki sondro dyesi èn tapu a di fu seibi dei un mus hori wan fesa gi MASRA. 7Seibi dei langa un sa nyan brede di meki sondro dyesi. No wan sani di meki nanga dyesi mus de na un mindri. Ini a heri kondre fu unu dyesi no mus de. 8Tapu a di fu seibi dei un mus ferteri den pikin fu unu taki: ‘Mi e du disi gi MASRA, fu san A du gi mi di A tyari mi kmoto ini Egipte.’ 9A mus de leki wan marki tapu un anu nanga un fes'ede, fu a wèt fu MASRA tan na ini un mofo. Bika nanga en makti MASRA ben puru un na ini Egipte. 10Den sani disi di Mi taigi un fu du, un mus tan du ala yari tapu wan fasti ten.

11Te MASRA tyari un go na a kondre fu den Kananitisma, leki fa A ben pramisi den afo fu wi èn A gi wi a kondre, 12dan un mus poti ala fosi pikin aparti gi MASRA. Fu den meti un mus poti ala fosi manwan aparti gi MASRA tu. 13Ma a fosi manpikin fu wan buriki yu sa bai fri nanga wan skapu noso wan krabita. Efu yu no wan du dati dan yu mus drai en neki broko. Ibri fosi manpikin fu wan libisma yu mus bai fri. 14Te den pikin fu unu sa aksi bakaten taki: ‘Fu sanede wi e du a sani disi?’ Dan yu mus piki den taki: ‘Fu di MASRA puru wi nanga en makti ini Egipte, pe wi ben de srafu. 15Bika di Farao ben tranga en yesi fu meki wi go, MASRA kiri ala fosi pikin fu libisma nanga meti ini a kondre Egipte. Dat' meki fu ala meti wi e gi a manwan, di kmoto leki fosiwan ini a m'mabere, leki wan ofrandi na MASRA. Èn ala fosi manpikin fu wi, wi abi fu bai fri. 16A mus de leki wan marki tapu wi anu nanga fes'ede. Bika nanga en makti MASRA ben puru wi na ini Egipte.’ ”

Gado e meki a folku teki wan tra pasi

17Di Farao meki a pipel go, MASRA no meki den teki a pasi di ben e psa ini a kondre fu den Filistijnsma, aladi dati ben de a moro syatu pasi. Gado du dati nanga a prakseri taki: “Kande te feti miti a pipel a o hati den taki den ben gwe libi Egipte. Dan den o wani drai go baka.” 18Dat' meki Gado meki a pipel drai teki a pasi fu a sabana di ben e go na a Riet Se.13:18 A Septuaginta taki: Redi Se.

Den Israelitisma ben waka ini grupu leki srudati kmoto na ini Egipte leki na feti den ben e go. 19Moses ben teki a dedeskin fu Yosef gwe nanga den, bika Yosef ben meki den Israelitisma sweri gi en taki den bo du dati. A ben taigi den taki: “Gado no o fergiti unu. Dan un mus tyari a dedeskin fu mi gwe fu dyaso.”

20Den Israelitisma ben kmoto fu Sukkot dan den meki den kampu na Etam, krosbei fu a sabana. 21Te mamanten MASRA ben e go na den fesi leki wan wolku fu sori den a pasi. A wolku disi ben gersi wan bigi postu. Te neti A ben e krin a pasi gi den leki wan faya di ben gersi wan bigi postu tu. So den Israelitisma ben man waka dei nanga neti. 22Ala dei, dei nanga neti, a wolku nanga a faya ben e go na fesi fu a pipel.

14

141Dan MASRA taigi Moses taki: 2“Taigi den sma fu Israel taki den mus drai go baka go meki den kampu na fesi Pi-Hakirot, mindri Migdol nanga a Se. Un mus meki a kampu leti na abrasei fu Baal-Sefon na a Se. 3Dan Farao o prakseri taki: ‘Den lasi pasi na ini a sabana. Den no sabi fa fu kmoto ini a sabana.’ 4Mi sa meki Farao tranga en ati fu a teki na un baka. Mi sa kisi bigi nen te Mi kiri Farao nanga a heri legre fu en. Dan de sma fu Egipte sa sabi taki Mi na MASRA.” Dan den Israelitisma du so tu.

5Di den taigi a kownu fu Egipte taki a pipel lowe gwe, en nanga den knekti fu en kenki den prakseri. Den taki: “San wi du? Fu sanede wi meki den Israelitisma gwe? Now wi no abi srafu moro.” 6Ne a seti en fetiwagi dan a teki den man fu en nanga en. 7A teki siksi hondro fu den moro bun fetiwagi nanga ala tra fetiwagi fu Egipte. Ala wagi ben abi wan ofisiri. 8Na so MASRA ben meki Farao, a kownu fu Egipte, tranga en ati fu a go na den Israelitisma baka. Ma den sma fu Israel ben e go sondro frede moro fara.14:8 Un kan puru a pisi disi so tu: Ma den sma fu Israel ben e go moro fara èn MASRA ben e kibri den.

9A legre fu Egipte nanga ala den wagi fu Farao, den srudati di ben e sidon tapu asi nanga den srudati di ben e waka, hari go na den Israelitisma baka. Dan den kon miti den na Pi-Hakirot, abrasei fu Baal-Sefon, pe den Israelitisma ben meki den kampu na a se. 10Di Farao ben kon moro krosbei den Israelitisma opo den ede luku, dan den si taki den sma fu Egipte ben e kon na den baka. Ne den bigin frede dan den bigin begi trangatranga fu MASRA yepi den. 11Den taigi Moses taki: “Kande nofo berpe no ben de na Egipte. Dat' meki yu tyari wi kon fu un dede ini a sabana. Fa yu ben kan du sowan sani fu tyari wi kmoto fu Egipte? 12Wi ben taigi yu na ini Egipte kba taki: ‘Libi wi meki wi dini den sma fu Egipte. Bika a moro bun gi wi fu wi dini den sma fu Egipte dan fu dede na ini a sabana.’ ” 13Ma Moses piki a pipel taki: “No frede. Un hori doro dan un o si tide fa MASRA o yepi unu. Bika den sma fu Egipte di un e si tide, un no o si noiti moro. 14MASRA o feti a feti gi unu. Unsrefi no abi fu du noti.”

15Dan MASRA aksi Moses taki: “Fu sanede yu e bari kari Mi so? Taigi den sma fu Israel fu den broko a kampu. 16Yu mus opo yu anu nanga a wakatiki, dan yu e langa yu anu go na a se fu prati a se na tu. Dan den sma fu Israel o man abra a se tapu drei gron. 17Ma arki, na Mi o meki den sma fu Egipte tranga den ati fu den tan kon na un baka. Dan Mi o kisi bigi nen fu di Mi o kiri Farao nanga a heri legre fu en, den srudati di e tyari den fetiwagi nanga den srudati di e sidon tapu asi. 18Dan den sma fu Egipte sa kon sabi taki Mi na MASRA, fu di Mi o kisi bigi nen fu di Mi o kiri Farao, den srudati di e tyari den fetiwagi fu en nanga den srudati di e sidon tapu asi.”

19Dan a Engel fu Gado, di ben e go na fesi fu den Israelitisma, kmoto fu en presi go na den baka. A wolku, di ben gersi wan bigi postu, kmoto fu en presi na fes'sei tu go tnapu na den baka. 20Tapu a fasi disi a ben de mindri a legre fu Egipte nanga di fu den Israelitisma. A wolku ben dungru na a wan sei ma na a tra sei a ben e krin a neti. So den tu legre no ben man miti densrefi a heri neti dati. 21Dan Moses langa en anu abra a se. A heri neti dati MASRA meki wan tranga winti wai kmoto fu a oostsei, di ben e wai a watra fu a se gwe nanga baka, te leki a se ben prati èn drei gron ben de fu si. 22So den Israelitisma ben man abra a se tapu drei gron. Na den let'sei nanga den kruktusei a watra ben tan tnapu leki wan skotu. 23Dan den sma fu Egipte go na den baka ini a se. Ala den asi fu Farao, den wagi nanga den man tapu den asi. 24Musudei mamanten MASRA luku fu a wolku nanga fu a faya di ben gersi wan bigi postu, go na a legre fu Egipte dan A tyari bruya na den mindri. 25A meki taki den wiel fu den wagi ben e grati gwe. So den no ben man go esi na fesi. Ne den sma fu Egipte taki: “Kon meki wi lowe gi den Israelitisma bika MASRA e feti nanga wi gi den.”

26Dan MASRA taigi Moses taki: “Langa yu anu go na a se fu a watra wasi kon baka abra den sma fu Egipte, den wagi fu den nanga den man tapu den asi.” 27Ne Moses langa en anu go na a se. Di dei bigin broko a watra fu a se wasi kon baka leki fa a ben gwenti lon. Den sma fu Egipte ben e pruberi fu lowe, ma a watra ben e wasi kon na den tapu. Na so MASRA figi den sma fu Egipte go poti na ini a dipi fu se. 28A watra ben wasi kon baka èn a tapu den wagi nanga den man tapu asi fu a legre fu Farao, di ben hari kon na baka den Israelitisma ini a se. No wan fu den no tan na libi. 29Ma den sma fu Israel abra a se tapu drei gron. Na den let'sei nanga den kruktusei a watra ben tan tnapu leki wan skotu.

30Na so MASRA ferlusu den Israelitisma a dei dati puru ini a makti fu den sma fu Egipte. Den Israelitisma ben si fa den dedeskin fu den sma fu Egipte ben didon na syoro. 31Ne den sma fu Israel si a bigi wroko di MASRA du nanga Egipte. A pipel ben abi bigi lespeki gi MASRA èn den ben e fertrow MASRA nanga en knekti Moses.