Sranan Tongo Bible 2016 (STB16)
26

A santa tenti

261Yu mus meki a santa tenti nanga tin duku. Den duku mus de fu diri linnen krosi, blaw katun, dungruredi katun, nanga fayaredi katun. Meki sma di sabi du a wroko bun nai kerub na den tapu. 2Ibri duku mus langa tin-na-fo meter èn a mus bradi tu meter. Ala den duku mus langa a srefi èn den mus bradi a srefi. 3Yu mus fasi feifi fu den duku kon na wan. A srefi sani yu mus du nanga den feifi trawan. 4Te yu du dati, yu mus meki ai fu blaw katun na a wan sei lantyi fu ala den tu duku. 5Yu mus meki feifitenti ai na a wan duku nanga feifitenti ai na a tra duku. Den ai fu den tu duku mus de abra nanga abra. 6Yu mus meki feifitenti gowtu aka fu aka den tu duku kon na wan, meki den tron wan.

7Yu mus meki wan tenti tu nanga erfu duku fu krabitawiwiri. A tenti disi mus kon abra a santa tenti. 8Ala den duku musu langa a srefi èn den mus bradi a srefi. Den mus langa tin-na-feifi meter èn den mus bradi tu meter. 9Feifi fu den duku yu mus fasi kon na wan. Den siksi trawan yu mus fasi kon na wan tu, ma a di fu siksi duku yu mus fow dobru. A dati mus kon na fes'sei fu a tenti. 10Te yu fasi den feifi duku kon na wan, yu mus meki feifitenti ai na a lantyi fu en. A srefi sani yu mus du te yu fasi den tra siksi duku kon na wan. 11Yu mus meki feifitenti kopro aka. Nanga den aka disi yu mus aka den ai fu den tu duku kon na wan, meki den tu duku tron wan. 12Yu mus meki afu fu a pisi fu a duku di langa psa, anga na a bakapisi fu a santa tenti. 13Yu mus meki a afu meter di bradi psa na ala tu sei, anga abra a santa tenti fu tapu en. 14Fu tapu a tenti yu mus meki wan duku fu skapububa di ferfi redi. Tapu a skapububa wan tra duku mus kon fu krabitabuba.

15Yu mus meki planga fu acacia-udu gi a santa tenti. Den planga disi mus tnapu let' opu. 16Ibri planga mus langa feifi meter èn a mus bradi drikwart meter. 17Ala planga mus abi tu pen fu kan fasi den na makandra. Ala planga fu a santa tenti mus de so. 18Yu mus meki tutenti planga gi a sei fu a santa tenti di de na a zuidsei. 19Meki fotenti futupisi fu solfru. Ibri planga mus abi tu futupisi. Ini den futupisi disi den tu pen fu den planga mus fiti. 20Gi a sei fu a santa tenti di de na a noordsei yu mus meki tutenti planga tu 21nanga fotenti futupisi. Tu futupisi gi ibri planga. 22Gi a bakapisi fu a santa tenti di de na a westsei, yu sa meki siksi planga. 23Gi den uku na bakasei fu a santa tenti yu sa meki tu planga. 24Den tu planga disi o meki den uku. Fu ondrosei go na loktu te na a linga den mus de a srefi. 25Ala nanga ala aiti planga mus de nanga solfru futupisi. Tin-na-siksi solfru futupisi sa de. Tu gi ibri planga.

26Yu mus meki dwarsbalk fu acacia-udu. Feifi gi a wan sei fu a santa tenti, 27feifi gi a tra sei fu a santa tenti nanga feifi gi den planga na bakasei fu a santa tenti di de na a westsei. 28A di fu dri dwarsbalk mus didon leti na mindri fu den planga èn a mus waka fu a fosi planga go te na a laste wan. 29Yu mus tapu den planga nanga den dwarsbalk nanga gowtu èn yu mus meki gowtu linga gi den planga ini san den dwarsbalk mus kon fasi. 30Dan yu sa opo a santa tenti tnapu, leki fa Mi sori yu dyaso na tapu a bergi.

31Meki wan garden fu blaw katun, dungruredi katun, fayaredi katun nanga diri linnen krosi èn yu mus meki sma di sabi du a wroko bun, nai kerub na en tapu. 32Yu mus anga en nanga gowtu aka na fo postu fu acacia-udu, di tapu nanga gowtu. Den postu mus tnapu tapu fo solfru futupisi. 33Yu mus anga a garden ondro den tra gowtu aka, dan yu e poti a kisi fu a ferbontu baka a garden. A garden sa prati a santa pisi nanga a moro santa pisi. 34Poti a tapun tapu a kisi ini a moro santa presi. 35Yu mus poti a tafra nanga a kandelaar abra nanga abra fesi a garden. A tafra mus de na noordsei fu a santa tenti. A kandelaar mus de na a zuidsei.

36Yu mus anga wan garden na mofodoro fu a tenti tu. A mus meki fu blaw katun, dungruredi katun, fayaredi katun nanga diri linnen krosi èn moimoi sani mus nai na en tapu. 37Gi a garden disi yu mus meki feifi postu fu acacia-udu di tapu nanga gowtu. Yu mus meki gowtu aka gi den tu nanga feifi kopro futupisi.