Sranan Tongo Bible 2016 (STB16)
24

Yerusalem, a frustu patu

241Ini a di fu neigi yari di un ben ini Babilon leki strafuman, tapu a di fu tin dei fu a di fu tin mun, MASRA taki nanga mi. A taigi mi taki: 2“Manpikin fu libisma, skrifi sortu dei un de tide. Skrifi a yoisti dei, bika tide a kownu fu Babilon broko go tapu Yerusalem. 3Ferteri a trangayesi pipel dati wan agersi tori. Taigi den taki: Na disi Masra MASRA e taki: Poti wan patu tapu faya! Poti en, dan yu e kanti watra na ini. 4Furu en nanga den moro bun pisi meti fu den bowtu nanga fu den skowru. 5Yu mus srakti den moro bun skapu nanga krabita fu du dati. Lai udu poti ondro a faya. Meki a patu kuku, meki den bonyo srefi gari.

6Na disi Masra MASRA e taki: A kba gi a foto fu den kiriman. A de wan frustu patu èn a frustu no wani kmopo. Puru den pisi meti wan fru wan na ini, te leki noti no libi ini a patu. 7Bika a brudu di lon drape de fu si ete. A no go ini a gron èn santi no tapu en. A tan didon na tapu wan bergiston di no abi noti na en tapu. 8Fu wiki a hebi atibron fu Mi, nanga fu pai den wan baka di meki a brudu lon, Mi meki a brudu lon go na tapu a bergiston di no abi noti na en tapu. Drape sma no o man tapu en.

9Dat' meki Masra MASRA e taki: A kba gi a foto fu den kiriman! Misrefi o meki wan bun bigi faya drape. 10Sorgu gi wan bigi ipi udu. Leti a faya, bori a meti bun. Meki a sowsu kon deki. Meki den bonyo bron. 11Meki a leigi patu tan na tapu a krofaya fu a kan faya èn fu a kopro kan kon bun faya. So ala dot'doti sani na ini sa bron èn a frustu kan gwe. 12Ma ala a muiti dati na fu soso: a frustu deki sote dati a no wani gwe, a faya srefi no man puru en. 13Mi ben wani krin yu fu a doti libi nanga fu a motyo libi fu yu, ma yu no meki Mi du dati. Dat' meki yu no o krin moro te leki Mi lusu a hebi atibron fu Mi na yu tapu. 14Na Mi, MASRA, taki en. A o kon, Mi o du en. Mi no o hori Misrefi, Mi no o sari yu èn Mi no o abi sari-ati. Sma o leisi strafu gi yu na a fasi fa yu tyari yusrefi, Masra MASRA e taki.”

Low no mus low te Yerusalem fadon

15MASRA taki nanga mi, A taigi mi taki: 16“Manpikin fu libisma, yere, sondro fu yu ferwakti en Mi o puru a wan di yu lobi sote na yu sei. Ma yu no mus singi dede-oso singi, yu no mus sari èn yu no mus krei. 17Dyeme te yu wawan de èn no low fu en ede. Tan tai a duku lontu yu ede èn tan weri yu susu. No tapu yu fesi èn no nyan a nyanyan di sma di e low e gi yu.”

18A mamanten dati mi e taki nanga a pipel ete, neti a uma fu mi e dede. A tra mamanten mi du leki fa Masra ben komanderi mi.

19Ne a pipel taigi mi taki: “Brokobroko gi unu fu sanede yu e tyari yusrefi so nanga san dati wani taki gi wi.” 20Mi piki den taki: “Masra MASRA taki nanga mi. A taigi mi taki: 21Taigi a pipel fu Israel taki: ‘Na disi Masra MASRA e taki: Un yere, Mi e doti a santa presi fu Mi, a tranga presi fu unu gi san un e meki bigi so, a presi di un lobi sote èn na san un e angri nanga un heri ati. Deigri o kiri den manpikin nanga den umapikin fu unu di un libi na baka. 22Dan un mus du leki fa mi e du: un no sa tapu un fesi, èn un no sa nyan a nyanyan di den sma di o low o tyari kon gi unu. 23Un sa tan weri un susu, sosrefi a duku na un ede. Un no sa singi dede-oso singi èn un no sa krei. Ma den kruktudu fu unu o meki un swaki dei fu dei èn a wan o dyeme gi a trawan. 24Na so Esekiyel o de wan libilibi eksempre gi unu. Un sa du leki fa en du. Te a bigi ogri doro un o sabi taki na Mi na Masra MASRA.’ ”

25“Manpikin fu libisma, fu tru, a dei di Mi o broko a tranga presi fu den, a moi oso di de wan prisiri gi den, a presi di den lobi sote èn na san den e angri nanga den heri ati, èn te Mi o puru den manpikin nanga den umapikin na den anu, 26a dei dati wan fu den di ben kan tan na libi o kon gi yu a boskopu. 27A dei dati, te a man di tan na libi kon na yu, a mofo fu yu o opo baka dan yu o man taki baka. Yu no o babaw moro. So yu o de wan libilibi eksempre gi den, èn den o sabi taki Mi na MASRA.”