Sranan Tongo Bible 2016 (STB16)
27

271MASRA taki nanga mi, A taigi mi taki: 2“Manpikin fu libisma, singi wan sari singi fu Tyrus, 3a foto di e tiri den lanpe fu a se èn pe den baiman nanga den seriman fu furu kondre tapu se e kon bai èn seri den sani. Taigi en taki: ‘Na disi Masra MASRA e taki:

Tyrus, yu ben si leki yu moi sote,

dati noti e mankeri na yu.

4A kondre fu yu de leti mindri fu a se,

den man di meki yu meki yu moi srefsrefi,

noti ben mankeri na yu.

5Yu ben de leki wan bun bigi sipi di meki fu sipres-udu fu Senir.

Gi a langa postu di e tnapu mindrisei fu a sipi,

na wan sedrebon fu a Libanonbergi den teki.

6Nanga den bigi bon fu Basan den meki den pari fu yu.

pe sma e waka ben de fu ivoor,

di den poti ini udu fu a dennebon

di ben kmoto fu den kondre fu den Kititisma.

7Den seiri fu yu ben de fu fini linnen krosi fu Egipte,

moimoi ben nai na en tapu.

Fu fara sma ben kan si na den seiri dati na yu ben e kon.

A tenti fu yu ben de fu blaw katun nanga fu dungruredi katun,

di ben kmopo fu den kondre tapu se fu Elisa.

8Den man di ben e pari yu ben de fu Sidon nanga fu Arwad.

Den man di ben e wroko na yu tapu

ben de den moro bun sipiman fu Tyrus srefi.

9Owru sabiman fu a temrewroko fu Gebal ben e hari gwe nanga yu.

Ala sipi nanga sipiman ben hari kon ini yu,

na drape den ben kenki sani nanga yu.

10Srudati fu Persia, fu Lydia nanga fu Libia e feti gi yu.

Den ben e anga den schild nanga den fet'ati fu den

na den skotu fu yu

na grani nomo den ben e gi yu so.

11Man fu Arwad nanga fu Helek ben e hori wakti na tapu den skotu fu yu,

man fu Gamad ben e du dati ini den hei wakti-oso fu yu.

Den ben e anga den schild fu den na den skotu fu yu,

so den ben e meki yu moro moi leki san yu ben de kba.

12Na den sma fu Tarsis ben e du a wroko fu yu gi yu. Na den ben e kenki den sani fu yu gi solfru, isri, tin nanga loto. 13Baiman nanga seriman fu Grikikondre, fu Tubal nanga fu Mesek ben e gi yu srafu nanga kopro gi den sani fu yu. 14Den di fu Bet-Togarma ben e gi yu asi fu rei, asi fu tyari fetiwagi, nanga difrenti sortu buriki gi den sani fu yu. 15Den baiman nanga seriman fu Dedan ben e kon na yu tu. Baiman nanga seriman fu furu fu den kondre tapu se ben e teki den sani fu yu tu. Den ben e pai yu nanga ivoor èn nanga ebben-udu. A ben diri. 16Aram srefi ben e kon na yu. Fu den furu sani di yu ben abi den ben e pai yu nanga hematietston, nanga dungruredi katun, nanga moi brei krosi, nanga linnen, nanga koraal èn nanga robijn. 17Yuda nanga a tra pisi fu Israel ben e kon na yu tu. Den ben e gi yu tarwe fu Minit, mire, oni, oli nanga balsem. 18Damaskus srefi ben e kon na yu fu den furu difrenti sani di yu ben abi. Den ben e tyari win fu Helbon nanga weti katun fu Sakar. 19Wedan nanga Yawan fu Usal ben e gi bun isri fu wroko, kaneri nanga kalmoes gi den sani fu yu. 20Den man fu Dedan ben e gi yu sani fu sidon tapu asi gi den sani fu yu. 21Den Arabiri nanga den tiriman fu Kedar ben e kon na yu tu. Den ben e gi yu yongu skapu, man skapu nanga man krabita gi den sani fu yu. 22Owktu den baiman nanga seriman fu Seba nanga fu Rama ben e kon na yu. Den ben e gi den moro fini spesrei, ala sortu diriston nanga gowtu gi den sani fu yu. 23Den baiman nanga seriman fu den foto Haran, Kane nanga Eden, fu Seba, Asur nanga Kilmad ben e kon na yu tu. 24Den ben e gi yu diri krosi, blaw katun, mantel nanga sani brei poti na en tapu, tapijt di ben brei nanga difrenti sortu deki titei. 25Na sipi fu Tarsus ben e tyari den lai fu yu gwe.

Na so yu ben didon spanspan na mindrisei fu a se.

26Den man di ben e pari a sipi fu yu ben e tyari yu go na dipi watra,

ma drape, leti mindri fu a se,

drape wan hebi winti di wai kmopo na oostsei broko yu.

27Tapu a dei di a o kba nanga yu,

den gudu fu yu, den sani di yu abi,

den sani di yu ben e seri,

den sipiman, den temreman,

den baiman nanga den seriman,

ala den srudati fu yu,

iya, ala sma di ben de na yu tapu,

den alamala o sungu leti mindri fu a se.

28Den bigi skwala srefi o beifi fu a babari fu den sipiman.

29A sani dati meki ala pariman e gwe libi den sipi fu den,

den man di e wroko na tapu den sipi,

den man di e tiri den sipi,

den alamala e go na syoro.

30Trangatranga den e low gi yu,

den e krei sote.

Den e fringi santi na tapu den ede,

den lolo na ini asisi, soso fa den e sari.

31Fu yu ede den e piri den ede,

den e weri low krosi,

den e krei sote,

den e sari nanga den heri ati.

32Nanga ala sari den e singi wan sari singi gi yu:

Sortu foto ben de leki Tyrus?

Ma now a didon tiri fu en te na ondrosei fu a se.

33Yu ben sorgu dati furu folku ben kisi nofo

fu san den ben abi fanowdu,

nanga den lai fu yu di ben kon abra a se.

Yu gudu den kownu fu grontapu nanga den gudu fu yu,

èn nanga den sani di yu ben e seri.

34Now a se broko yu pis'pisi,

dan a swari yu teki.

Den sani di yu ben e seri nanga ala den sma di ben e de nanga yu,

den sungu gwe nanga yu.

35Ala den sma fu a syoro o tnapu nanga opo mofo.

Den kownu fu den skin e gro,

den fesi kenki.

36Den baiman nanga den seriman fu den tra folku

e seki den ede fu san miti yu.

Yu tron wan sani di e gi frede,

èn yu no o de fu si moro,

noiti moro!’ ”

28

281MASRA taki nanga mi, A taigi mi taki: 2Manpikin fu libisma, go taigi a tiriman fu Tyrus taki: “Na disi Masra MASRA e taki: Yu kon kisi heimemre sote dati yu taki: ‘Mi na wan gado, na tapu wan kownusturu mi e sidon, leti na mindri fu a se.’ Yu e si yusrefi a srefi leki wan gado, aladi yu na wan libisma èn no wan gado. 3Yu denki dati yu koni moro Danyel, no wan kibrisani e tan kibri gi yu. 4Nanga a koni fu yu èn fu di yu srapu yu kon gudu psa marki. Yu tyari gowtu nanga solfru kon na wan ini a kamra pe yu e poti den gudu fu yu. 5Fu di yu koni fu bai èn seri sani yu kon moro gudu. Ma dan yu kisi heimemre fu di yu kon gudu so.

6Dat' meki na disi Masra MASRA e taki: Fu di yu si dati yu koni leki wan gado, 7dat' meki yere, Mi e tyari dorosei folku kon na yu tapu, den moro ogri-ati wan. Nanga den deigri den o tyari wan kba kon na ala den moi sani di a koni fu yu du gi yu, èn den o pori a glori fu yu. 8Ini a grebi den o meki yu saka go, yu o dede wan takru dede, leti mindri fu a se. 9Te yu o tnapu fesi nanga fesi nanga dede yu no o man tak' moro taki: ‘Mi na wan gado!’ Te yu o de ini a makti fu den di o kiri yu a o sori dati yu na libisma èn no wan gado. 10Den dorosei folku dati o kiri yu leki fa sma di no e dini Mi e dede. Na Mi taki en, Masra MASRA e taki.”

11MASRA taki nanga mi, A taigi mi taki: 12Manpikin fu libisma, singi wan dede-oso singi gi a kownu fu Tyrus. Taigi en taki: “Na disi Masra MASRA e taki: Yu ben meki bun, noti no ben mankeri na yu. Yu ben furu nanga koni èn yu ben moi sote. 13Na Eden yu ben e libi, ini a moi dyari fu Gado. Ala sortu diriston ben de na yu krosi: robijn, topaas, yaspis, turkoois, onyx, nefriet, safier, granaat nanga smaragd. Gowtu ben de lontu ibriwan fu den ston dati. Di yu gebore den ben klar'klari e wakti yu. 14Yu ben de wan kerub, den frei fu yu ben bradi opo. Mi ben poti yu tapu a santa bergi fu Gado.28:14 Un kan puru a pisi disi so tu: a santa bergi fu den gado. Drape yu ben de mindri faya ston. 15No wan sma ben man sori finga na yu tapu. Sensi di yu gebore yu ben e libi leki fa a fiti, te leki yu bigin du ogri. 16Leki fa a bai nanga a seri wroko fu yu ben e bigi moro nanga moro, na so yu ben e kon takru èn yu ben e sondu moro nanga moro tu. Na dat' meki Mi seni yu gwe fu a bergi fu Gado. Kerub, yu di Mi ben poti leki waktiman. Mi o yagi yu kmopo fu a bergi, yagi yu puru mindri den faya ston. 17A moi fu yu ben meki yu kisi heimemre. Yu lasi a glori nanga a koni fu yu. Na dat' meki Mi trowe yu na gron. Kownu ben e teki den ten luku san e miti yu. Nanga sari den ben e luku yu. 18Yu doti den santa presi fu yu, nomo fu den furu kruktudu fu yu ede, nanga fu a takrufasi fa yu ben e bai èn seri yu sani. Dat' meki Mi meki wan faya bigin bron ini yu, wan faya di bron yu te noti fu yu libi. Mi meki yu tron asisi tapu a gron, leti fesi ala sma di ben e luku yu. 19Ala den folku di ben sabi yu o tnapu nanga opo mofo. Yu tron wan sani di e gi frede, èn yu no o de fu si moro, noiti moro!”

A strafu fu Sidon

20MASRA taki nanga mi, A taigi mi taki: 21Manpikin fu libisma, poti yu fesi go na Sidon, dan yu e taki san Mi e gi yu fu taki. Taki: 22“Na disi Masra MASRA e taki: Sidon, yere, Mi o strafu yu! Mi o sori a bigifasi fu Mi na un mindri. Te Mi o strafu a foto dati èn sori Misrefi na den leki a Santawan den o sabi taki Mi de MASRA. 23Mi o seni wan takrusiki fu panya drape. Brudu o lon na tapu den strati. Mi o seni legre fu alasei go na den tapu èn dede o fadon. Dan den o sabi taki Mi de MASRA. 24Ma den folku di e libi lontu a pipel fu Israel, den folku di e si den leki noti, den no sa tanteri den leki makamaka moro. Dan den Israelitisma sa sabi taki Mi de Masra MASRA.

25Na disi Masra MASRA e taki: Mi o tyari a pipel fu Israel kon na wan fu ala den kondre pe Mi ben panya den go, èn so Mi o sori ala folku dati Mi na a Santawan. Den Israelitisma o libi ini a kondre di Mi ben gi Mi knekti Yakob. 26Den o libi drape sondro fu sma kon du den ogri. Den o bow oso èn den o prani droifidyari. Iya, den o libi drape sondro fu ogri miti den. A srefi ten dati Mi o strafu ala den folku ini a birti fu den di ben e si den leki noti. Dan den Israelitisma sa sabi taki Mi de MASRA, a Gado fu den.”

29

A strafu fu Egipte

291MASRA taki nanga mi ini a di fu tin yari di un ben leki strafuman ini Babilon, tapu a di fu twarfu dei fu a di fu tin mun. A taigi mi taki: 2Manpikin fu libisma, poti yu fesi go na Farao, a kownu fu Egipte. Dan yu e taigi en nanga heri Egipte san Mi e gi yu fu taki. 3Opo yu mofo èn taki: “Na disi Masra MASRA e taki:

Yere, Farao, kownu fu Egipte, Mi o strafu yu!

Iya, yu di didon leki wan bun bigi kaiman ini a Nijl-liba.

Yu di e taki: ‘A Nijl-liba, na mi abi en, na misrefi meki en.’

4Ma na aka Mi o naki ini den kakumbe fu yu,

èn Mi o meki den fisi fu a Nijl-liba fasi na den buba fu yu.

Dan Mi o hari yu puru ini a liba,

makandra nanga ala den fisi di fasi na den buba fu yu.

5Baka dati Mi o fringi yu trowe ini a bigi dreisabana.

Yu o fadon ini a santi nanga ala den fisi fu a Nijl-liba.

No wan sma o opo yu puru drape noso beri yu.

Mi o gi yu na den krasimeti nanga na den fowru di e frei na loktu,

leki nyanyan Mi o gi yu na den.

6Dan so ala den sma fu Egipte sa sabi taki Mi de MASRA,

bika di den Israelitisma ben suku yepi na yu, Egipte,

na leki wan swaki tiki yu ben de.

7Te den ben grabu yu hori yu ben broko,

èn yu ben priti den heri skowru opo.

Te den ben anga na yu tapu yu ben e broko,

èn yu ben e puru den bowtu fu den na skrufu.

8Dat' meki, na disi Masra MASRA e taki: Mi e seni wan legre kon na yu tapu di o kiri libisma nanga meti. 9Egipte o tron wan broko pranasi nanga wan lo bigi ipi broko ston, èn den o sabi taki Mi de MASRA. Fu di yu ben taki: ‘A Nijl-liba na fu mi, na misrefi ben meki en,’ 10Mi e tron a feyanti fu yu nanga fu a Nijl-liba. Mi o meki a kondre Egipte tron bigi ipi broko ston, fu a busi fu Migdol go te na Syene nanga go te pe Egipte e tuka nanga Nubia. 11Fotenti yari langa a o tan sondro fu sma libi na en ini. No wan libisma o poti en futu drape, meti srefi no o go drape. 12Fotenti yari langa Mi o meki Egiptekondre tron wan broko pranasi mindri kondre di tron broko pranasi kba. Den foto fu en srefi o didon leki broko pranasi mindri foto di didon leki broko pranasi tu. Mi o panya den sma fu Egipte go na mindri tra folku, panya den go ini difrenti kondre.

13Ma na disi Masra MASRA e taki: Te den fotenti yari dati psa Mi o tyari den sma fu Egipte kon na wan baka. Mi o puru den mindri den folku, ini den kondre fu den folku dati, pe Mi ben panya den go. 14Mi o tyari wan kenki kon gi den sma fu Egipte èn Mi o meki den drai go baka na Patros, a kondre pe den kumbatitei beri. Ma drape den o de wan pikin swaki kondre. 15Den o de a moro pikin èn swaki kondre mindri den tra kondre, dan den no o man opo densrefi moro hei leki den trawan. Mi o meki den de wan pikin folku, fu den no tiri tra folku moro. 16So a pipel fu Israel no o poti den bribi moro na den tapu tu. Den no o poti sondu na den tapu moro fu go suku den yepi na den. Èn den Israelitisma o sabi taki Mi na Masra MASRA.”

17MASRA taki nanga mi ini a di fu tutenti-na-seibi yari di un ben de leki strafuman ini Babilon, tapu a fosi dei fu a fosi mun. A taigi mi taki: 18“Manpikin fu libisma, kownu Nebukadnesar fu Babilon meki a legre fu en feti wan hebi feti nanga Tyrus. A ede fu ala den srudati fu en piri, a buba fu ala den skowru kmopo, soso fu den someni lai di den ben mus syow. Ma toku en nanga den srudati fu en no ben man teki a foto dati abra.

19Dat' meki, na disi Masra MASRA e taki: Yere, Mi o gi kownu Nebukadnesar fu Babilon a kondre Egipte. A o fufuru ala sani teki ini a kondre dati èn a o teki den gudu fu den tyari gwe. Dati sa de a pai gi den srudati fu en. 20Leki pai fu a wroko di a du Mi e gi en a kondre Egipte, bika na gi Mi den wroko, Masra MASRA e taki. 21Te dati psa Mi o gi Israel nyun krakti, èn yu o man taki baka nanga den Israelitisma. Dan den o sabi taki Mi de MASRA.”