Sranan Tongo Bible 2016 (STB16)
32

321MASRA taki nanga mi ini a di fu twarfu yari di un ben de leki strafuman ini Babilon, tapu a di fu twarfu dei fu a di fu twarfu mun. A taigi mi taki: 2“Manpikin fu libisma, singi wan dede-oso singi gi Farao, a kownu fu Egipte. Singi gi en taki:

‘Yu ben si yusrefi leki wan tranga yongu lew na mindri fu den folku,

ma yu de leki wan bigi kaiman di e meki a watra naki kon na loktu,

di e trubu a watra nanga den futu fu yu.’

3Na disi Masra MASRA e taki: Mi o fringi a net fu Mi abra yu. Furu folku o hari yu kon na syoro. 4Tapu a gron Mi o fringi yu trowe, fringi yu gwe ini a opo wei. Ala den pikin fowru o frei kon saka na yu tapu, ala den meti fu grontapu o kon furu den bere nanga yu. 5Mi o poti a dedeskin fu yu tapu den bergi. Mi o furu den dal nanga den bonyo fu yu. 6Mi o sungu a gron nanga a watra di e kmopo fu a dedeskin fu yu, sosrefi nanga a brudu fu yu di o hei go te na den bergi, di o furu ondrosei fu den kriki. 7Mi o meki dati a heimel no o de fu si moro. Mi o dungru den stari. Mi o tapu a son nanga wolku, èn Mi o meki a munkenki tapu sori a faya fu en. Mi o du den sani dati te a faya fu a libi fu yu kiri. 8Fu yu ede Mi o dungru ala den faya di e sori na a heimel. Mi e tyari dungru abra a kondre fu yu. Na so Masra MASRA e taki.

9A ati fu furu folku o de na dyompo, te kondre di yu no sabi o yere fa Mi puru yu na pasi. 10Iya, Mi o wai nanga Mi deigri fesi furu folku nanga den kownu fu den. Dan den o skreki te fu dede èn den skin o gro, bika den sabi san miti yu. Tapu a dei di yu o fadon den o beifi go nanga langa, iniwan gi en eigi libi. 11Bika na disi Masra MASRA e taki:

Farao, a legre fu a kownu fu Babilon e kon,

a e hari kon na yu nanga en deigri.

12Mi e meki a deigri fu dyadya fetiman kiri a heri folku fu yu,

den moro ogri-ati fetiman fu den tra folku,

den o broko a moi fu Egipte,

den o kiri ala sma drape.

13Ala den meti sei a bigi liba Mi e kiri tu:

a futu fu no wan libisma o seki a watra moro,

a futu fu no wan meti o trubu en moro.

14Mi o meki a watra kon krin baka,

èn Mi o meki a lon leki oli,

Masra MASRA e taki.

15Te Mi meki Egipte tron wan broko pranasi,

te a feyanti fufuru ala sani puru ini a kondre,

te Mi kiri ala sma di e libi drape,

dan yu o sabi taki Mi de MASRA.

16Dati na a dede-oso singi: den umasma fu tra folku musu singi en gi Egipte nanga ala den sma fu en, Masra MASRA e taki.”

17MASRA taki nanga mi tu tapu a di fu tin-na-feifi dei fu a srefi mun fu a srefi yari dati. A taigi mi taki: 18“Manpikin fu libisma, singi wan dede-oso singi gi a pipel fu Egipte, singi en nanga den umasma fu folku di abi bigi makti. Na so un o tyari Egipte go na a grontapu na ondrosei, na den di go ini den grebi kba.

19Taigi den taki:

‘Un e denki dati un betre moro trawan,

ma un o saka go didon fu un na den di no e dini Mi.

20Un o fadon mindri den wan di deigri kiri.’

A deigri fu a feyanti de klar'klari fu du en wroko ini Egipte. Un srepi a heri folku tyari gwe! 21Ini dedekondre den moro dyadya fetiman e taki fu Farao nanga den di yepi en taki: ‘Den e saka kon, den didon drape now, den di no e dini Gado. A deigri kiri den.’

22Asur nanga a heri legre fu en de drape tu, den grebi fu den didon na alasei. Den alamala lasi libi ini a feti, deigri kiri den. 23Den grebi fu den de na bakasei fu a grontapu ondrosei, den de lontu a di fu den kownu. Na den ben e meki sma frede sote ini a kondre fu den libiwan. Now densrefi lasi libi, deigri kiri den.

24-25Na drape den grebi fu ala den srudati fu Elam de. Den de lontu a di fu den kownu. Den alamala dede ini bigi feti, deigri kiri den. Leki sma di no e dini Gado den saka go ini a grontapu fu ondrosei. Wan pisten na den ben e meki sma skreki te fu dede ini a kondre fu den libiwan. Now den abi fu teki a syen makandra nanga den di ben saka go ini a grebi kba.

26Na drape den grebi fu den srudati fu Mesak-Tubal de. Den grebi fu ala den srudati de lontu a di fu den kownu. Na deigri kiri den alamala, sma di no e dini Gado. Iya, na den ben e meki sma skreki te fu dede na alasei ini a kondre fu den libiwan. 27Den no beri na den dyadya fetiman fu langa di psa. Den di beri nanga den deigri ondro den ede nanga den schild tapu den skin. Na den ben de den dyadya fetiman di ben meki den feyanti fu den skreki te fu dede.

28Ma unu, pipel fu Egipte, unu o didon fu bigi mankeri ede mindri den wan di no e dini Gado, den di deigri kiri.

29Na drape a pipel fu Edom de tu, makandra nanga den kownu nanga den tra tiriman. Awinsi fa den ben tranga den didon now sei den wan di deigri kiri. Densrefi didon now na den wan di no e dini Gado, na den di saka go ini a grebi.

30Na drape ala den tiriman fu noordsei, nanga ala den sma fu Sidon de tu. Na den wan di dede ini bigi feti den saka go, nanga syen, awinsi na den ben meki sma skreki te fu dede gi a makti di den ben abi. Den didon drape, den di no ben e dini Gado, nanga den di deigri kiri èn den e tyari den syen na den di ben saka go ini a grebi kba.

31Te a Farao si den a o de wan trowstu gi en fu a lasi di a lasi a heri folku fu en. Owktu a Farao nanga a legre fu en sa lasi den libi, Masra MASRA e taki. 32Na Mi ben meki a Farao skreki sma te fu dede ini a kondre fu den libiwan. Ma now en nanga a folku fu en o didon na mindri fu den wan di no ben e dini Gado, nanga mindri den di deigri kiri, Masra MASRA e taki.”