Sranan Tongo Bible 2016 (STB16)
33

Masra poti Esekiyel baka leki waktiman

331MASRA taki nanga mi, A taigi mi taki: 2“Manpikin fu libisma, opo yu mofo taigi den kondreman fu yu taki: efu Mi meki bigi feti broko ini wan kondre èn den sma fu a kondre poti wan sma leki waktiman, 3dan a waktiman o bro a tutu fu warskow a pipel fu en te a si taki feyanti e broko kon fu kiri den. 4Efu wan sma yere a babari fu a tutu ma no teki en leki wan warskow, èn feyanti kiri en ini a feti, dan na ensrefi suku en dede. 5A yere a babari fu a tutu, ma a no teki en leki wan warskow. Na ensrefi suku en dede. Efu a ben arki a warskow a ben o tan na libi. 6Ma te a waktiman si a feyanti e kon ma a no e bro a tutu fu warskow a pipel, dan a feyanti doro èn kiri wan sma, dan a sma o dede fu en eigi kruktudu ede, ma Mi o kari a waktiman kon na frantwortu fu a dede fu a sma.

7Now yu, manpikin fu libisma. Mi poti yu leki waktiman gi a pipel fu Israel. Te yu yere Mi taki wan sani, yu sa warskow den ini Mi nen. 8Te Mi taki dati a no abi misi dati so wan ogri-ati sma o dede, ma yu no e taki fu warskow a ogri-ati sma fu a fasi fa a e tyari ensrefi, dan so wan ogri-ati sma o dede fu en eigi kruktudu ede, ma Mi o kari yu kon na frantwortu fu a dede fu en. 9Ma efu yu warskow so wan ogri-ati sma fu a tapu nanga a fasi fa a e tyari ensrefi, ma a no e tapu, dan a o dede fu a eigi kruktudu fu en ede, ma yu ferlusu a libi fu yu.

10Dat' meki, manpikin fu libisma, taigi a pipel fu Israel taki: Un e taki: ‘Den kruktudu nanga den sondu fu wi di de leki wan bun hebi lai na un tapu e meki un swaki dei fu dei. Un no man libi so go moro fara.’ 11Dan yu mus taigi den taki: ‘Mi e sweri na Mi eigi libi, Masra MASRA e taki, Mi no abi a prisiri te wan ogri-ati sma e dede. Ma san e gi Mi prisiri na te wan ogri-ati sma tapu nanga a fasi fa a e tyari ensrefi èn tan na libi. Tapu, tapu nanga a ogri fasi fu yu e tyari yusrefi. Fu sanede un wan dede, pipel fu Israel?’

12Manpikin fu libisma, taigi den kondreman fu yu taki: ‘A libi fu wan sma di bun ini Gado ai no o yepi en efu a bigin du ogri. Èn ogri-ati sani di wan ogri-ati sma e du no o meki a lasi en libi efu a tapu nanga en. Wan sma di bun ini Gado ai no o man tan na libi efu a bigin sondu, awinsi o bun a ben e libi. 13Te Mi e taigi a sma di bun ini Mi ai dati a no abi misi dati a o dede, ma a e fertrow na tapu a leti fasi fa a e libi èn a e tan du ogri, dan Mi no o prakseri no wan fu den bun sani di a du, ma a o dede fu den ogri di a du. 14Te Mi e taigi a ogri-ati sma dati a no abi misi dati a o dede, ma a e tapu nanga a sondu libi èn a bigin du bun èn libi tapu wan leti fasi, 15te a gi baka san a ben teki leki panti, pai a sma di a fufuru, èn libi soleki fa den wèt e taki di e gi libi, wan sani di e meki a tapu fu du ogri, dan a no abi misi dati a o tan na libi, a no o dede. 16A no o pai moro fu no wan fu den sondu di a du. A bigin du san bun èn libi na tapu wan leti fasi. A no abi misi dati a o tan na libi.’ 17A sani disi meki den kondreman fu yu e taki: ‘A fasi dati fa MASRA e du sani no bun,’ ma na a fasi fa den e du sani no bun. 18Te wan sma di bun ini Mi ai tapu fu libi na tapu wan leti fasi èn bigin du ogri, dan na a ogri di a e du o tron en dede. 19Ma te wan ogri-ati sma tapu nanga a ogri-ati libi di a e libi èn a bigin du san bun èn libi na tapu wan leti fasi, dan dati o meki dati a tan na libi. 20Un taki fu unu nomo: ‘A fasi fa MASRA e du sani no bun,’ ma Mi o leisi strafu gi unu pipel fu Israel, iniwan na a fasi fa a tyari ensrefi.”

Esekiyel no babaw moro langa

21Ini a di fu twarfu yari di un ben de leki strafuman ini Babilon, tapu a di fu feifi dei fu a di fu tin mun, wan man di ben man lowe kmopo ini Yerusalem kon drape nanga wan boskopu taki: “A foto broko!” 22A neti na fesi a krakti fu MASRA ben de na mi tapu. Di a man doro a mamanten fu en na mi, MASRA opo mi mofo. So mi ben man taki baka, mi no ben babaw moro.

A bigi ogri kon

23MASRA taki nanga mi, A taigi mi taki: 24“Manpikin fu libisma, den sma di e libi mindri den bigi ipi broko ston ini Israel e taki: ‘Abraham ben de en wawan, toku a kisi a heri kondre. Unu de nanga furu, dat' meki na unu kisi a kondre gi unsrefi.’ 25Fu di den e taki so, taigi den taki: ‘Na disi Masra MASRA e taki: Un e nyan meti di abi brudu ete, un e dini kruktu gado, un e kiri sma, dan fa un wani taki a kondre mus de fu unu. 26Un e bow na tapu den deigri fu unu, un e du groskin sani, iniwan fu unu e go na bedi nanga tranga nanga a uma fu wan trawan. Dan fa un wani taki a kondre mus de fu unu.’ 27Taigi den taki: ‘Na disi Masra MASRA e taki: Mi e sweri na Mi eigi libi taki den wan di e libi mindri den bigi ipi broko ston, na deigri o kiri den. Den wan di e libi ini den wei, na krasi meti o nyan den, èn den wan di e libi ini den tranga kibripresi nanga ini den olo na den bergi, na takrusiki di o panya drape o kiri den. 28Mi o broko a kondre, Mi o pori en. Mi o broko a makti fu en di e meki a e opo ensrefi so. Den bergi fu Israel dati o gersi broko pranasi, no wan sma o hari psa na den moro. 29Te Mi meki a kondre tron wan presi di broko, di pori, fu ala den groskin sani di a pipel du, den sa ferstan dati Mi de MASRA.’

30Masra taigi mi taki: Manpikin fu libisma, den kondreman fu yu e taki nanga makandra fu yu, na den skotu fu a foto èn na den doro fu den oso fu den. A wan e taigi a trawan taki: ‘Kon, meki un go arki san MASRA abi fu taigi unu.’ 31Dan den kon na yu nanga bun furu sma, den e go sidon èn den e arki san yu e taki. Ma den no e du den sani di yu e taigi den fu du. Wortu fu lobi e kmopo ini den mofo, ma den e prakseri soso fa den kan meki moni tapu wan fasi di no fiti. 32Gi den yu na noti moro leki wan singiman di e singi lobisingi, wan di e singi moi èn di e prei a instrumenti bun. Den e yere san yu e taki, ma den no e du san yu e taki. 33Ma te den sani di yu taki kon tru, èn den o kon tru, dan den o ferstan taki wan profeiti ben de na den mindri.”

34

Masra, a bun skapuman fu En pipel

341MASRA taki nanga mi, A taigi mi taki: 2“Manpikin fu libisma, taigi den skapuman fu Israel san Mi e gi yu fu taki. Opo yu mofo, èn taigi den san Mi e gi yu fu taki. Taigi den taki: ‘Na disi Masra MASRA e taki: A kba gi den skapuman fu Israel, den di e wei densrefi. Skapuman na skapu den mus wei. 3Un e nyan a fatu fu den, un e weri den deki wiwiri fu den leki krosi, un srakti den moro fatuwan fu nyan, ma fu tyari den go wei un no de. 4Den swakiwan un no e gi krakti, den sikiwan un no e dresi, un no e tai den presi pe den e kisi mankeri, den wan di lasi pasi un no e go teki tyari kon baka, den wan di lasi un no e go suku, ma un e tiri den nanga tranga èn na tapu wan ogri-ati fasi. 5Den e panya go na ala sei, bika den no abi skapuman. Den e tron nyanyan gi ala den krasimeti noso den e lon panya. 6Den skapu fu Mi e waka lontu nomo tapu den bergi nanga loktusei fu ala lagi bergi. Den skapu fu Mi panya abra heri grontapu, èn yu no abi no wan sma di e aksi fu den noso suku den.

7Dat' meki, un skapuman, un arki a boskopu fu MASRA. 8Mi e sweri na Mi eigi libi, Masra MASRA e taki, den skapu fu Mi no abi skapuman, dat' meki den tron sani tapu san krasimeti e onti, den tron nyanyan gi den èn unu, skapuman, un no e wei den srefsrefi. Na unsrefi un e wei. 9Dat' meki, un skapuman, un arki a boskopu fu MASRA. 10Na disi Masra MASRA e taki: Mi o strafu den skapuman dati! Den o abi fu gi Mi den skapu fu Mi. Mi e tyari wan kba kon tu na a fasi fa den e taki dati den e wei Mi skapu. Den skapuman no o wei densrefi moro. Mi o puru den skapu fu Mi na ini den mofo, fu den no de nyanyan gi den moro. 11Na disi Masra MASRA e taki: Misrefi o luku fu den skapu fu Mi èn Misrefi o sorgu gi den. 12Leki fa wan skapuman e go luku fu den skapu fu en te den lasi pasi, na so Mi o go suku den skapu fu Mi èn ferlusu den fu ala den presi pe den ben panya go tapu wan dei fu dungru wolku di e gi frede. 13Mi o meki den hari kmopo na mindri fu den folku, puru den na ini den kondre tyari den kon na wan, èn tyari den go na den eigi kondre. Mi o tyari den go wei tapu den bergi fu Israel, na a syoro fu kriki, nanga ini ala den kontren fu a kondre pe sma e libi. 14Mi o wei den na tapu bun weigron, owktu na tapu weigron hei na ini den bergi fu Israel. Drape, na tapu den bergi fu Israel, den o rostu tapu wan bun weigron, èn nyan moi fatu grasi. 15Na Misrefi o wei den skapu fu Mi èn meki den rostu, Masra MASRA e taki. 16Den wan di lasi Mi o suku, èn den wan di ben lasi pasi Mi o tyari kon baka. Mi o tai den soro fu den wan di kisi mankeri, dresi den wan di siki, ma den fatu wan, den tranga wan Mi o kiri puru na pasi. Mi o wei den leki fa a fiti.

17Èn unu, skapu fu Mi, na disi Masra MASRA e taki: Un yere, Mi o koti krutu mindri a wan skapu nanga a trawan. Den man skapu nanga den man krabita Mi e taigi taki: 18Un e nyan ini den moro bun wei di de. Dan fu sanede un mus traputrapu a grasi di libi? Un e dringi a moro krin watra di de. Dan fu sanede un mus trubu a watra nanga un futu te un kba dringi? 19Sobun den tra skapu fu Mi mus nyan a grasi di un traputrapu èn den mus dringi a watra di un trubu. 20Dat' meki, na disi Masra MASRA e taigi den: Un yere, Misrefi o koti krutu mindri den fatu skapu nanga den mangri wan. 21Fu di un e pusu den swakiwan gwe nanga un sei èn nanga un skowru, fu di un buku den nanga un tutu te leki un puru den na un mindri, 22meki Mi o ferlusu den skapu fu Mi. Mi no o meki un rigeri so nanga den moro langa. Mi o koti krutu mindri a wan skapu nanga a trawan.

23Mi o poti wán skapuman fu tiri den, fu tyari den go na wei: Mi knekti David. En sa wei den, en sa de a skapuman fu den. 24Mi, MASRA, sa de a Gado fu den, èn Mi knekti David sa de a tiriman na den mindri. Na Mi, MASRA, taki dati. 25Mi o meki wan ferbontu nanga den di sa de wan dyaranti gi den dati den o libi ini freide. Mi o meki dati krasimeti no sa de moro ini a kondre. Den leki Mi skapu o man libi tiri fu den ini den wei èn sribi tiri fu den ini den busi sondro fu ogri miti den. 26Mi o blesi den, sosrefi a gron di de lontu a lagi bergi fu Mi. Mi o meki a alen fadon na tapu den ten di a mus fadon. Den alen dati de wan blesi. 27Den bon sa gi froktu èn a gron sa gi nyanyan. Den sa libi ini a kondre sondro wan sani du den. Te Mi puru a hebi lai na den tapu èn ferlusu den fu a makti fu den di ben e pina den, den o sabi taki mi de MASRA. 28Dan tra folku no o kon fufuru den moro, èn krasimeti no o nyan den moro. Ma den o libi sondro fu ogri miti den, sondro fu sma skreki den. 29Mi o seti pranigron poti gi den fu san sma o taki na alasei. No wan sma moro o dede fu angri ini a kondre èn tra folku no o man broko den saka moro langa. 30Dan den o sabi taki Mi, MASRA, na a Gado fu den, èn dati den leki pipel fu Israel na a pipel fu Mi, Masra MASRA e taki. 31Unu na den skapu fu Mi, den skapu di Mi e wei. Un na libisma èn Mi na a Gado fu unu, Masra MASRA e taki.’ ”

35

Gado o pai Edom baka fu san a du

351MASRA taki nanga mi, A taigi mi taki: 2Manpikin fu libisma, poti yu fesi go na a sei fu Seirbergi, dan yu e taigi en san Mi e gi yu fu taki. 3Taki: “Na disi Masra MASRA e taki: Seirbergi, Mi o strafu yu! Mi o meki yu tron wan broko pranasi, Mi o meki yu tron busi. 4Mi o meki den foto fu yu tron bigi ipi broko ston, wan broko pranasi yu o tron dan yu o sabi taki Mi de MASRA. 5Sensi di yu de yu no ben man si den Israelitisma na ai. Na dat' meki yu meki den feyanti fu den kiri den a ten di a bigi ogri ben miti den, a ten di den ben pai gi den kruktudu fu den. 6Dat' meki, èn Mi e sweri disi na a eigi libi fu Mi, Masra MASRA e taki, Mi o meki a brudu fu yu lon. Dede o hari kon na yu baka, bika yu no ben span fu meki brudu lon. 7Mi o meki Seirbergi tron wan broko pranasi, bigi ipi broko ston a o tron, èn Mi o kiri ala sma di e hari psa drape. 8Mi o tapu den bergiskin fu yu nanga dedeskin. Den sma fu yu o dede tapu den lagi bergi, ini den dal, ondrosei fu ala den kriki, fu a bigi feti ede. 9Mi o meki yu tron wan broko pranasi fu têgo. Sma no o libi na ini den foto fu yu moro. Dan yu o sabi taki Mi de MASRA. 10Yu ben tak' tu taki: ‘Den tu folku fu a kondre, a wan di e libi na noordsei fu a kondre nanga a wan di e libi na zuidsei, nanga a kondre fu den o de fu mi. Un o teki en abra, awinsi MASRA ben libi drape.’ 11Dat' meki, èn Mi e sweri disi na a eigi libi fu Mi, Masra MASRA e taki: A srefi fasi fa yu du nanga den ini faya atibron nanga dyarusu, nanga fu no ben man si den na ai, na so Mi o du nanga yu tu. Èn nanga a strafu di Mi o strafu yu Mi o sori Misrefi na den. 12Yu o sabi tu dati Mi de MASRA. Mi yere fa yu e afrontu den bergi fu Israel: ‘Den broko. Den meti di e waka drape na gi unu fu un nyan.’ 13Iya, Mi yere fa yu e gi Mi bigi taki, fa yu e taki bradi.

14Ma na disi Masra MASRA e taki: Edom, heri grontapu o breiti te Mi o broko yu trowe, 15neleki fa yu ben breiti di feyanti ben e broko a kondre fu a pipel fu Israel. Seirbergi, a srefi sani Mi o du nanga yu: Mi o meki yu broko didon na gron, yu nanga ala den tra pisi fu Edom. Na so den o sabi taki Mi de MASRA.”