Sranan Tongo Bible 2016 (STB16)
46

461Na disi Masra MASRA e taki: A doro na oostsei fu a pren di de inisei fu a tempel dyari sa tan sroto tapu den siksi wrokodei fu a wiki, ma tapu a sabatdei nanga tapu a dei fu a nyunmunfesa un mus opo en. 2Den dei dati a tiriman sa kmopo fu dorosei kon èn waka na a gadri kon ini a doro, dan a e tan tnapu na a postu fu a doro. Dan den priester sa bron wan meti gi en leki ofrandi èn tyari a freide-ofrandi. Te dati psa a tiriman sa boigi tapu a stupu fu a doro. Baka dati a e go baka na dorosei. A doro mus tan opo heri dei, neti fosi a mus sroto baka. 3Tapu den dei dati, tapu a sabatdei nanga tapu a dei fu a nyunmunfesa, a pipel sa boigi na MASRA fesi na a doromofo dati.

4Den meti di a tiriman mus bron gi MASRA tapu a sabatdei leki ofrandi, sa de siksi yongu skapu nanga wan man skapu. No wan fu den meti dati mus abi wan mankeri noso wan siki na den skin. 5Makandra nanga a man skapu a tiriman mus tyari wan graan-ofrandi fu neigi kilo graan, èn na ini wan fu den yongu skapu a kan gi omeni graan leki a man gi. Nanga ibri neigi kilo graan a mus gi dri liter oleif-oli tu. 6Den meti di mus bron leki ofrandi tapu a nyunmunfesa sa de wan yongu bulu, siksi yongu skapu nanga wan man skapu. No wan fu den meti disi mus abi wan mankeri noso wan siki na den skin. 7Makandra nanga a yongu bulu nanga a man skapu a tiriman mus tyari wan graan-ofrandi neigi kilo karu, èn na ini wan fu den skapu a kan gi omeni karu leki a man. Na ibri neigi kilo karu a mus gi dri liter oleif-oli tu.

8Te a tiriman e go na inisei a mus waka na a gadri fu a doro, èn na drape a mus waka go na dorosei baka.

9Ma te a pipel e kon fu boigi na MASRA fesi tapu den fesadei, den wan di waka na a doro fu noordsei kon na inisei sa waka na a doro fu zuidsei gwe baka, èn den wan di waka na a zuidsei kon na inisei sa waka na a doro fu noordsei gwe baka. No wan sma sa gwe na a srefi doro fu pe a waka kon, ma a sa gwe na a doro di de leti na abrasei fu a wan fu pe a kon. 10A tiriman sa go a srefi yuru nanga a pipel na inisei, èn den sa kmopo a srefi yuru kon na dorosei baka.

11Tapu ala den tra sortu fesadei wan graan-ofrandi sa tyari fu neigi kilo graan makandra nanga ibri bulu nanga neigi kilo graan nanga ibri man skapu. A sma di e tyari a ofrandi kan gi omeni graan di a man gi. Dri liter oleif-oli mus gi makandra nanga ibri neigi kilo graan tu.

12Te a tiriman wan bron wan meti leki ofrandi nanga wan fri wani, noso te a wani gi wan freide-ofrandi nanga wan fri wani na MASRA, den mus opo a doro na oostsei gi en, èn a sa tyari den ofrandi leki fa a e tyari den tapu a sabatdei. Te a go na dorosei baka, a doro mus sroto.

13Ala mamanten un mus bron wan yongu skapu fu wan yari gi MASRA leki wan 6 pe a heri meti mus bron. A skapu no mus abi no wan mankeri noso siki na en skin. 14Makandra nanga a skapu un mus tyari wan graan-ofrandi fu tu kilo fini blon, nanga wan liter oleif-oli. A wèt disi no sa kenki noiti. 15Ala mamanten den priester sa tyari wan yongu skapu leki ofrandi, wan graan-ofrandi nanga oleif-oli gi Mi fu têgo.

Wèt gi a gron fu a tiriman

16Na disi Masra MASRA e taki: Efu a tiriman o gi wan fu den boi fu en wan pisi fu a gron fu en leki kado, a pisi gron dati o de gi den pikin nanga bakapikin fu a boi dati tu. A o de wan sani di den kisi fu a famiri gudu. 17Ma te a tiriman o gi wan fu den srafu fu en wan pisi fu a gron fu en, a srafu kan hori en te kon miti a yari fu fri. Baka dati a pisi gron e kon baka ini anu fu a tiriman. A gron na fu en nanga den manpikin fu en. 18Wan tiriman no mus prefuru fu pina wan sma fu a folku fu puru a gron fu en na anu. A mus gi den manpikin fu en wan pisi fu a eigi gron fu en. No wan sma fu a pipel fu Mi mus kmopo nanga tranga fu en gron.’ ”

Den kukru fu a tempel

19Baka dati a man tyari mi waka na a doro di ben de sei a poort go na den santa kamra fu den priester di e sori go na noordsei. We, drape baka den kamra, go na westsei, mi si wan bigi kamra tu. 20Dan a man taigi mi taki: “Disi na a presi pe den priester o bori den meti fu den ofrandi fu kan kisi pardon fu sondu, nanga den meti fu den paiman di den tyari kon leki ofrandi fu kan kisi pardon fu sondu. Owktu a karu fu a graan-ofrandi o baka dyaso. So den priester no abi fu syow den meti go na dorosei, tapu a pren di de na dorosei fu a tempel dyari, fu den no santa a pipel.”

21A man tyari mi go na dorosei now, tapu a pren dorosei fu a tempel dyari. A tyari mi waka na ala den fo uku fu en. Mi si dati ibri wan fu den uku ben abi wan pikin pren tu. 22Den pikin pren ben langa tutenti meter èn den ben bradi tin-na-feifi meter. Ala den fo pikin pren ben bigi a srefi. 23Ala den fo pikin pren disi ben abi wan pikin skotu tu, èn lontu na den skotu skin yu ben abi presi pe faya ben kan meki fu bori. 24Dan a man taigi mi taki: “Disi na den kukru pe den knekti fu a oso fu Masra e bori a meti di srakti leki ofrandi.”

47

A watra di e lon na a tempel

471Baka dati a man tyari mi go baka na a doromofo fu a oso fu Masra. We, mi si watra drape di ben e lon kmopo ondrosei fu a stupu. A ben e bigin lon na zuidsei fu a oso fu Masra, a ben e psa sei a altari, psa tapu a tempel dyari go na oostsei. 2A man tyari mi waka na a doro fu noordsei tyari go na dorosei fu a tempeldyari pe wi beni go na a doro fu oostsei. We, mi si a watra drape e lon na zuidsei fu a doro dati. 3Dan a man waka go na oostsei, èn nanga a markitiki fu en a marki feifi hondro meter go ini watra. Dan a taigi mi fu waka ini a watra go pe a ben marki. A watra drape ben doro na den enkel fu mi. 4A man marki feifi hondro meter go moro fara dan a taigi mi fu psa ini a watra go drape. A watra drape doro na den kindi fu mi. A man marki ete feifi hondro meter èn a meki mi psa ini a watra go drape tu. A watra drape doro now te na mi bere. 5Dan a man marki ete feifi hondro meter. Ma a watra ben kon tron wan liba now pe mi no ben wan waka moro. A ben kon so hei dati na swen nomo sma ben kan swen psa drape. 6Ne a man taigi mi taki: “Manpikin fu libisma, luku bun san yu si.” Dan a meki mi waka na a syoro go baka na en. 7Di mi doro na en, we, mi si bun furu bon na den syoro fu a liba.

8Dan a man taigi mi taki: “A watra disi e lon psa na oostsei go na a bigi lagi presi fu a Yordanliba. Fu drape a e fadon go ini a Dede Se. Èn te a lon go ini a se a e meki a sowtu watra fu en kon gesontu. 9Bun furu fu ala sortu libi sani nanga fisi o de ala presi pe a watra disi e lon go, bika a o tyari libi nanga bun krin watra gi a Dede Se. 10Sma sa tnapu na a syoro fu a se e fanga fisi, fu Engedi go te na En-Eglaim, èn presi o lai drape pe den e drei den net fu den. Bun furu fu ala sortu fisi o lai ini a se dati, neleki fa den lai ini a Bigi Se. 11Ma den kriki nanga den tra presi pe a watra fu a se e go sidon no o gesontu. Den o tan sowtu fu sma kan kebroiki a sowtu fu den. 12Ala sortu froktubon o gro na den tu syoro fu a liba. Den wiwiri fu den no o flaw èn froktu no o kba na den, ma den o tyari froktu ala mun. Dati o de so fu di a watra e kmopo fu a santa presi. Den froktu fu den bon o bun fu nyan èn den wiwiri fu den o bun leki dresi.”

Den kbapisi fu a kondre

13Na disi Masra MASRA e taki: Na so den kbapisi mus waka fu a kondre di un o prati gi den twarfu lo fu Israel gi densrefi. A lo fu Yosef mus kisi tu pisi. 14Un kisi en gi unsrefi, iniwan fu unu, a kondre di Mi ben pramisi den afo fu unu nanga wan sweri. A kondre sa de fu unu.

15Disi na den kbapisi fu a kondre na noordsei: A e waka fu a Bigi Se langalanga psa Hetlon te go miti Sedad. 16Dan a e hari psa Hamat, Berota nanga Sibriam, di didon mindri den kontren fu Damaskus nanga Hamat, go miti Kaser-Hatikon na a kbapisi fu Hauran. 17Sobun a kbapisi e waka fu a se go na Kasar-Enon. Noordsei fu en na den kontren fu Damaskus nanga Hamat. Dati na a kbapisi fu a kondre na noordsei.

18A kbapisi fu oostsei e waka mindri Hauran nanga Damaskus, mindri Gilead nanga Israel, langalanga psa na a Yordanliba go te na a Dede Se krosbei fu a foto Tamar.47:18 A Hebrewtekst fu a pisi disi no krin. Dati na a kbapisi fu a kondre na oostsei.

19A kbapisi fu zuidsei e waka fu Tamar te go miti den watra fu Meribat-Kades, psa na a kriki, èn go doro na a Bigi Se. Dati na a kbapisi fu zuidsei.

20A kbapisi fu westsei e waka fu a Bigi Se go te pe a pasi go na Hamat e bigin. Dati na a kbapisi fu westsei.

21Na a kondre disi un leki den twarfu lo fu Israel mus prati nanga makandra. 22Dan te un o fringi a lot fu sori suma o kisi pe, un no mus fergiti den doroseisma di e libi èn di kisi pikin na un mindri. Un mus si den leki den gebore leki Israelitisma. Neleki unu den mus kisi gron tu pe den difrenti lo e kisi. 23Na a lo pe den leki doroseisma e libi den sa kisi wan pisi gi densrefi, Masra MASRA e taki.

48

A pisi fu a kondre di den lo fu noordsei kisi

481-7Iniwan fu den lo di nen un o kari dyaso o kisi wan pisi fu a kondre di e waka fu a kbapisi fu oostsei go na a Bigi Se. A kbapisi na noordsei e waka psa den foto Hetlon nanga Lebo-Hamat, èn a e tapu na Hasar-Enon, di na a kbapisi di de mindri den bigi foto Damaskus nanga Hamat. Den lo di o kisi wan pisi fu a kondre, a wan sei a trawan, fu noordsei go na zuidsei, na: A lo fu Dan, a lo fu Aser, a lo fu Naftali, a lo fu Manase, a lo fu Efraim, a lo fu Ruben nanga a lo fu Yuda.

A pisi fu Masra

8A pisi di un mus hori aparti de sei a pisi fu a lo fu Yuda, fu oostsei go na westsei. A pisi dati bradi twarfu nanga afu kilometer èn a langa leki den tra pisi di e waka fu oostsei go na westsei. A santa presi sa de leti na mindrisei fu a pisi dati. 9A pisi di un mus gi MASRA langa twarfu nanga afu kilometer èn a bradi tin kilometer. 10A santa pisi dati na fu den grupu sma disi: Den priester. Na noordsei a pisi fu den sa langa twarfu nanga afu kilometer, na westsei a sa bradi feifi kilometer, na oostsei a sa bradi feifi kilometer, èn na zuidsei a sa langa twarfu nanga afu kilometer. A santa presi fu MASRA sa de leti na mindrisei fu a pisi disi. 11A santa pisi sa de gi den priester, den wan fu a famiri fu Sadok, di tan du a wroko ini a santa presi. Den wan di no gwe libi Mi, leki fa den Lefitisma ben du, a ten di den Israelitisma ben gwe libi Mi. 12Inisei fu a pisi di un gi den e kisi wan pisi di santa srefsrefi. A de sei a di fu den Lefitisma.

13Den Lefitisma e kisi wan pisi leti sei a di fu den priester èn a bigi a srefi. Fu oostsei go na westsei a langa twarfu nanga afu kilometer, èn fu noordsei go na zuidsei a bradi feifi kilometer. Sobun a heri pisi langa twarfu nanga afu kilometer èn a bradi feifi kilometer. 14Den no abi primisi fu seri noso kenki no wan pisi fu a kondre. Na a moro bun pisi fu a kondre èn na Mi abi en.

15San libi fu a pisi dati, wan pisi di langa twarfu nanga afu kilometer èn di bradi dri kilometer, no santa. A pisi dati na fu meki a foto Yerusalem gi Israelitisma fu den libi, èn gi weigron. A foto sa de leti mindri fu a pisi dati. 16A foto sa de wan fokanti: noordsei sa de tu kilometer, zuidsei tu kilometer, oostsei tu kilometer, nanga westsei tu kilometer. 17A foto mus abi wan pranigron na en lontu di mus bradi wan hondro tutenti-na-feifi meter. 18Den pisi di e libi na oostsei nanga westsei, èn di kbapisi de na a santa pisi, langa feifi kilometer. Den sa de pranigron gi den sma di e wroko ini a foto. 19Na den sma fu ala den lo fu Israel di e wroko ini a foto sa wroko a pranigron disi. 20A heri kontren di un gi Mi, makandra nanga a pisi fu a foto, sa de wan fokanti èn iniwan fu den sei sa langa twarfu nanga afu kilometer.

21A pisi di o libi na ala den tu sei fu a pisi di un gi Mi, nanga a pisi fu a foto na fu a tiriman: na oostsei nanga na westsei a pisi dati bradi twarfu nanga afu kilometer èn a e waka makandra nanga den kontren fu den lo. A santa pisi nanga a oso fu Masra sa de na mindrisei fu en. 22Boiti a eigi gron fu den Lefitisma nanga a eigi gron fu a foto, di de leti mindrisei fu a kontren fu a tiriman, ala a gron mindrisei fu a kontren fu a lo fu Yuda nanga fu a lo fu Benyamin, na fu a tiriman.

A pisi fu a kondre di den lo fu zuidsei kisi

23-27A pisi fu a kondre gi den tra lo fu Israel sa de zuidsei fu a pisi di un gi Mi. Iniwan fu den lo dati sa kisi wan pisi fu a kondre di e waka fu a kbapisi na oostsei fu Israel go na Bigi Se na westsei. Den lo di o kisi den pisi fu a kondre, a wan sei a trawan, fu noordsei go na zuidsei, na: a lo fu Benyamin, a lo fu Simeon, a lo fu Isakar, a lo fu Sebulon nanga a lo fu Gad. 28A kbapisi fu a kontren fu a lo fu Gad na owktu a kbapisi fu a heri kondre. A o bigin na a foto Tamar, dan a o go na zuidwestsei na den watrabron krosbei fu Meribat-Kades, fu drape a o psa sei a kriki na a kbapisi nanga Egipte, fu kon doro na a Bigi Se. 29Disi na a kondre di un mus prati mindri den lo fu Israel. Un mus meki a lot sori un suma mus kisi pe, Masra MASRA e taki.

Den bigi doro fu Yerusalem

30-34A foto Yerusalem sa abi twarfu doro, dri na ibriwan fu den fo sei fu a skotu. Den twarfu doro disi sa nen leki fa den twarfu lo fu Israel nen. Den doro di e tyari den nen fu Ruben, Yuda nanga Lefi, sa de na a noordsei. Den di e tyari den nen fu Yosef, Benyamin nanga Dan sa de na oostsei. Den di e tyari den nen fu Simeon, Isakar nanga Sebulon sa de na zuidsei. Nanga den di e tyari de nen fu Gad, Aser nanga Naftali sa de na westsei. Iniwan fu den fo sei fu a skotu fu a foto sa langa tu kilometer,

35A heri skotu langa aiti kilometer.

A nyun nen fu a foto sa de: MASRA de drape.