Sranan Tongo Bible 2016 (STB16)
7

A kba gi Israel

71MASRA taki nanga mi, A taigi mi taki: 2“Manpikin fu libisma, na disi Masra MASRA e taigi Israel:

A o kba gi yu! A o kba gi noordsei, gi zuidsei, gi westsei nanga gi oostsei!

3A o kba gi yu now.

Mi o lusu a faya atibron fu Mi

na yu tapu,

Mi o strafu yu fu a fasi fa yu tyari yusrefi,

Mi o meki yu pai fu den groskin sani di yu du.

4Mi no o sori sari-ati,

Mi no o sari no wan sma.

Yu o pai fu a fasi fa yu tyari yusrefi,

den groskin sani di yu du

o drai kon tapu yu eigi ede.

Dan un o sabi dati Mi na MASRA.

5Na disi Masra MASRA e taki:

Iya a e kon!

A wan bigi ogri baka a trawan.

6A o kba gi yu!

Disi na a kba fu yu!

A opo kba fu kon na yu.

Luku, a e kon!

7Sma fu a kondre,

a bigi ogri e kon na un tapu.

A ten doro, a dei doro.

Prisiri babari no de fu yere moro

na tapu den bergi.

Soso bruya.

8Her'esi Mi o lusu a hebi atibron fu Mi na un tapu.

A faya atibron fu Mi o kon na un tapu

nanga ala en krakti.

Mi o strafu un fu a fasi fa un tyari unsrefi,

Mi o meki un pai fu ala den groskin sani di un du.

9Mi no o sori sari-ati,

Mi no o sari no wan sma.

Mi o meki un pai fu a fasi fa un tyari unsrefi,

èn den groskin sani di un du o drai kon tapu un eigi ede.

Dan un o sabi dati na Mi, MASRA, e fon unu.

10Luku, a dei! Luku, a dei e kon!

A bigi ogri doro!

Wan taki e sproiti,

a bromki fu en nen heimemre.

11Sma e du sani nanga tranga,

moro nanga moro, a ogri e rigeri.

Ma no wan fu den o tan na libi.

Noti o de fu yere fu a babari di den ben meki,

noti fu a rigeri di den ben rigeri.

Wan kba e kon na a prodo di den ben prodo.

12A ten e kon! A dei e doro!

A sma di e bai no abi fu prisiri,

a sma di e seri no abi fu sari,

bika a faya atibron fu Mi o kon tapu den alamala.

13Awinsi ala tu ben o tan na libi,

a wan di seri noiti o kisi a sani baka di a seri.

Mi no o teki baka san Mi ben taki dati o psa nanga a kondre.

No wan sma di e prisiri nanga kruktudu o tan na libi.

14Un kan bro a trompet,

un kan meki ala sani klari gi a feti.

Ma sma no de fu hari go feti,

bika a faya atibron fu Mi de tapu a heri kondre.

15Feti e feti na dorosei fu a foto,

takrusiki nanga angri e rigeri inisei fu en.

A deigri o kiri den di de ini a wei,

èn angri nanga a takrusiki o kiri den di de ini a foto.

16Den di man kmopo o lowe go na den bergi

èn dyeme drape fu den eigi kruktudu,

leki doifi di ben abi fu frei es'esi kmoto ini a dal.

17Frede o meki ala anu anga

èn a o meki den pisi nati den skin.

18Den o weri lowkrosi

èn den o piri den ede.

Frede o meki den heri skin beifi,

èn den o syen sote.

19Den o trowe a solfru fu den na tapu strati,

a gowtu fu den o tron wan groskin sani gi den.

A solfru nanga a gowtu fu den,

den no o man ferlusu den tapu a dei fu a faya atibron fu MASRA,

den no o man bai nyanyan srefi nanga den

den no o man furu den bere nanga en.

bika na a solfru nanga a gowtu fu den meki den e sondu.

20Den teki a moi gowtu nanga a solfru nanga san den e prodo so,

dan den meki den groskin kruktu gado,

den takrusani fu den.

Mi o meki den si den srefi sani dati leki groskin sani now.

21Mi o meki doroseisma kon teki den sani tyari gwe,

den ogri-ati sma fu grontapu o kon fufuru den tyari gwe,

èn den o doti den.

22Mi e drai Mi fesi gi a pipel fu Mi,

èn sma di e du sani nanga tranga o pori a presi fu Mi di Mi lobi sote

Den e broko go na ini èn den o pori en.

23Meki keti klari!

Bika a kondre lai nanga brudu,

a foto furu nanga ogri.

24Mi o meki den moro ogri-ati folku hari kon ini a kondre,

den o teki den oso fu un abra.

Mi o tyari wan kba kon na a heimemre fu den di abi makti,

èn Mi o pori den santa presi fu den.

25Den o frede te fu dede,

dan den o suku freide, ma den no o feni en.

26A wan bigi ogri baka a trawan.

A wan takru boskopu baka a trawan.

Den e angri sote fu Gado sori wan profeiti wan sani,

den priester no man gi den leri moro,

den fesiman no man gi den rai moro.

27A kownu fu den sa weri lowkrosi,

den man di e yepi en tiri a kondre sa skreki sote.

Skreki nomo o meki den sma fu a kondre tnapu leki den lan.

Mi o strafu den na a fasi fa den tyari densrefi,

fu den sani di den du.

Dan den o sabi dati na Mi na MASRA.”