Sranan Tongo Bible 2016 (STB16)
9

Esra yere tak' den Israelitisma pori sani

91Baka dati den edeman fu a pipel kon na mi. Den taigi mi taki: “A pipel fu Israel, den priester nanga den Lefitiman, no hori densrefi aparti fu den tra folku di e libi ini a kondre. Den e du den groskin sani tu fu den Kananitisma, den Hetitisma, den Perisitisma, den Yebusitisma, den Amonitisma, den Moabitisma, den sma fu Egipte nanga den Amoritisma. 2A de so tak' den man teki uma fu den folku dati gi densrefi nanga gi den manpikin fu den. Dan so a santa pipel kon moksi nanga den tra folku dati. Den edeman nanga den tiriman e waka na fesi ini a sondu dati.”

3Di mi yere a sani dati, mi priti mi krosi nanga a langa dyakti di mi ben e weri na en tapu, mi hari den wiwiri puru na mi ede nanga mi barba, dan mi saka sidon. Mi no ben sabi srefsrefi san fu du. 4Dan ala den sma kon na mi di ben frede den sani di a Gado fu Israel ben taki tak' A o du nanga a sondu di den sma du di drai kon baka fu pe den feyanti fu den ben tyari den go nanga tranga. Ma mi tan sidon sondro fu sabi san mi ben mus du te kon miti a yuru fu a neti ofrandi. 5Di a yuru fu a neti ofrandi doro, mi opo, èn mi tapu nanga a saka di mi ben e saka misrefi fesi Gado. Dan so, nanga den priti krosi fu mi, mi fadon go na tapu mi kindi èn mi langa mi anu go na MASRA, a Gado fu mi. 6Mi taki: “Mi Gado, mi e syen èn mi no abi a dek'ati fu opo mi ai luku Yu. Mi Gado, den kruktudu fu wi furu psa marki èn den sondu fu wi doro te na heimel. 7Sensi a ten fu den afo fu wi te kon miti tide, wi du furu sondu. Fu den kruktudu fu wi ede Yu gi wi, den kownu nanga den priester fu wi, abra ini a makti fu den kownu fu tratra kondre. Yu meki den kiri wi na ini feti èn grabu wi tyari gwe. Yu meki den fufuru ala wi sani tyari gwe tu èn Yu poti wi leki spot'popki, leki fa wi de now. 8Ma no langa di psa, MASRA, a Gado fu wi, sori wi a bunfasi fu En. A meki wantu sma fu a pipel fu wi kmoto ini a pina pe wi ben de èn gi wi wan presi pe wi kan libi sondro frede ini a santa presi fu En. A Gado fu wi gi wi howpu nanga dek'ati baka ini a katibo ini san wi de. 9Bika wi na srafu, ma Gado no gwe libi wi ini wi katibo. A meki den kownu fu Persia sori wi a bunfasi fu den. A meki den gi wi dek'ati fu wi kan meki a oso fu a Gado fu wi, di ben broko fadon, tnapu baka. Den ben de leki wan skotu gi wi tu ini Yuda nanga Yerusalem. 10Ma now, Gado fu wi, san wi kan taki, baka di Yu du den sani dati gi wi? Soso dati wi no hori wisrefi moro na den gebod fu Yu, 11den gebod di Yu ben meki den knekti fu Yu, den profeiti, gi wi nanga den wortu disi: ‘A kondre pe wi e hari go fu teki abra, na wan doti kondre. Den folku di e libi drape doti en nanga den groskin sani fu den. Den doti a heri kondre, fu a wan sei go na a tra sei, nanga a doti libi fu den. 12Dat' meki wi no mus meki den umapikin fu wi trow nanga den manpikin fu den, èn wi no mus meki den umapikin fu den trow nanga den manpikin fu wi. Noiti wi mus du wan sani fu yepi den fu sani go bun nanga den. Dan wi o kon tranga èn nyan a bun fu a kondre, di wi o man libi na baka leki wan têgo gudu gi den pikin fu wi.’ 13Ala den sani di miti wi na a bakapisi fu den takrudu nanga den bigi sondu fu wi. Ma Gado fu wi, Yu no gi wi a strafu di wi ben fiti fu kisi èn Yu sorgu taki someni fu wi kmopo fu pe wi ben de. 14Dan fa a kan dan tak' wi e broko den gebod fu Yu agen fu meki den manpikin nanga den umapikin fu wi trow nanga sma fu den groskin folku dati? Na wan sani fu meki Yu kisi sowan atibron na wi tapu taki Yu kan kiri un alamala. No wan fu wi ben o man tan na libi, no wan fu wi ben o man kmopo fu pe wi ben de. 15MASRA, Gado fu Israel, Yu e krutu sani na tapu wan leti fasi. Bika Yu meki wi ala di ben kan kmopo fu pe wi ben de, tan na libi, te tide. Luku, wi tnapu na Yu fesi nanga wi sondu. Ma fu taki leti, no wan fu wi abi a leti fu tnapu so na Yu fesi.”