Sranan Tongo Bible 2016 (STB16)
3

A wèt noso a bribi

31Ai baya, un sma fu Galasia. Fa un don so? A gersi leki na wan sma wisi unu. Mi ben sori un krinkrin taki Yesus Kristus dede na a kroisi! 2Na wan enkri sani mi wani aksi unu. Fa un du kisi a Yeye? Na fu di un du san a wèt e taki, noso na fu di un yere a boskopu, dan un bribi en? 3Fa un don so! Fa un kan bigin nanga a Yeye dan un wani kba na ini un eigi krakti? 4Ala den sani san ben miti unu, na fu soso den psa? Mi no wani bribi dati! 5Gado e gi unu En Yeye, èn A e du bigi sani na un mindri. Un taigi mi efu A e du dati fu di un e du san a wèt e taki, noso fu di un e yere a boskopu, dan un bribi en.

6Meki un luku Abraham. A ben bribi san Gado taki èn fu dat'ede Gado si en leki wan sma di bun ini En ai.

3:6
Gen 15:6
Rom 4:3
7Na so un e si taki den sma di e bribi, na bakapikin fu Abraham.
3:7
Rom 4:16
8A Santa Buku ben sori na fesi kba taki Gado e meki den sma di no de Dyu kon bun nanga En te den bribi. Dat' meki A ben gi Abraham a bun nyunsu taki: “Ini yu Mi o blesi ala folku.”
3:8
Gen 12:3
9So ala sma di e bribi leki fa Abraham ben e bribi, e teki prati na ini a blesi. 10A fluku fu Gado de tapu ala sma di e ferwakti tak' den o kon bun nanga Gado fu di den e hori a wèt. Bika a skrifi taki: “Wan fluku de tapu ala sma di no e du ala sani soleki fa a skrifi ini a buku fu a wèt.”
3:10
Deu 27:26
11So a de krin taki no wan sma e kon bun ini Gado ai fu di a e hori a wèt. Bika: “A sma di bun ini Gado ai, sa libi fu di a bribi.”3:11 Un kan puru a pisi disi so tu: A sma di bun ini Gado ai fu di a bribi, sa libi.
3:11
Hab 2:4
12Ma ini a wèt a no e go nanga bribi, bika: “A sma di du san a wèt e taki, o feni a libi.”
3:12
Lev 18:5
13Ma Kristus bai wi fri fu a fluku fu a wèt. Di A anga na a kroisi A teki a fluku dati na En tapu, bika a skrifi taki: “Wan fluku de tapu iniwan sma di e anga na wan postu.”
3:13
Deu 21:23
14Tapu a fasi disi den sma di no de Dyu kan teki prati ini a blesi fu Abraham, fu di den de wan nanga Kristus Yesus. Dan so wi kisi a Yeye tu san Gado ben pramisi fu di wi e bribi.

A wèt noso a pramisi

15Brada nanga sisa, mi o gi unu wan eksempre fu a aladei libi. Te wan sma meki wan testamenti3:15 A wortu disi wani taki ferbontu tu. dan a poti en stampu tak' a e agri, dan no wan sma no kan taki tak' a no e teri moro noso skrifi wan tra sani poti na ini. 16We, now a de so taki Gado ben gi Abraham nanga wan fu den bakapikin fu en wantu pramisi. Arki bun. A wortu no taki “den bakapikin,” sobun moro leki wan, ma a taki “wan fu den bakapikin,” dati na wan enkri wan nomo. Èn a bakapikin dati na Kristus. 17San mi wani sori unu na disi: Gado meki wan ferbontu, dan A poti En stampu na en tapu. So a wèt di kon fo hondro nanga dritenti yari baka dati, no kan broko a ferbontu fu meki san Gado ben pramisi no teri moro.

3:17
Eks 12:40
18Efu a wèt ben man gi unu den blesi, dan a pramisi no ben de fanowdu. Ma na a pramisi meki taki Gado gi Abraham den blesi.
3:18
Rom 4:14

19Dan fu sanede a wèt ben de fanowdu dan? Gado gi a wèt bakaten fu a kon krin gi wi taki wi e sondu. A wèt ben o de gi wan pisten te leki a bakapikin kon di ben kisi a pramisi fu Gado. Den engel ben poti a wèt ini anu fu wan mindriman fu gi a folku. 20A mindriman no e taki gi wan sma nomo. Ma Gado na wan. 21Un sa man taki dan taki a wèt no e kruderi nanga den pramisi fu Gado? Nono, kwet'kweti! Bika efu Gado ben gi wan wèt di ben kan gi sma a libi, dan a ben o de so tu taki a sma di hori a wèt ben o kon bun ini Gado ai. 22Ma a Santa Buku e sori taki ala sma de ini a katibo fu sondu. So a wan enkri fasi fu kisi a pramisi fu Gado, na fu bribi na ini Yesus Kristus.3:22 Un kan puru a pisi disi so tu: Ma fu di Kristus de fu fertrow meki wi o kisi den pramisi. 23Ma fosi a ten ben kon pe un ben kan bribi ini Yesus Kristus, wi ben de leki straf'man. A wèt ben hori ai na wi tapu, te leki a ten fu a bribi ben o kon na krin. 24So a wèt ben mus luku wi èn gi wi leri te leki Kristus kon, fu wi sa kon bun ini Gado ai te wi e bribi. 25Ma now di wi e bribi, wi no abi a wèt fanowdu moro fu luku wi èn gi wi leri. 26Bika un alamala na pikin fu Gado, fu di un kon bribi na ini Kristus Yesus. 27Bika di un teki dopu ini Kristus nen, un alamala weri Kristus leki wan krosi. 28A no abi trobi efu yu na wan Dyusma, noso efu yu a no wan Dyusma, efu yu na wan srafu efu noso wan fri sma, efu yu na man noso uma. Bika un alamala de wan na ini Kristus Yesus. 29We, efu unu na fu Kristus, dan unu na bakapikin fu Abraham. Dan un o teki prati na ini ala den sani san Gado ben pramisi Abraham.

3:29
Rom 4:13

4

Unu na pikin fu Gado

41Un mus si a sani so. Solanga a sma pikin ete di o kisi ala den gudu fu en p'pa, a no betre moro wan srafu, awinsi na en o abi ala sani. 2Solanga a ten no doro san a p'pa ben poti, dan na sma e sorgu gi en, èn na sma e luku den gudu fu en. 3Na so a ben de nanga wi tu. Wi ben de leki pikin, èn wi ben mus fu libi soleki fa den gronprakseri fu grontapu de.4:3 A wortu san puru dya nanga gronprakseri fu grontapu, un kan puru tu nanga den yeye fu grontapu. 4Ma di a ten kon lepi, Gado seni En Manpikin kon. Wan uma meki en, èn A ben mus libi leki fa a wèt e taki. 5So A ben kan bai den sma fri di ben mus fu du san a wèt e taki. A du dati fu Gado ben kan teki wi leki En eigi pikin.

4:5-7
Rom 8:15-17
6Dan fu sori taki unu na En pikin, meki Gado seni a Yeye fu En Manpikin kon tan na ini wi ati. Èn a Yeye e kari: “Abba,4:6 Abba wani taki Papa ini Arameestongo. Papa!” 7So unu no de srafu moro, ma unu na pikin. Èn fu di unu na pikin, Gado sa gi unu san A abi gi En pikin.

Paulus broko en ede nanga den sma fu Galasia

8A pisten di un no ben sabi Gado, un ben de srafu fu den gado di no de gado srefsrefi. 9Ma now un kon leri sabi Gado. Nono, a moro bun fu mi taki tak' Gado kon sabi unu. Dan fa un kan drai go baka na den swaki pôti gronprakseri fu grontapu, fu tron srafu fu den baka? 10Un e hori unsrefi na spesrutu dei nanga mun, sosrefi spesrutu ten nanga yari. 11We, mi frede gi unu taki na fu soso mi ben meki someni muiti nanga unu.

12Brada nanga sisa, mi e begi unu fu un kon de leki mi, bika mi kon de leki unu. Na ini no wan fasi un du kruktu nanga mi. 13Un srefi sabi taki na fu di mi ben siki, meki mi ben kon na unu a fosi leisi di mi tyari a bun nyunsu gi unu. 14Ma aladi a siki fu mi ben kan tyari unu ini a tesi fu si mi leki noti, noso fu un drai baka gi mi, toku un no du dati. Ma un teki mi leki wan engel fu Gado. Iya, mi kan taki tak' un ben teki mi neleki mi na Kristus Yesus srefi. 15Un ben prisiri srefsrefi. Ma pe a prisiri dati de now? Mi kan taki fu unu tak' efu un ben man, un ben o diki un eigi ai puru fu gi mi. 16Ma now a gersi leki mi na wan feyanti fu unu, fu di mi taigi unu san na tru. 17Den tra man e du ala muiti fu kisi unu na den sei. Ma den no abi bun prakseri, bika den wani prati wi nanga unu, fu un kan du ala muiti gi den. 18A bun fu meki ala muiti fu du bun, ma un mus du en ala ten. Un no mus du en soso te mi de na unu. 19Mi lobi pikin, leki fa a tranga gi wan m'ma te a e meki wan pikin, na so mi de ini a srefi pen agen fu unu ede, te leki Kristus sa kisi a yoisti presi na ini un libi. 20Mi e winsi taki nownow mi ben kan de nanga unu, èn tak' mi ben kan taki wan tra fasi nanga unu. Bika mi no sabi san fu du nanga unu.

Hagar nanga Sara

21Un taigi mi, un di wani de nomonomo ondro a wèt: Un no e arki dan san a wèt e taki? 22A skrifi taki Abraham ben kisi tu manpikin. A wan a ben kisi nanga en srafu, èn a trawan a kisi nanga en uma, a fri uma.

4:22 a
Gen 16:15
23Ma a pikin di a kisi nanga en srafu, a kisi fu di ensrefi ben wani kisi en. Ma a pikin di a kisi nanga a fri uma, a kisi en fu di Gado ben pramisi en dati. 24A heri tori disi dipi. Den tu uma e taki fu den tu ferbontu san Gado meki. A wan e taki fu a bergi Sinai. Dati na Hagar di e meki pikin di e tron srafu. 25So Hagar e taki fu a bergi Sinai ini Arabia. A e taki tu fu a Yerusalem fu tide, bika Yerusalem nanga den sma fu en na srafu. 26Ma a fri uma e taki fu a Yerusalem na heimel. A foto dati fri, èn na en na wi m'ma. 27Bika a skrifi taki: “Uma, yu di no man kisi pikin, yu mus prisiri. Yu mus bari fu prisiri, yu di no ben sabi san na a bere-ati dati. Bika a wan di de en wawan, sa abi moro pikin leki a wan di abi masra.”
4:27
Yes 54:1
28Brada nanga sisa, neleki Isak, unu srefi na pikin fu a pramisi fu Gado. 29Neleki fa a pikin di ben gebore nanga libisma wani, ben trobi a wan di ben gebore nanga a wani fu a Yeye, na so a de tide tu. 30Ma a skrifi na ini a Santa Buku taki: “Yu mus seni a umasrafu nanga en manpikin gwe. Bika a manpikin fu a umasrafu no sa teki prati na ini den gudu, ma soso a manpikin fu a fri uma.”
4:29-30
Gen 21:9-10
31So brada nanga sisa, wi a no pikin fu a umasrafu, ma fu a fri uma.

5

Kristus meki wi kon fri

51Kristus meki wi fri, fu wi de fri fu tru. So un mus tnapu tranga. No meki no wan sma poti un ini katibo baka leki srafu. 2Luku, mi Paulus e taigi un taki: Efu un meki den besnei unu, dan Kristus no sa abi no wan warti moro gi unu. 3Wantron moro mi e taigi ala sma di wani fu besnei taki den o abi fu du ala sani san a wèt e taki. 4Efu un e hori a wèt fu kan kon bun ini Gado ai, dan na broko un broko nanga Kristus. Dan Gado no man sori unu En bun-ati. 5Ma nanga bribi wi e ferwakti taki nanga a yepi fu a Santa Yeye, wi o kisi san wi e howpu fu kisi: wi o kon bun ini Gado ai. 6Bika efu wi de wan nanga Kristus Yesus, a no e teri efu wi besnei noso efu wi no besnei. Ma san e teri na bribi, di de fu si ini a lobi san wi e sori trawan.

7Un ben de bunbun na tapu a pasi. Suma hori unu, meki un no e du moro san a tru leri e taki? 8A no Gado meki un kenki prakseri, bika na En kari unu. 9Leki fa a odo e taki: “Pikinso dyesi sari kba fu meki a heri blon sweri.”

5:9
1Kor 5:6
10Èn mi abi a fertrow taki fu di wi de wan nanga Masra, un abi a srefi denki leki mi. Ma a sma di e bruya unu, o kisi en strafu, awinsi suma na en. 11Brada nanga sisa, sma e feni taki mi e leri ete taki wan sma mus besnei. Ma efu a de so, dan fu sanede den de na mi baka fu du mi ogri dan? Bika efu mi e leri dati ete, dan no wan sma no ben o abi problema moro nanga a boskopu fu san Yesus du na a kroisi. 12We, efu den man di e bruya unu wani besnei nomonomo, dan meki den koti a heri sani fu den puru dan!

A tiri fu a Santa Yeye

13Brada nanga sisa, Gado kari unu fu un de fri. Ma un no mus teki a fri disi fu du san a sondufasi fu unu e firi fu du. Ma nanga lobi un mus dini makandra. 14Bika ala sani san a wèt e taki, yu kan poti ini a wortu disi: “Yu mus lobi tra sma soleki fa yu lobi yusrefi.”

5:14
Lev 19:18
15Ma efu un e beti èn priti makandra leki meti, dan un mus luku bun taki un no swari makandra. 16San mi wani taki na disi: Un meki a Yeye tiri unu, èn no du san a sondufasi fu unu e firi fu du. 17Bika den sani san a sondufasi fu un e firi fu du, no e akruderi nanga san a Yeye wani. Èn san a Yeye wani du, no e akruderi nanga san a sondufasi fu unu e firi fu du. Den tu sani disi no e koti nanga densrefi. Dat' meki un no man du san un ben sa wani.
5:17
Rom 7:15-23
18Ma efu yu e meki a Yeye tiri unu, dan un no abi fu du san a wèt e taki. 19Bika un alamala sabi den sani san a sondufasi fu wi e tyari kon na doro. Dati na: gi yusrefi abra na takru lostu, dot'libi, yayolibi, 20afkodrei, tofruwroko, hori sma na feyanti, meki trobi, bigi-ai, èn fu kisi atibron es'esi. Moro fara: fu prakseri yusrefi wawan, fu tyari prati kon mindri sma nanga grupu fu sma, 21dyarusufasi, drungufasi, fu e gi fesa nomo, èn moro fu den sortu sani dati. Fu den sani disi mi e warskow unu, èn mi ben warskow unu kba taki den sma di e du den sortu sani disi, no o man kon ondro a tiri fu Gado. 22Ma a froktu fu a Yeye na lobi, prisirifasi, freide, langa pasensi, switi maniri, bunfasi, èn taki sma kan bow na yu tapu. 23Moro fara safri-ati, èn taki yu man hori yusrefi. No wan wèt e taki tak' den sani disi no bun. 24Bika den sma di de fu Kristus Yesus, spikri a sondufasi fu den na a kroisi makandra nanga den takru lostu fu en nanga den sani san a wani abi. 25Efu a Yeye e meki taki wi e libi, dan wi mus meki a Yeye tiri wi libi. 26Wi no mus meki bigi gi wisrefi, bika tapu a fasi dati un o suku sma mofo èn tyari dyarusu kon tu.