Sranan Tongo Bible 2016 (STB16)
27

271Isak ben kon breni di a kon owru. A kari Esau en fosi boi, dan a taki: “Mi boi.” Esau piki: “Iya, mi e arki.” 2Ne Isak taigi en taki: “Luku, mi kon owru èn mi no sabi oten mi o dede. 3Dat' meki yu mus teki yu ontisani, yu peiri nanga yu bo, dan yu go na busi go sutu wan meti gi mi. 4Bori wan switi nyanyan, leki fa yu sabi taki mi lobi en, dan yu e tyari en gi mi meki mi nyan. Dan te mi nyan mi o blesi yu fosi mi dede.”

5Rebeka ben arki di Isak ben e taki nanga Esau. Di Esau gwe na busi fu go sutu a meti gi en p'pa, 6Rebeka taigi Yakob taki: “Arki, mi yere fa yu p'pa taigi yu brada Esau taki: 7‘yu mus go sutu wan meti gi mi. Bori wan switi nyanyan meki mi nyan. Dan mi o blesi yu na MASRA fesi, fosi mi dede.’ 8Dat' meki yu mus arki san mi e taigi yu, mi boi. 9Go na den meti fu unu, tyari den tu moro bun bokoboko gi mi, dan mi o bori wan switi nyanyan gi yu p'pa, leki fa wi sabi taki a lobi en. 10Dan yu mus tyari en gi en fu a nyan fu a kan blesi yu.” 11Ma Yakob taigi en m'ma taki: “Esau skin lai nanga wiwiri. Mi skin no abi wiwiri. 12Kande p'pa o firifiri mi skin. Dan a o si mi leki wan bedrigiman èn a o fluku mi prefu a blesi mi.” 13En m'ma taigi en taki: “Meki a fluku kon na mi tapu, mi boi. Du san mi taigi yu, go teki den bokoboko kon.” 14So Yakob go teki den bokoboko kon gi en m'ma. Dan en m'ma bori wan switi nyanyan, leki fa a ben sabi taki a p'pa lobi en. 15Rebeka teki den moro bun krosi fu en fosi boi Esau tu, di a ben abi ini oso. Dan a meki Yakob, a yonguwan, weri den. 16Den buba fu den bokoboko a poti abra den anu nanga a neki fu Yakob di no ben abi wiwiri 17Baka dati a gi en boi a switi nyanyan di a ben bori nanga brede.

18Dan Yakob go na en p'pa. A taki: “P'pa.” Isak piki taki: “Iya. Sortu wan fu den boi fu mi na en?” 19Yakob piki en p'pa taki: “Na mi, Esau, yu fosi boi. Mi du san yu ben taigi mi fu du. Opo sidon, dan yu e nyan a bus'meti, fu yu kan blesi mi.” 20Isak piki en boi baka taki: “Mi boi, yu feni a meti sutu esi.” Yakob piki taki: “Na fu di MASRA, a Gado fu yu, meki sani waka bun gi mi.” 21Dan Isak taigi Yakob taki: “Mi boi, kon moro krosbei meki mi fasi yu, fu mi kan sabi trutru efu yu na mi boi Esau.” 22So Yakob go moro krosbei fu en p'pa Isak. Isak fas'fasi en dan a taki: “Na Yakob sten, ma den anu na fu Esau.” 23Isak no ben man sabi taki na Yakob, fu di en anu ben lai wiwiri leki di fu en brada Esau. Ma fu di a ben wan blesi en, meki a aksi en taki: 24“Yu na mi boi Esau, trutru?” Yakob piki: “Iya.” 25Ne Isak taigi en taki: “Tyari a nyanyan kon, fu mi nyan fu a bus'meti fu mi boi, fu mi kan blesi yu.” Yakob tyari a nyanyan gi en, dan Isak nyan. Yakob tyari win gi en tu, èn Isak dringi. 26Baka dati en p'pa Isak taigi en taki: “Kon moro krosbei, mi boi, dan yu e bosi mi.” 27Yakob kon moro krosbei fu en p'pa dan a bosi en. Di Isak smeri en krosi, a blesi en dan a taki:

“Mi boi, yu smeri de leki a grasi,

a grasi di MASRA blesi

28Meki Gado gi yu a dow fu heimel,

nanga den bun gron na grontapu.

Meki A gi yu nyanyan nanga dringi psa marki.

29Folku sa dini yu

kondre sa boigi gi yu.

Yu sa de a edeman fu den brada fu yu

den sa boigi gi yu.

A sma di fluku yu, fluku ensrefi

a sma di blesi yu, e blesi ensrefi tu.”

30Yakob go na dorosei baka di Isak blesi en. Leki fa a go na dorosei, na so Esau drai kon fu onti. 31Esau srefi bori wan switi nyanyan tu. A tyari en go gi en p'pa dan a taigi en taki: “P'pa opo sidon. Nyan fu a bus'meti di mi bori gi yu fu yu kan blesi mi.” 32Ne Isak aksi taki: “Suma na yu?” Esau piki taki: “Na mi, Esau, yu fosi boi.” 33Isak skreki srefsrefi. Dan a aksi taki: “Ma suma ben de a sma dan, di ben sutu bus'meti tyari kon gi mi? Mi nyan ala sani fosi yu doro, dan mi blesi en. Èn a blesi sa tan na en tapu.” 34Di Esau yere san en p'pa taki, a hati en. A bari gi en p'pa taki: “Blesi mi, mi p'pa. Blesi mi tu.” 35Ma Isak piki en taki: “Yu pikinbrada kon tapu wan bedrigi fasi, dan a kisi a blesi di yu ben mus kisi.” 36Ne Esau taki: “Den sma abi leti fu kari en Yakob, bika na di fu tu leisi kba di a bedrigi mi. A teki den leti di mi ben abi leki fosi pikin. Luku, now a teki mi blesi tu.” Dan Esau aksi en p'pa taki: “Yu no abi no wan blesi moro gi mi?” 37Isak piki taki: “Arki, mi poti en leki yu edeman. Ala den brada fu en sa de knekti fu en. Mi gi en nyanyan nanga dringi. San mi o man du gi yu moro, mi boi?” 38Esau aksi en p'pa baka taki: “Mi p'pa na a wan enkri blesi dati nomo yu ben abi? Blesi mi tu mi p'pa, blesi mi tu.” Dan a bari krei. 39Ne Isak taigi en taki:

“Arki, yu san tan farawe fu den bun gron

farawe fu a dow fu heimel.

40Yu libi o de wan libi fu feti,

yu sa de a knekti fu yu brada.

Ma te yu kaka futu,

yu sa broko den keti.”

41Esau ben hori Yakob na ati fu a blesi di en p'pa ben blesi Yakob. A ben e waka nanga a prakseri taki: “No langa moro, dan wi o abi fu low gi p'pa. Ma baka dati mi o kiri Yakob.” 42Di Rebeka kisi fu yere san en fosi boi, Esau, ben wani du, a seni kari a pikinwan, Yakob, dan a taigi en taki: “Arki, yu brada wan kiri yu, soso fu du yu wan sani baka. 43Dat' meki yu mus arki mi, mi boi. Opo, lowe go es'esi na mi brada Laban, na ini Haran. 44Tan wan pisten drape, te leki a atibron fu yu brada saka. 45Te en ati kowru èn a fergiti san yu ben du en, dan mi san kari yu kon. Mi no wani lasi un ala tu tapu a srefi dei.”

46Dan Rebeka taigi Isak taki: “Mi no lobi den Hetiti-uma srefsrefi. Mi bribi taki mi o dede efu Yakob teki wan uma fu a kondre disi tu.”