Sranan Tongo Bible 2016 (STB16)
32

Yakob e frede fu miti Esau

321Yakob teki pasi go moro fara tu. Dan a miti nanga engel fu Gado. 2Di Yakob si den a taki: “Disi na a legre fu Gado” So a kari a presi: Makanaim.32:2 Dati wani taki: tu kampu.

3Dan Yakob seni boskopuman go na fesi na Seir, ini a kontren fu Edom, pe en brada Esau ben e tan. 4A taigi den taki: “Un mus taigi masra Esau: ‘Yu knekti Yakob seni taigi yu taki: Sensi mi gwe mi tan leki wan doroseisma na Laban èn now fosi mi e drai kon baka. 5Now mi abi kaw, buriki, skapu nanga krabita, mansrafu nanga umasrafu. Mi seni taigi yu disi fu yu kan abi prisiri nanga mi.’ ”

6Den boskopuman drai kon baka na Yakob dan den taigi en taki: “wi go na yu brada Esau. A de na pasi kba fu kon miti yu nanga fo hondro man.” 7Dan Yakob bigin frede srefsrefi. A ben kon ini bigi benawtu. A prati den sma, den skapu nanga krabita, den kaw nanga den kameel ini tu grupu. 8A prakseri na ensrefi taki: “Efu Esau kon feti nanga a wan grupu, dan a trawan kan lowe.” 9Ne Yakob taki: “Gado fu mi afo Abraham èn Gado fu mi p'pa Isak. MASRA, yu di taigi mi taki: ‘Drai go baka na yu kondre. Go na yu famiri. Mi sa meki sani go bun nanga yu.’ 10Mi no warti fu ala den bun di yu du gi mi. Yu tan sori yu knekti taki a kan fertrow na yu tapu. Bika nanga mi wakatiki wawan mi ben koti a Yordanliba abra. Now mi abi so furu taki mi kan prati den ini tu kampu. 11Yepi mi fu mi no fadon ini anu fu mi brada Esau, bika mi e frede en. Kande a o kon fu fon mi, den m'ma nanga den pikin. 12Na Yusrefi ben taki: ‘Mi sa meki sani go bun nanga yu. Mi sa gi yu someni bakapikin leki a santi na sekanti. Den o de so furu taki den no o de fu teri.’ ”

13Dan Yakob psa a neti drape. A poti wantu fu den meti di a ben abi leki kado gi en brada Esau. 14A poti tu hondro krabita nanga tutenti bokoboko, tu hondro uma skapu nanga tutenti man skapu, 15dritenti kameel di ben abi pikinwan na bobi ete, fotenti kaw, tin bulu, tutenti umaburiki nanga tin manwan. 16A prati den meti ini grupu, dan a poti den srafu fu en fu luku den. A taigi den taki: “Un bigin go na mi fesi ma un no mus meki den grupu meti waka tumsi krosbei fu makandra.” 17A taigi a srafu di ben o de te na fesi taki: “Te yu miti nanga mi brada Esau dan a aksi yu taki: ‘Suma na yu basi? Pe yu e go? Suma abi den meti di e waka na yu fesi?’ 18Dan yu mus piki: ‘Na fu yu knekti Yakob. Na wan kado di a seni gi masra Esau. Ensrefi de na baka e kon.’ ” 19A taigi a di fu tu, a di fu dri nanga ala den trawan di ben e waka baka den grupu meti taki: “Na disi un mus taigi Esau te un miti en. 20Un mus taigi en taki: ‘Yu knekti Yakob de na baka e kon tu.’ ” Bika Yakob ben prakseri taki: “Kon meki mi bigin seni den meti go na fesi fu meki en bun nanga en. Baka dati mi sa miti nanga en. Kande a sa gi mi pardon.” 21Dan so Yakob seni a kado go na fesi. Ensrefi tan a neti dati ini a kampu.

22Ma neti fu en, Yakob opo, a teki den tu frow, den tu umasrafu nanga den erfu boi fu en, dan a koti a Yabokliba abra pe a watra no ben dipi. 23A meki den koti a liba abra. Ala sani di a ben abi a tyari go na abrasei. 24Yakob wawan tan na baka. Dan wan man feti nanga en te leki dei broko. 25Di a man si taki a no ben man wini Yakob, a naki en na a bigin fu en bowtu pe a skrufu de, meki a kmoto ini a komki. 26Dan a taigi Yakob taki: “Lusu mi meki mi gwe bika dei broko kba.” Ma Yakob taigi en taki: “Mi no o meki yu gwe solanga yu no blesi mi.” 27Dan a man aksi en taki: “Fa yu nen?” Yakob piki: “Yakob.” 28Ne a man taigi en taki: “Den no sa kari yu Yakob moro ma Israel. Bika yu feti nanga Gado, yu feti nanga libisma èn yu wini.” 29Dan Yakob aksi en taki: “Taigi mi fa yu nen.” Ma a man piki en taki: “Fu sanede yu wan sabi fa mi nen?” Dan a man blesi en drape. 30Yakob kari a presi Pniel. A taki: “Mi si Gado ai na ai ma mi no dede.” 31Son ben opo kba di Yakob kmoto fu Penuel. A ben e manki fu di en bowtu ben kmoto ini a komki. 32Fu a sani disi ede den sma fu Israel no e nyan a meti di de tapu a komki fu a bowtu. Bika a man ben naki Yakob na a presi dati.