Sranan Tongo Bible 2016 (STB16)
36

Den bakapikin fu Esau

361Disi na den bakapikin fu Esau di den e kari Edom tu.

2Esau ben trow nanga umasma fu Kanaan. A ben trow nanga Ada a umapikin fu Elon, wan Hetitiman. A ben trow tu nanga Oholibama, a umapikin fu Ana nanga granpikin fu Sibon, wan Hiwitiman. 3Moro fara a ben trow nanga Basemat, a umapikin fu Ismael. Basemat ben de a s'sa fu Nebayot. 4Ada ben kisi wan boi gi Esau di ben nen Elifas. Basemat ben kisi Rehuel gi en. 5Oholibama ben kisi dri boi: Yehus, Yalam nanga Korak. Disi na den manpikin di Esau ben kisi na Kanaan.

6Dan Esau teki den frow, den boi nanga den umapikin fu en. A teki ala den knekti fu en, den meti, nanga ala gudu san a ben abi na Kanaan, dan a gwe go tan na wan tra kondre farawe fu en brada Yakob. 7Den gudu san den ben abi ben furu tumsi fu den tan libi makandra. A kondre pe den ben e libi leki doroseisma ben pikin tumsi fu hori ala den meti fu den. 8Fu dat'ede Esau, di den e kari Edom tu, ben go tan tapu a bergi Seir.

9Disi na den bakapikin fu Esau. En na a afo fu den Edomitisma, di e libi tapu a bergi Seir. 10Disi na den nen fu den pikin fu Esau: Yu ben abi Elifas, a boi di Ada ben kisi gi Esau, nanga Rehuel, a boi di Basemat ben kisi gi en. 11Den manpikin fu Elifas ben de Teman, Omar, Sefo, Gatam nanga Kenas. 12Elifas, a manpikin fu Esau, ben abi ete wan frow di ben nen Timna. Timna ben kisi Amalek. Disi ben de den bakapikin fu Ada, a frow fu Esau. 13Den manpikin fu Rehuel ben de Nakat, Serak, Sama nanga Misa. Disi ben de den bakapikin fu Basemat, a frow fu Esau. 14Disi na den manpikin fu Oholibama, a frow fu Esau. Oholibama ben de a umapikin fu Ana nanga bakapikin fu Sibon. Nanga Oholibama Esau kisi Yehus, Yalam nanga Korak.

15Yu ben abi bakapikin fu Esau di ben de edeman fu lo. Den manpikin fu Elifas, a fosi manpikin fu Esau, di ben de edeman, ben de: Teman, Omar, Sefo, Kenas, 16Korak, Gatam nanga Amalek. Den na den manpikin fu Elifas, a manpikin fu Ada, di ben de edeman ini Edom. 17Disi na den manpikin fu Rehuel, a manpikin fu Esau, di ben de edeman: Nakat, Serak, Sama nanga Misa. Den na den manpikin fu Rehuel, a manpikin fu Basemat, di ben de edeman ini Edom. 18Disi na den manpikin fu Oholibama, a frow fu Esau, di ben de edeman: Yehus, Yalam nanga Korak. Den na den manpikin fu Oholibama, a umapikin fu Ana, di ben de edeman. 19Den na de den bakapikin fu Esau di ben de edeman.

20Disi na den bakapikin fu Seir. Den na den Horitisma di ben e tan ini a kondre. Yu ben abi Lotan, Sobal, Sibon, Ana, 21Dison, Eser nanga Disan. Den ben de den edeman fu den Horitisma, bakapikin fu Seir, di ben e libi ini a kondre Edom. 22Den manpikin fu Lotan ben de Hori nanga Heman. A sisa fu Lotan ben nen Timna. 23Den manpikin fu Sobal ben de: Alwan, Manakat, Ebal, Sefo nanga Onam. 24Den manpikin fu Sibon ben de: Aya nanga Ana. Na Ana ben feni den bron nanga faya watra ini a sabana, di a ben mus hori ai na tapu den buriki fu en p'pa. 25Den pikin fu Ana ben de: Dison nanga Oholibama, di ben de wan umapikin. 26Den manpikin fu Dison ben de: Hemdan, Esban, Yitran nanga Keran. 27Den manpikin fu Eser ben de: Bilhan, Sawan nanga Akan. 28Den manpikin fu Disan ben de: Us nanga Aran.

29Disi ben de den edeman fu den Horitisma: Lotan, Sobal, Sibon, Ana, 30Dison, Eser nanga Disan. Na den ben de den edeman fu den Horitisma ini Seir.

31Disi na den kownu di ben e rigeri abra Edom. A pisten dati den sma fu Israel no ben abi wan kownu ete. 32Yu ben abi Bela, a manpikin fu Beor. A ben e libi na Dinhaba. 33Di Bela dede, Yobab, a manpikin fu Serak, teki en presi leki kownu. A ben kmoto fu Bosra. 34Di Yobab dede, Husam teki en presi leki kownu. A ben kmoto fu a kondre fu den Temanitisma. 35Di Husam dede, Hadad, a manpikin fu Bedad, teki en presi leki kownu. Hadad ben wini den Midyanitisma na Moab. A ben e libi na Awit. 36Di Hadad dede, Samla fu Masreka teki en presi leki kownu. 37Di Samla dede, Saul fu Rekobot teki en presi leki kownu. Rekobot ben didon na libakanti. 38Di Saul dede, Baal-Hanan, a manpikin fu Akbor, teki en presi leki kownu. 39Di Baal-Hanan, a manpikin fu Akbor dede, Hadar teki en presi leki kownu. Hadar ben e libi na Pau. A frow fu en ben nen Mehetabel. Mehetabel ben de a umapikin fu Matred nanga bakapikin fu Mesahab.

40Den bakapikin fu Esau ben prati na ini difrenti famiri, di ben e libi na difrenti presi. Den famiri nanga den presi pe den ben e libi ben e tyari a nen fu a edeman fu a famiri. Den nen fu den edeman fu den famiri ben de: Timna, Alwa, Yetet, 41Oholibama, Ela, Pinon 42Kenas, Teman, Misbar 43Magdiyel nanga Iram. Disi ben de den edeman fu Edom nanga den presi pe den ben e libi. Esau ben de a afo fu den Edomitisma.

37

Den dren fu Yosef

371Yakob tan libi ini Kanaan, a kondre pe en p'pa ben libi leki wan doroseisma. 2Disi na a tori fa Yakob libi ben lon.

Leki wan yongu boi fu tin-na-seibi yari, Yosef ben gwenti fu hori ai na tapu den skapu makandra nanga den brada fu en. Dati ben de den boi fu Bilha nanga Silpa, den frow fu en p'pa. Ma Yosef ben e ferteri en p'pa fu den takru sani di a yere taki den brada fu en ben e du. 3Israel ben lobi Yosef moro ala den tra boi fu en, fu di a ben grani di a kisi en. Fu dat'ede a ben meki wan moi langa dyakti gi en. 4Ma di den brada fu en kon si taki den p'pa ben lobi en moro den alamala, den no ben lobi en moro èn den no ben man taki switi moro nanga en.

5Dan Yosef dren wan dren. A ferteri den brada fu en a dren, ma dati ben meki taki den no ben wani si en na ai srefsrefi moro. 6Bika a ben taigi den taki: “Un yere san mi dren. 7Mi dren taki wi ben de na gron e tai graan ini bosu kon na wan. Ne a bosu fu mi opo dan a tan tnapu let' opu. Ma dan mi si taki den bosu fu unu kon tnapu lontu a di fu mi dan den boigi gi a bosu fu mi.” 8Ne den brada fu en taigi en taki: “Na tron yu wani tron wi kownu? Na tiri yu wani tiri wi?” A dren fu Yosef nanga den sani di a taki ben meki taki now den brada fu en no ben wani si en na ai kwet'kweti. 9Dan Yosef dren wan tra dren baka. A ferteri den brada fu en a dren. A taigi den taki: “Mi dren wan dren baka. Mi si fa a son, a mun nanga erfu stari boigi gi mi.” 10Di a ferteri en p'pa nanga den brada fu en a sani disi, en p'pa warskow en taki: “San na a dren di yu dren? Yu denki taki mi nanga yu m'ma nanga den brada fu yu o kon boigi gi yu?” 11Den brada fu Yosef ben kon dyarusu na en tapu, ma en p'pa no ben man fergiti den dren.

12Wan leisi den brada fu Yosef ben tyari den skapu fu den p'pa go na wei, krosbei fu Sikem. 13Dan Israel taigi Yosef taki: “Den brada fu yu e wei den skapu na Sikem. Kon, meki mi seni yu go na den.” Yosef piki taki: “Mi sa go.” 14Ne en p'pa taigi en taki: “Go luku fa a e go nanga den brada fu yu, èn fa a e go nanga den skapu, dan yu e kon taigi mi.” Dan a meki Yosef kmoto fu a Hebrondal go na Sikem. 15Di a e waka lontu ini a wei a miti nanga wan man. Dan a man aksi en taki: “San yu e suku?” 16Yosef piki en taki: “Mi e suku den brada fu mi. Yu man taigi mi pe den e wei den skapu?” 17Ne a man taigi en taki: “Den kmoto fu dyaso. Mi yere fa den taki tak': ‘Kon meki wi go na Dotan.’ ” So Yosef gwe na baka den brada fu en, dan a miti nanga den na Dotan.

18Den brada fu en si en fu fara di a e waka kon. Ma fosi a doro den, den meki mofo taki den o kiri en. 19Den taigi makandra taki: “Luku, a bigi drenman e kon. 20Yere, kon meki wi kiri en dan wi e trowe en go ini wan fu den peti. Wi o taki tak' na wan krasi meti priti en. Dan wi sa si san o psa nanga den dren fu en.” 21Di Ruben yere dati, a pruberi fu meki den no du Yosef ogri. A taigi den taki: “Kon meki wi no kiri en.” 22A taigi den tu taki: “Kon wi no meki brudu lon. Un trowe en ini a peti disi, dyaso ini a sabana, ma un no mus kiri en.” Ruben taki so fu di a no ben wani fu den du en ogri, ma a ben wani fu tyari Yosef go baka na en p'pa. 23Fa Yosef doro na den brada fu en, na so den hari a moi langa dyakti di a ben weri puru na en skin. 24Den grabu en, dan den fringi en go ini a peti. A ben de wan drei peti. Watra no ben de na ini.

25Baka dati den go sidon nyan. Di den ben e sidon nyan, den opo den ede luku dan den si wan grupu Ismaelitisma e kon. Den sma disi ben kmoto fu Gilead èn den ben e tyari gom, balsem nanga hars tapu kameel go na Egipte. 26Dan Yuda taigi den brada fu en taki: “Sortu wini wi abi efu wi kiri wi brada dan wi du leki wi no sabi noti fu a dede fu en? 27Kon meki wi seri en gi den Ismaelitisma prefu wi kiri en. Na wi brada, wi eigi brudu.” Dan den tra brada agri nanga Yuda. 28Di den man fu Midyan, di e bai èn seri sani, ben e psa, den hari Yosef kmoto ini a peti, dan den seri en gi tutenti solfru moni gi den Ismaelitiman. Dan den man disi tyari Yosef go na Egipte.

29Di Ruben drai kon baka na a peti, a si taki Yosef no ben de ini a peti moro. Ne a priti en krosi. 30A go na den brada fu en dan a taki: “A boi no drape moro. San mi mus du now?” 31Ne den srakti wan bokoboko, dan den teki a krosi fu Yosef dopu ini a brudu. 32Den seni a moi langa dyakti go gi den p'pa nanga a boskopu taki: “Wi feni a sani disi. Luku efu a no de a krosi fu a boi fu yu.” 33Di Yakob si a krosi a ben sabi taki na dati. Dat' meki a taki: “Na a krosi fu mi boi. Wan krasi meti nyan en. A mus de so taki a priti Yosef.” 34Dan Yakob priti en krosi. A weri rowkrosi dan a row langa gi a boi fu en. 35Ala den manpikin nanga den umapikin fu en ben e pruberi fu trowstu en. Ma Yakob no ben wani fu den trowstu en. A taki: “Kwet' kweti. Mi sa tan row te leki mi dede go na mi boi ini dedekondre.” So Yakob tan krei fu en boi.

36Ma a pisten dati den Midyanitiman ben tyari Yosef go na Egipte dan den seri en gi Potifar. Potifar ben de wan ofisiri, a ben de a edeman fu den waktiman fu Farao.

38

A tori fu Yuda nanga Tamar

381A srefi ten dati Yuda gwe libi den brada fu en, dan a go tan na Hira, wan man fu Adulam. 2Dan Yuda si a umapikin fu Sua, wan man fu Kanaan. Yuda trow nanga en dan a sribi nanga en. 3A uma disi hori bere, dan a meki wan manpikin di a kari Er. 4Baka dati a hori bere baka, dan a kisi ete wan boi di a kari Onan. 5Di Yuda ben de na Kesib, a uma kisi wan manpikin baka di a kari Sela.

6Dan Yuda teki wan frow gi en fosi boi Er, di ben nen Tamar. 7Ma Er, a fosi boi fu Yuda, no ben libi bun ini MASRA ai, dat' meki MASRA kiri en. 8Ne Yuda taigi Onan taki: “Go na yu brada frow. Trow nanga en leki fa a gwenti de, dan yu e meki pikin gi yu brada nanga en.” 9Ma Onan ben sabi taki den pikin di a ben o meki no ben o de fu en. Dat' meki ala leisi te a ben go na bedi nanga a frow fu en brada, a ben e meki en manwatra fadon na gron, soso fu no meki pikin gi en brada. 10Ma a sani disi no ben bun ini MASRA ai, so A kiri en tu. 11Dan Yuda taigi Tamar, a frow fu en manpikin, taki: “Go libi leki wan uma di no abi masra moro na yu p'pa oso, te leki mi boi Sela kon bigi.” Ma Yuda ben e prakseri na ensrefi taki: “Dan a no abi fu dede leki den brada fu en.” So Tamar go tan na en p'pa oso.

12Wan heri pisten baka dati a frow fu Yuda, a umapikin fu Sua dede. Baka di Yuda ben kba row, a go nanga en mati Hira fu Adulam na Timna, pe den man fu en ben e koti a wiwiri fu den skapu. 13Dan Tamar kisi fu yere taki en masra p'pa ben go na Timna fu go koti wiwiri fu den skapu fu en. 14Ne Tamar puru en rowkrosi, dan a tapu en fesi nanga wan duku. A weri so wan fasi taki sma no ben o sabi taki na en, dan a go sidon na a pasi di e go na Timna, pe yu e beni go na Enaim. Bika a ben si taki Sela ben kon bigi, ma den no ben meki a trow nanga en. 15Di Yuda si en, a ben denki taki na wan huru. Bika Tamar ben tapu en fesi. 16Yuda go na en na a sei pasi, dan a aksi en taki: “Mi kan sribi nanga yu?” Ma a no ben sabi taki a ben de a frow fu en manpikin. Dan Tamar aksi taki: “San yu o gi mi te yu sribi nanga mi?” 17Yuda piki taki: “Mi o meki den seni wan pikin bokoboko fu a grupu fu mi gi yu.” Tamar piki baka taki: “Dan yu o abi fu libi wan sani leki panti, te leki yu seni en gi mi.” 18Ne Yuda aksi en taki: “San mi mus gi yu leki panti?” Tamar piki taki: “Yu linga nanga san yu e poti yu marki, a titei na san a linga e anga nanga yu wakatiki.” Yuda gi en den sani, èn a sribi nanga en. Dan Tamar kon hori bere. 19Baka di Yuda sribi nanga en, Tamar opo dan a drai go baka na oso. A puru a duku nanga san a ben tapu en fesi, dan a weri en rowkrosi baka.

20Dan Yuda seni a bokoboko nanga en mati fu Adulam gi a uma, fu a ben kan kisi den sani baka di a ben gi leki panti. Ma en mati no si a uma. 21So a aksi den man fu a presi drape taki: “Pe a uma de di ben sidon na sei a pasi na Enaim?” Den piki en taki: “No wan uma no ben dyaso.” 22Ne a drai go baka na Yuda dan a taigi en taki: “Mi no si a uma. Den man fu a presi taigi mi taki: ‘No wan uma ben dyaso.’ ” 23Yuda piki taki: “Dan meki a hori den fu den no teki un leki spot'popki. Yusrefi si taki mi seni a bokoboko gi en, ma yu no si en.”

24Baka dri mun so den kon taigi Yuda taki: “Tamar, a frow fu yu manpikin, libi wan hurulibi. A uru dan a hori bere.” Ne Yuda taki: “Un tyari en go na dorosei fu a foto, dan un bron en.” 25Ma di den e tyari Tamar gwe, a seni a boskopu gi en masra p'pa taki: “Na fu a man di abi den sani disi mi hori bere.” A taki tu taki: “Yu mus luku a linga, a titei nanga a wakatiki bun. Dan yu o sabi suma abi den.” 26Dan Yuda kon si taki na den sani fu en. Ne a taki: “Mi abi fu gi en leti. Bika mi no meki mi manpikin Sela trow nanga en.” Baka dati Yuda no sribi moro nanga en.

27Di a ten ben doro fu a kisi a pikin, a sori taki na tu pikin ben de ini en bere. 28Di a kisi den pikin, wan fu den sutu en anu kon na doro. Dan a uma di ben e yepi en, hori a anu dan a tai wan redi titei na en. Ne a taki: “Disi na a fosiwan.” 29Ma a pikin ben hari en anu go baka, dan a brada fosi kon na doro. Ne a frow taki: “Nanga krakti yu pusu kon na doro.” So a gi en a nen fu Peres.38:29 Peres wani taki: broko kon na doro. 30Baka dati en brada kon na doro di ben abi a redi titei na en anu. Dan den kari en Serak.