Sranan Tongo Bible 2016 (STB16)
13

Fa bribisma mus libi

131Un mus tan lobi tra bribisma. 2Un no fergiti fu opo un oso gi trawan, bika disi meki taki son sma ben meki engel tan ini den oso sondro fu den sabi.

13:2
Gen 18:1-8
19:1-3
3Un prakseri den sma di de na straf'oso neleki un de na strafu nanga den. Prakseri den sma tu di trawan e pina, neleki den e pina unu tu.

4Ala sma mus lespeki a trowlibi, den no mus go nanga wan tra sma na bedi. Bika Gado o krutu den sma di e gi densrefi abra na takru lostu nanga den sma di e huru. 5Moni no mus de a moro prenspari sani ini un libi. San un abi mus sari gi unu. Bika Gado srefi taki: “Mi no o libi yu noiti èn noiti Mi sa poti yu na wan sei.”

13:5
Deu 31:6,8
Yos 1:5
6Dat' meki wi kan taki sondro frede taki: “Masra na mi Yepiman, mi no e frede. San wan libisma o man du mi?”
13:6
Psa 118:6

7Un no mus fergiti den fesiman fu unu di ben ferteri un a wortu fu Gado. Luku fa den libi te leki den dede, dan un mus bribi leki fa den ben bribi. 8Yesus Kristus na a srefi esde, tide èn fu têgo.

9No meki sma drai un prakseri nanga ala sortu tra leri di un no sabi. A moro bun fu teki krakti ini a bun-ati fu Gado, dan ini den wèt di e leri san wi kan nyan noso san wi no kan nyan. Den sma di ben suku en ini san den e nyan no feni yepi. 10Wi abi wan altari, ma den priester di e du den wroko ini a santa tenti no abi primisi fu nyan fu a altari disi. 11Bika baka te a granpriester e tyari brudu kon ini A Moro santa presi leki ofrandi gi sondu, dan den e tyari a skin fu den meti go bron dorosei fu a foto.

13:11
Lev 16:27
12Fu dat'ede Yesus nyan pina dorosei fu a foto tu, fu A kan meki a pipel kon santa nanga En eigi brudu. 13So, meki wi go na En dorosei fu a foto fu teki prati ini a syen fu En. 14Bika un no abi wan foto dya di e tan fu têgo, ma wi e suku a wan di de fu kon. 15Dat' meki wi mus tan prijse Gado nanga a yepi fu Yesus, meki a de leki wan ofrandi gi En. Wi e du dati te wi e taki nanga wi mofo taki wi e bribi ini En. 16Un no mus fergiti tu fu du trawan bun èn fu prati san un abi nanga den. Bika Gado lobi en te wi e tyari den ofrandi dati.

17Du san den fesiman fu unu e taigi un fu du. Un saka unsrefi gi den, bika den na den sma di e sorgu gi unu, èn na den o abi fu gi frantwortu fu a sani disi. Meki den du den wroko nanga prisiri. Den no mus du en nanga dyeme, bika dati no o tyari no wan wini gi unu.

18Begi gi unu, bika wi sabi taki wi abi wan krin konsensi. Bika ala fasi wi e pruberi fu tyari wisrefi bun. 19Mi e begi unu fu un begi spesrutu taki mi kan drai kon baka moro esi na unu.

Wan begi nanga wantu kriboi wortu

20Gado di e gi freide, ben meki wi Masra Yesus, a bigi Skapuman fu den skapu, opo baka na dede fu di a têgo ferbontu ben stampu nanga En brudu. 21Meki a Gado disi gi unu ala bun sani san un abi fanowdu fu du En wani. Dan A o man du san A wani ini unu nanga a yepi fu Yesus Kristus. Na En mus kisi glori fu têgo èn ala ten. Amen.

22Brada nanga sisa, mi e begi unu fu teki den wortu disi nanga san mi e gi unu dek'ati. Mi skrifi wan syatu brifi nomo gi unu. 23Mi wani taigi unu taki den lusu wi brada Timoteus. Efu a kon es'esi, dan mi nanga en o kon luku unu.

24Taki ala den fesiman fu unu, nanga ala den sma fu Gado, odi gi mi. Den brada nanga sisa fu Italiakondre seni taki un odi. 25Meki a bun-ati fu Gado de nanga unu alamala.